1 Samuel L 2
2
Xana Kayiikparama
1Ne Xana ɔkparamakayi ɔɣɛ sɔ,
"Wũ ɔtu to ɔna isoɣɔ i Bosate iso.
Bosate ame i wũ isa#2.1 Isa: Iɣɛ itã ɔle ɔɔkɔlɛ kato.
Wũ kanya to kaɖe ndamu kapia wũ matsirise,
alasɔ aɖi me nto lona isoɣɔ.
2"Ɔturi kuwɛ̃ iise sekelee lɛ Bosate awe.
Kuwɛ̃ na i fɔ kama.
Itasiare kuiwɛ̃ na lɛ bo Ɣaa awe.
3"Midaala ikaiɖe i iteso ame
ɣee minyua akaɖe i katoikɔlɛso nɛmɔ igbã ame,
alasɔ Bosate nɖe Ɣaa wɔ nɣe.
Ɔ̃ nsɛ ɔɖaɛ itɔ̃me i maturi awune kurabarara iso.
4"Makpãrɛrɛĩ kuta ɔfɛfɛ̃
ɣɛɛ mma lorɔ̃ sɛ mana ɔle.
5Maturi ma nsɛ maɖe aɖera mami saa, ka mapia i awoba ame i aɖera wa maaɖe iti,
ɣɛɛ mma loisɛ mana aɖera maɖe saa ne, kukã iisibakpɛ̃ ma kini.
Ɔrɔ̃go wɔ loɖe ɔlɛma ɔɔba ɔ̃aɣe mabi ikɔdzɛ,
ɣɛɛ ɔ̃ wɔ loɣe mabi gbodzoo ɔɔba ɔ̃akpese lɛ ɔturi wɔ loiɣe ɔbi ɔnya awe.
6"Bosate sɛ ɔtã ɔturi ngbã, fiɛ ɔ̃ ame nsɛ ɔbɔ kukpi ne.
Ɔsɛ ɔtã ɔturi ɔkɛlɛ ikpibiɔ ame, fiɛ ɔ̃ ame nsɛ ɔkpadzɛ̃ wũ ɔɖi ɔbɔ ngbã ana.
7 Bosate sɛ ɔbara ɔwɛ̃ wɛrɛba fiɛ ɔsɛ ɔbara ɔmama ranase.
Ɔ̃ nsɛ ɔbara ɔwɛ̃ ɔbɔsokarɔ̃ fiɛ ɔsɛ ɔkɔlɛ ɔmama kato.
8Ɔsɛ ɔkpadzɛ̃ mawɛrɛba ɔɖi i sise ame,
fiɛ ɔsɛ ɔkɔlɛ maɣiãni kato ɔbɔrɛgu i ndɔ̃ ikpe ame.
Ɔsɛra maɣiani i makpakpaturi ndɛ̃,
fiɛ ɔsɛ ɔtã sɔ masɛ i kuwarɛ iyara iso.
"Alasɔ karɔ̃ sikaĩ ɖe Bosate sire;
sɛ̃ iso ɔtsue kayiiso ɔɖuɖu ɔsia ne.
9Ɔsɛ ɔdzuɛ̃ ɔ̃ manukuarese inene,
ɣɛɛ maturi nyanyariã to maawɔ i idududu ame.
"Alasɔ iiɖe ɔturi ɔle nsɛ ɔtã ɔɖeiso.
10Maawɔra mma lota maɣɛ i Bosate iso.
Ɔto ɔ̃aɖi silɔ teteree lɛ kadoiɖu ɔpia ma ɔbɔrɛgu i kato.
Bosate to ɔ̃aɣɛgu ɔbiara i karɔ̃ ɔɖuɖu iso atɔ̃me.
"Ɔto ɔ̃atã ɔ̃ igara ɔle,
fiɛ ɔ̃akɔlɛ nwɔ ɔsɔla nnɔĩ isa kato.
11Ne kama ne Elkana ɔrui ɔkɛlɛ ɔ̃ aɖe Rama, ɣɛɛ ɔ̃ ɔbibirɛrɛĩ ɔsumu Bosate i sɔrɛdze Eli kayirinɔ.
Sɔrɛdze Eli Mabibirɛrɛĩ
12Eli mabibirɛrɛĩ Xofni gu Penixas ɔwe ɔtile. Maiwarɛ Bosate mapia i kuira ame. 13Kiniɔ ne iɖe kubarara i masɔrɛdze magbe gu maturi magbe ndɛ̃ sɔ si ɔrere ɔba ɔsɔrɛ ara ne, sɔrɛdze ɔɖabo ala kugbadai kutɛ katsue i kɔrɔ̃ ɔba, gɔ mato mawa sina. 14Ɔto ɔ̃asu katsue ɔtsue mina i ɔruɛ ɣee iwabui ɣee ɔlakutu ɣee daɖisɛĩ ame, iyɔ sɔrɛdze aasu irabiara nɛ kaɖi i kame. Kumɛgɔgbe mala maɔbara i Israel mabi ɔbiara wɔ loba ɔsɔrɛ ara i Silo iso ne. 15Ibua ne iso ne, fiɛ maatsuedza iɖa kɔraa ne, sɔrɛdze ɔɖabo ɔ̃aba ɔ̃aɣere nwɔ nto ɔsɔrɛ ara sɔ, "Tã sɔrɛdze sina kɛkɛĩ si ɔfɛ̃; ɔ̃ito ɔ̃afɔ sina dzɛ mawa i fɔ kɔrɛ ɣɛɛ siyuɛ kere ɔto ɔbie."
16Si nwɔ nto ɔsɔrɛ ara ɔɣere wũ sɔ, "Tã matsuedza iɖa tɔtɔ, si ka aasu nnɛ abie," iyɔ ɔɖabo aatã mmuai sɔ, "Ooɣo! Su tã me kiniɔ; si iiɖe ngbɔ ne, loaɖi sɛ̃ ku ɔle!"
17Eli mabi magbe ikpi ɔnyanyarĩ i Bosate anɔmi ame gbaã, alasɔ maisɛ mapia kuwarɛ kukuwɛ̃ i Bosate isɔrɛ iso.
18Ɣɛɛ ne, Samuel ɔla ɔ̃abara kasumu karabara i Bosate anɔ. Ɔɖe kaporoporoi ga lopia akalala ɔmearapia. 19Ikɔ biara ne ɔ̃ ɔnyi sɛ ɔkã awu tagbaraa ɔkɛlɛgu wũ si ma gu ɔ̃ ɔrã Elkana ɔsɛ ikɔ isɔrɛ kabarakɔ̃. 20Eli ɔ̃afere Elkana gu ɔ̃ ɔre kusɛkusɛ ɔɣɛ sɔ, "Bosate si ɔtã ɔrɔ̃go wɔgbe si ɔɣe mabi ɔtã-ɔ asu asɛ i nwɔ asu atã wũ kanya." Iyɔ ne kama ne ka maɔrui makɛlɛ kaa. 21Bosate ɔbualɛ Xana ɔɣe mabirɛrɛĩ itɛ ɔbua gu mabirɔ̃gomi inyɔ. Ɔwi wɔgbe ne, ɔbirɛrɛĩ Samuel, ɔmɔ i Bosate anɔ.
22Kiniɔ ne, Eli ɔɔbua ɔbe gbaã. Ɔnɔ irabiara nɛ ɔ̃ mabibirɛrɛĩ to mabara i Israel kaɖe ɔɖuɖu iso. Ɔnɔ sɔ ɔ̃ mabi ɔla maɔrɛgu marɔ̃go ma nsɛ masumu i Isarɛ Ikpayo kayogodɔ̃ ana. 23Ne ɔso ɔkarɛ ma sɔ, "Be ɔso mito mibara ara wagbe igbã? Nto lonɔ ɔturi biara to ɔɣɛ aranyanyariã wa mito mibara. 24Wũ mabi, ooɣo lo! Bosate maturi iito maɖeikaɖe sɛɛ kuiwɛ̃ i mi iso. 25Si ɔturi ɔɣɛrɛ ɔ̃ ɔnyii ne, Ɣaa sɛ ɔbuai i kpibaradze iso. Ɣɛɛ si ɔturi ɔbara ikpi i Bosate iso ne, nna loawo nrɔɔ̃ ɔpɛ i ɔ̃ iti?" Ɣɛɛ ɔ̃ mabibirɛrɛĩ iinɔ ma ɔse isɛ̃ ma, alasɔ Bosate kubie kuɖe sɔ ɔ̃aɖoe ma.
26Kabirɛrɛĩ Samuel ɔmɔ ku somina ɔbua, ɔ̃ ara ɔbo Bosate gu maturi anɔ.
Bosate Ɔsɛ̃ Eli Iyomaturi
27Kiniɔ ne Ɣaameturi ɔwɛ̃ ɔba Eli kɔrɛ ɔba ɔ̃aɣere wũ sɔ, "Bosate sɔ, 'Loɖi so lote fɔ ɔse iyo ku ɔwi wɔ mapia i Egipte karɔ̃ iso i Igarakpakpa kayirinɔ. 28Loɖi fɔ ɔse i Israel kumele ɔɖuɖu ndɛ̃ sɔ ɔ̃aɖe wũ sɔrɛdze. Ɔ̃ loasumu i wũ isɔrɛkasege katɔ̃, ɔ̃atsuedza kuakɔrɔ̃kɔrɔã fiɛ ɔ̃apia ɔmearapia i wũ anɔ. Losu Israel mabi asɔrɛ ɔɖuɖu wa masɛ mabaragu ɔtɔ lotã fɔ ɔse iyo ana. 29Be ɔso mito misopara wũ isɔrɛ gu karatã ga lokarɛ lotã wũ kasɛkɔ̃? Be ɔso ato awarɛ fɔ mabi aɖo me? Be ɔso mito miɖe sina kasɛ ga nlɛ kaɖo fiɛ kaba iɖa ne mito mina so mibɔrɛgu i isɔrɛ biara nɛ wũ maturi Israel mabi ɔbɔ ame?'
30"Ne ɔso Bosate, Israel Ɣaa, ɔɣɛ sɔ, 'Loɣɛ losɛ sɔ fɔ iyo gu fɔ ɔse iyo, aawe i wũ kɔrɛ masumu ɔwi daaro.' Ɣɛɛ kiniɔ ne, Bosate to ɔɣɛ sɔ, 'Kuiyikuiyi, iisibaba i ne ame inya! Maturi ma nsɛ mawarɛ me ne, mme wũ loawarɛ ma, ɣɛɛ mma losɛ me i karɔ̃ ne, loasopara ma. 31Nyɔ, ɔwi to ɔba gɔ loawɔra fɔ kakpa gu fɔ ɔse iyo, iyɔ ne ɔkpakpa kuwɛ̃ iisibawe i fɔ iyomaturi ɔkparɛ ame. 32Iyɔ ne ato aamararã so i wũ kasɛkɔ̃. Atoasɔ loatã ara ɔlɛgu Israel mabi mama ne, ɔkpakpa kuwɛ̃ iibawe i fɔ iyomaturi ɔkparɛ ame kuiyikuiyi. 33Ɔturi ɔwɛ̃ pia i fɔ ɔkparɛ ame wɔ loatã ɔwe ngbã, fiɛ loibatɛ̃ wũ ɔri sɔ ɔdaasumu me lɛ sɔrɛdze. Ɣɛɛ ɔto ɔ̃abiɛ anɔmi, fiɛ ɔto ɔ̃awe i isoma gu imararãso ame ɔwi biara. Ɣɛɛ fɔ ɔkparɛ tsɔra ne mato maakpi i ipɛmi kanya.
34" 'Nnɛ loaba i fɔ mabibirɛrɛĩ inyɔ, Xofni gu Pinexas iso, loaɖe-ɔ ikparĩ - ma inyɔ ɔɖuɖu to maakpi ku iyi iwɛ̃. 35Loasɛ sɔrɛdze ɔnukuarese, nwɔ loabara i wũ ɔtu gu adzuni iso lotã so. Loasɛra ɔ̃ iyo teteree, fiɛ ɔ̃asumu me i wũ nwɔ masɔla nnɔĩ anɔ ɔwi biara. 36Iyɔ fɔ mabi ma loakuti aasɛ sɔrɛdze wɔmɔ kɔrɛ masɛ maakarɛ sikãfudza kɛkɛĩ gu araɖea kutia, fiɛ maapɛ wũ nrɔɔ̃ sɔ, "Botã-ɔ iti, tã bo ɔri si bobuai masɔrɛdze bobara karabara si boana araɖea boɖe." ' "
Currently Selected:
1 Samuel L 2: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation