Lûkə 7
7
Yésuwə a pwisí mbwəlâ-a-ndutu n nlú sója ɛ́ baʼ bá Róma.
1Ngə Yésuwə a malíní álí byá misam mínán mísə́sə̌n á baʼ ábə́ bá bílí áwə́, a kǐ á Kapɛ́nahûmə. 2Á nkí mû, mɔ anə̂n a sója ɛ baʼ bá Róma a bílí áwə́, a bílí ɛ janiya mbúki ɛ́ sója. Mbwəlâ-a-ndutu m mɔ nfɔ́ awə̌ a nəŋíní jǐta, a bílí ɛ kfulu jǐta, kə́ŋkə́ŋ á n mə̌ ɛ wútan álí wá. 3Ngə nlú n sója mû n wúkíní pɔ́li ɛ́ Yésuwə, n lúmí bankúmə́ bá nkí álí pɔ̌ŋ Yésuwə nána, a paʼ a pwisí mbwəlâ-a-ndutu m mɔ. 4Baʼ bâ bá pílí á Yésuwə, ti bá yɔ́mbí mɔ́ na nlə́m m bɔ nsə́sə̌n nána, “Wúnján mɔ anínán. A dí mɔ awə̌ ɛ lɔlíní ɛ wúnjan. 5A nəŋí baʼ bá sə, a lúŋí pə́ sə́ ndáʼ ɛ makáni.”
6Yɔ́ Yésuwə a kǐní na bɔ́. Ngə a pilíní li wútán ndáʼ ɛ nlú n sója ani, sója ani lúmí baʼ álí pɔ̌ŋ Yésuwə nána, “Sísə́, ɛ si takí nyǔ ɛ́ wə. Ŋ kúkiyǎ álí kasí wə̂ ngə nkən á ndáʼ ɛ́ myə. 7Ká mimə̌n pə́ n kúkiyǎ álí paʼ wə̂ á wusú. Ká ɛyala yɔ́ ɛ byábíní, mɔ a ndutu m myə á dyɛ bwâm. 8Mimə̌n pə́ n dí á wásé ɛ baʼ bá nə̂n bápə́pə̂, na mi pə́ ŋ wɔ́ŋí basója ábə́ bá dí á wásé ɛ́ myə. Nǎn pɔ̌ŋ nfɔ́ nána ‘Kə̌’, nǎ pə́ ǎ kəní. Nǎn pɔ̌ŋ ampə́pə̂ nána, ‘Pǎ nǎ pə́ ǎ paʼní.’ Njí m pɔŋí mɔʼ a ndutu m myə nána, ‘Bwə nán’, nǎ pə́ ǎ bwəní.”
9Yésuwə a bílí manyáká ngə a wúkíní nâni. A wɛ́sí nyǔ ti a byábí á límuti lí bâʼ ábə́ bá bílí mɔ́ ɛ pɔŋ á mbǐ nána, “M pɔ̂ŋ nyə́, á mbálɛ ɛsə́sə̌n, mi nan míníyá wə́ nyai ɛ dúbɛ ngə ɛnín, ká á Ísrɛl.” 10Bakə-bá-ndúm bâ, bá tímbí á ndáʼ ɛ nlú n sója, bá tání mbwəlá-a-ndutu m mɔ a mə̌ ɛ dyɛ̌ bwâm.
Yésuwə a pumú mwǎn a mumân n nkfwís a mwalân á liwá
11Á mbís ɛ púndá, Yésuwə a kǐ á nkí ámə́ bá bə́ŋákíní bá Nayin. Bawútú bá mɔ na ndíŋgí n bâʼ jǐta bá pɔŋí mɔ á mbí. 12Ngə a pilíní á líshúkí lí nkí, a bumání baʼ ábə́ bá pə́mbí mbimba. Mɔ awə̌ a gvúlí a bílí ápɔkɔ̂ a mwǎn m mwalân awə̌ a bílí nkfwís. Ndíngí mbaʼ jǐta ábə́ bá fí á nkí m mú bá bílí na mɔ́. 13Ngə Yésuwə a míníní nkfwís a mwalân ani, a wúkí mɔ́ likini jǐta. Ti a byábí nána, “Ɛ si jǐ!” 14Yɔ́ a kǐní a bándí ɛkɛ́ á likɛʼ álə́ bá pə́mbíní mbimba. Ti baʼ ábə́ bá pə́mbí lɔ́ bá tyə́bí. Yɔ́ Yésuwə a byábíní nána, “Ɛshɛʼ, nǎn pɔ̌ŋ wə̂ tyə́ ámǐn.” 15Mɔ awə̌ a m mə̌ ɛ́ wá a falú áshí, a bútí ɛ́ byá ti Yésuwə a bəkí mɔ́ á nyǎ m mɔ.
16Bɔŋ bú kúwí bɔ́ baʼ básə́sə̌n, bá bútí ɛ kɛsí Dyǔ nána, “Nlakwa-a-mudî a nə̂n a pilí áwútitîn wú sə́ təlí,” ti bá byábí pə́ nána, “Dyǔ lí mə́ ɛ paʼ á álí shuŋgɛ́ baʼ bá mɔ!”
17Ndúm ɛni tɛ́ŋgɛnɛ Yésuwə ɛ kǐ á pɛsi ɛ́ mbú ɛ́ Judéya ɛ́sə́sə̌n na á bikumbu ábə́ bí wútání.
Jɔnə́, a dumsɛ́ a lúmí bawútú bá mɔ á Yésuwə
18Bawútú bá Jɔnə́ pə́ bá wúkí misam mínán mísə́sə̌n. Ti a bəŋí bɔ́ bá bábɛ̂. 19Ti Jɔnə́ a lúmí bɔ́ á Yésuwə álí kɔndɛ́ mɔ́ nána, “Wə̌ ɛ dí mɔ awə̌ Dyǔ lí byábíní nána lí lúm, tɔ̌ sí sínja mɔʼ ampə́pə̂?”
20Ngə bá pílíní á Yésuwə bá byábí á mɔ́ nána, “Jɔnə́, a dumsɛ a lúmí sə́ á wə́ álí kɔndɛ́ wə̂ nána, ‘Wə̌ ɛ dí mɔ awə̌ Dyǔ lí byábíní nána lí lúm, tɔ sí lɔ́lí ɛ sínj mɔ ampə́pə̂?’”
21Á púndá ɛyə́ bá pílíní áwə́, Yésuwə a pwisí baʼ jǐta ábə́ bâ ŋ wɔ́ŋ mikfulu, baʼ ábə́ bá wɔ́ŋí banyambɛ̂ na baʼ ábə́ bá wɔ́ŋí midî míbî. A bwəlí pə́ bá jǐta ábə́ bá bíliyǎ ɛ́ mín álí mín pə́. 22Ti a timbí a bawútú bá Jɔnə́ nána, “Timbáni nyí pɔ̂ŋ Jɔnə́ misam ámə́ nyí míníní na misam ámə́ nyí wúkíní pə́. Nyí pɔ̂ŋ mɔ nána, ba ábə́ bá bílí bidímtí bá mín, ábə́ bá bíliyǎ ɛ púl ɛ kə bwǎm bá kə bwǎm, baʼ ábə́ bâ ŋ wɔ́ŋ ákúnyə bá mə́ ɛ sáŋ. Baʼ ábə́ bá bíliyǎ wú wǔm, bá wú wǔm, ábə́ bâ m mə̌ ɛ́ wá bá tímbí á luŋgɛ́, na bá lɛ́fú ndúm ɛ mbâ á baʼ bá líban. Áfánikə̌, nyí káni nána nwɔ́ŋa-a-ndfukú a lúm bapálaʼ.” 23Wunam na baʼ ábə́ bá sə̌ shǔm pénda tɛ́ŋgɛnɛ mi.
Yésuwə a pɔŋí baʼ bâ mɔ awə̌ Jɔnə́ a díní
24Ngə bakə-bá-ndúm bá Jɔnə́ bá kǐní, Yésuwə a bútí ɛ pɔ́ŋ límuti lí bâʼ álə́ lí bílí fâ misam tɛ́ŋgɛnɛ Jɔnə́. A kɔndɛ́ bɔ́ nána, “Á púndá ɛyə̌ nyí kǐní ɛ tán Jɔnə́ á ɛ́sínj, yə̌ nyí bílíní ɛ kani nána nyí mín? Ɛpan ɛ́ jyɛ́ ɛ́yə́ ɛfiʼ ɛ́ sákíní? 25Yə̌ nyí bílíní ɛkə álí mín? Mɔ awə̌ a fílí maba má mpesa? Nyí lɔ́lí ɛ bî nána, baʼ ábə́ bá fá maba má mpesa, na ábə́ bá kúmbɛ́ nyǔ ɛ́ bɔ, bá dyɛ wɔ̂ a mandáʼ má kə̂ŋ. 26Nyí pɔ̂ŋ mi, yə̌ nyí kǐní ɛ mín wû? Nlakuwa-a-mudî mɔ́ nyí kǐní ɛ mín? Iŋ nâ ɛ́ díní. Á mbálɛ nǎn pɔ̌ŋ nyə́ nána nyí míní mɔʼ awə̌ a túmbí nlakuwa-a-mudî. 27Jɔnə́ mɔ́ a bílí mɔʼ awə̌ bá bílíní ɛ byá á púndá ɛyə̌ bá tílíní biyala ábə́ Dyǔ lí byábíní nána,
‘Tátí, n lúm nkə̌-a-ndúm m myə álí kə wə̌ á wusú,
álí kə̌ ɛ bunsán nji.’
28Nǎn pɔ̌ŋ nyə́ nána Jɔnə́ a túmbí mɔ ansə́sə̌n awə̌ a fí á libum lí mwalân á nkínshíyə. Ndé awə̌ a dí a ntə́kə̂n á Janiya lí Dyǔ a dí a mbímbí a túmbí Jɔnə́.”
29Baʼ básə́sə̌n ábə́ bá wúkí yə̌ ɛ́yə́ Yésuwə a byábíní, ká baku-bá-táks, bá púshú nána yə̌ ɛ́yə́ Dyǔ lí byábíní nána ɛ́ bwəlán, ɛ́ mə́ ɛ bwəlan, á ɛ́tútú nána bá kwísí dumsɛ lí Jɔnə́. 30Ndé Bafárisî na balɛ̂ bá mbéndá bá báŋí yə̌ ɛ́yə́ Dyǔ lí mə́ní ɛ tyə́si á ɛ́tútú nána bá báŋí álí kwisí dumsɛ lí Jɔnə́.
31Yésuwə a kǐ á wusú nána, “Ndé, na yə̌ n tíŋgání ɛ nǔŋ ɛlángsán na nyɔnyi ɛ́tɛ̂n? Yán bɔ́ bá díní? 32Bá dí ngə bǎn ábə́ bá shúmání á nkí átin, ti mɔtɛ́ á lɛbá nsún m mɔ nána,
‘Sí fúŋí nyə́ liwɔ̂ŋ ndé nyí sákiyǎ.
Sí kɔ́ní nyə́ mikɔ́ni mí ɛ́gvú ndé nyí jíyǎ.’
33Á púndá ɛyə̌ Jɔnə́ a Dumsɛ a pilíní, á bílí ɛ dyɛ̌ njɛ-á-mákáni, a si mwáká pə́ mǐm. Ti nyí bílí ɛ byá nána, ‘A wɔ́ŋí mudî m bî!’ 34Mwǎn a Mɔnyuŋ a pilí, ǎ dyá lídyá, ǎ mwá pə́ mǐm, ti nyí byá nána, ‘Tátíyáni mɔʼ anínán. A dí ŋguŋgú ɛ lidyá, a bá pə́ mwá-a-mǐm, lisún na baku-bá-tâks na baʼ bábî.’ 35Ndé álí shúkán mɔʼ na mɔtɛ́ awə̌ a bí yǔm ǎ byá nána, nji ɛ Dyǔ ɛ tɛ́ŋgɛ́ní.”
Mwalân awə̌ bá láksɛ́ní wubî wú mɔ
36Mɔ a Fárisî a bəŋí Yésuwə a ndáʼ ɛ́ mɔ. Yésuwə a kǐ a ndáʼ ɛ́ mɔ, a shumání na mɔ́ á tíbili álí dyá. 37Á nkí mû, mwalân a bílí áwə́ awə̌ a bílí ɛ́ bwə̌ mísam míbî. A wúkí nána Yésuwə a bílí ɛ dyá lídyá á ndáʼ ɛ́ mɔ á Fárisî. Ti a pánání mǎ mbam ɛyə̌ ɛ lwínjí na labínda. 38A tyə́bí bɛbɛ na mákwi má Yésuwə, á jiya, á fwɛ́síyá mákwi má Yésuwə na mashâʼ má mɔ. Ti a fyákú makwi má mɔ na nyuŋ ɛ́ mɔ, a nyáŋú makwi má mɔ́ álí lúfu ɛdúbɛ́ ti a wɔkí mɔ́ na labínda.
39Ngə mɔ a Fárisî a míníní nâ, a byábí na mɔ́mə̌n nána, “Njí mɔ anínán a n bá nlakuwa-a-mudî na mbálɛ, ní á bí ɛbú ɛ́ mɔ́ ɛ́yə́ mwalân awə̌ a nyɔtí mɔ́ a díní, ní a bí ɛbú ɛ́ luŋgɛ́ lí bî álə́ a wɔ́ŋíní, ní á bí nána mwalân anínán ǎ bwə misam míbî.” 40Ti Yésuwə a byábí á mɔ́ nána, “Sáyímɔnə ŋ wɔ́ŋí yǔm álí pɔ̌ŋ wə.” Sáyímɔnə a pushú nána, “Pɔ̌ŋ mi mulɛ̂.” 41Yésuwə a butí nána, “Baʼ bábɛ̂ bá bílí ábə́ mɔ a bílíní ɛ ká wudúm. A bílí ɛ ká nfɔ́ mûm má bikúlí mátán, aníní bikúlí bítân. 42Bɔ́ mɔ ká nfɔ́ bá púliyǎ mɔ́ ɛ sáwu. Ti a laksɛ mɔ tɛ́ wudúm wú mɔ. Á bɔ́ baʼ bábɛ̂, a n fə́ ɛ míníní nána a n nəŋ mɔ́ jǐta?” 43Sáyímɔnə a pushú nána, “N dúbɛ na awə̌ bá láksɛ́ní wudúm ábə́ wú kɔ́lí.” Yésuwə a pushú nána, “Ɛ byábí mbálɛ.”
44Yésuwə a mindí mwalân awə̌, ti a byábí á Sáyímɔnə nána, “Ɛ míní mwalân anín? N pílí á ndáʼ ɛ́ wə, ɛ bə́kiyǎ mî madí álí wǔ makwi má myə, ndé amə̌ ɛ́ wul mákwi má myə na mashâʼ má mɔ, a fyákú mɔ́ na nyuŋ ɛ́ mɔ. 45Ɛ kátaniyǎ mí álí kasí mi, ndé ti á fə́ n kwílíní á ndáʼ ɛ́ wə́, mwalân anín a na mákúwá wə́ álí wɔ́kí mákwi má myə na labínda. 46Ɛ wɔ́kiyǎ mí lifû á nlú álí kasí mî ngə nkən, ndé mwalân ani a wɔ́kí makwi má myə na labínda. 47M pɔ̌ŋ kə́ wə, ɛniŋgán ɛnə̂n ɛ́yə́ a lúfúní ɛ dí nána misam mi bî jǐta ámə́ a bwəlíní mi láksáni. Mɔtɛ́ awə̌ bá láksɛ́ní wubî ábə́ wú bwíyǎ átin, á lúfú ɛniŋgán ɛ́tə́kə̂n.” 48Ti Yésuwə a byábí a mwalân ani nána, “Wubî wú wə wú láksání.” 49Baʼ bání ábə́ bá shúmání á tíbili bá butí ɛ byá na bɔ́mə̌n nána, “Njá anín awə̌ a wɔ́ŋí wúnja álí laksɛ́ wubî?” 50Ndé Yésuwə a byábí á mwalân ani nána, “Dúbɛ lí wə lí shúŋgɛ́ wə, kə̌ na musaŋgu.”
Currently Selected:
Lûkə 7: bwt
Highlight
Copy
Compare
Share
Want to have your highlights saved across all your devices? Sign up or sign in
