Yohanes 9
9
I Yesus pamaam matana tau bautaan
1Jaji barik nanga lamba’a i Yesus, andian tau bauta dakitaan kole’a i Yesus. Tau bautaan dinen asala dari akeke’a, tarangkat dari paranakanga. 2Jaji barik mangatoani dinen palola’a lo’a i Yesus, “O Pa’ Guru, ai tau bautaan dinen yang manyuro’ bautaan lo’a, dosanaka, dosana tamatoanaaka?” ingka kenang palola’a manjaruma lo’a i Yesus.
3Jaji barik dasauti kole’a i Yesus, “Dinen okan bea dosa diri’a, okan bea dosana tamatoana,” ingka kenang. “Dinen mainto’ datamuna kuasana panyunyuana Alatala yang lo’aan,” ingka kenang lo’da’. 4-5“Launna andianku’ di duniaan, iak lalo di’en yang parawangiin, iak lalo jalu arawangen yang itiang lo’a tau di duniaan,” ingka kenang lo’da’. “Di balangkenapi matasoon, arungki’ mawa karajana tau yang manyuro’en lo’ku’. Kole’a ti’ ona’ malam asoon kosan barik tau bakaraja, ati’en mamin araun jaluun,” ingka kenang sama’ jaruma i Yesus lo’da’. Mat. 5:14; Yoh. 8:12.
6Jaji barik mamin akaus jaruma dinen, i Yesus malasu lo’a tana’en mamola petak. Jaji petaken dinen dalulukang lo’a matana tau yang bautaan dinen. 7Jaji barik maminna dinen, dasuro’ dinen tau bautaan kole’a i Yesus, “Se’ kusuk matanu di kolam Siloam,” ingka kenang. Ratina dinen Siloam dalam jarum banuaka’ dinen, manyuro’. Jaji barik dakusuk dinen matana tau bautaan. Jaji mole’ balik, maam barik mamelena.
8Jaji barik dinen gulungan kawanna dinen yang biasa maita lo’a pot-pot mamita duiten, sikatoanan, “Ai tau dinen,” ingka, “okan te’ daia yang biasa aduduk mamita duit lo’a tauen?” ingka kenang sijarumanda’.
9“Ialalo,” ingka sapa dua.
Andian bapi sapa dua, “Okan!” ingka. “Balu’a poang dinen,” ingka dinen sapa dua sijarumanna sama diri’a.
Jaji barik manjarum diri’a tau bautaan dinen, “Iak lalo,” ingka kenang manyautina tau bautaan dinen.
10Jaji barik dakatoani kole’a tauen dinen tau bautaan, “Ai manyuro’ maamen barik dinen matanu?” ingka kenang ira.
11Jaji barik manyauti dinen tau bautaan, “Tau dinen yang iasanen i Yesus, ia yang pamaamen lo’ku’. Daia mamola petaken. Jaji petaken dinen dalulukang lo’a mataku’. Maminna dinen dasuro’ kusuk. Mamin kukusuk, sadinga poang maama mataku’,” ingka kenang manyautina tau bautaan dinen lo’da’.
12Jaji barik manjarum dinen ira, “Disasi daia dinen?” ingka kenang.
Jaji barik, “Taua, na’anak manamu,” ingka kenang manyautina tau bautaan lo’da’.
Gulungan tau Parisiin mamaraksa lo’a tau yang dapamaamen matana
13Jaji barik tau bautaan de’i, daawa lo’a gulungan tau Parisiin. 14Jaji dinen asona i Yesus mamola petaken dinen pamaami matana tau bautaan, dinen aso Sabaten. 15Jaji tau Parisiin dinen mamaraksa tau bautaan dinen ratina maama. Jaji barik manjarum tau bautaan dinen, “Tau dinen malulukang petaken di mataku’. Mamin dinen kukusuk. Mamin barik kukusuk, maam mataku’,” ingka kenang tau bautaan lo’a tau Parisiin.
16Jaji barik ira dinen sapa dua manjarum, “Tau pamaamiin dinen na’an patut dari nanna Alatala. Ti’ dari nanna Alatala, na’an patut malanggar adat aso Sabaten,” ingka kenang.
Jaji ira dinen manjarum sapa dua, “Ti’ tau badosaan na’an patut pande mamola panyunyuana balu’a dinen,” ingka kenang. Jaji barik ira dinen na’an sikule’ jaruma, situngkat.
17Jaji barik ira tau Parisiin dinen matoani bapi lo’a tau bautaan dinen, “Tau dinen, iasan iko pamaam matanu. Na, ai lo’a pikirannu lo’a tau dinen?” ingka kenang ira.
Jaji manjarum tau bautaan dinen, “Ia lalo panjaruma Alatala,” ingka kenang tau bautaan lo’a tau Parisiin dinen.
18Poangsi tau Parisiin dinen alibakpi parasaya’. Daasanang okan tapat tau bautaan yang maamen matana barik. Jaji dasuro’ mondok tamatoana. 19Jaji barik ira dinen matoani lo’a tamatoana, “Ai lo’a, di’ lalo anakin yang bautaan? Ati’ kenang, asi lo’a barik maama matana?” ingka kenang.
20Jaji barik dasauti kole’a tamatoana dinen, “Bauta lalo, bauta tarangkat dari paranakanga. Itamuna ikam kole’a saja anakama,” ingka kenang. 21“Poangsi yang manyuro’ maamen, na’an itamu ikam. Na’an bea itamu intain yang pamaamiin dinen,” ingka kenang ira lo’a tau Parisiin. “Katoani poang ikin. Sukup mamin umura, mamin datamu ratina,” ingka kenang tamatoana manyautina. 22Ratina kenanga jarumda’ dinen, atakut dinen ira lo’a toa Yahudiin. Kole’a mamin de’i sipakat ira gulungan toa-toaan. Intain, ingka, mangaku’ parasaya’ kole’a i Yesus lalo Kristus dinen, tau mangaku’en dinen to’ dauser dari sao sambayangen. Na’an pande lagi’ manyemba inang. 23Dinen lalo ratina jarumda’ dinen, “Katoani poang ikin. Sukup mamin umura,” ingka’en dinen.
24Jaji tabalik ira manyuro’ mondok lo’a tau bautaan tarangkat paranakanga dinen. Jaji manjarum, “Daiko ti’ tapat jarumu, arungko basumpa di arona Alatala,” ingka kenang. “Kole’a mamin itamu tau dinen yang pamaamiin lo’u, dinen tau badosaan,” ingka kenang ira lo’a tau bautaan.
25Jaji barik, “Taua. Yang kutamu poang dinen maama mataku’. Ati’en ijoloon na’an kukita jaluun. Awandi’en barik kukita,” ingka kenang. “Na’anak manamu tau badosa, na’anak manamu tau ai,” ingka kenang.
26Jaji dakatoani bapi kole’da’, “Ai lo’a tau dinen? Jalu ai datiang pamaami matanu?” ingka kenang jaruma lo’a tau bautaan dinen.
27“Asi ikatoananga ikin balik-balik? Maminla’ kujarumang lo’in, alibakkin poang manaantalinga,” ingka. “Ai daikin, to’ padari palola’a tau dinen bea?” ingka kenang jaruma tau bautaan lo’da’.
28Jaji barik ira dinen pajau’ lo’a tau bautaan dinen, “Na daiko, iko lalo palola’a tau dinen,” ingka kenang ira dinen lo’a tau bautaan. “Daikam di’en palola’a baki’ Musa. 29Kole’a dinen kuasana baki’ Musa dinen itamu sijarumanna nanna Alatala,” ingka kenang ira. “Ati’en tau di’en saja na’an itamu asala!” ingka kenang dinen ira lo’a tau bautaan.
30Jaji barik manjarum dinen tau bautaan, “Jarumin dinen sampai bangonna. Na’an itamu ikin asala, poangsi daia datamu pamaam mataku’!” ingka kenang lo’da’. 31“Mamin itamu iki’ kole’a Alatala alibak manaantalinga lo’a tau badosaan. Yang tau paduliin lo’a, yang malola’aniin panamuna, dinen yang dakamainya’iin. Lo’a tau balu’a dinen Alatala mainya’ manaantalinga,” ingka kenang. 32“Dari akata duniaan na’an kala’ idalinga iki’ dongona tau datamuun pamaam matana tau bautaan. 33Ti’ tau di’en na’an tarangkat dari nanna Alatala, na’an dakule’ manu jalu aien,” ingka kenang tau bautaan lo’a gulungan tau Parisiin dinen.
34Jaji barik manyauti dinen tau Parisiin lo’a tau bautaan, “Na, daiko dinen tau badosako memen dari paranakangu. Baraniko kakaru’ majar lo’am!” ingka kenang ira. Jaji barik tau bautaan dinen dauser dari sao sambayangen dinen kole’da’.
Tau na’anen parasaya’ dasama’ang nanna tau bautaan
35Jaji barik dadalinga dongona tau bautaan kole’a i Yesus, dausera dari sao sambayangen. Jaji barik i Yesus dinen pasidua’ang kalena nanna tau bautaan dinen. Jaji barik, “Ai, mainya’ko parasaya’ lo’a Anak Mantuariin?” ingka kenang i Yesus lo’a tau bautaan dinen.
36“Jaji kenang, Ama’e, jarumang lo’ku’ mainto’ kutamuna, mainto’ parasaya’ku’ lo’a,” ingka kenang tau bautaan dinen.
37Jaji manjarum barik dinen i Yesus lo’a tau bautaan dinen, “Maminko maita. Iak lalo di’en Anak Mantuariin yang sijarumanen nannu,” ingka kenang i Yesus lo’a tau bautaan dinen.
38Jaji barik manyauti tau bautaan dinen lo’a i Yesus, “O Paraampuanku’, parasaya’ak barik,” ingka kenang tau bautaan laloang malingkutut di arona i Yesus.
39Rabarik manjarum i Yesus lo’a tau bautaan dinen, “Daiak pamondokku’ di’en, mainto’ tau yang bautaan dinen dakule’ mamele. Yang asanen kalena dakule’ mamele, mainto’ padari bauta rabarik,” ingka kenang jaruma i Yesus lo’a tau bautaan.
40Jaji barik andian ira tau Parisiin manaantalinga inang. Jaji barik manjarum lo’a i Yesus, “Ai daiko masannu lo’am bauta yang na’anenkam bauta?” ingka kenang dinen ira lo’a i Yesus.
41Jaji barik dasauti kole’a i Yesus, “Daikin ti’en tapat-tapat tau bauta, jaji na’ankin mananggung dosa. Poangsi daikin asan kalenin ikule’ mamele. Kole’a dinen lalo daikin mananggung dosanin,” ingka kenang i Yesus lo’da’.
Currently Selected:
Yohanes 9: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
