Lukas 9

I Yesus manugas lo’a palola’a

Mat. 10:5-15; Mk. 6:7-13

1Jaji barik i Yesus mawa kombong lo’da’ dua belasen. Dameang lo’da’ panamu, dameang kuasa datiang maruru gulungan jalu ajau’en sarata pamaami padisa tauen. 2Jaji datugas barik ira itiang manjarumang dongo maamen kole’a mainso’ mamin to’ adari baya Alatala to’ mangkama lo’ka’ awan rajaan. Sarata dasuro’ pamaam lo’a tau apadisen. 3Jaji barik paba’i lo’da’, “Ada’kin mawa jaluun di palamba’annin dinen. Tungkaten, tasen, rotiin, duiten, kain salinanen ada’ mawaan,” ingka kenang. 4“Ati’enkin mondok lo’a sao tauen, ada’kin mamalin-malinen lo’din-lo’din. Lalako’kin poang inang launnin nampi tarangkat. 5Ati’enkin ona’ sidua’ nanna tau yang alibaken manarima’ lo’in, alibaken manaantalinga lo’a jarumin, to’ tarangkatkin barik, pipirikang poang kakinin maunjang kutu tana’en, tandana lalo dinen tanggung jawap diri’a,” ingka kenang paba’ina i Yesus lo’a palola’a. Lk. 10:4-11; PalPa. 13:51.

6Jaji tarangkat barik ira malamba’i banua dinen-banua dinen manjarumang dongo maamen sarata pamaami padisa tauen.

Dongona i Yesus dadalinga kole’a Raja Herodes

Mat. 14:1-12; Mk. 6:14-29

7Jaji Raja Herodes mandalinga dongoon lo’a ambata panyunyua dinen. Jaji rararao barik pikiranna kole’a andianna tau masanen lo’a i Yesus dinen, daasan i Yohanes Pambaptis yang maminen tio’ balik. 8Andian bea dari bokan yang masanen lo’a baki’ Eliajo yang paitangen kalena barik lo’a tauen. Andian bea sapa dua tauen masanen andian panjaruma Alatala yang ijoloon yang tio’ baliken. Mat. 16:14; Mk. 8:28; Lk. 9:19. 9Poangsi Raja Herodes daia manjarum, “Yang i Yohanes Pambaptis dinen mamin kutataki kalonga. Jaji intainsi bapi di’en yang dongona kudalingaan?” ingka kenang. Jaji dasari to’ pasidua’ang kalena nanna i Yesus dinen.

I Yesus pangkaan lo’a tau lima ribuun

Mat. 14:13-21; Mk. 6:30-44; Yoh. 6:1-14

10Jaji barik mondok ambata pasuro’a i Yesus dinen mole’ dari tugasa malapor ambata gulungan jalu dakarajaan. Jaji ira dinen barik daawa kole’a i Yesus, dakapi’ang lo’a banua seraan asanna Betsaida. 11Poangsi di tarangkatda’ dinen, tau bayu’en dapat manamu. Jaji malola’ dinen ira lo’a dinen. Dasialoi bua kole’a i Yesus, dajarumang lo’da’ to’ adarina baya Alatala to’ mangkama lo’ka’ awan rajaan. Ambata tau antarada’ dinen yang apadisen dapamaam kole’a.

12Jaji balangke barik matasoon, mondok ira dua belasen lo’a. Jaji barik, “Kosan di’en kosan ateengen. Jaji manjarumko lo’da’ tau bayu’en manyuro’ lamba’ lo’a banua sibiring-biringanen nanka’ itiang mamali jalu kaan laloang samalam inang,” ingka kenang palola’a lo’a.

13Poangsi manjarum bapi i Yesus manyauti lo’da’, “Na’an. Ikin poang pangkaanen lo’da’,” ingka kenang.

Jaji manyauti bapi ira, “Rotika’ di’en suma lima papaka. Laukka’ dua sakalana,” ingka kenang. “Ai dinen, to’ ikam isuro’ lamba’ mamali jalu kaan itiang lo’da’ tau bayu’en di’en?” ingka kenang ira dinen lo’a i Yesus. 14Jaji ambata tau bayu’en dinen kira-kira lima ribu yang babakaan poang.

Jaji manjarum i Yesus lo’a palola’a, “Suro’ lo’da’ aduduk bapakang-pakang, kira-kira lima pulo’ mantuariin sapakang,” ingka kenang i Yesus lo’da’. 15Jaji dalola’ani bua kole’a palola’a awan bua jaruma i Yesus dinen. 16Mamin dinen dajaput dinen lauken nanna rotiin kole’a i Yesus laloang maningara’ lo’a suanen bado’a lo’a Alatala. Maminna barik dado’aang jalu kaan dinen, dabala’-bala’ dinen laloang dameang lo’a palola’a, dasuro’ manyorongi lo’a tauen. 17Samuada’ ira dinen yang bayu’en angkaan bosor-bosor kausana. Mamin akaus angkaan, dakapulungang bapi dinen tunanna jalu kaanna, sampai bayu’a tunanna. Andian dua belas babakul apano’ nanna bobor rotiin nanna lauken.

I Yesus daaku’ Kristus kole’a i Petrus

Mat. 16:13-19; Mk. 8:27-29

18Jaji di kakalenana barik, i Yesus bado’a. Andian bea palola’a inang nanna. Jaji mangatoani lo’da’, “Ai lo’a jaruma tauen masanen lo’ku’? Intainak kalo’a?” ingka kenang.

19Dasauti barik kole’da’, “Daiko daasanko baki’ Elia. Tauen sapa dua masan lo’u panjaruma Alatala yang maminen tio’ balik. Andian bapi masanen lo’u i Yohanes Pambaptis,” ingka kenang ira. Mat. 14:1-2; Mk. 6:14-15; Lk. 9:7-8.

20Rabarik i Yesus matoani bapi lo’da’, “Poangsi ai lo’a daikin? Intainak kalo’in?” ingka kenang lo’da’.

Mamin dinen i Petrus yang manyautiin, “Iko lalo Kristusen yang tau dabayaangen kole’a Alatala lo’am,” ingka kenang manjaruma i Petrus. Yoh. 6:68-69.

21Mamin dinen i Yesus paba’i lo’da’ nanna bakarasen, dapase’ang datamu tau.

I Yesus manjarumang memen matena nanna tio’ balika

Mat. 16:20-28; Mk. 8:30—9:1

22Jaji manjarum daia, “Daiak di’en Anak Mantuariin arung dadua’ bayu’ parinsa’en. Arungak dakalibakang kole’a toa-toaan, ambata imam baraa’en nanna toa adaten. Laloang arungak iduno’. Tuli talung asoon maminna mateku’, baru’ak dakatio’ balik,” ingka kenang lo’da’.

23Maminna dinen barik, daia manjarum lo’da’ kausana, “Intain tau yang to’ malola’en lo’ku’ arung idunjang panamu diri’a. Arung tio’ mate malola’a lo’ku’, kapi iparinsa’i, kapisi mate di kayu salipen. Arung awan dinen kiraso tio’a. Mat. 10:38; Lk. 14:27. 24Kole’a intain tau manyagaien to’ katio’ poang kalena, dinen ona’ yang arugiin to’ mate idukum salaun-launna. Intain dinen mainya’en parugi kalena, sampai mainya’ mate malola’a lo’ku’, dinen yang bauntungen to’ tio’ salaun-launna,” ingka kenang i Yesus lo’da’. Mat. 10:39; Lk. 17:33; Yoh. 12:25. 25“Kole’a ai gunana daiki’ ampuna kausa harta duniaan ati’en iparugi nyawaka’ manyuro’ dalao’i nanna ukum salaun-launnaan? 26Intain tau yang bawa’ mangaku’en lo’ku’ nanna gulungan jarumku’, daiakpi di’en Anak Mantuariin bawa’ak bea daiak ona’ to’ mangaku’ lo’a. Ona’ di mondokku’ nanna kamaamanku’ yang palin arawangen, ialalo kamaamanna Ama’ku’ nanna ambata malaikat yang bareseen, bawa’ak mangaku’ lo’a tau yang awan dinen,” ingka kenang i Yesus lo’da’. 27“Jaji manjarumak lo’in tapat-tapat. Andian di antara tau tambaan nanka’ indi’angen,” ingka, “ti’ nampi daia mamele adarina baya Alatala to’ mangkama lo’ka’ awan rajaan, nampi daia mate. Nampina matena to’ mamele memen adarina kangkamanna,” ingka kenang i Yesus lo’da’.

Tapalin batora i Yesus

Mat. 17:1-8; Mk. 9:2-8

28Jaji kira-kira saminggu maminna jaruma i Yesus dinen, inait ira taluun, ari Yakobus, i Yohanes, i Petrus, daawa inait lo’a ukiten kole’a i Yesus, to’ bado’a inang. 29Jaji bado’a i Yesus inangen, tapalin batora. Kainna dinen padari ute’-ute’ jaji, bakilat-kilat. 30Jaji paita barik inang, andian mantuari dua sijarumanen nanna i Yesus, ialalo arabaki’da’ yang ijoloon, baki’ Musa nanna baki’ Elia, 31yang paitaan barik inang nanna kamaamanna yang palin arawangen. Yang dapasijarumangen kole’da’, matena i Yesus yang to’ dapadariin barik kole’a i Yesus inang di Yerusalem.

32Jaji i Petrus nanna arakawana dinen tatindo’an de’i. Poangsi dabeleang jaji matada’ barik, dakita barik arawanga kamaamanna i Yesus nanna ira duaan yang akadengen ibiringa. 33Jaji to’ inyap barik ira duaan, i Petruspi manjarum lo’a i Yesus, “O Pa’ Guru, bauntungkam malola’en lo’a di’en. Suba ipola ikam kakalang taluun, sera itiang lo’u, sera lo’a baki’ Musa, sera lo’a baki’ Elia,” ingka kenang manjaruma, kole’a i Petrus dinen saja ataran mamelena lo’a kadarian dinen. Na’an lagi’ datamu ratina jarum diri’aan.

34Jaji patanga’an manjaruma dinen, daluluni ira inang kole’a domen. Atakut bea ira daluluniin. 35Jaji mondok unyi dari domen, “Di’en lalo Anakku’ yang kudile’iin. Taan talinganin lo’a jaruma,” ingka kenang. 2Ptr. 1:17-18; Yes. 42:1; Mat. 3:17; 12:18; Mk. 1:11; Lk. 3:22. 36Jaji mamin akaus unyi jarum dinen, mamele ira inang, kosan paita. I Yesus poang kakalena inang nanda’. Jaji kadarianna dinen datanami nyawaan poang. Na’anpi dajarumang lo’a intain-intain di waktu nanga dinen.

I Yesus pamaami anak babakaan yang dasarung jalu ajau’en

Mat. 17:14-21; Mk. 9:14-27

37Jaji barik di aso seraan, tador ira dari ukit dinen. Jaji bayu’ tau babangkulungen yang sidua’en nanna i Yesus. 38Jaji andian tau nanda’ dinen yang mamukoon lo’a i Yesus, “O Pa’ Guru, kamase’i iak. Kupita tapat lo’u, suba ibele anakku’ yang seseraan di’en. 39Daia dinen sadinga poang dasarunga kole’a jalu ajau’en. Ti’ mamin dasarung dinen, biasa pasiak-siak. Sampai babaluean barik, sampai beror dinen baba’a dasarunga jalu dinen,” ingka kenang. “Saja na’an mainya’ inyap jaluun dinen. Inyap na’an inyap, akaus apadis mantuarina,” ingka kenang amana dinen lo’a i Yesus. 40“Mamita’ak jaji de’i, kusuro’ pamaam lo’a palola’u, kusuro’ maruru, na’an bua dapat dapamaam kole’da’,” ingka kenang.

41Jaji dasauti kole’a i Yesus, “Asi lo’in yang tio’en di tatakka’ di’en, na’an jajikin parasaya’? Ajau’ jajikin,” ingka. “Ai, na’anpi sukup launku’ lalako’en nannin. Na’anpi sukup launna kupanaata nannin?” ingka kenang. Jaji mamalin bapi jaruma, “Awa dinen anaku lo’ku’,” ingka kenang manjaruma i Yesus lo’a babaka dinen de’i.

42Jaji mondok dinen nangkanaken lo’a, patanga’an lamba’a, daparaba’ bua lo’a tana’en kole’a jalu ajau’en, dainjak-injakang. Poangsi i Yesus marada’i lo’a jalu ajau’en dinen, dapamaam. Laloang dapole’ nangkanak dinen lo’a amana. 43Tauenpi dinen samuana tatakau mamelena kole’a baraana kuasana Alatala.

I Yesus manjarumang bapi lo’a matena nanna tio’ balika

Mat. 17:22-23; Mk. 9:30-32

Jaji mansangapi tauen tatakauna lo’a ambata karajana i Yesus, daiapi manjarum lo’a palola’a, 44“Taantalinganin, tanami nyawaan yang jalu kujarumangen lo’in di’en,” ingka kenang. “Daiak Anak Manturiin arungak dasera ona’ lo’a tangan tauen,” ingka kenang i Yesus lo’da’. 45Poangsi ira dinen na’an marati. Ratina dinen mamin dalamun lo’da’ mainto’ na’anna dakarati. Atakut bea ira matoanang lo’a i Yesus ratina.

Intain baraa’en pakaina?

Mat. 18:1-5; Mk. 9:33-37

46Jaji barik mulai sipadu dinen palola’a i Yesus. Yang dapasipaduangen dinen, intain yang tau to’ baraa’en pakaina antarana ira dinen. Lk. 22:24. 47Datamu bua pikiranna ateda’ kole’a i Yesus. Jaji dala nangkanak keke’en, dasuro’ akadeng ibiringa. 48“Intain manyialoon lo’a nangkanak balu’ di’en, atas asanku’, yang paruluun lo’a,” ingka, “daia dinen manyialo bua lo’ku’. Jaji okan iak poang dasialoiin, manyialo bea lo’a tau yang manyuro’en lo’ku’,” ingka kenang. “Kole’a intain tau palin akeke’en antaraka’, ia lalo yang tau palin baraa’en,” ingka kenang i Yesus lo’da’. Mat. 10:40; Lk. 10:16; Yoh. 13:20.

Intain na’anen malawan lo’ka’ silola’anen bua nanna panamuka’

Mk. 9:38-40

49Jaji barik i Yohanes manyauti lo’a i Yesus, “O Pa’ Guru,” ingka kenang, “ikita ikam de’i, andian tau maruru jalu ajau’en atas asannu. Daikam di’en mamase’angkam lo’a kole’a okan kawanka’,” ingka kenang i Yohanes lo’a i Yesus.

50Poangsi i Yesus manjarum, “Na’an pande. Na’an pande ipase’ang, kapisi okan kawanka’. Kole’a intain na’anen malawan lo’ka’ silola’anen bea nanna panamuka’,” ingka kenang i Yesus lo’a i Yohanes.

Tau banua Samariaan mangalibakang lo’a i Yesus

51Jaji waktu nanga dinen mainso’ mamin asona i Yesus to’ daangkatang inait. Jaji barik daia putusi kalena to’ lamba’ lo’a Yerusalem. 52Jaji ilalam palamba’anna lo’a Yerusalem, dasuro’ tau lamba’ ijolona lo’a banua daerah Samaria itiang mangamasang kosanna itiang samalam inang. 53Poangsi ira tau Samariaan inangen alibak manyialo lo’a. Alibak manarima’, kole’a datamu kole’da’ dinen tujuan palamba’anna to’ lo’a Yerusalem. 54Jaji barik datamu dinen kole’a palola’a, kole’a ari Yakobus nanna i Yohanes, “O Paraampuane, iparuarangkam iko bado’a manyuro’ tador api dari suanen itiang manampusi lo’da’?” ingka kenang mangatoanina dinen palola’a, ari Yohanes nanna i Yakobus lo’a i Yesus. 2Raj. 1:9-16. 55Dadalinga barik kole’a i Yesus, laloang koengang kalena marada’i lo’da’ kole’a jarumda’ dinen. 56Mamin dinen lamba’ bapi ira dinen lo’a banua bokanen.

Okan maunda malola’ka’ lo’a

Mat. 8:19-22

57Jaji barik lamba’ dinen i Yesus nanna palola’a, andian tau seraan manjarum lo’a, “Pa’ Guru, daiak di’en to’ malola’ak lo’u. Disa poang lamba’u, malola’ak lo’u,” ingka kenang.

58Jaji barik manjarum i Yesus, “Ai lo’u malola’en lo’ku’? Ti’ asu toanen, burungen, andian kausa saranga. Poangsi daiak di’en Anak Mantuarin kosan dampe lenga’anku’,” ingka kenang manjaruma i Yesus lo’a.

59Jaji andian bea tau bokanen, jaji i Yesus manjarum lo’a, “Se’, malola’ko lo’ku’,” ingka kenang.

Poangsi manyauti tau dinen, “O’ Paraampuane, to’ malola’ak lo’u. Poangsi manuntuaniakpi lo’a ama’ku’. Ti’ mamin ikaliang, malola’ak lo’u barik,” ingka kenang manjaruma.

60Poangsi dasauti kole’a i Yesus, “Bele koronga dakalianga kole’da’ tau nampiin ikatio’. Tau mateen poang mangaliangen lo’a tau mateen,” ingka kenang sama’ jaruma. “Daiko manjarumang lo’a tauen to’ adarina baya Alatala to’ mangkama lo’ka’ awan rajaan,” ingka kenang i Yesus lo’a tau dinen.

61Andian bapi sera yang manjarumen lo’a i Yesus, “Daiak di’en malola’ak lo’u,” ingka kenang. “Poangsi to’ mole’akpi ijolo pamase’ lo’a suang tindo’anku’,” ingka kenang manjaruma lo’a i Yesus. 1Raj. 19:20.

62Jaji i Yesus manyauti lo’a tau dinen, “Umpamana tau aparuken, mamin mulai daia manyangkul umana mamakai karabau, ti’ mamele balik lapoang, ai lo’a karajana. Ti’ tau awan dinen atena, na’anpi pande ipakai di kangkamanna Alatala,” ingka kenang i Yesus lo’da’.

Currently Selected:

Lukas 9: EBE

Highlight

Copy

Compare