DEUTERONOMY 27

Matsɛrɛ Bosate Mmara Masia i Ata Iso

1Mose gu Israel makpakpa ɔɣere maturi sɔ, "Mimɔɛ̃ mmara ɔɖuɖu mɛ nto lotã mi nɔme mila. 2Si miɔwara Yordan ɔwore mibo i karɔ̃ ga i Bosate mi Ɣaa to ɔ̃atã mi ne, misu ata wa lomɔ awɛ̃ misɛ si mibala wã ku iba fudza. 3Mitsɛrɛ mmara mɛgbe ɔɖuɖu atɔ̃me misia i ata iso, si miɔwara ɔwore misɛ miabo i karɔ̃ ga i Bosate mi Ɣaa to ɔ̃atã mi iso. Karɔ̃ sɛɛ ku iɖa kaɖe, lɛ kumɛgɔ i Bosate mi mawa Ɣaa ɔɣɛ ɔsɛ mi. 4Si miɔwara Yordan ɔwore ne, miɣedza ata wagbe i Ebal Kube iso, lɛ loɣere mi nɔme, si mikua wã ku iba fudza. 5Mipɛ isɔrɛkasege ku ata i mmɔ mitã Bosate mi Ɣaa. Midaasu ibɔrakpinaa irabarara mibara kuira i ata iso. 6Mipɛ Bosate mi Ɣaa isɔrɛkasege ku karɔ̃ ndɛ̃ ata si misɔrɛ araifɛ̃ asɔrɛ mitã Bosate mi Ɣaa i kã iso. 7Mmɔ ne si misɔrɛ isobuɛ asɔrɛ si miɖe wã mina isoɣɔ i Bosate mi Ɣaa anɔ. 8Ata wa miɣedza iso ne, mitsɛrɛ mmara mɛgbe atɔ̃me ɔɖuɖu kukaakɔ misia iso."

9Kere ne Mose gu masɔrɛdze ma nɖe ma Levise, ɔɣere Israel maturi ɔɖuɖu sɔ, "Israel kaɖe, milo si mikã atsue! Kiniɔ ne miɔkpese Bosate mi Ɣaa maturi. 10Miwarɛ Bosate mi Ɣaa si misiai ɔ̃ mmara gu asɛ̃ra wa lotã mi nɔme."

Sigbarĩ Ala Atsue Idaakã Ɔso

11Iyi nɛmɔ ame i Mose ɔɣere maturi sɔ:

12Si miɔwara Yordan ɔwore ne, kumele gɔgbe loaya i Gerizim Kube iso mafere maturi kusɛkusɛ ne: Kumele nɖe Simon, Levi, Yuda, Isakar, Yosef gu Benyamin. 13Kumele gɔgbe loaya i Ebal Kube iso magbarĩ ne: Kɔ̃ nɖe Ruben, Gad, Aser, Zebulon, Dan gu Naftali.

14Ma Levise aaɣere Israel maturi ɔɖuɖu atɔ̃me wa nsiai ku silɔ teteree sɔ:

15"Sigbarĩ siɖe ɔturi wɔ loabara irapɔa ɣee ɔtore irapɔa nɛ nɖe inyanyara i Bosate anɔ, gɔ iɖe kusɛ̃baradze karabara - ne ɔɣedza ne i iwɛrɛ ame."