Mbandukulu 1
1
Mbandukulu
1–11
Nzaambi wayirika nsi na muutu
1Mu mbandukulu Nzaambi wayirika yulu na butoto.
2Butoto bwaba bwahele na nzelu na bwamukangala, mampimbisi maba ha yulu mubu, na mpeeve Nzaambi yaba kwepekemukaana ha yulu maampa.
3Nzaambi waleele : Hemese buungi buba ! Na buungi bwaba. 4Nzaambi wamono ti buungi bwabubwete. Nzaambi wahaambula buungi na mampimbisi. 5Nzaambi waluka buungi "mwiini", na mampimbisi "butsuku". Nsinsika yaba na kipari kyaba : Kikyo ngo kiluumbu kyatete.
6Nzaambi waleele ti : Hemese kingyee-kingyee kiba ha kakati dya maampa mu kumakabula mu bibari byoolo ! 7Nzaambi wasa kingyee-kingyee ; wahaambula maampa mari ku nsuku kingyee-kingyee na maampa mari ku yulu kingyee-kingyee. Na bubwo bwayirima. 8Nzaambi wateele kingyee-kingyee yulu. nsinsika yaba na kipari kyaba : Kikyo ngo kiluumbu kyabyoolo.
9Nzaambi waleele ti : « Hemese maampa mari ku nsuku mayulu makutukina ha kibeendu kimosi, na nsi yakana yamonokono ! » Na bubwo bwayirima. 10Nzaambi waluka nsi yakana butoto, na maampa makutukina wamaluka mubu ; Nzaambi wamono ti bubwo bwabubwete. 11Nzaambi waleele ti : « Hemese butoto bumenese bitiiti : Bitiiti bibuta bifulu, bunu buri bitsuumbu bya bo, na miti mibuta bimbutu bunu buri bitsuumbu bya bo ! » Na bubwo bwayirima. 12Butoto bwamenese bitiiti : Bitiiti byabuta bifulu bunu buri bitsuumbu bya bo, na miti myabuta bimbutu bunu buri bitsuumbu bya bo ! Nzaambi wamono ti bubwo bwabubwete. 13Nsinsika yaba na kipari kyaba : Kikyo ngo kiluumbu kyabitatu.
14Nzaambi waleele ti : « Hemese kuba bitotolo biha buungi mu mayulu, mu kuhaambula mwiini na butsuku ; biba bidiimbu bitswiikisa mantaangu, biluumbu na mibvu ; 15sa biba mu mayulu mu kuhaa buungi ha butoto ! » Bubwo bwayirima. 16Nzaambi wayirika bitotolo byoolo byabinene biha buungi : Kyakinene kiha buungi mu kutwaalisa mwiini, ngo ntaangu ; kyantele kiha buungi mu kutwaalisa butsuku, ngo ngoondo ; ha yulu haho nde wabweese bambwetete. 17Na Nzaambi wabisuusa mu mayulu mu kuha buungi ha butoto, 18mu kutwaalisa mwiini na butsuku, na kuhaambula buungi na mampimbisi ; Nzaambi wamono ti bubwo bwabubwete. 19Nsinsika yaba na kipari kyaba : Kikyo ngo kiluumbu kyabina.
20Nzaambi waleele ti : « Hemese munsa maampa mu fundumuka bibulu byamwooyo, na banoni badumuka mu yulu ! » 21Nzaambi wayirika bibulu byansisi bya mu mubu, na bibulu byobinso byamwooyo bibaanaa mu maampa, bunu buri bitsuumbu bya byo, na banoni bunu buri bitsuumbu bya bo. Na Nzaambi wamono ti bubwo bwabubwete. 22Nzaambi wabisakumuna na waleele ti : « Butee bimbutu, fununee na butunee mu mibu ; na banoni se babutuna ha butoto ! » 23Nsinsika yaba na kipari kyaba : Kikyo ngo kiluumbu kyabitaanu.
24Nzaambi waleele ti : Hemese butoto bubuta bibulu byamwooyo bunu buri bitsuumbu bya byo : Bibulu bya kutwiila, bibulu bilaandilaa, bibulu bya musitu ! Na bubwo bwayirima. 25Nzaambi wayirika bibulu bya musitu bunu buri bitsuumbu bya byo, bya kutwiila, na byobinso bilaandilaa, bunu buri bitsuumbu bya byo. Na Nzaambi wamono ti bubwo bwabubwete.
26Nzaambi waleele ti : « Tuyirikee muutu mu kifwaani kya beetu-meene, bunu bu turi, mpisi katuma bansu ba mubu, banoni ba yulu, bibulu byabinene na byantele, mu nsi yansiina na mu byobinso bikweyende ha butoto ! » 27Nzaambi wayirika muutu mu kifwaani kya nde-meene ; mu kifwaani kya Nzaambi nde kamuyirika. Nde wayirika mubakala na mukyeetu.
28Nzaambi wabasakumuna na wabaleele ti : « Butuneenu, fununeenu, luuluseenu butoto na twaalisee bwo. Tumee bansu ba mubu, banoni ba yulu na mpisi kibulu kikweyendaa ha butoto. » 29Na Nzaambi waleele ti : « Me nyiluheeri bitiiti byobinso bibutaa bifulu ha butoto, na miti myominso mibutaa bimbutu ; sa byaba byandya bya beenu. 30Na kuri bibulu byobinso bya ha butoto, banoni bobanso badumukaa, na byobinso bikweyende, biri na muwuumunu wa bumwooyo, me nyibaheeri bitiiti bunu byandya. » Na bubwo bwayirima. 31Nzaambi wamono ti byobinso bikayirikiri byabibwete. Nsinsika yaba na kipari kyaba : Kikyo ngo kiluumbu kyabisaamunu.
Currently Selected:
Mbandukulu 1: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024
