DEUTERONOMY 32
32
Mose Kuka
1O kato, kã me atsue, si loaɖeika,
O karɔ̃, nɔ wũ kanya ame atɔ̃me.
2Tã wũ araite si apɛ lɛ kado,
si wũ atɔ̃me si akpakpase lɛ kuɖobiobio.
Akpase lɛ kadowiria i sikua ɣɛtɛ iso,
lɛ kado gbodzoo wɔ nto ɔpɛ ɔfere i sikua ɖɔbɔrɔa iso.
3Loapɛ Bosate iyere imomo.
Ao, mile bo Ɣaa sisiare!
4Ɔ̃ nɖe Itasiare fiɛ ɔ̃ karabara ɔyi,
fiɛ ɔ̃ siri ɔɖuɖu ɔya.
Ɣaa ɖe nukuarese wɔ loisɛ ɔbara iɣɛrɛ kuiwɛ̃,
ɔsɛ ɔbara isɛɛ fiɛ iya.
5Maiɖe ɔnukuare matã wũ,
i ma kunuarɛ ame ne maisiɖe ɔ̃ maturi.
Ɣɛɛ maɖe ɔɣekparɛ nyanyariã ma nna ɔnukuare.
6O madzunisɛĩ gu mma loiɣe iwola,
ɔri wɔgbe iso miatã Bosate kuso?
Iiɖe ɔ̃ nɖe mi Ɔse gu mi Baradze ɣɛɛ?
Iiɖe ɔ̃ lobara mi fiɛ ɔsɛra mi ɣɛɛ?
7Nyigi kokowi,
si adzuĩ siɣekparɛ dzɛ loɔba sife akɔ gbodzoo.
Karɛ fɔ ɔse iyɔ ɔto ɔ̃aɣere-ɔ,
karɛ mi makpakpa iyɔ mato maaɖi ne karɔ̃ mate-ɔ.
8Ɔwi wɔ Nwɔ Lokɔlɛ Ɔɖo ɔɣɛ kaɖekɔ̃ ɔtã kaɖe biara,
fiɛ ɔɣɛ maturi awune ɔɖuɖu ndɛ̃ ne,
ɔsia ame ɔtã maturi
lɛ kumɛgɔ Israel mabibirɛrɛĩ ɔsi kanya.
9Ala Bosate ɔkpɛ nɖe ɔ̃ maturi,
Yakob ɔkparɛ ɔɖi lɛ kaɖekɔ̃ ɔtã so.
10 Bosate ɔnya wũ ɔsu i fafuĩ ame,
i karɔ̃ ga loilɛ fiɛ siwiri sɛ sifuri pelepele.
Ɔpia wũ nrɔɔ̃ fiɛ ɔnyɔ wũ iso,
fiɛ ɔdzuɛ̃ wũ lɛ ɔ̃ inɔmibi awe.
11 Bosate se lɛ finikpo wɔ nsɛ ɔdzuɛ̃ ɔ̃ irodzayo
fiɛ ɔsɛ ɔfɛrɛrɛ ɔki ɔlɔ ɔ̃ abi,
ɔsɛ ɔwarɛ ɔ̃ abue ɔwi biara si ɔmɔɛ̃ wã
ne ɔsɛ ɔsore wã i ɔ̃ abue iso.
12 Bosate ɔnɔwɛ̃ lokɔ wũ.
Ɣaa mama kuwɛ̃ iiwegu wũ.
13Ɔtã wũ ɔɖeiso i karɔ̃ abemi iso
fiɛ ɔtã wũ karɔ̃ iso aɖedziribi ɔɖe.
Ɔtã wũ maɣendu mɛ nɣɛ i ata ame ɔnɛ,
gu ku nnɔĩ ɔbɔrɛgu i ata kpokporoa awo ame.
14Ɔtã wũ ɔna inyɛndu kpɛ̃kpɛkpɛ̃ ɔɖi i manantsuĩ iso gu inyɛndu i masɛrɛrerɔ̃ iso.
Ɔtã wũ masɛrɛrerɔ̃ abi gu masɛrɛtepu ku iɖa
gu akpalasa wa nlɛ abɔrɛ i Basan
ɔtã kamɔ sɛɛ ɔpia abi.
Minɛ wain sɛɛ wɔ lobara sirarã.
15Yesurun#32.15 Yesurun: Ne karɔ̃ nɖe ɔsɛɛ, iɖe iyere mama itã Israel. ɔba ɔ̃ana ara gu atsuele.
Ɔna aɖera ɔɖe ne ɔna so ku iɖa.
Ɔsɛ̃ Ɣaa wɔ lobara wũ,
ne ɔsɛ̃ nwɔ nɖe Itasiare nɛ nɖe ɔ̃ Ɖidze.
16Matã ɔkpɛ̃ sirerɛ ku ma kafɔrɔ̃ aɣɔ
fiɛ ɔnagu ma sikpã i ma anyanya arapɔa iti.
17Masɔrɛ ara matã siwarã lalaa dzɛ loiɖe Ɣaa -
maɣaa ma maiɣe.
Maɖe maɣaa ma lobɔrɛ maya iina ɔpã,
maɣaa ma mi mawa iinigã.
18Mirui minyua Itasiare, nwɔ lola mi lɛ ɔse awe.
Miɣara Ɣaa wɔ lobara mi.
19 Bosate ɔnya nnɛgbe ne ɔsɛ̃ ma
ala ɔ̃ mabibirɛrɛĩ gu mabibirɔ̃gomi ɔpia wũ sikpã ɔso.
20Ne ɔɣɛ sɔ, "Loakɔla wũ anɔ i ma kɔrɛ,
si loanyɔ kumɛgɔ i ma kawirikɔ̃ aase.
Ala ɔtile ɔɣekparɛ maɖe ɔso.
Mabi ma nna ɔnukuare maɖe.
21Matã me lokpɛ̃ sirerɛ iki nnɛ loiɖe ɣaa iti
ne mapia me sikpã ku ma arapɔa wa nna kusia.
Loatã makpɛ̃ sirerɛ iki i kaɖe ga loiɖe maturi iti.
Loapia ma sikpã ku kaɖe ga nna karɔ̃inɔ.
22Ala wũ sikpã ɔmɔɛ̃ lɛ kumɛgɔ ɔtɔ sɛ ɔtsue,
nwɔ loatsue ɔkɛlɛ ta kayirinɔ i kukpi aɖe.
Sito siatsuedza karɔ̃ ku kã ɔraɖui.
Ne siatsuedza ta abe sikaĩ ana.
23"Loafu kukpakpi ikpe i ma iso,
fiɛ loapɛ wũ mirɛ̃ losese ma iso.
24Loasese kukãsiare i ma iso fiɛ maakpadzɛ̃ maɖi akui,
loasese atikesi gu sinyɛpɛ̃ nyanyariã i ma iso.
Loasese ma mabɔi agberenyɛ.
Loasese ibɛ nɛ nsɛ i sise ame kabiɛtɛ i ma iso.
25Ipɛmi to iabara ma, mma nna mabi i sivurã iso;
ifɔ̃ to iamɔɛ̃ maturi i ma ayo kame.
Maporoporoi gu mabitɛ to maawɔ,
mabiɛtɛ gu atifudza ana aawɔ.
26Loɣɛ sɔ tee loasamera ma
fiɛ loanukutu ma loɖi i maturi awune kanyigi ame.
27Ɣɛɛ lonigã sɔ matsirise to maabara aɣiãra,
fiɛ makpɛ̃guse iibanɔ ne karɔ̃
ne maaɣɛ sɔ, 'Bo ɔle bosu boɖeiso,
iiɖe Bosate ɔɖe lobara nwagbe ɔɖuɖu.' "
28Israel maturi ɖe kaɖe ga nna adzuni ɖuɖuuɖu,
mana iwola kuiwɛ̃.
29Si anɔ makpa ne, tee mato maanɔ nnɛgbe karɔ̃.
Maatsue nnɛ nto iaba i ma iso ku kawirikɔ̃!
30Nda i ɔturi ɔwɛ̃ aatere ɔsiai maturi kakpi?
Ɣee nda i maturi inyɔ atã maturi kukpi kuweo ɔrui matere?
Tagbi ma Itasiare ɔsu ma ɔpia nrɔɔ̃,
tagbi si Bosate ɔɖi ma nrɔɔ̃.
31Ala ma itasiare iise lɛ bo Itasiare,
atoa bo matsirise ɣe ne.
32Ma wain awɛĩ ɔbɔrɛ i Sodom are ame
gu nwa mapia i Gomora ame.
Adziribi wa asɛ aɣɔ̃ ɔyigu kabiɛtɛ,
fiɛ wã kabekpã ndu ba ɔɖo.
33Ma wain ɖe aɣɛ kabiɛtɛ.
Ise lɛ ɣɛreba kabiɛtɛ nyanyariã.
34"Loledza nnɛgbe losɛ
fiɛ losɛ̃ ne lopia i wũ kakɔlakɔ̃.
35Wũ ɔkpɛ nɖe ibara itikuso; loatã kuso.
Ɔwi kɛkɛĩ to ɔba gɔ mato maarɔ̃.
Ma kukpakpi iyi ɔɔɣo iro
fiɛ ma iwɔ to iba i ma iso mala."
36 Bosate to ɔ̃aɣɛgu ɔ̃ maturi atɔ̃me
fiɛ ɔ̃anyɔ ɔ̃ maɖabo nnya
si ɔnya sɔ ɔle ɔɔro ma
fiɛ kuwɛ̃ iisikuti, ɔsande ɣee ɔsɛgusoi.
37Ɔ̃akarɛ sɔ, "Kiniɔ, lɛ i ma aɣɔ pia,
itasiare nɛ nɖe ma katarikɔ̃ ɣɛɛ?
38Lɛ i aɣɔ wa lonɛ ma asɔrɛ iɖa
fiɛ anɛ wain wɔ mabara arainɛ asɔrɛ pia?
Mitã mata si mabuai mi!
Mitã si matã mi inyɔiso!
39"Minyɔ kiniɔ sɔ wũ mɔmɔ Mme nɖe Ɔ̃!
Fiɛ ɣaa mama kuwɛ̃ siina i wũ kama.
Nsɛ loɖue ɔturi fiɛ nsɛ lobɔ wũ ngbã.
Nsɛ lopia ɔturi igbɛ fiɛ nsɛ losa wũ.
Kuwɛ̃ na ɔ̃awo ɔpɛ ɔfɔ i wũ nrɔɔ̃ ame.
40Lokɔlɛ wũ kɔrɔ̃ kato lokã sɔ:
Ayi kumɛgɔ lopia ngbã ɔwi daaro ne,
41si loruɛ wũ ipɛmi fiɛa
fiɛ loamɔɛ̃ ne i itɔ̃meiɣɛ ame ne,
loabara wũ matsirise lotikuso.
Loatã mma lotsiri me kuso.
42Loatã wũ mirɛ̃ ɔrɛ̃gu ima,
gɔ i wũ ipɛmi to ikɛkɛ sina.
Mma lorɔ̃ i kakpã ame gu mma mamɔɛ̃ i kakpã ame ima maanɛ.
Loatu matsirise matɔ̃ɖedze ati."
43Nɖebi maturi, mile Bosate maturi, si mitã Ɣaa makpabo ɔɖuɖu si masumu wũ
alasɔ ɔto ɔ̃akpadzɛ̃ mma loɖue ɔ̃ maɖabo kutsue.
Ɔto ɔ̃abara ɔ̃ matsirise ɔtikuso
fiɛ ɔto ɔ̃abara ikpikusoisɔrɛ ɔtã ɔ̃ maturi gu karɔ̃.
44Mose ɔkɔ Yosua, Nun ɔbibirɛrɛĩ makɛlɛ maturi katɔ̃, ne Mose ɔɣɛ kuka atɔ̃me ɔɖuɖu gɔ maturi ɔɖuɖu ɔkã atsue.
Mose Kawirikɔ̃ Asɛra
45Ɔwi wɔ Mose ɔro atɔ̃me wagbe ɔɖuɖu ɔɣere Israel mabi ɔɖuɖu ne, 46ɔɣere ma sɔ, "Mimɔɛ̃ atɔ̃me ɔɖuɖu wa loɣere mi nɔme mipia i ɔtu ame. Misu wã mite mi mabi, si mawarɛ mmara atɔ̃me ɔɖuɖu wagbe kukaakɔ. 47Aiɖe atsuɛpɛ̃ kere atã mi, wã nɖe mi ngbã. Iki i wã iso ne, miasɛ ngbã tagbaraa i karɔ̃ ga mito miasɛ miafɔ i Yordan ɔwore kama fiɛ kaaɖe mi kare iso."
Mose To Ɔ̃akpi i Nebo Kube Iso
48Iyi nɛmɔ ame iso i Bosate ɔɣere Mose sɔ, 49"Kɛlɛ Abarim abe siairãso iso i Moab karɔ̃ iso i anɔ ku Yeriko. Ya Nebo Kube si anyɔ Kanaan karɔ̃ ga nto loasu lotã Israel mabi lɛ ma mɔmɔ kare asese. 50Ato aakpi i kube gɔ aya fiɛ aakɛlɛ fɔ mawa mɛrɛ̃ kɔrɛ, lɛ kumɛgɔ i fɔ ɔnyibi Aron ɔkpi i Xor Kube iso, ɔkɛlɛ ɔ̃ mawa mɛrɛ̃ kɔrɛ awe. 51Ala mi inyɔ ɔɖuɖu iiɖe ɔnukuare mitã me, i Israel mabi anɔ i Meriba Kades i Zin Fafuĩ ame, ngbegɔ ndu sɛ mifuĩdza so mibɔrɛ. Miiɖi wũ isekele mite i Israel mabi ndɛ̃. 52Ne ɔso ato aanyɔ karɔ̃ asese i igu ame kere ɣɛɛ aibasia fɔ kukpa, i karɔ̃ ga nto loasu lotã Israel mabi iso anya."
Currently Selected:
DEUTERONOMY 32: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation