1 Korinto 14
14
Profesia No Lian Oi-oin
1Buka tuir domin no hakaas aan atu hetan prezenti espirituál sira, liu liu katak imi bele foo sai profesia. 2Tanba ema nebee koalia ho lian oi-oin koalia ba Maromak, laos ba ema seluk. Tanba la iha ema nebee kompriende nia, maibee nia foo sai mistériu ruma iha Espíritu. 3Maibee ema nebee foo sai profesia koalia ba ema seluk atu hametin sira, foo korajen no foo kamaan. 4Ema nebee koalia ho lian oi-oin hametin ninia aan rasik, maibee ema nebee foo sai profesia hametin igreja. 5Agora, hau hakarak katak imi hotu koalia ho lian oi-oin, maibee liu liu katak imi foo sai profesia. Tanba ema nebee foo sai profesia mak boot liu ema nebee koalia ho lian oi-oin, só deit ema tradus lian nee hodi hametin igreja.
6Agora, maun-alin sira, se hau vizita no koalia ho lian oi-oin, imi sei manaan saida? Diak liu hau foo sai liafuan hosi Maromak,#14:6 Liafuan Gregu apokalipse katak hatudu sai buat nebee ema la hatene, inklui mos Jesus no liafuan hosi Maromak. Iha mos versíkulu 26. ka matenek, ka profesia, ka hanorin ruma. 7Se karik instrumentu nebee la moris, hanesan flauta ka harpa, la foo lian moos, oinsaa mak ema bele hatene knananuk nee? 8Tanba se korneta foo sai lian la moos karik, see mak prepara aan atu funu? 9Nunee mos ho imi, se imi koalia ho lian nebee ema la kompriende, oinsaa mak ema bele hatene buat nebee imi dehan? Tanba imi koalia ba anin deit. 10Iha lian barak iha mundu, no ida-idak iha ninia signifikadu. 11Nunee se hau la hatene lian ida nia signifikadu, hau sei sai ema estranjeiru ba nia nebee koalia. No nia nebee koalia sei sai estranjeiru ba hau. 12Nunee mos ho imi, tanba imi laran manas atu simu prezenti espirituál sira, maibee buka prezenti sira nebee hametin igreja.
13Entaun ema nebee koalia ho lian oi-oin tenki halo orasaun katak nia bele tradús. 14Tanba se hau halo orasaun iha lian oi-oin karik, hau nia espíritu mak halo orasaun maibee la iha rezultadu iha hau nia neon. 15Entaun hau sei halo saida? Hau sei halo orasaun ho espíritu, maibee hau sei halo orasaun mos ho hau nia neon. Hau sei kanta ho hau nia espíritu, no hau sei kanta mos ho hau nia neon. 16Se lae, bainhira o foo bensaun ho o nia espíritu, oinsaa mak nia nebee la hatene bele dehan, ‘Amén’? Tanba bainhira o foo agradese, nia la hatene saida mak o koalia nee. 17Tanba bainhira o foo agradese nee diak, maibee ida nee la hametin ema seluk nee. 18Hau foo agradese ba hau nia Maromak katak hau koalia ho lian oi-oin liu fali imi hotu. 19Maibee iha igreja hau hakarak koalia liafuan lima deit ho hau nia neon hodi hanorin ema seluk, duké hau foo sai liafuan rihun sanulu ho lian oi-oin.
20Maun-alin sira, keta sai hanesan labarik sira iha imi nia hanoin. Sai hanesan bebee sira kona ba hahalok aat, maibee kona ba kompriensaun sai ema nebee iha maturidade.#14:20 Gregu telios, nebee ‘ema perfeitu’, kompletu no pas. Haree 1 Korinto 2:6, 13:10 no Filipe 3:15 no nota. 21Iha Lei ema hakerek nanis ona, “Liu hosi ema nebee koalia ho lian seluk no liu hosi estranjeiru nia ibun mak Hau koalia ba povu nee. Maski nunee mos sira lakohi rona Hau, dehan Nai.”#14:21 Hosi Isaias 28:11-12. 22Nunee lian oi-oin mak sinál ida, laos ba sira nebee fiar, maibee ba sira nebee la fiar. Maibee profesia nee laos ba sira nebee la fiar, maibee ba sira nebee fiar. 23Entaun, se igreja tomak halibur hamutuk no sira hotu koalia ho lian oi-oin, no ema nebee la hatene ka ema nebee la fiar tama, laos sira sei dehan katak imi bulak? 24Maibee se sira hotu foo sai profesia, no ema ida tama nebee la fiar ka ema ida nebee la hatene tama, entaun nia sei hatene ninia sala tanba sira hotu, no nia sei hetan kastigu tanba sira hotu. 25No ninia segredu sira nebee iha ninia fuan laran sei foo sai. Depois nia sei monu tuun ho oin ba rai no adora Maromak. No nia sei dehan katak tebes duni Maromak mak iha imi nia leet.
Kultu Nebee Loos
26Entaun oinsaa, maun-alin sira? Bainhira imi halibur hamutuk, ema ida-idak iha knananuk ida, hanorin ida, liafuan ida hosi Maromak, liafuan ida iha lian oi-oin, ka tradusaun ida. Halo buat hotu nee hodi hametin ema. 27Se ema ruma koalia ho lian oi-oin, husik ema nain rua ka tolu deit mak koalia, no sira tenki hein ema ida koalia tiha foin mak ema ida fali koalia. No ema seluk tenki tradús. 28Maibee se la iha ema atu tradús, entaun ema nee tenki nonook iha igreja laran. Nia bele koalia ba ninia aan rasik no ba Maromak. 29Husik profeta nain rua ka tolu atu koalia, no ema seluk bele tetu liafuan nee. 30Se ema ida nebee tuur hela iha nebaa hetan liafuan hosi Maromak, ema primeiru tenki para. 31Tanba imi hotu bele foo sai profesia, maibee troka malu atu nunee imi hotu bele aprende no imi hotu bele simu korajen. 32No profeta sira sei domina sira nia espíritu. 33Tanba Maromak nee laos Maromak rungu-ranga nian, maibee Maromak dame nian. Hanesan nee iha santu sira nia igreja hotu.
34Feto sira tenki nonook iha igreja. Tanba sira la iha lisensa atu koalia. Maibee sira tenki halo tuir, hanesan mos Lei dehan. 35Se sira hakarak aprende buat ruma, sira bele husu sira nia laen iha uma. Tanba feto halo moe bainhira sira koalia iha igreja.
36Maromak nia liafuan mai hosi imi ka? Maromak nia liafuan too deit ba imi ka? 37Se ema ruma hanoin katak nia mak profeta ida ka ema espirituál, entaun nia sei konfirma katak buat nebee hau hakerek ba imi mak mandamentu hosi Nai. 38Maibee se ema ruma lakohi simu ida nee, entaun imi lalika simu nia. 39Entaun, maun-alin sira, hakaas aan atu foo sai profesia, no keta bandu ema atu koalia ho lian oi-oin. 40Maibee halo buat hotu ho planu diak no tuir dalan loos.
Currently Selected:
1 Korinto 14: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.