1 Samuel L 6

Makpesegu Ndamu Aɖaka Mabɔ Israel

1Ɔwi wɔ i Bosate ndamu aɖaka ɔɔwe i ma Filistise karɔ̃ iso awa akɔdzɛ ne, 2ma Filistise ɔkpere ma masɔrɛdze gu mawase makarɛ ma sɔ, "Nda ngbɔ boabara Bosate ndamu aɖaka? Miɣere bo kumɛgɔ boabara fiɛ boakpesegu wã bokɛlɛgu wã kasɛkɔ̃."

3Matã mmuai sɔ, "Si mito mikpesegu Israel ɣaa aɖaka mikɛlɛgu ne, midaasese wã kere. Ikote sɔ miasese wũ iɣɛrɛkuso isɔrɛ. Iyɔ ne miana isosarɛ fiɛ miatsue miɖiite sɔ, ne ɔso i Bosate iitara ɔ̃ kɔrɔ̃ i mi iso."

4Ne ma Filistise ɔkarɛ ma sɔ, "Iɖe iɣɛrɛkuso isɔrɛ nɛ boasu bokɛlɛgu wũ?"

Matã mmuai sɔ, "Mitore sikãrɛtɛa aramua aru gu sikãrɛtɛa kulelei kuru i ma Filistise maɖeisoi iru kanya, alasɔ inyɛpɛ̃ igbã iwɛ̃ loba i mi gu mi maɖeisoi iso. 5Mibara aramua kumiamia gu kulelei gɔ nto kunina ara i karɔ̃ iso kumiamia, si miapia Israel ɣaa kuwarɛ. Sianyɔ ɔto ɔ̃anyua kutsueikpadzɛ̃ mi gu mi aɣɔ gu karɔ̃ iso. 6Be ɔso misɛ̃ mi situ lɛ ma Egiptese Igarakpakpa gu ɔbara awe? Gɔ Ɣaa ɔbara ma amumuɣɔ kama ne, mainyua Israel mabi sɔ mamɔɛ̃ ma ɔri marui ɣɛɛ?

7"Kiniɔ ne, mibara kabore ɣɛtɛ, si mibie manantsuĩnyimɔ inyɔ ma loɣe abi kere fiɛ maipia ikpuã i ɔme manya. Miɖi abi i ma kɔrɛ mipia i ɔkpã ame, si ka mikɔra manantsuĩnyimɔ i kabore iso. 8Misu Bosate ndamu aɖaka mipia i kabore ame. Misu ara wa mitoregu sikãrɛtɛa wa mito mikpesegu misese wũ lɛ iɣɛrɛkuso isɔrɛra mipia i kaɖakai ame i kabore ame i wã kuruɛ. Iyɔ si minyua kabore si kakɛlɛ kã mɔmɔ ɔri, 9ɣɛɛ mila miɔnyɔ kã. Si kamɔɛ̃ ɔri kakɛlɛ kã mɔmɔ karɔ̃ ame i Bet-Semes isɛ ne, iyɔ Bosate ɔɖe lobɔ kukpakpi gɔgbe i bo iso. Ɣɛɛ si iiba kumɛɔ ne, iyɔ boatsue sɔ iiɖe Ɣaa ɔɖe nto ɔkpadzɛ̃ bo kutsue, ira nɛ loba i bo ɔri iso kere iɖe."

10Ne ɔso mabara ngbɔ. Masu manantsuĩnyimɔ inyɔ, makɔra ma i kabore iso, ne mamɔɛ̃ ma abi mapia i ɔkpã ame ne. 11Masu Bosate ndamu aɖaka masɛ i kabore ame, ne masu kaɖakai ga ame i kulelei gu aramua wa matoregu sikãrɛtɛa ana pia masɛ i wã kuruɛ ne. 12Manantsuĩnyimɔ ɔɣo ɔri siĩ makɛlɛ Bet-Semes isɛ, masɛ i ɔri iso fiɛ mato mabiɛ i ɔri ɔɖuɖu iso, maisɛnɛkɛ̃ makɛlɛ kuɖearɔ̃ ɣee kubena iso. Ma Filistise maɖeisoi ɔsiai ma isɛ iabo ta Bet-Semes kume iso.

13Kiniɔ ne i ɔwi wɔmɔ ame ne, Bet-Semes maturi ɔwe i kagbolomi ame mala maɔrui kamɔ. Matara anɔ kere, ne manya ndamu aɖaka ne. Gɔ manya wã ne mana isoɣɔ gbaã. 14Kabore ɔsɛ kaba kaatuĩ i itasiare iwɛ̃ kɔrɛ i Bet-Semese Yosua ɔwĩ ame. Maturi ɔkɛkɛ kabore mabara ala ndɔrɛ̃, ne maɖoe manantsuĩnyimɔ masu mafɛ̃ ara matã Bosate lɛ araifɛ̃ isɔrɛ. 15Ma Levise ɔɔmɔɛ̃ Bosate ndamu aɖaka gu kaɖakai lobua iso, nga ame i sikãrɛtɛa aratorea pia, masu masɛ i itasiare iso. Iyi nɛmɔ ne ma Bet-Semese ɔsɔrɛ araifɛ̃ asɔrɛ gu asɔrɛ matã Bosate. 16Ma Filistise maɖeisoi iru ɔnya ara ɔɖuɖu wa mabara i ngbegɔ mmɔ fiɛ makpese makɛlɛ Ekron ku iyi nɛmɔ ame.

17Sikãrɛtɛa aramua wa i ma Filistise ɔsese Bosate lɛ iɣɛrɛkuso isɔrɛ ne, ibiara ɣɛ itã ɔmagɛ̃ ɔwɛ̃ - Asdod, Gaza, Askelon, Gat gu Ekron. 18Ngbɔ ame sikãrɛtɛa kulelei ɣɛ i ma Filistise maɖeisoi iru simagɛ̃ kanya ne, simagɛ̃siare dzɛ matsue abere maki malɔ ku sɛ̃ kumagɛĩ kanya. Itasiare nɛ i ma Levise ɔsu Bosate ndamu aɖaka masia iso i Bet-Semes, Yosua ɔwĩ ame ɔkpese ise lɛ aɖansiɛ i nnɛ loba awe ipɛ ɔwi wɔ matsɛrɛ ara wagbe."

19Ɣɛɛ Ɣaa ɔɖoe ma Bet-Semese sikɔdzɛ alasɔ manyɔ Bosate ndamu aɖaka ame. Ɔmagɛ̃ maturi ɔwe i isoma ame alasɔ ku kɔrɔ̃ teteree i Bosate ɔɖoe maturi mamɔ i ma ndɛ̃, 20ne Bet-Semes maturi ɔkarɛ sɔ, "Nna loawo ɔya i Bosate, Ɣaa sekelea wɔgbe anɔ? Lɛ i aɖaka aakɛlɛ si arui i ngbe?"

21Ne masese makpabo Kiriat-Yearim maturi kɔrɛ sɔ, "Ma Filistise ɔɔkpesegu Bosate ndamu aɖaka mabɔ. Miba miasu wã mikɛlɛgu mi kɔrɛ."

Currently Selected:

1 Samuel L 6: AKP

Highlight

Copy

Compare

Want to have your highlights saved across all your devices? Sign up or sign in