Mâkə 14
14
Bá lə́mbí Yésuwə
1Ŋgandu ɛ Litúm á Mǐn na Ŋgandu ɛ́ Blɛ̂t ɛ́yə́ ɛ́ Wɔ́ŋiyǎ Ɛfulan ɛ̂ m bukɛ́ madû mábɛ̂ álí paʼ. Prísə a nə̂n na balɛ̂ bá mbéndá bá bílí ɛ sǎ nji álí kú Yésuwə á kfun átin, na álí búlú mɔ́. 2Ndé bá byábí nána, “Sí si bwə nâni á bǔn bú ŋgandu, á ɛ́tútú nána baʼ bá panán mpuŋgú.”
Bá wɔ́kílí Yésuwə á Bɛ́táni
3Á púndá ɛyə̌ Yésuwə a bílíní á nkí m Bɛ́táni, á bílí ɛ dyá lidyá á ndáʼ ɛ Sáyímɔnə, a wə̌ a ŋ wɔ́ŋ ákúnyə, mwalân nfɔ́ a kwilí na ɛkpím ɛ́ labínda ɛ́yə́ ɛ́ wɔ́ŋí ɛshwinj ɛ́ mbâ, ɛ́yə́ ɛ́ n kpú nkfun jǐta. Bâ m bwə labínda ɛni na nâdə. A búkí nlú mú ɛkpím, ti a suwí Yésuwə labínda ɛni á nlú. 4Duŋgu lí bâʼ ábə́ bá bílí áwə́ bá n kfwí jǐta, ti bá bílí ɛ táŋ na bɔ́mə̌n nána, “Yə̌ ɛ́ dí yándá álə́ mwalân anín á bílíní ɛ fɛ̌nj mbú mú labínda ngə ɛni? 5Bá púlákí ɛ súm labínda á nkfun n nə̂n bá nǔŋ ngáʼ ɛni bá bə baʼ bá líban.” Á píʼ átin bá byábání mwalân ani. 6Ndé Yésuwə a byábí nána, “Nyí máku mɔ́. Yə̌ nyí takíní mɔ́? A bwəlí mi nsam mbâ. 7Á ɛ́tútú nána baʼ bá líban bá bá wə́ na nyə́ ɛtîtɛ́, nyí tíŋgání bɔ́ ɛ wúnjan ká njá púndá. Ndé n sî bá na nyə́ ɛtîtɛ́. 8Mwalân ani a bwəlí yǔm ɛ́yə́ a púlíní ɛ bwə. A mə́ mi ɛ kfú lɔvínda á nlú, álí bunsan liwúshi lí myə byáná púndá ɛ̌ paʼ. 9Á mbálɛ nǎn pɔ̌ŋ nyə́ sɔnsɔ́nǎn nána, ká njá fǔm ábə́ bá byábíní ndúm ɛ mbâ á nkínshíyə nsə́sə̌n, yǔm ɛ́yə́ mwalân ani a bwəlíní ɛ́ bá wə́ ɛ́ byábán álí kaní mɔ́.”
Júdasə á pushú álí nǎŋ Yésuwə
10Ti Júdasə Ískáryɔtə muwútú n nfɔ́ á bawútú dyǔm na bábɛ̂ bá Yésuwə, a kǐ ɛ tán prísə a nə̂n nána á naŋ Yésuwə á bɔ́. 11Baprîsə bánə̂n bá wúkí munyɛŋgɛ á yǔm ɛ́yə́ Júdasə a pɔŋíní bɔ́, na bá pɔŋí mɔ́ nána bá bə mɔ́ ngáʼ. Áfánikə̌, Júdasə a butí ɛ́ sá njí álí súm Yésuwə á bɔ́.
Yésuwə a dílí Lidyá ɛ Litúm Ámǐn na bawútú bá mɔ
12Á bǔn bú wusúwə wú Ŋgandu ɛ́ Blɛ̂t ábə́ bí wɔ́ŋiyǎ Ɛfulan, bǔn ábə́ baʼ bá búlúní bǎn bá mílɔngi álí bunsan Lidyá lí Litúm á mǐn, bawútú bá Yésuwə bá kɔ́ndɛ́ mɔ́ nána, Á fə́ ɛ̌ saní nána si bunsan wə Lidyá lí Litúm á mǐn? 13Ti Yésuwə a lúmí bawútú bá mɔ bábɛ̂ na ndúm nána, Nyí kə̂ á nkí átin. Njí nyí pílí áwə́ mɔʼ awə̌ a pə́mbí mbam ɛ madí ǎ tán nyə́. Nyí pɔ̂ŋ mɔ́ á mbís. 14Njí nyí pílí, nyí pɔ̂ŋ nwɔ́ŋ-a-ndáʼ nána, “‘Mulɛ̂ a byábí nána, Áfə́ tfǔŋ ɛ bakən ɛ díní áfə́ á dyání Lidyá lí Litúm Ámǐn na bawútú bá mɔ?’ 15Á lúfú nyə́ tfǔŋ ɛ nə̂n á ndáʼ ɛ ndɛ́ki á mǐn, ɛyə̌ bá mə́ní ɛ bunsan, bá támbú yɔ́ átin. Nyí búnsan sə́ lidyá áwə́. 16Ti bawútú bá Yésuwə á bâ bá mákú bá kí á nkí átin. Bâ n tán yǔmtɛ́ ngə Yésuwə a n pɔŋní bɔ́, ti bá búnsání Lidyá ɛ Litúm Ámǐn. 17Nkwin, Yésuwə a pílí áwə́ na bawútú bá mɔ dyǔm na bábɛ̂. 18Ngə bá bílíní ɛ́ dyá lídyá á tíbili, Yésuwə a pɔŋí bɔ́ nána, Á mbálɛ nǎn pɔ̌ŋ nyə́ nána nyə́ mɔ nfɔ́ á bɔ mî á makɛ́ má baʼ bá ɛkfwɛyí, nfɔ́ á nyə́ awə̌ ǎ dyá na mí. 19Ngə bawútú bá mɔ bá wúkíní yə̌ ɛyə́ a byábíní, bá wúkí likini, ti bá bútí mɔ́ ɛ kɔ́ndɛ́ nfɔ́ na nfɔ́ nána, ‘N dúbɛ́ nána suká mî.’ 20Yésuwə a pushú nána, ‘Ɛ́ dí mɔʼ nfɔ́ átinə́ na nyə́ dyǔm na bábɛ̂, mɔʼ awə̌ sî mɔ́ sí jǔ blɛ̂t á kúmbu á mulimlim m púndá.’ 21Mwǎn á Mɔnyuŋ á wá ngə ɛ́ tílání, ndé ɛbúmán na mɔ awə̌ á nǎŋ mɔ́. Ɛ́ n lɔʼ nána njí bá sî n yə́ mɔ́ ani fúliyə̂.”
Lidyá lí Sáŋgúwə́
22Ngə Yésuwə na bawútú bá mɔ bá bílíní ɛ dyá, a nuŋí blɛ̂t, a sákán Dyǔ, a ká bɔ́, ti a bəkí bawútú bá mɔ á byá nána, “Nyí nûŋ, nyǔ ɛ́ myə yɔ́ ɛ dí nán.” 23Á mbís ɛ púndá a nuŋí mbwindí ɛyə̌ mǐm má díní á wə́, a sákán Dyǔ, ti á bə́kí bawútú bá mɔ, ti bɔ́ básə́sə̌n bá mwílí. 24Yésuwə a byábí á bɔ́ nána, “Makǐ má myə mɔ́ mán ámə́ má súwílí á milú mí bâʼ jǐta. Makǐ mán má dí makǐ má nguʼ ɛ kɔ́nə́. 25Á mbálɛ nǎn pɔ̌ŋ nyə́ nána, mi sî mwá pə́ mǐm mâ kə́ŋ ti bǔn ábə́ mi m mwání mǐm má kɔ́nɛ́ á janiya lí Dyǔ.” 26Bá n kɔ́n nkɔ́ni m másákan. Ngə bá málíní álí kɔ́n bá kí á Wukul wú Ólivə.
Yésuwə á byábí ngə Píta á báŋní mɔ́ á nyǔ
27Yésuwə a byábí á báwútú bá mɔ́ nána, “Nyə́ baʼ básə́sə̌n nyí bfúl, nyí makú mî. Á ɛ́tútú nána ɛ́ tílání á kâti ɛ Dyǔ nána,
‘M búlú ntátiya a mílɔ́ŋgi
ti mílɔŋgi mísə́sə̌n mí páŋili.’”
28Yésuwə á byábí pə́ nána, “Ndé wə̌ti Dyǔ lí púmú mi, n kə á wusú á Gálilî, na áwə́ nyí tán ní mi.” 29Ti Píta a byábí nána, “Ká mɔ ansə́sə̌n a búŋgú a mákú wə, mimə̌n n sî makúwǎ wə” 30Yésuwə a byábí á Píta nána, “Á mbálɛ nǎn pɔ̌ŋ wə nána, wudû búnán byáná njúm má kfú á kɔ́n bitî bíbɛ̂, ɛ́ báŋ mí á nyǔ bitî bílán.” 31Píta a pushú mɔ́ na ngínya nána, “Ká ɛ́ dí nána n lɔlí ɛ wá na wə, n tíŋganiyǎ wə́ ɛ báŋ á nyǔ tǒm. Ti bawútú bání básə́sə̌n bá byábí mulimlim mú nsam.”
Yésuwə a kání á Gɛtsɛ́máni
32Á mbís ɛ púndá Yésuwə na bawútú bá mɔ bá kǐ a fǔm ábə́ bá bəŋní Gɛtsɛ́máni. Ngə bá pílíní áwə́ Yésuwə á pɔŋí bɔ́ nána, “Nyí shúmán fánán na mi nán kə ɛ́ káni.” 33A n kə na Píta, Jémsə na Jɔnə́ mǎ yǔm á wusú álí kə ɛ́ káni. Ndutu na mutaka jǐta mî m paʼ mɔ́ á nlə́m átin. 34Ti a byábí á bɔ́ nána, “Ndutu ɛyə̌ ɛ dí mî á nlə́m ɛ tíŋgání mi ɛ búlu. Nyí dyɛ̂ fán, nyí dyɛ̂ ɛpin na mi.” 35A kǐ á wusú mǎ yǔm, a shwá nyǔ ɛ́ mɔ áshí, ti a butí ɛ kání nána njí ɛ́ tíŋgání ɛ bwəlan, a si mín ɛbú ɛ́ mútakaʼ ngə ɛ́yî. 36Ti Yésuwə a kání nána, “A Sáŋ m Myə, Sáŋ m Myə, ɛ tiŋgání ɛ bwə misam mísə́sə̌n. Sûn, shuŋgɛ́ mî á mútaka mún. Ndé kánâwə́ bwə̌ ngə wə ɛ nəŋíní, suká ngə mi nəŋíní.” 37Ngə Yésuwə a malíní álí káni, a timbí a tání bawútú bâ bálán bá nalí wúyɔ́. Ti a byábí á Píta nána, “Á Sáyímɔnə, ɛ̌ nali wuyɔ́? Ɛ tíŋganiyǎ ɛ́ dyɛ̌ ɛ́pin ká á háwa pɔ́?” 38A kǐ á wúsú álí pɔ̌ŋ bɔ́ nána, “Nyí dyɛ̂ ɛpin, na nyí kániya álí bwə nána Dyǔ lí sî kufúwá mákiksɛ má tán nyə́. Nlə́m nə́ŋí álí bwə ndé nyǔ ɛ̌ báŋ.” 39A timbí pə́ á mbǐ, a káni mulimlim ngə a n kɔ́sɛ́ní ɛ kání. 40Ngə a timbíní pə́ á bawútú bá mɔ, a n tán bɔ́ bá naliya, wuyɔ́ wú bílí bɔ́ á mǐ jǐta. Áfánikə̌ bá sî bî yǔm álí pɔŋ mɔ́. 41Ngə a kîní ɛtî ɛ́yə́ ɛ́ lwínjání bitî bílán, a n pɔ̌ŋ bɔ́ nána, “Nyí dí wə́ ɛ́ nalí na álí kɔ́mbɛ? Ɛ́ kúkí nâ! Nyí táti, púndá ɛ mə̌ ɛ paʼ ɛyə̌ bá bə̌ Mwǎn a Mɔ̌nyuŋ á mákɛ́ má baʼ bá bî. 42Nyí fálú áshí sí kə̂. Tátíyáni, mɔ awə̌ a nǎŋí mî, mɔ́ ǎ paʼ nán.”
Bá kúwí Yésuwə
43Ngə Yésuwə a bílíní wə̌ ɛ́ byá yɔ̂ Júdasə a pilíní. Júdasə a bílí muwútú m mɔ́ nfɔ́ á bawútú dyǔm na bábɛ̂ bá Yésuwə. A pilíní áfə́ Yésuwə a bílíní. A pilí na limuti álə́ lí lə́kí pɛ́ ɛlə́kə́n, na ngámbá. Baprîsə bánə̂n, balɛ̂ bá mbéndá na bankúmə́ bɔ́ bá lúmí bɔ́ álí kúʼ Yésuwə. 44Mɔʼ awə̌ a ŋ wɔ́ŋ álí nǎŋ Yésuwə a n mə̌ ɛ́ bə limuti ɛyəmblan nána, “Mɔ awə̌ n kátání, ní mɔ́ nyí saʼní. Nyí kú mɔ́, nyí búki mɔ́ bwǎm na nyí kánan mɔ́.” 45Ngə Júdasə a pilíní, a n túm á Yésuwə. A byábí nána, “Á mulɛ̂.” Ti a kátání mɔ́. 46Áfánikə̌ limuti lí kúwí Yésuwə, bá búkí mɔ́ kpáŋ. 47Ndé mɔ nfɔ́ awə̌ a bílí átitîn na baʼ ábə́ bá bílí na Yésuwə, a dvulí pɛ́ ɛ yabíyə́ á mbáʼ ɛ pɛ́ ɛ́ mɔ. A túmbílí yɔ́, ti a shɛ́lí ɛtwî ɛ́ ntáŋ mú prísə a nə̂n a nə̂n. 48Yésuwə a kɔndɛ́ bɔ́ nána, “Ndí yə̌ njíb ɛ́yə́ nyí paʼní na pɛ́ ɛ́ yábíyə́, na ngámbá álí kú mi? 49M bílí na nyə́ á Tɛ́mpɛl bǔn tɛ́ n lúfúwǎ baʼ, nyí sî n kú mî. Ndé ɛyala ɛ́ kâti ɛ Dyǔ ɛ́ lɔ́lí ɛ bwəlan.” 50Ti bawútú bá mɔ básə́sə̌n bá mákú mɔ́, bá kí mifílí. 51Mǎ kɔ́li mɔ ɛ bílí á wə́ ɛ́ pɔŋá Yəsuwə á mbí. A n tfúl wɔ̂ sanji. Baʼ bâ bá wánání álí kú mɔ́, 52a kǐ mifílí na musámban, a makú libaʼ lí mɔ á mbí.
Bá káyísí Yésuwə
53Limuti álə́ lí kúwí Yésuwə lí kanání mɔ́ á ndáʼ ɛ́ prísə á nə̂n a nə̂n. Baprîsə bánə̂n, bankúmə́ na balɛ̂ bá mbéndá básə́sə̌n bá búmí áwə́. 54Ngə bá bílíní ɛ kə na Yésuwə, Píta a bílí mɔ́ ɛ pɔ̌ŋ á mbǐ, ndé a bílí mǎ yǔm kfwáŋ á mbǐ. Ti a kwilí á ɛbúka ɛkfúlá átin ɛ́ prísə a nə̂n a nə̂n. A shumání á wə́ na batátiya bá Tɛ́mpɛl, á wɔ́kɔ́ mwǐ. 55Baprîsə bánə̂n, na ngvwa ɛsə́sə̌n bá bílí ɛ saʼ bâʼ ábə́ bá tyə́ mbúŋ ɛ́ matúm tɛ́ŋgɛnɛ Yésuwə nána bá búlu mɔ́. Ndé bá sî wɔ́ŋá ká nfɔ́. 56Mbúŋ jǐta bá byábí matúm tɛ́ŋgɛnɛ Yésuwə, ndé bá sî m bá nsu nfɔ́. 57Álí shúʼ mbúŋ ɛfɔ́ ɛ tyə́bí ámǐn, byábí matúm mánán tɛ́ŋgɛnɛ Yésuwə nána. 58“Sí wúkí Yésuwə á byábá nána, ‘M páŋ Tɛ́mpɛl ɛnín ɛyə̌ bǎnyûŋ bá lúŋíní, n lúŋ ɛpə́pə̌ átinə́ ɛ madû málán ɛyə̌ bá lúŋiyaní na makɛ́.’” 59Ká ngə bá tyə́bíní mbúŋ, yə̌ ɛ́yə́ bá byábíní ɛ bíliyǎ mulimlim. 60Prísə a nə̂n á nə̂n a tyə́bí áwútitîn wú ngvwa, ti a kɔndɛ́ Yésuwə nána, “Ɛ wɔ́ŋiyǎ yálabɛ́ á míbyá mínán ámə́ bá byábíní tɛ́ŋgɛnɛ wə?” 61Ndé Yésuwə a dyɛ̌ kpiʼ a si byá ká yǔm. Prísə a nə̂n a nə̂n a kɔndɛ́ pə́ mɔ́ nána, “Ɛ dí Ani Awə̌ bá Wɔ́kílíní, Mwǎn a Dyǔ awə̌ baʼ bá bəní ɛdúbɛ́?” 62Yésuwə a pushú nána, “Á mbálɛ, n dí. Nyí mín Mwǎn a Mɔnyuŋ ngə a shumání á ɛ́kɛ́ ɛ mbâ ɛ Dyǔ lí ngvum. Nyí mín mɔ́ ngə á paní á libáŋ átin ngə á fíní ámǐn” 63Prísə a nə̂n a nə̂n a nyatí mábaʼ má mɔ á lí lúfú nána a mə́ ɛ kfwí ti a byábí nána, “Njá mbúŋə́ pə́ sí saʼni. 64Nyí wúkí ngə ǎ lwíní Dyǔ. Yə̌ ɛ́ dí mbakú ɛ́ nyə?” Bɔ́ baʼ básə́sə̌n bá byábí nána Yésuwə a lɔlí ɛ wá. 65Bɔ́ baʼ bafɔ́ bá bútí ɛ pɛ́njí bíkfwɛn á nyǔ ɛ́ Yésuwə. Bá tfúlí mɔ́ mǐ, bá lábá mɔ́, ti bá pɔ́ŋí mɔ́ nána, “Pɔ̌ŋ sə́, njá a lábí wə̂.” Ti babwəla bá nuŋí mɔ́ bá bútí mɔ́ ɛ láti.
Píta a báŋí Yésuwə á nyǔ
66Píta a n shuman á ɛ́búka ɛ́kúlá, yɔ́ mwalân a ndutu a prísə a n nə̂n a n nə̂n nfɔ́ a pílíní áwə́. 67Ngə mwalân ani a míníní Píta á wɔ́kɔ́ mwǐ, a tátí mɔ́ jǔŋ ti a pɔŋí nána, “Wə pə́ ɛ bílí na Yésuwə awə̌ a fí á Názarɛtə.” 68Ndé Píta a byábí nána m bíyǎ na n sɔ́ntaniyǎ yǔm ɛ́yə́ ɛ̌ byání. A mə́ní ɛ maʼ álí byá nâ a nyítí á ɛbúkatîn. Á mulimlim m púndá, njúm á kfú a kɔ́ní. 69Mwalân a ndutu ani a míníní pə́ Píta áfâ, ti a butí ɛ pɔ̌ŋ baʼ ábə́ bílí fâ á nsaŋ nána, “Mɔ anínán a dí mɔ nfɔ́ á baʼ ábə́ bá bílí ɛ pɔ̌ŋ Yésuwə á mbís.” 70Ndé Píta a nyísání pə́. Á mbísi ɛ púndá, baʼ ábə́ bá tyə́bí á nsaŋ bá bútí ɛ byá á Píta nána, “Ɛ dí mbálɛ. Ɛ dí mɔ nfɔ́ á baʼ ábə́ bá pɔ̌ŋ Yésuwə á mbí á ɛ́tútú nána wə ɛ fí á Gálilî.” 71Ti Píta a butí mɔ́mə̌n ɛ bə ɛbúmán, á mwáká nguʼ nána, “M bíyǎ mɔ anínán awə̌ nyí byání.” 72Mulimlim m púndá, njúm má kfú a kɔ́ní bitî ábə́ bí lwínjání bíbɛ̂. Ti Píta a kaní ngə Yésuwə a pɔŋíní mɔ́ nána, “Byáná njúm á kfú á kɔ́n bitî bíbɛ̂, ɛ́ báŋ mi á nyǔ bitî bílán nána ɛ bíyǎ mi.” Ti Píta a kándí liji á jiya.
Currently Selected:
Mâkə 14: bwt
Highlight
Copy
Compare
Share
Want to have your highlights saved across all your devices? Sign up or sign in
