Lukas 2

I Yesus daparanakang

Mat. 1:18-25

1Jaji waktu nanga dinen barik Raja Agustus, raja Roma dinen mamarinta lo’a ambata tau kangkamanna manyuro’ mandaptar diri’a itiang sensus. 2-3Jaji samuana mandaptar diri’a lo’a banua diri’a sera-serana. Waktu nanga Raja Agustus dinen mamarintana, jaji i Kirenius dinen padari gubernur di negara Siria. Dinen lalo pandaptaran yang mulakataan.

4-5Jaji barik i Yusuppi dinen tarangkat bea to’ mandaptar kalena, ira nanna taju’a dinen yang iasanen i Maria. I Maria dinen araunting. Jaji lamba’ ira dari banua Nasaret daerah Galilea dinen lo’a daerah Yudea, banua Betlehem, banuana Raja Daudjo ijoloon. Kole’a i Yusuppi lalo dinen kanturunan Raja Daud. 6Jaji barik lamba’ dinen, mondok lo’a Betlehem, inang di Betlehem bainyenapi yang i Mariaan mamin mondok bulanna. Jaji apadis batanga. 7Apadisa batanga dinen laloang aranak, babakaan. Barik dinen anaka daliliti nanna kainen, dapalenga’ di pampalungen. Ratina dapalenga’a di pampalungen kole’a ira dua lakunyeen dinen de’i na’an mandua’ang kosan di sao tumpangan. Ialalo dapalenga’a dinen di pampalungen.

Paranakanga i Yesus dajarumang lo’a tau panuntuani dombaan

8Jaji mainso’ di banua dinen de’i, andian tau maruangi dombaan di malamen. 9Barik dinen paita malaikata Paraampuanen. Mondok dinen kamaamanna Alatala yang manyalang kulilingen. Darawangi kausa jalu dakitaan kole’a panuntuani dombaan dinen. Atakut jaji dinen tau panuntuaniin mamele jalu arawangen.

10Jaji barik manjarum dinen malaikaten lo’a panuntuani dombaan dinen, “Ada’kin atakuten. Kole’a daiak di’en pamondokku’ to’ kujarumang lo’in dongo maamen yang manyuro’ sasau jaji nyawana urangin samuanin,” ingka kenang. 11“Kole’a aso di’en bua andian tau iparanakangen di banua Betlehem, Raja Pangatio’en. Ialalo Kristus Paraampuanka’, tau yang dabayaangen dinen,” ingka kenang dinen jaruma malaikaten. 12“Jaji di’en lalo tandana lo’in, ti’ idua’ang ona’ ikin nangkanaken daliliti nanna kainen, dapalenga’ di pampalungen, dinen lalo iaan,” ingka kenang malaikaten lo’a panuntuani dombaan.

13Jaji barik sadinga poang paitana andian bapi bayu’ tapat malaikata Alatala ibiringa malaikat dinen. Jaji mamudi-mudi lo’a Alatala,

14Ipudi asanna Alatala di kosanna, yang palin bajao’en iaset.

Di duniaanpi di’en ipamondokang sikamaamanen antarana tau yang dakamainya’iin,

ingka kenang mamudina malaikaten lo’a Alatala.

15Mamin dinen barik, gulungan malaikaten dinen mole’ balik lo’a Surga. Maminna mole’ lo’a Surga dinen, ambata panuntuani dombaan dinen sijaruman sera lo’a seraan, “Se’,” ingka kenang siawana, “lamba’ki’ lo’a Betlehem mamele jalu yang dajarumangen dinen kole’a Paraampuanen, ti’en ai lo’a balu’a,” ingka kenang sijarumanna panuntuani dombaan.

16Jaji barik babariar lamba’a samuana lo’a dinen. Maminna lamba’ dinen lo’a Betlehem, andian sidua’ nanna ira talu panak dinen, i Maria, i Yusup, nanna anaka dinen. Nangkanak dinen lenga’ di pampalungen. 17Dabele awan dinen, jaji manjarum barik panuntuani dombaan, manutul lo’a jalu maminen dakita, lo’a jalu maminen dadalinga dinen, jaruma malaikaten. 18Tau manaantalingaanpi dinen tatakau mandalingana lo’a jaruma panuntuani dombaan. 19Jaji manonong barik i Maria mamikirang samuana jalu adariin dinen, datanami nyawaan. 20Jaji panuntuani dombaan dinen mole’ nanna sasauna nyawana. Mamudi-mudi barik lo’a Alatala, kole’a jalu dadalingaan, jalu dakitaan. Kole’a jalu dakitaan dinen sabangon bua nanna jalu dajarumangen kole’a malaikaten.

I Yesus daawa lo’a Saona Alatala

21Jaji maminna dinen nangkanak dinen mondok umur lapan aso, daia dinen to’ dasunat. Jaji maminna barik dasunat, dameang barik asanna, i Yesus, asan yang dameangen kole’a malaikaten nampina iparauntingang. Im. 12:3; Lk. 1:31.

22-24Mamin dinen, mamin tuli asona to’ malola’ani sara pamaresena induna yang mole’ aranaken dinen, to’ mawa pamindara lo’a Alatala ira awan parintana di Ukuma Paraampuanen. Yang dasuro’ awa dinen,

Dua burung takukur atau dua anak burung daraan,

ingka kenang parintana, awan di Ukuma baki’ Musa dinen. Im. 12:6-8. Jaji barik lamba’a i Yusup nanna i Maria lo’a saona Alatala di Yerusalem itiang mawa pamindara pamareseen dinen, daawa bea nangkanak dinen to’ manyera lo’a Alatala. Kole’a andian bea dinen datulisangen di Ukuma Paraampuanen,

Samuana anak danginanen, ti’ babakaan arung ilaanang itiang lo’a Paraampuanen padari ia ampunaan,

ingka kenang. Pal. 13:2,12.

25Jaji barik di banua dinen de’i, andian tau, i Simeon asanna. I Simeon dinen tau tapaten, yang palin malola’aniin lo’a Alatala. Daia dinen manyari tapat lo’a tau dabayaangen dinen yang to’ pamaam nyawana ambata gulungan tua Israelen. Jaji andian Sumangat Bareseen nanna, 26yang maminen mamaya lo’a. Daia, ingka na’an pande mate ti’en nampi mangita lo’a Kristus yang tau datugasen kole’a Paraampuanen. 27Jaji barik daia dinen andian Sumangata Alatala yang mawaan lo’a lo’a Saona Alatala. Jaji mondok bea inang nangkanak dinen i Yesus yang daawaan kole’a tamatoana, to’ manu lo’a malola’ani atoranna Ukuma Alatala. 28Jaji dala dinen nangkanaken kole’a i Simeon, daawiin. Jaji dapudi Alatala sarata manjarum,

29“Na Paraampuane, akaus barik tugasku’ suro’annu.

“Paruarangak marantang duniaan nanna yang maamen awan lalo jarum bayanu lo’ku’.

30“Kole’a maminak lalo mangita lo’a tau to’ matio’en lo’am, yang isuro’angen iko, 31yang ipayoangen iko di arona tauen kira tatak banuaan.

32“Ialalo jalu arawangen itiang mawa pudi lo’a anak katio’annu tau Israelen, itiang marawangi dalanna tau bokanen yang okanen Yahudi,” ingka kenang manjaruma i Simeon. Yes. 42:6; 49:6; 52:10.

33Jaji maminna barik tamatoana nangkanak dinen manaantalinga jaruma i Simeon awan dinen manjarumang anaka, dairapi dinen tatakau. 34Jaji pamaam bapi i Simeon lo’da’ sarata manjarum lo’a induna nangkanaken,

“Nangkanak di’en ona’ tugasa, bayu’ tau Israelen to’ daangkatangen. Bayu’ bea to’ dapaindoren.

“Ia bea ona’ yang padari tandaan yang to’ dapajau’en rabarik kole’a tauen, 35manyuro’ paita barik pikiran isi’ ate tauen.

“Jaji daikopi diri’u, susa ona’ atenu. Tungan jalu dasusuken nanna pedang bataramen, awan dinen ona’ susanu,” ingka kenang manjaruma i Simeon lo’a i Maria.

36Jaji andian bea inang panjaruma Alatala tamatoaan yang tau bainye jandaan, i Hana asanna, anaka i Panuel, tau kanturunanna i Aser. Jaji tamatoa dinenjo, tuju taun launna lalako’a nanna lakina. 37Mamin dinen sampai umura lapan pulo’ ampat taun, tio’ awan bainye jandaan lapoang. Tau dinen na’an kala’ marantang unjang saona Alatala. Asoon malamen daia dinen manyemba lo’a Alatala. Bado’a daia sarata bapuasa. 38Jaji pas nanga dinen bua sidua’a i Hana nanda’ talu panaken yang maminen mondok lo’a saona Alatala. Jaji barik mangasuang nyawa daia lo’a Alatala, manjarumang nangkanak dinen lo’a tauen. Intain poang yang manyariin tapat lo’a mondoka asona Alatala to’ malapasang lo’a banua Yerusalem dari kajau’anda’, lo’da’ dajarumang dongo dinen.

39Jaji maminna barik akaus dalola’ani ambata paratoran Ukuma Paraampuan, mole’ barik ira dinen talu panaken lo’a banuana, banua Nasaret dinen. Mat. 2:23. 40Nangkanak dinen barik insang mainsit, insang bakajung. Saja maam dinen ambata panamuna dinen. Dakamainya’i bua kole’a Alatala.

I Yesus sisautan jarum nanna ambata toa adaten

41Jaji barik i Yusup dinen nanna i Maria maira taun-maira taun, tamba lapoang maramiang aso Palaloien di Yerusalem. Pal. 12:1-27; Ul. 16:1-8. 42Jaji maminna tuli dua belas taun umura i Yesus, lamba’ ira dinen talu panaken to’ maraming dinen awan kiraso. 43Jaji barik dinen maminna daramiang dinen Palaloien, mole’ dinen aratamatoana. I Yesuspi dinen arantang di Yerusalem. Poangsi na’an datamu kole’da’. 44Daasanang to’ andian nanda’ arakawanna bokanen yang sama lamba’ nanda’ dinen. Jaji mamin barik lamba’ saso, mulai ira dinen manyari lo’a antarana arakawanna, arasairunna. 45Jaji dabele barik, kosan. Jaji mole’ balik lo’a Yerusalem, manyari lo’a.

46Jaji barik dinen balaun. Talung aso launna manyari lo’din, manyari lo’din arainduna i Yesus nanna amana, baru’ barik dadua’ang nangkanak dinen i Yesus di saona Alatala. Aduduk nanna guruun manaantalinga lo’da’ sambil mangatoanang lo’da’. 47Jaji samuana tauen dinen tatakau manaantalingana lo’a nangkanaken dinen. Sampai dinen panamuna, pandena manyauti lo’da’ ambata guruun. 48Jaji barik sidua’ nanna aratamatoana, tatakau dinen ira. Jaji manjarum induna, “Anake, ai ipolaan iko awan di’en, mamolanu lo’am?” ingka kenang. “Puaskam manyariin nanna ama’, na’anko idua’ang,” ingka kenang i Maria.

49Jaji barik dasauti kole’a i Yesus, “Asi lo’a, na’anak itamu ikin musti indi’angen di saona Ama’ku’? Ambukinak to’ isari,” ingka kenang manjaruma i Yesus lo’a arainduna. 50Jaji barik irapi manaantalingaan dinen na’an datamu ratina manyautina awan dinen.

51Jaji barik dinen i Yesus mole’ balik sarata nanna aratamatoana lo’a banua Nasaret. Malola’ani lapoangpi bua lo’a panamuda’. Jaji samuana jalu dinen de’i, kadarianna dinen, dataro’ lapoang ilalam atena i Mariaan. 52I Yesuspi dinen insang mainsita mantuarina, insang maam bea panamuna pasitimbangang jalu maamen nanna jalu ajau’en, batamba pande. Insang dakamainya’i bua kole’a Alatala, kole’a gulungan mantuariin. 1Sam. 2:26; Ams. 3:4.

Currently Selected:

Lukas 2: EBE

Highlight

Copy

Compare