Luka 8

Monnogo owoto kede Yecu

1Ka kare okato anok, owoto i boma apapat kede pacci atino kun tito kop, dok rabo amut aber me loc Obaŋa. Jo mere apar wie aryo onwoŋo tye kede, 2#Mat. 27.55-56; Mar. 15.40-41; Luk. 23.49karacel kede monnogo a rik ecanogi i cen areco kede too: Maliam ame olwoŋo ni me Magdala, ame cen abiro cen oya i kome; 3Yoanna cik a Kuja, agwokjami a Kerode; Cucanna, kede mon ocele apol. Mon magi yam konyogi kede limgi.

Carokop i kom acoc

(Nen daŋ Matayo 13.1-9; Marako 4.1-9)

4Ka lwak jo ecipan ocokere karacel, kun jo bino baŋe oya i boma apol, en okobo i carokop ni, 5“Lo moro rik owoto ka coyo koti mere. Ame en tye ka coc, koti mogo okir i dye yo, jo onyono oko, winy a twarre malo obino odepo oko. 6Mogo okir i lela; odoŋo, te two oko, pien pii mom i tere. 7Mogo te kir i akina okuto; okuto odoŋo karacel kede odie. 8Mogo te kir gigi i lobo aber, odoŋo, tyene acel acel ocek iye nyige mia acel.” Ka doŋ okobo kop man kede teko ni, “Ŋat a tye i yit me winyo, myero winy!”

Gin omio opwonyo jo i carokop

(Nen daŋ Matayo 13.10-17; Marako 4.10-12)

9Jo mere a lube openye te kop me carokop man. 10#Ica. 6.9-10 En ogamo ni, “Wun omiowu ŋeyo muŋ me loc Obaŋa, ento jo ocele omiogi i carokop, me bed acalo rik ocoo, ni ka gin oneno, kur onen, dok ka gin owinyo, kur oniaŋ tere.

Yecu ogonyo te carokop i kom acoc

(Nen daŋ Matayo 13.18-23; Marako 4.13-20)

11“Carokop-pi tere en: Koti en kop Obaŋa. 12Gin ame i dye yo, gin jo ame winyo, icennere Catan bino, te kwanyo kop i cunygi oko, me kur gin oye dok olarre. 13Gin ame i lela, gin jo ame ka owinyo, ogamo kop kede yomcuny, ento mom otye kede lwitgi, ye megi tye pi kare anok, ento i kare ame obitogi, gin poto oko. 14Gin ame okir i akina okuto, gin jo ame winyo, ento ka gin omedde kede kwo megi, par apol, lonyo kede yomcuny me kwo man diogi, nyiggi mom cek aber. 15Gin ame i lobo aber, gin jo ame ka owinyo kop, olido atek kede cuny aber, ame genne, onyako nyiggi kun odio cunygi.

Tara ame owumo kede gulu

(Nen daŋ Marako 4.21-25)

16 # Mat. 5.15; Luk. 11.33 “Mom tye ŋattoro ame cwinyo tara te dok wumo oko kede gulu, aŋar keto i te tanda, ento keto malo i wi gol, me jo ame bino i ot nen lero mere. 17#Mat. 10.26; Luk. 12.2Pien mom tye ginnoro ame okano ame mom bino nen kannaler, dok mom tye ginnoro ame owumo ame mom bino ŋeye, dok ame mom obino yabo kannaler. 18#Mat. 25.29; Luk. 19.26Gwokere wunu i kom kite ame iwinyo wunu kede; pien ŋat a mere tye, obino medde, ŋat a mere mom, obino gamo i baŋe gin ame en tamo ni mege.”

Toto a Yecu kede omego mere

(Nen daŋ Matayo 12.46-50; Marako 3.31-35)

19Tottere kede omego mere obino baŋe, cite pi lwak mom otwero tuno baŋe. 20Jo te titte ni, “Totti kede omegoni ocuŋ oko, gin mito neni.” 21Ento en odokkigi iye ni, “Totta kede omegona gin jo ame winyo kop Obaŋa, dok oketo i tic.”

Yecu ojuko yamo i dye nam

(Nen daŋ Matayo 8.23-27; Marako 4.35-41)

22I nino moro acel en odonyo i yee karacel kede jo mere a lube, okobbigi ni, “Koŋ okat wunu loka nam tuŋ ca,” gin ote cako wot. 23Ame doŋ otye ka kwaŋ, en te nino oko, yamo te cako kodo atek i dye nam, pii daŋ te ero poŋ oko iyi yee, onwoŋo doŋ gin otye arac. 24Gin obino baŋe ote coye oko kun okobo ni, “Adwoŋ, Adwoŋ, oto oko!” En te co oko, daŋ te juko yamo kede pii a tagere, te kwe, nam daŋ te liŋ oko. 25Openyogi ni, “Iyeewu tye kwene?” Lworo omakogi kun owuro, ame openyere kengi kengi ni, “Man kara ŋa, ame ciko yamo kede pii-gu, gin te winye-nie?”

Ocano dano me Geraca ame won cen arac

(Nen daŋ Matayo 8.28-34; Marako 5.1-20)

26Gin te bino i lobo a jo Geraca ame otemere kede Galilaya. 27Ka okato i wi tela, dano moro me paco-nu orwatte kede ame won cen areco. Onwoŋo doŋ ori kare alac a kun mom ruko boŋo i kome; pe bedo i ot, bedo i ka lyele. 28Ka en oneno Yecu, oredo, te ryebere i nyime, te kop kede dwon aloŋo ni, “Yecu, Wot Obaŋa Amalo Meicel, kara ilaro ŋo keda? Abako doga baŋi, kur iwuna.” 29Pien onwoŋo ociko cen arac ni ya oko i kom dano-nu. Tyen apol onwoŋo dwogo i kome, obedo ka gwoke agwoka kun otwee kede jegere kede nyony; en rik turo gin ame otwee kede oko, cen tere i tim. 30Yecu openye ni, “Yin nyiŋi ŋa?” Te gamo ni, “Mony#8.30 Mony: Leb Grik: Legion”, pien lwak cen apol tye i keme. 31Gin te bako doggi baŋe ni kur cikgi owot i bur ame agikki tere mom. 32Lwak puno ecipan onwoŋo tye ka cem i kor kidi kuno. Gin ote bako doggi baŋe ni oye wek gin odony i punni; oyegi. 33Cen te ya oko i kom dano-nu, te pikere i punni; lwak puno obelle i ŋwec i kor kidi, ote mwonyere oko iyi nam. 34Okwat ka oneno gin otimere, ote riŋo oko, otero koppere i boma kede i akina pacci. 35Jo te ciro wot neno gin ame otimere. Gin te bino baŋ Yecu, ote nwoŋo dano ame cen areco oya i kome obedo piny i ŋet Yecu, orukere i boŋŋi, wie odoko aber; lworo omakogi. 36Jo ame oneno otito baŋgi kit ame dano a yam tye kede cen areco doŋ ocaŋ. 37Jo ducu ame bedo i lobo a jo Geraca acocok okwae ni myero ya oko i baŋgi, pien lworo onwoŋo omakogi meicel; omio en odonyo i yee, odok cen. 38Dano ame cen oya i kome obako doge ni ber ebed doŋ baŋe: ento en ocwae kun ci ke ni, 39“Dok paco, irab pi gin adit ame Obaŋa otimo i komi.” En owoto kun rabo i dye boma-nono luŋ gin adit ame Yecu otimo i kome.

Nyaka a Yairo kede dako ame ogudo ruk a Yecu

(Nen daŋ Matayo 9.18-26; Marako 5.21-43)

40Ka Yecu odwogo, lwak ojole kede yomcuny, pien onwoŋo gin luŋ otye ka kure. 41Dano moro a nyiŋe Yairo obino; en rik obedo adwoŋ a loo kacokere. Oryebere piny i te tyen Yecu, obako doge baŋe ni wot i ode, 42pien rik tye kede nyare ame onywalo acel keken, onwoŋo adedera, mwaka me dittere bwot romo apar wie aryo.

Ka en tye ka wot, lwak odie. 43Dako moro onwoŋo tye kuno a rik otwo too me kwer remo mwakki apar wie aryo, ame doŋ obalo limmere ducu baŋ dakatal, naka pe tye ŋattoro ame twero caŋo. 44Obino i tuŋ ŋec, te gudo boŋo mere; cucuttono remo mere ame cwer te cok oko. 45Yecu openyo ni, “Kara ŋa oguda-nie?” Ka jo ducu okwero, Petero kede jo ame tye karacel kede ogamo ni, “Adwoŋ, itye i dye lwak, jo tye adiyi.” 46Ento Yecu ogamo ni, “Ŋattoro gire oguda, pien awinyo teko moro oya i koma.” 47Dako ka oneno ni mom etwero pono, obino ame kome myel amyela, te ryebere i nyime, otito i nyim lwak ducu gin omio egudo, anaka kite ame ecan kede cutocuto. 48Yecu te kobo ni, “Nyara, iyeeni ocaŋi oko; wot giri i kuc.”

49Ame en pwod tye ka kop, dano obino ame oya i paco adwoŋ me kacokere, ote kobo ni, “Nyari doŋ oto oko; kur dok imedde cano apwony.” 50Ento Yecu ka owinyo, okobo ni, “Kur ilwor; ye ayea keken, en bino caŋ gire.” 51Ka en odonyo i ot, mom oye ni dano dony kede i ot, kono ka Petero kede Lakana kede Yakobo, kede papa atin kede tottere keken. 52Jo luŋ onwoŋo tye akokko kun okumo pire; ento Yecu okobo ni, “Weku koko obedi, pien nya-nu mom oto gire, ento onino anina.” 53Gin onyere atek meicel, pien gin oŋeo ni doŋ oto oko. 54En omako ciŋe olwoŋe ni, “Atin, ya malo.” 55Cunye te dwogo oko, oya malo cutocuto; Yecu te ciko ni mie cem. 56Jo onywale owuro meicel; ento en ocikogi atek ni kur otit gin ame otimere baŋ dano moro.

Currently Selected:

Luka 8: La79

Highlight

Copy