Palamba’anna Pasuro’a I Yesus 4
4
I Petrus nanna i Yohanes daawa di arona katua adat agamaan
1Jaji patanga’an manjaruma ira i Petrus nanna i Yohanes inang, damansangi kole’da’ ambata imamen, kole’a kapala’ panyagai Saona Alatala nanna ambata tau golongan Sadukiin. PalPa. 23:8. 2Ajau’ nyawada’ manaantalingana jarumda’ duaan kole’a ilalam jarumda’ manjarumangen i Yesus, tau mateen daasan tio’ balik. 3Jaji barik ira dinen datingkam. Dataan barik di sao ukumanen inang sampai imbara asoon. Nampi idurusi kole’a mamin to’ malam matasoon. 4Poangsi di antarana tau manaantalingaan de’i, bayu’ bea yang parasaya’en. Jaji batamba barik tau parasaya’en dinen kira-kira lima ribu mantuariin ambatda’.
5Jaji di imbara asoon barik bakumpul ambata gulungan paurus urang Yahudiin, ambata toa-toaan, ambata guru agamaan di banua Yerusalem. 6Andian ira i Anas imam baraa’en nanna i Kayapas, i Yohanes, i Aleksander nanna ambata gulungan arasairunna imam baraa’en dinen. 7Jaji ira i Petrus nanna i Yohanes daawa bea lo’a ruang pangadelan dinen, to’ daselediki. Maminna mondok lo’a dinen, dakatoani barik, “Dari sakin mandua’angen panamu manyuro’ pande mamola jalu awan dinen? Dari kuasana intain, dari asanna intain?” ingka kenang ira matoanina lo’da’ duaan.
8Jaji dasauti kole’a i Petrus. Daia dinen dakuasai tapat kole’a Sumangat Bareseen. “Araama’ku’kin tau Paurus Israel nanna toa-toaan,” ingka kenang, 9“ti’ to’ isari kasala’anam kakaru’ katagal basa maamam lo’a tau tamateen kakina, to’ itamu ikin ratina tau dinen dapat ipamaam, kenang ratina. 10Arung itamu ikin nanna samuana urangka’ tau Israelen. Yang manyuro’ tau tamateen kakina dapat akadeng ijolona aronin ilalam ka’ada’an sehat, ialalo kole’a asanna i Yesus Kristus tau Nasaret. Ia bua dinen yang ipanandapaan ikin di kayu saliben, yang dakatio’ baliken barik kole’a Alatala. 11Ia bua batu dinen ilalam jarum yang datulisangen ilalam Jaruma Alatala,
Andian batu yang na’anen ipaguna ikin pamola saoen, ikalibakang. Batu dinen barik yang padariin batu palin pentingen di pambangunanen,
ingka kenangjo ilalam Jaruma Alatala. Msm. 118:22.
12“Jaji kosan tau bokan maminna i Yesus yang dapaten matio’ tau dari ukum dosaan. Kole’a kosan asan mantuari bokanen inyaunga galung suanen yang bakuasaan pande matio’ lo’a tauen dari ukum dosaan,” ingka kenang manjaruma i Petrus lo’a gulungan paurusen dinen. Mat. 1:21; Yoh. 3:16; 6:39,40; 12:46; 14:6; PalPa. 10:43; Rm. 3:20; 1Tim. 2:5-6; Ibr. 9:22.
13Jaji dabele barik kole’a gulungan paurusen dinen baranina ira i Petrus nanna i Yohanes, tabulanga’ ira. Kole’a datamu lo’da’ duaan tau na’anen sakola, tau biasa. Laloang datamu barik ratina, kole’a lalo sarilao’a nanna i Yesus awan dinenna. 14Poangsi to’ mamalas jarumda’, badidit. Kole’a tau tamateen kakinajo dinen mamin akadeng inang ibiringda’. 15Jaji barik dasuro’ minsaluan ira duaan dari ruang pangadelan. Mamin dapainsaluan baru’ sisarian jarum, 16“Ai lo’a maama jalu ianuun iki’ lo’da’ duaan? Kosan dalanka’ manasal lo’a tanda panyunyua dapolaan kole’da’. Kole’a mamin datamu kole’a samuana ambata panduduk Yerusalem. 17Suma poang isari dalanna mainto’ na’anna atambor lagi’ lo’a tauen. Arung irarasiang jaji iki’. Ipase’ang majar mawa asan dinen,” ingka kenang manjaruma ira paurusen dinen sijarumannen sama diri’a.
18Jaji maminna dinen barik, ira duaanpi dinen dasuro’ mole’ ilalam. Dapase’ang ira manjarum barik atau majar atas asanna i Yesus. 19Poangsi dasauti barik kole’da’ ira i Petrus nanna i Yohanes, “Bele poang ikin, inde mandua’en di arona Alatala. Malola’ani panamuninaka? Atau malola’ani panamuna Alatalaaka? 20Kole’a na’an patutkam atadang manjarumang jalu dinen. Ai poang maminen ikita, ai poang maminen idalinga, musti dinen ijarumang ikam,” ingka kenang manjaruma ira i Petrus nanna i Yohanes manyautina lo’a ambata paurusen.
21Jaji dararasi tapat ira dinen kole’a paurusen laloang dapalapas. Kosan akalda’ to’ maukum lo’da’ kole’a mamudi kausa tauen lo’a Alatala katagal basa panyunyuana yang dakitaan dinen. 22Kole’a tau tamateen kakina yang dapamaamen malaloi panyunyuada’ dinen mamin balangke bea umura. Mamin ampat pulo’ taun labi umura.
23Jaji maminna ira i Petrus nanna i Yohanes dapalapas, mole’ ira duaan lo’a ambata arakawanna. Laloang datutul kole’da’ jaruma ambata gulungan imam baraa’en nanna tau atoaan. 24Jaji maminna barik dadalinga laporanda’ dinen, laloang bado’a ira sasarata, “O Paraampuane yang mangkamen ibona samuana, yang mamolaan tana’en nanna suanen, yang mamolaan jawaan nanna ambata gulungan isi’a, bado’akam lo’u. Pal. 20:11; Neh. 9:6; Msm. 146:6. 25Iko buajo manyuro’en Sumangat Baresenu marantang jarum di’en malaloi arabakinam baki’ Raja Daud, suro’annu dinen,
Mai bakayana arasina ambata tau okanen Yahudiin? Mai poang dapasipakatanga to’ manu jalu na’anen patut adariin? 26Kole’a ambata raja duniaan mamansangi lo’a Paraampuanen. Sigulungan ambata tau mangkamen di duniaan, to’ malawan lo’a tau datugasen kole’a Paraampuanen,
ingka kenangjo bayana baki’ Daud yang datulisangen di Jaruma Alatala. Msm. 2:1-2.
27“Jaji kenang lalo adarina barik di’en, awan jaruma baki’ raja Daud. Raja Herodes nanna Gubernur Pontius Pilatus dinen sipakat di banua di’en nanda’ ambata gulungan anak kanturunanna baki’ Israel nanna ambata tau kanturunan bokanen. To’ malawan lo’a i Yesus, suro’annu yang bareseen dinen, yang itugasen iko. Mat. 27:1-2; Mk. 15:1; Lk. 23:1,7-11; Yoh. 18:28-29. 28Jalu dapasipakatangen kole’da’ dinen jalu kenanga memen kaputusannu. Ialalo dinen kuasanu nanna panamunu yang mamutusiin manyuro’ adari awan dinen. Ipadarina poang barik kole’da’.
29“Na, taantalinga poang iko Paraampuane lo’a tikomanda’. Manyuro’ poangko barani lo’am suro’annu di’en itiang manjarumang Dongonu lo’a tauen. 2Tim. 1:17. 30Pamaam ambata tau apadisenko. Mamolako panyunyua nanna jalu laan-laanen atas asanna suro’annu yang bareseen, i Yesus dinen,” ingka kenang manjaruma ilalam do’ada’.
31Maminna akaus bado’ada’ awan dinen, dasauti bua do’ada’ kole’a Alatala. Dainjak-injakang sao kosanda’ bakumpulen inang. Samuada’ dakuasai barik kole’a Sumangat Bareseen. Jaji daawa jaruma Alatala barik lo’a tauen. Insang barani barik mawana.
Tau parasaya’en sigulungan
32Jaji ambata tau parasaya’en dinen tio’ saate, sapikir. Ambata gulungan jaluna kosan tau manggap diri’a ampunaan. Darasa kapulunganna kausana. PalPa. 2:44-45. 33Ambata pasuro’a i Yesus dinen bakuasa tapat manyaksida’ lo’a tio’ balika Paraampuanka’ Yesus. Kenang bea Alatala daia maruap-ruap kamaamanna atena lo’da’ kausana. 34Mondok di kumpulanda’ inang kosan jaji tau marinsa’ antarada’. Kole’a intain tau ampunaan saona atau tana’a, dapet rabarik. Laloang daawa ragana dinen 35lo’a pasuro’a i Yesus. Datawa’i barik kole’da’ lo’a tau yang andianen kaparuluanna.
36Jaji awan dinen bea i Yusup, kanturunan Lewi dinen, yang barasal dari pulau Siprus. Andian bapi asanna i Yusup dameangen kole’da’ ambata pasuro’a i Yesus. Asanna yang kaduaan, i Barnabas. Jaji ratina Barnabas, tau yang pamaam ate tau. 37Jaji i Barnabas daia, dapet tana’a, laloang daantat ragana lo’a ambata pasuro’a i Yesus.
Currently Selected:
Palamba’anna Pasuro’a I Yesus 4: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
