1 Samuel L 5
5
Ndamu Aɖaka I Ma Filistise Kɔrɛ
1Ɔwi wɔ i ma Filistise ɔɔmɔɛ̃ Ɣaa ndamu aɖaka mafɔ kama ne, masu wã i Ebenezer makɛlɛgu Asdod. 2Ne masore ndamu aɖaka makɛlɛgu Dagon kuɣɔ isɔrɛyo ame, masu wã masɛ i Dagon irapɔa kɔrɛ. 3Gɔ Asdod maturi ɔta ku kaɖesɛã kaya ne, mmɔ manya sɔ Dagon ɔrɔ̃ katɔ̃ fu i karɔ̃ i Bosate ndamu aɖaka katɔ̃! Ne matara Dagon fiɛ masu wũ maɣedza i ɔ̃ kasɛkɔ̃ ne. 4Ɣɛɛ kaɖesɛã kaya ne, gɔ mata ne manya sɔ Dagon irapɔa ɔledza irɔ̃ ifu katɔ̃ i karɔ̃ i Bosate ndamu aɖaka katɔ̃! Ɔ̃ iti gu nrɔɔ̃ ɔfɛfɛ̃ miɖi iso mise i kayogodɔ̃ fiɛ ikuti ɔ̃ iso kere. 5Nnɛgbe ɔso ipɛ nɔme ne, Dagon mabia oo, maturi ma losumu wũ oo, si mabo i Dagon isɔrɛyo i Asdod ne, maisɛ masia kukpa i kayogodɔ̃ mmɔ.
6 Bosate ɔkpadzɛ̃ Asdod gu ɔ̃ awo ame maturi kutsue teteree. Ɔkpadzɛ̃ iwɔ ɔbɔ ma iso ne ɔtã ara ɔmumu maturi ma i mmɔ pelepele. 7Gɔ Asdod maturi ɔnya ara wa nto aba ne, maɣɛ sɔ, "Iikote sɔ Israel ɣaa aɖaka aase i bo kɔrɛ alasɔ ɔto ɔkpadzɛ̃ bo gu bo kuɣɔ Dagon kutsue." 8Ne ɔso makpere ma Filistise maɖeisoi ɔɖuɖu makarɛ ma sɔ, "Be boabaragu Israel ɣaa aɖaka?"
Matã mmuai sɔ, "Mitã masu wã makɛlɛgu Gat ɔmagɛ̃siare." Ne ɔso masu Israel Ɣaa aɖaka makɛlɛgu Gat.
9Ɣɛɛ gɔ masu wã i mmɔ makɛlɛgu kama ne, Bosate ɔkpadzɛ̃ ɔmagɛ̃siare wɔmɔ kutsue ana, fiɛ itã ifɔ̃ siare ɔmɔɛ̃ ma. Ɔkpadzɛ̃ ɔturi biara kutsue i ɔmagɛ̃siare ame, makpakpa i makoso pelepele ku ara imumu. 10Ne ɔso masu Ɣaa ndamu aɖaka makɛlɛgu Ekron.
Gɔ Ɣaa aɖaka to abo i Ekron ɔmagɛ̃siare ame ne, Ekron maturi ɔlakulu mabiɛ maɣɛ sɔ, "Maɔsu Israel ɣaa aɖaka mabɔ bo sɔ aaba aɖoe bo gu bo maturi." 11Ne ɔso makpere ma Filistise maɖeisoi ɔɖuɖu ne maɣɛ sɔ, "Misu Israel ɣaa aɖaka miruigu, mitã akpese akɛlɛ wã mɔmɔ kasɛkɔ̃ si iiɖe ngbɔ ato aaɖoe bo gu bo maturi." Alasɔ kukpi ifɔ̃ ɔmɔɛ̃ ɔmagɛ̃siare maturi ɔɖuɖu i Ɣaa kɔrɔ̃ teteree i ma iso ɔso. 12Mma loikpi ne, ara ɔmumu ma fiɛ ɔmagɛ̃siare kaku ɔkɛlɛ Ɣaa kɔrɛ i kato.
Currently Selected:
1 Samuel L 5: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation