DEUTERONOMY 21
21
Ikpikusoisɔrɛ Itã Ɔturi Wɔ Lokpi Fiɛ Maiɣe Nwɔ Loɖue Wũ
1Mose ɔɣere Israel mabi sɔ: Iba sɔ manya kpise i karɔ̃ ga i Bosate mi Ɣaa to ɔ̃asu ɔtã mi iso ɣɛɛ maiɣe nwɔ loɖue wũ. 2Mi matɔ̃ɖedze gu matɔ̃meɣɛdze to maasɛ mmɔ, masɛ maasusu igu ita i ngbegɔ kpise se, ikɛlɛ ɔmagɛ̃ biara wɔ lobore ɔmatã i mmɔ. 3Iyɔ matɔ̃ɖedze i ɔmagɛ̃ wɔ lobore ɔmatã ɔɖo ngbegɔ i kpise se, aasu nantsuĩibirɔ̃go nɛ loibara karabara inya fiɛ iikpadzɛ̃ ikpuã ana kuiyikuiyi. 4Matɔ̃ɖedze aakɔ ne makɛlɛgu kagbolomi ame, i ngbegɔ maikpɛ̃ ɣee maipia ɔraɖui fiɛ kaworei pia i mmɔ. Mmɔ i kagbolomi ame ne, maafɛ̃ nantsuĩibirɔ̃go simɔ. 5Masɔrɛdze ma nɖe Levi mabibirɛrɛĩ aasɛ makɛlɛ katɔ̃. Ala ma i Bosate mi Ɣaa ɔɖi sɔ masumu si mafere kusɛkusɛ i Bosate iyere ame, si maɣɛ si maɖaɛ amami gu atɔ̃mekaɣɛ ɔɖuɖu atɔ̃me. 6Iyɔ ɔmagɛ̃ wɔ lobore ɔmatã ɔɖo i ngbegɔ kpise se matɔ̃ɖedze, aafore ma nrɔɔ̃ masia i nantsuĩibirɔ̃go nɛ simɔ mafɛ̃ i kagbolomi ame iso. 7Ne ka maaɣɛ sɔ, "Boiɖue nwɔgbe fiɛ boinya nwɔ loɖue wũ ana. 8O Bosate fɔ ikpikusoisɔrɛ nɛgbe i fɔ kaɖe Israel iti, mma aɖi. Daakarɛ fɔ maturi, ɔturi wɔ loiɣɛrɛ ngbe kukpi iɣɛrɛ." Iyɔ ne maɔtã ituriɖue ikpi kuso. 9Ne ɔso mito miaɖi nwɔ loiɣɛrɛ ima nɛ mafere i karɔ̃ iɣɛrɛ i mi iso, alasɔ miɔbara nnɛ loya i Bosate anɔmi ame.
Marɔ̃go Ma Mamɔɛ̃ i Kakpã Ame Iyiri Atɔ̃me
10Mose ɔɣere Israel mabi sɔ: Si Bosate mi Ɣaa ɔtã miɖe mi matsirise iso i kakpã ame fiɛ mimɔɛ̃ mayorɛdze ne, 11si aanya ɔrɔ̃go wɔ nto ɔlɛnyɔ i ma ndɛ̃, gɔ ɔ̃ ara ɔmɔɛ̃-ɔ ɔtu ne, aawo wũ ɔyiri. 12Kɔ wũ kɛlɛgu i fɔ iyo, si atã ɔkparɛ̃ iti si ɔsisi ɔ̃ sirɔĩyuɛ 13si ɔɖi ɔ̃ arapia wa ɔpia mamɔɛ̃ wũ ɔsɛ. Si ɔ̃ɔwe i fɔ iyo fiɛ ɔ̃ɔbiɛ ɔ̃ ɔse gu ɔ̃ ɔnyi kuwa kuwɛ̃ kama ne, iyɔ ka aawo ɔsɛgu wũ aɖe ɔ̃ ɔrã fiɛ ɔ̃ wũ ka ɔ̃aɖe fɔ ɔre. 14Si aisiɖuɛ ɔ̃ itɔ̃me ne, ɖi wũ ɔri si ɔrui ɔkɛlɛ ngbegɔ nlɛ wũ. Iikote sɔ aarɔdɛ̃ wũ ɣee aabara wũ lɛ ɔsande, ala ɔɔsopara wũ ɔso.
Ibiete Kaɖekɔ̃ Ara
15Mose ɔɣere Israel mabi sɔ: Ɔrɛrɛ̃ ɔwɛ̃ ɔyiri marɔ̃go inyɔ, ne ɔsɛ ɔɖuɛ ɔwɛ̃ ɔɖo ɔnyɔare, iba sɔ marɔ̃go inyɔ ɔɖuɖu ɔɣe mabibirɛrɛĩ matã wũ. Ɣɛɛ ne ɔrɔ̃go wɔ ɔ̃ito ɔɖuɛ ɔɖo loɣe ɔbibirɛrɛĩ ɖeakatɔ̃. 16Si ɔrɛrɛ̃ wɔgbe sɔ ɔ̃aɣɛ ɔ̃ karana ɔtã ɔ̃ mabibirɛrɛĩ ne, iikote sɔ ɔ̃asu ɔbibirɛrɛĩ ɖeakatɔ̃ mɔmɔ wɔ kaɖekɔ̃ kaɖe fiɛ ɔɖe ɔrɔ̃go wɔ ɔ̃iɖuɛ ɔbi, ɔtã ɔrɔ̃go wɔ ɔsɛ ɔɖuɛ ɔɖo ɔbibirɛrɛĩ. 17Ikote sɔ ɔ̃afɔ ɔpia sɔ ɔrɔ̃go wɔ ɔ̃iɖuɛ ɔbibirɛrɛĩ nɖe ibiete, iki gɔ ɔ̃asu aka anyɔ i ɔ̃ ara ɔɖuɖu ame ɔtã wũ. Ɔbibirɛrɛĩ wɔmɔ nɖe ɔ̃ ɔse ɔle ɖeakatɔ̃ ikparĩ. Ɔbibirɛrɛĩ ɖeakatɔ̃ kaɖekɔ̃ ɖe ɔ̃ kare.
Atɔ̃me i Ɔbibirɛrɛĩ Wɔ Mba Ɔnɔle Iso
18Mose ɔɣere Israel mabi sɔ: Su sɔ ɔrɛrɛ̃ ba ɔbibirɛrɛĩ wɔ mba ɔnɔle fiɛ ɔ̃isɛ ɔwarɛ ɔ̃ ɔse gu ɔ̃ ɔnyi fiɛ ɔ̃isɛ ɔkã ɔ̃ ɔse gu ɔ̃ ɔnyi atsue, atoasɔ masɛ makpadzɛ̃ wũ kutsue. 19Iyɔ ɔ̃ ɔse gu ɔ̃ ɔnyi si makɔ wũ makɛlɛgu matɔ̃ɖedze kɔrɛ i ɔ̃ ɔmagɛ̃ kayogodɔ̃. 20Mato maaɣere ɔmagɛ̃siare matɔ̃ɖedze sɔ, "Bo ɔbibirɛrɛĩ wɔgbe ba ɔnɔle fiɛ ɔsɛ ɔta ɔya i bo iso. Ɔ̃isɛ ɔkã bo atsue. Ɖeɖei ɔɖe gu tarɛ̃dze ɔɖe." 21Iyɔ ɔmagɛ̃ ame marɛrɛ̃ ɔɖuɖu aapɛ wũ ata ɔkpi. Ikote sɔ miaɖi iranyanyariã i mi ndɛ̃. Ɔbiara i Israel to maanɔ ne fiɛ maanigã.
Mmara Agbãagbã
22Mose ɔɣere Israel mabi sɔ: Si ɔrere ɔbara ikpi siare nɛ ikote sɔ ɔ̃akpi fiɛ masa wũ i kudziri iso ne, 23iikote sɔ mianyua wũ ɔsa i kudziri iso kaɖe ɔsɛ̃. Ikote sɔ mianyɔ sɔ mabiara wũ ku ikpɛnɛ nɛmɔ ame, alasɔ ɔturi ɔrere wɔ masa i kudziri iso ne, ɔpia i Ɣaa sigbarĩ ame. Iikote sɔ mianina karɔ̃ ga i Bosate mi Ɣaa to ɔ̃atã mi lɛ mi kaɖekɔ̃.
Currently Selected:
DEUTERONOMY 21: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation