Mâkə 15
15
Páyíletə a káyísí Yésuwə
1Mushú mushú pilílí baprîsə bánə̂n, bankúmə́, balɛ̂ bá mbéndá, na ngvwa ɛsə́sə̌n, bá wálí mbum. Bá tfúlí Yésuwə, bá kánán mɔ́ ti bá bə́kí mɔ́ á mákɛ́ má Páyíletə. 2Páyílətə a kɔndɛ́ mɔ́ nána, “Wə̌ ɛ dí kə̂ŋ ɛ́ Baʼ bá Júda?” Yésuwə a pushú nána, “Ngə wə ɛ byábíní.” 3Baprîsə bánə̂n bá bándí mɔ́ misam jǐta á nyǔ. 4Ti Páyíletə a kɔndɛ́ pə́ mɔ́ nána, “Wəmə̂n ɛ mə̌ ɛ wú mísam mítín bá mə́ní wə ɛ bán á nlú. Ɛ wɔ́ŋiyǎ ká yǔm álí byá?” 5Ndé Yésuwə a púshúwa ká yǔm, ti Páyíletə a bílí manyáká.
Bá byábí nána Yésuwə a lɔlí ɛ́ wá
6Á Ŋgandu ɛ Litúm Ámǐn tɛ́, ɛ́ bílí ɛləm ɛ́ Páyíletə álí fúl mɔ a bibuwa nfɔ́ a wə̌ baʼ bá sákíní nána a fúl. 7Á púndá ɛni mɔ nfɔ́ awə̌ bá bílíní ɛ bəŋ Barábasə á bílí á bíbuwa. A bílí á bíbuwa na baʼ bápə́pə̂ á bə bá tɛ́ŋgɛ́ní janiya lí Róma. 8Limuti lî lí pílí á Páyíletə, ti bá pɔŋní mɔ́ nána, a bwə́li bɔ́ yə̌ ɛ́ yə́ a luŋgúní bɔ́ ɛ bwə. 9Ti a kɔ́ndɛ́ bɔ́ nána, “Nyí sa nána n fúl nyə́ kə̂ŋ ɛ baʼ bá Júda?” 10Paíyíletə á kɔ́ndɛ́ nâ á ɛ́tútú nána, a n mə̌ ɛ́ yəm nána á ɛ́tútú ɛ́ ŋgɔŋgí ɛ́ baprîsə bá nə̂n tɛ́ŋgɛnɛ Yésuwə yɔ́ bá pánání mɔ́. 11Ndé baprîsə bá nə̂n bá bílí ɛ kúnjí baʼ bâ na bá pɔŋ Páyíletə á fúl bɔ́ Barábasə. 12Ti Páyíletə a kɔndɛ́ pə́ nána. “Yə̌ kə́ m bwəní na mɔ awə̌ nyí bəŋní na kə̂ŋ ɛ baʼ bá Júda?” 13Ti bá búní pə́ ámǐn nána, “Bumí mɔ́ á mbásá!” 14Páyíletə a kɔndɛ́ pə́ bɔ́ nána, “Á ɛ́tútú ɛ́ yə̌? Njá wúbî a bwə́líní?” Bá búní pə́ ámǐn nána, “Bumí mɔ́ á mbásá!” 15Ngə Páyíletə a bílíní ɛ sa á lí lɔsí limuti lî milə́m á líbum, a bəkí bɔ́ Barábasə. Ti a bəkí wunja á sója nána bá laʼ Yésuwə, ti bá kə bá búmi mɔ́ á mbásá.
Sója ɛ́ nyásí Yésuwə
16Sója ɛ́ núŋí Yésuwə, bá kánán mɔ́ á ɛ́búka ɛ́kúlá ɛ́ janiya, ti bá látí sója ɛ́pə́pə̌ á wə́. 17Bá fílí mɔ́ libaʼ lítúnâ álə́ lí yábí álə́ lí wátání libaʼ li kə̂ŋ, bá bwə́lí mɔ́ ɛkpútú ɛ́ mayɔ̌, ti bá fílí yɔ́ á nlú m mɔ. 18Ti bá bútí mɔ́ ɛ nyasi, bá sámbaníyá mɔ́ nána, “Á kə̂ŋ ɛ baʼ bá Júda ɛdúbɛ́ ɛ́ bá na wə!” 19Bá bílí mɔ́ ɛ lá ngámbá á nlú, bá pɛ́njíyá mɔ́ bikfwɛn á nyǔ, bá bílí ɛ tɔ̂ mabɔ́ŋ má bɔ áshí á lí nyasi mɔ́. 20Bá mə́ní ɛ maʼ álí nyasi mɔ́, bá fúlí libaʼ lî á nyǔ ɛ́ mɔ, ti bá tímbí mɔ́ mabaʼ má mɔ á nyǔ. Ngə bá málíní nâni, bá kanan mɔ́ álí kə mɔ́ ɛ bumi á mbásá.
Bá búmí Yésuwə á Mbásá
21Ngə bá bílíní ɛ kə̌, bá tání mɔ awə̌ a fí á nkí n Sirínə, Dǐn lí mɔ lí bílí Sáyímɔnə. Sáymɔnə a bílí sáŋ mú Alɛsánda na Rúfusə. A bílí ɛ túm álí kwili á nkí átin. Ti sója ɛ́yî ɛ́ wálí mɔ́ ti bá bwə́lí mɔ́ a pə́mbí mbásá ɛ́ Yésuwə. 22Ti bá kánání Yésuwə á fǔm ábə́ bá bəŋní Gólgóta Yándá lí Gólgóta lí dí nána “Fǔm bú ɛ́fis ɛ́ nlú.” 23Áfâ bá bəkíní Yésuwə mǐm ámə́ mə̌ bá kítání ná bwə̌ á bə́ bá bəŋní máyi, ndé a mwíliyǎ mɔ́. 24Ti bá bumí Yésuwə á mbásá. Bá wáŋgú mbambáʼ álí kaʼ nku m mɔ. 25Bá búmí mɔ́ á mbásá ngə́ŋ libu ɛ́ mushúwə. 26Bá tílí á ɛ́bámbú ɛ́ yə́ bá búmíní á mbásá á lí wútán nlú n mɔ á mǐn álí lúfú yándá ɛ́lə́ bá búmíní mɔ́ á mbásá. Lí bílí nána, “Kə̂ŋ ɛ baʼ bá Júda.” 27-28Bá n búmí pə́ bajíb bábɛ̂ á mbásá na Yésuwə nfɔ́ á ɛ́kɛ́ ɛ mbâ, aníní á ɛ́kɛ́ ɛ mwɛ.#15:27-28 Dungu lí kâti ɛ́ wusú ɛ bándí njɔŋ 28: Á púndá ɛyə̌ nsam ɛ́ múnán n bwə́lání, yə̌ ɛ́yə́ bá tílní á kâti ɛ Dyǔ ɛ n bwəlan. Ɛ̌ n tilan nána “Bá láŋí pə́ mɔ́ na babwə bá wubî.”
29Baʼ á bə́ bá bílí ɛ́ túm á nsaŋ mú mbuka bá bílí ɛ sákí mílú mí bɔ, ti bá lwíyá mɔ́ nána. “Ahǎ! Ɛ m byá nána ɛ́ páŋ Tɛ́mpɛl ti ɛ lúŋí pə́ yɔ́ átinə́ ɛ madû málán. 30Shuŋgɛ́ wəmə̌n, sɔnsɔ́nǎn ɛ shûl áshí á mbásá!” 31Nâ pə́ baprîsə bánə̂n na balɛ̂ bá mbéndá bá nyásíní mɔ́. Bɔ́mə̌n bá byábá nána, “A bílí ɛ shuŋgɛ́ baʼ bápə́pə̂, ndé sɔnsɔ́nǎn a tíŋganiyǎ ɛ́ shuŋgɛ́ mɔ́mə̌n. 32Mɔ́ awə̌ a bílí ɛ byá nána mɔ́ mú n dí Ani Awə̌ bá Wɔ́kílíní, na nána mɔ́ mú dí kə̂ŋ ɛ baʼ bá Ísrɛl, ɛ́ shúl áshí á mbásá ɛni sɔnsɔ́nǎn, ngə sí mín ní ka sí dúbɛ.” Bajíb bábɛ̂ bâ á bə́ bá búmíní á mbásá ná Yésuwə. Bɔ́ pə́ bá bílí mɔ́ ɛ lwî.
Liwá lí Yésuwə
33Ngə kɔsi ɛ́ pílíní, ɛfínjan ɛ́ kfútí wǔm másə́sə̌n kə́ŋ ti ngə́ŋ ɛ́lán. 34Ngə ngə́ŋ ɛ́lán ɛ́ pílíní, Yésuwə a búní nána, “Ɛlí, Ɛlí, lamá sábátáni.” Ɛ́yínán ɛ dí yándá nána “Á Dyǔ lí myə, Á Dyǔ lí myə, yán kə́ ɛ makúní mi?” 35Ti baʼ bafɔ́ ábə́ bá tyə́bí fâ á nsaŋ, ngə bá wúkíní nâ, bá byábí nána, “Nyí wú ǎ bə̌ŋ Ɛláyíja, na a pâ a wúnjan mɔ́” 36Ti mɔ nfɔ́ a kǐ mifílí, á nuŋí kushá, a tfúlí yɔ́ á ntfúm, a nyɔkí yɔ́ á mǐm ámə́ má kpɛ́nyí, ti a fílí yɔ́ á nsú m Yésuwə nána a mwá. Mɔ ani a byábí nána, “Nyí sǐn, sí mín njí Ɛláyíja á paʼ mɔ́ ɛ bwə a shúl áshí á mbásá.” 37Ti Yésuwə a búní ɛsakí na ngɔli ɛnə̂n, ti a pátí nlə́m.
38Á púndá ɛni, libaʼ álə́ lí kabí Tɛ́mpɛl átin, lí nyábí átin mungu mábɛ̂, butya á mǐn ti áshí. 39Ngə mɔ a nə̂n a sója awə̌ a n tyə́ á wusú wú Yésuwə álí mindí mɔ́ a míní ngə Yésuwə a wúlíní a m byá nána, “Á mbálɛ, mɔ a nín a bílí Mwǎn a Dyǔ!”
40Balân bafɔ́ bá bílí áwə́, mǎ yǔm kfwáŋ bá tátiyá yə̌ ɛ́yə́ ɛ́ bwəlan. Á ndíngí m bɔ, bá bílí Meríyə́ Magdalinə, Salómɛ na Meríyə́ awə̌ a n yə́ Jémsə a ntə́kən na Josɛ́fə. 41Balân bâ bá bílí ɛ pɔ̌ŋ Yésuwə á mbí á púndá ɛyə̌ a bílíní á Gálilî, na bá bílí mɔ́ ɛ wúnjan. Balân jǐta bápə́pə̂ ábə́ bû mɔ́ bá bílí á Jerúsálɛmə bɔ́ pə́ bá bílí áwə́.
Liwushi lí Yésuwə
42Ɛ́ bílí Bǔn bú Mbunsan (ɛ́yə́ Bǔn bú Líkɔ́mbɛ bú búkɛ́ní bǔn bufɔ́.) Ngə kwin m bílíní ɛ paʼ, 43Josɛ́fə mɔ awə̌ a fí á nkí mú Arímatíya, mɔ a ɛdúbɛ́ a ngvwa. Mɔ́ pə́ a bílí ɛ sǐnj púndá ɛyə̌ wudya wú Dyǔ wú paʼní. A pilí á Páyíletə, ti a pɔŋí mɔ́ nána a bə́ mɔ́ mbimba mú Yésuwə. 44Páyíletə a bílí manyáká nána Yésuwə a m mə̌ ɛ́ wá. Yɔ̂ a lúmíní nána bá bə̂ŋ nlú n sója ani, a kɔndɛ mɔ́ njí Yésuwə a mə̌ ɛ́ wá. 45Ngə nlú n sója n pɔ́ŋíní Páyíletə nána Yésuwə a mə̌ ɛ́ wá, a bəkí Josɛ́fə wunjá álí nûŋ mbimba n Yésuwə. 46Ti Josɛ́fə a yandí mbɔ́m. A shulí mbimba m Yésuwə á mbásá. A pílání mɔ́ na mbɔ́m ɛni, a nanjí mbimba m Yésuwə á ndim ámə́ bá lákúní lilɛ́ átin. Ngə a malíní, a makí lilɛ́ línə̂n álí kɔ́ʼ ɛku ɛ́ ndim. 47Meríyə́ Magdalinə, na Meríyə́ nyǎ mú Josɛ́fə, bá bílí ɛ mindi fǔm ábə́ bá dímíní Yésuwə.
Currently Selected:
Mâkə 15: bwt
Highlight
Copy
Compare
Share
Want to have your highlights saved across all your devices? Sign up or sign in
