Palamba’anna Pasuro’a I Yesus 12
12
Pamarinta insang parinsa’i lo’a palola’a i Yesus
1Jaji di waktu nanga dinen barik mulai Raja Herodes dinen maningkama lo’a kumpulan anak ulun maama i Yesus sapa dua, to’ daparinsa’i. 2Dasuro’ uno’ dinen i Yakobus sairunna i Yohanes nanna pedangen. 3Maminna dauno’ i Yakobus dinen, dabele kakadaka gulungan tau Yahudiin lo’a basa uno’a dinen, dasuro’ bapi tentarana datiang maningkam lo’a i Petrus. Adariin awan dinen di aso iramianga Roti yang Na’anen Araragiin.
4Maminna datingkam i Petrus, dataan barik di sao ukumanen. Dasuro’ang lo’a tanganna ambata panyagaien. Jaji ambata panyagaien inangen andian ampat bangkulunganna yang manyagaien lo’a i Petrus. Kira bangkulunganna panyagaien dinen andian ampat-ampat mantuariin. Jaji tujuanna i Herodes dinen, maminna akaus daramiang aso Palaloi dinen, i Petrus dinen to’ daurusi di arona tau bayu’en. Pal. 12:1-27. 5Jaji i Petrus daia mamin ilalam sao ukumanen, poangsi bado’a lapoang ira kumpulan anak ulun maama i Yesus. Dado’aang tapat-tapat dinen i Petrus.
I Petrus daruarang dari sao ukumanen
6Di malama waktu nanga to’ daurusina i Petrus di arona tau bayu’en, i Petruspi tindo’. Daingkat dua bali nanna rantaien lo’a panyagai duaan. Di mambangan sao ukumanen andian bea panyagai. 7Jaji sadinga poang barik mondoka malaikata Paraampuanen akadeng ibiringa. Arawang tapat sao ukumanen kole’a. Jaji datampak babanga i Petrus manyuro’ asading. Jaji manjarum, “Akadengko babariar!” ingka kenang. Laloang alao’ bea rantaien dari tanganna i Petrus.
8Mamin dinen barik manjarum bapi malaikaten, “Pamaami kainnu, se’. Pakai sapatunu,” ingka kenang. Jaji dalola’ani bea jaruma dinen. Mamin dinen manjarum bapi, “Pakai sape langkenu, lola’ak,” ingka kenang. 9Jaji dalola’ barik malaikat dinen maruar dari sao ukumanen. Poangsi i Petrus daasanang jalu paitangen poang kalena. Na’an daasanang jalu tapat-tapat adariin kole’a malaikata Alatala.
10Maminna dalaloi kosanda’ manyagaien yang seraan nanna yang kaduaan kole’da’, mondok barik lo’a mambangan basiin, yang mobosen lo’a dalan banuaan. Mambangan dinen laloang bae’ang kalena, jaji minsaluan ira. Maminna minsaluan, lamba’ ira duaan di dalanen barik, sadinga poang inyapa malaikat dinen marantang lo’a i Petrus.
11Maminna dinen baru’ barik darasa kole’a i Petrus jalu laan-laanen dinen yang adariin lo’a. Jaji jarumi kalena, “Awandi’en baru’ kutamu kole’a Paraampuanen tapat-tapat manyuro’ malaikata paruar lo’ku’ dari tanganna i Herodes nanna ambata jalu yang to’ danuun kole’a tau Yahudiin lo’ku’,” ingka kenang i Petrus.
12Jaji maminna datamu dinen, i Petrus lamba’ lo’a saona i Maria, induna i Yohanes, yang asan tapata i Yohanes Markus. Di saona dinen bayu’ tauen patanga’an bakumpul bado’a. 13Jaji manodok mambangan isuliangen, mambangan yang lo’a dalanen, andian suro’an babainye seraan, i Rode asanna, yang mondok to’ mamae’ mambanganen. 14Mondok lo’a dinen, dakilala barik unyina i Petrus, laloang babariar barik intamana bapi lasana sasauna nyawana. Laloang dajarumang lo’a ambata arakawanna kole’a andianna i Petrus insaluan. Na’an lagi’ dabae’ mambanganen. 15“Ai, baundingko?” ingka kenang barik jarumda’ lo’a i Rode. Poangsi i Rode dinen bakaras masanna andian i Petrus inang insaluan. Laloang manjarum ira dinen, “Ha, dinen malaikata poang,” ingka kenang.
16Jaji i Petruspi manodok lapoangpi di mambanganen. Jaji dabae’ barik mambanganen kole’da’, dabele andian lalo i Petrus. Jaji barik tatakau. 17Jaji barik i Petrus dagayangang tanganna, mamase’ang araunyi. Maminna dinen datutul kausana lo’da’, kole’a Paraampuanka’ maminna mantat lo’a minsaluan lo’a sao ukumanen. Dasuro’ lo’da’ manjarumang dongo dinen lo’a i Yakobus sairunna i Yesus nanna ambata arasairunen bokanen. Maminna dinen i Petrus marantang saoda’ lamba’ lo’a kosan bokanen.
18Imbara asoon barik, bagado tapat ambata tentaraan. Akaus atena manyariin lo’a i Petrus. 19Dasuro’ sari tapat kole’a i Herodes, poangsi na’an dadua’ang. Maminna dinen gulungan panyagaien dinen dasuro’ madap lo’a, laloang daselediki. Maminna daselediki dinen daukum mate. Maminna dinen lamba’ i Herodes dinen marantang banua dinen, lamba’ lo’a banua Kaisarea laloang lalako’ inang.
Kamateanna i Herodes
20Jaji arasi Raja Herodes lo’a tau banua Tirus nanna banua Sidon. Jaji sipakat ira laloang mondok lo’a banuaan to’ sijaruman nanna rajaan. Dapat ira sipakat nanna i Blastus, tau patugas maurusi saona i Herodes inang. Dasuro’ awa pasikule’angen antarana Raja Herodes nanna urangda’ kole’a tau negerida’ dinen marap lo’a jalu kaanen dari kangkamanna Raja Herodes.
21Jaji mondok bayana to’ dapasidua’ang, arayu’ Raja Herodes nanna kain rajaan laloang aduduk di kursi rajaan. Maminna dinen manjarum rajaan di arona tau bayu’en. 22Jaji tau mandalingaan dinen laloang mamuko-muko mamudi lo’a rajaan, “Okan lagi’ unyi mantuariin dinen,” ingka, “Unyina Alatala,” ingka kenang tauen. 23Jaji sikadang kayana rabarik dalao’i ukum lo’a Raja Herodes kole’a malaikata Paraampuanen. Kole’a mainya’ daia manarima’ pudian awan dinen, na’an dapalinang tujuan pudian dinen lo’a Alatala. Daia laloang mate inang, mate dakaan olang-olang.#12:23 Sabenara, na’an itamu olang-olang atau ulas angkaanen lo’a. Jarum asliin dinen antara duaan.
24Jaji insang tadongo Jaruma Paraampuanen, insang atambor.
25Jaji maminna akaus karajana i Barnabas nanna i Saulus, laloang mole’ ira dari Yerusalem. Daawa bea i Yohanes dinen, asan tapata i Yohanes Markus. PalPa. 11:30.
Currently Selected:
Palamba’anna Pasuro’a I Yesus 12: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
