Lukas 6

Okan Ukuma Alatala yang palin baraa’en

Mat. 12:1-8; Mk. 2:23-28

1Di aso Sabaten barik, aso sangarianna tau Yahudiin, i Yesus lamba’ nanna palola’a malaloi dinen lo’a rawang umaan. Jaji di lamba’a dinen mamoto’ gandomen dinen kakapit, dakusuk nanna tanganna laloang dakaan. Ul. 23:25. 2Jaji barik manjarum tau Parisiin dinen, “Ai ratina karajanin dinen mamoto’ang gandom? Na’anki’ pande di adatka’ bakaraja di aso sangarianen,” ingka kenang manjaruma tau Parisiin.

3Jaji dasauti barik kole’a i Yesus, “O, asi bea ipase’anga? Ai daikin, na’ankin kala’ mambasa tutulan datulisangen lo’a Raja Daud, arabaki’ka’ yang ijoloon? Jaji di mase’a batanga baki’ Daud nanna kawanna, 4daiapi intama lo’a saona Alatala. Dakaan barik roti jalu dapanyorongangen itiang lo’a Alatala, dameang bua lo’a kawanna. Okan dinen jalu pande ikaan lo’a tau biasaan, suma imam poang. Na’an bea manyuro’ sala’ lo’a, kapisi okan imam ira baki’ Daud, jalu mase’ batanga,” ingka kenang lo’da’. Im. 24:9; 1Sam. 21:1-6.

5Jaji manjarum bapi i Yesus lo’da’, “Jaji daiak di’en Anak Mantuariin Paraampuanak lalo. Samuana iak matoren. Di aso Sabaten ka’ kenanga,” ingka kenang i Yesus manyautina.

I Yesus dapase’ang pamaam tau yang tamateen tanganna sabala’ di aso Sabaten

Mat. 12:9-14; Mk. 3:1-6

6Jaji di aso Sabaten bapi i Yesus intama bapi lo’a sao sambayangen majar lo’a tauen. Jaji andian indinangen babakaan yang tau tamateen tanganna katoen. 7Jaji ambata tau Parisiin nanna toa adaten maimpa’ mamele kasala’anna i Yesus, ati’en mainya’ pamaami tau dinen di aso Sabaten, kole’a baingin to’ manuntut sala’a. 8Jaji tujuanna nyawada’ dinen mamin datamu kole’a i Yesus. Jaji manjarum lo’a tau tamateen tanganna dinen, “Lo’di’kojo. Akadengko di arona tauen,” ingka kenang. Jaji dalola’ani bua jaruma i Yesus.

9Mamin dinen barik i Yesus manjarum lo’da’, “Mangatoaniak lo’in, ai yang daparuarangen lo’ka’ di aso Sabaten? Papadisi tauaka, atau manggulungi? Mauno’ tauaka, ataupun matio’ tau?” ingka kenang manjaruma i Yesus lo’da’.

10Jaji barik mamele bapi i Yesus kuliling lo’da’ laloang manjarum lo’a tau tamateen tanganna dinen, “Tanggeang tangannu!” ingka kenang. Datanggeang tanganna laloang maam barik dinen tau apadisen tanganna, mole’ asal. 11Jaji ajau’ barik nyawada’ tau Parisiin nanna toa adaten, mulai sipakat barik manyari panamu to’ manu lo’a i Yesus.

I Yesus manugas lo’da’ dua belasen

Mat. 10:1-4; Mk. 3:13-19a

12Jaji di waktu nanga dinen i Yesus inait di ukiten to’ bado’a. Jaji samalam-malam bado’anna sampai mondok imbara asoon. 13Imbara asoon barik dinen daia mangalong lo’da’ gulungan ambata palola’a, laloang daile’i tau antarada’. Jaji yang daile’iin ira dua belasen yang datugas padari pasuro’a. 14Asanna dinen ira dua belasen, ari Simon yang dameang bapi asanna kole’a i Yesus, i Petrus. Mamin dinen arina i Petrus dinen ialalo i Andreas. Mamin dinen ari Yakobus, i Yohanes, i Pilipus, i Bartolomeus. 15Mamin dinen ari Matius, nanna i Tomas. Andian bea ari Yakobus anaka i Alpeus. Mamin dinen i Simon dari partai Patriot dinen. 16Mamin dinen ari Yudas anaka i Yakobus nanna i Yudas Iskariot yang tau maduangen dinen lo’a i Yesus lo’a musuna mainto’ dakule’a datingkam.

Tau malola’en daasan bauntung

Mat. 4:23-25; 5:1-12

17Maminna dinen barik i Yesus tador nanda’ dari ukit dinen de’i laloang akadeng di tana’ rataan. Bayu’ tauen babangkulungen inang. Bayu’ ambata palola’a, ambata tau bokanenpi bayu’ bea. Andian tau dari ambata banua daerah Yudea, tau dari Yerusalem, tau dari biring danoon daerah Tirus nanna Sidon. 18Jaji mondok dinen gulungan tauen to’ manaantalinga lo’a i Yesus, to’ suro’ pamaam kalena lo’a. Ambata tau dakaru jalu ajau’en laloang padari maam barik. 19Tau dinen samuana pakokoloan to’ manjaput lo’a kole’a andianna kuasa maruar lo’a yang pandeen pamaam pamadisda’.

20Jaji barik i Yesus mamele lo’a palola’a dinen laloang manjarum, “Iki’ yang tau masikinen, bauntungki’, kole’a iki’ lalo ona’ yang to’ padari panduduk kangkamanna Alatala,” ingka kenang manjaruma.

21“Iki’ yang tau mase’ batangka’ awandi’en, bauntungki’ bua, kole’a iki’ lalo ona’ yang to’ bosoren,” ingka kenang.

“Iki’ yang tau anangisen awandi’en, bauntungki’ bua, kole’a iki’ lalo ona’ yang tatawaan,” ingka kenang.

22“Ti’ ikin palola’ku’ Anak Mantuariin datamu kole’a tauen, dakalibakangkin rabarik, arabuluun ate tauen lo’in, dapajau’kin barik, daasankin ajau’, bauntungkin. 1Ptr. 4:14. 23Arung sasau nyawaka’ ti’ awan dinen. Arungki’ marajuk-rajuk lasana sasauna nyawaka’. Kole’a baraa ona’ opa’ka’ di Surga. Ira yang manuun lo’in dinen saja manyuli lo’a arabaki’da’. Kole’a awan dinen lalojo gulungan panjaruma Alatala daparinsa’ina kole’a arabaki’da’ dinen,” ingka kenang i Yesus lo’da’. 2Taw. 36:16; PalPa. 7:52.

Tau alibaken malola’ daasan marinsa’ ona’

24“Mase’ poang nyawanin ona’ ikin yang tau maamen tio’in. Kole’a mamin itarima’ kausa ikin kamaamannin,” ingka kenang.

25“Mase’ poang nyawanin ona’ ikin yang tau maminen bosor. Kole’a ona’kin to’ mase’ batangin,” ingka kenang.

“Mase’ poang nyawanin ona’ ikin yang tau tatawaan awandi’en. Kole’a ikin lalo ona’ yang to’ ajau’ nyawanin, to’ anangis,” ingka kenang.

26“Mase’ poang nyawanin ona’ ikin yang tau dapudi kausa tauen. Kole’a awan dinen lalo sontona ambata tau asanen kalena panjaruma Alatalajo dinen poangsi okan. Dapudi beajo kole’a arabaki’da’ dinen,” ingka kenang i Yesus lo’da’.

Ada’ki’ manyari balasanen

Mat. 5:38-48; 7:12a

27“Tetapkin ona’ dakalibakang tau. Poangsi awan ikin yang mainya’en manaantalinga lo’ku’, manjarumak lo’in, musuka’ arung ikasaang iki’. Arungki’ maam lo’a ambata tau mangalibakangen lo’ka’. 28Ambata tau patuturiin lo’ka’, arung ipitaang jalu maamen. Ambata tau ajau’en lo’ka’, arung ido’aang iki’. 29Ti’en andian tau manampar lo’a lindo’ka’ sabala’, arung ikoengang bapi dinen lindo’ka’ sabala’, ipalaloang datampar bapi sabala’. Ti’en ampuroka’ dala tau, ada’ ipase’anga bapi dinen sapeka’. Iparuarang bapi sapeka’. 30Ti’ andian tau to’ mamita jaluun lo’ka’, arung imeang iki’. Ti’ andian jaluka’ dala tau, ada’ ala mole’a,” ingka kenang. 31“Jaji basaka’ lo’a tauen kenang. Ati’en daiki’ kakadakka’, kakadaka bea tauen. Dinla basa ipakaien lo’a tauen,” ingka kenang i Yesus lo’da’. Mat. 7:12.

32“Asi lo’a, daiki’ ti’ mangasaangka’ poang lo’a tau mangasaangen lo’ka’, lo’a musuka’ na’an, andian opa’ka’? Tentu kosan. Gulungan tau badosaanpi dinen ka’ kenanga basana lo’a tauen. 33Ti’ de’i maamki’ poang lo’a tau yang maamen lo’ka’, na’anki’ maam lo’a bokanen, andian opa’ka? Tentu kosan. Gulungan tau badosaanpi dinen ka’ kenanga basana lo’a tauen. 34Mainya’ki’ poang pinjamang lo’a tau yang dakule’en mamayar utanga, andian opa’ka’? Gulungan tau badosaanpi mainya’ kenang lo’a tauen,” ingka kenang. 35“Daiki’ ada’ kenangen. Gulungan musuka’ arung ikasaang iki’. Arungki’ maam lo’a. Arungki’ painjamang jaluun lo’a tauen. Ada’ bea marapen to’ dapole’a lo’ka’. Baru’ baraa opa’ka’. Baru’ki’ manyuli lo’a Ama’ka’ di Surga yang Tau Palin Bakuasaan. Kole’a daia dinen sama rata maama lo’a tauen, kapisi lo’a tau na’anen datamu mangasuang nyawa, kapi lo’a tau palin ajau’en basana. 36Awan lalo pangamase’ina Ama’ka’ lo’a tauen, arung sabangon mangamase’ika’ lo’a tauen,” ingka kenang manjaruma i Yesus lo’da’.

Ada’ iawa ate bakarasen yang pajau’en lo’a tauen

Mat. 7:1-5

37“Ada’ki’ mawa ate bakarasen. Ada’ pasala’en lo’a tauen, mainto’ na’anka’ dapasala’. Ada’ki’ manyopo lo’a tauen, mainto’ daiki’pi na’anki’ dasopo. Arungki’ mamponi poang lo’a tauen mainto’ daiki’pi rabarik daamponi bea. 38Arungki’ mainya’ mameang lo’a tauen, baru’ki’ dabalas, dameangki’ bua. Takaran dinen lo’ka’ tentu apano’ jaji, tentu datakan, darengong-rengongang, tentu lolo to pano’a yang datungge’angen lo’ka’. Kole’a sesuai nanna takaran mameangka’ lo’a tauen, awan dinen bea mamalasa lo’ka’,” ingka kenang i Yesus lo’da’.#6:38 Sasil sama sasili.

39Jaji dajarumang bapi lo’da’ sama’ jarum di’en, “Ai lo’a, pandeaka tau bautaan mauluang tau bautaan? Tentu na’an. Yang tau bautaan ati’ mauluang lo’a tau bautaan ona’ to’ alao’ dua-duana ilalam loang kaliin,” ingka kenang. Mat. 15:14. 40“Yang guruun,” ingka, “tentu ia jaji iboen. Na’an patut murita baraa lo’a guruna. Poangsi muriten ti’ mamin lulus, tentu manyuli bua lo’a guruna,” ingka kenang i Yesus lo’da’. Mat. 10:24-25; Yoh. 13:16; 15:20.

41“Asi lo’a daiki’ ibelena iki’ jalu akeke’en di matana arasairunka’, padahal pakayuun di mata diri’ka’ pande na’an ipaduli? 42Baraniki’ kakaru’ manjarum lo’a, Arasairunku’e, se’ jalu akeke’en di matanu kudunjang. Padahal pakayuun di mata diri’ka’ pande na’an ipaduli! Dinen lalo tau mamis baba’en masam atena. Yang maamen, arung idunjang iki’ tajolo pakayuun yang di mataka’en. Baru’ maam mataka’. Itamu iki’ barik maunjang jalu akeke’en di matana arasairunka’,” ingka kenang i Yesus lo’da’. #6:42 Semut diseberang lautan nampak. Gaja di talapak mata tidak nampak.

Dari basana ikilalana tauen

Mat. 7:16-20; 12:34b-35

43“Umpamana akat kayuun, akat yang maamen na’an mainya’ ambua’ bua’ ajau’en. Kenang bea akat yang ajau’en na’an mainya’ ambua’ bua’ maamen. 44Ikilala bua iki’, ibele iki’ dari bua’a. Umpamana bua’ araan na’an mainya’ iala di akat jalu arapati’en. Umpamana bua’ angguren, na’an mainya’ iala di akat jalu arapati’en. 45Iki’ tau maamen, tentu jalu maamen yang ibobosangen iki’ dari ateka’, kole’a jalu maamen lalo yang itanami nyawaan. Iki’ tau ajau’en tentu jalu ajau’en yang ibobosangen iki’ dari ateka’, kole’a jalu ajau’en lalo yang itanami nyawaan,” ingka kenang. “Kole’a dari isi’a ateka’ lalo mobosa jarumka’,” ingka kenang i Yesus lo’da’. Mat. 12:33-34.

Tau manaantalingaan andian dua baranana

Mat. 7:24-27

46“Asi lo’a daikin masanen lo’ku’, Paraampuane, O Paraampuanku’, ikin lo’ku’? Padahal na’ankin bua malola’ani jarumku’! 47Jaji mamakai sama’ jarumak lo’a tau yang mondoken lo’ku’, yang tau mandalingaan lo’ku’, yang malola’aniin bua lo’a jarumku’. 48Ia dinen kuasan awan tau yang mamola saona. Jaji dakaliang dinen pakayuna, bajalam dakalianga, sampai mondok lo’a batuanen. Jaji mondok barik danum baraa’en, bajaras danumen manumpuna lo’a saona, sao dinen na’an pakaji’. Tagap kole’a maama polana,” ingka kenang.

49“Na, tau yang mandalingaan lo’a jarumku’ di’en, yang na’anen malola’ani, dinen kusama’ang nanna tau mamola saona lo’a tana’en poang kenang. Na’an imeang pakayuna. Jaji bajaras barik danumen manumpuun lo’a, sao dinen araba’, saja arurun sao dinen,” ingka kenang i Yesus lo’da’.

Currently Selected:

Lukas 6: EBE

Highlight

Copy

Compare