1 Korinto 9
9
Paulo Husik Ninia Direitu
1Laos hau livre? Laos hau apostolu ida? Laos hau haree ona ita nia Nai Jesus? Laos imi mak rezultadu hosi hau nia servisu iha Nai? 2Se hau laos apostolu ida ba ema seluk, tebes duni hau mak apostolu ba imi. Tanba imi mak sinál#9:2 Liafuan Gregu koalia kona ba karimbu nebee taka ba surat hodi prova ida nee. Haree dezenhu iha Jénesis 41:42. nebee hatudu katak hau mak apostolu ida iha Nai.
3Nee mak hau nia resposta ba sira nebee hakarak tesi lia mai hau. 4Laos ami iha direitu atu haan no hemu? 5Laos ami iha direitu atu lori feen nebee fiar hodi akompanha ami hanesan apostolu sira seluk, no maun-alin sira iha Nai, no mos Cefas? 6Ka hau no Barnabé deit mak la iha direitu atu para hosi servisu nebee buka moris? 7See mak serví nudar soldadu no gasta ninia osan rasik? See mak kuda toos uvas no la haan ai fuan hosi toos nee? See mak hein bibi no la hemu susu been hosi bibi nee?
8Hau koalia nunee tuir ema nia hanoin deit ka? Laos Lei dehan hanesan nee? 9Tanba iha Moisés nia Lei hakerek dehan, “La bele taka karau nia ibun bainhira nia sama hela trigu.”#9:9 Karau sama trigu hodi haketak hosi trigu kulit. Hosi Deuteronómiu 25:4. Maromak hanoin kona ba karau ka? 10Laos Nia sempre koalia kona ba ita? Sin, liafuan nee hakerek ba ita. Tanba ema nebee fila rai no ema nebee sama trigu servisu ho esperansa katak sira sei hetan rezultadu balu nee. 11Se ami kuda ona buat sira nebee espirituál iha imi nia leet, entaun ami hetan barak liu se ami koa rezultadu mundu nian ka?#9:11 Iha lian Gregu, ‘rezultadu mundu nian’ mak ‘rezultadu isin nian’, nebee Paulo dehan tanba nia hanorin ona Maromak nia liafuan ba sira entaun nia bele simu osan, ai haan ka buat seluk hosi sira nudar ninia kolen. 12Se ema seluk iha direitu atu simu hosi imi, laos ami iha direitu boot liu fali? Maski nunee, ami la simu tuir direitu nee. Maibee ami tahan susar saida deit hodi la taka dalan ba Kristu nia evanjelhu. 13Imi hatene ka lae katak sira nebee halao ministériu santu iha Templu hetan ai haan hosi Templu? No sira nebee hein altár mos hetan hosi altár?#9:13 Saserdote sira bele haan hosi oferta sira nebee povu lori ba Templu. Haree Levítiku 6:16 no Deuteronómiu 18:1. 14Nunee mos Nai foo ona orden katak sira nebee haklaken evanjelhu bele moris liu hosi evanjelhu.#9:14 Haree Lucas 10:7.
15Maibee hau la simu tuir direitu nee. No hau la hakerek liafuan nee hodi hetan buat sira nee. Tanba hau hanoin diak liu hau mate duké ema halakon hau nia direitu atu gaba aan hanesan nee. 16Maibee bainhira hau haklaken evanjelhu, hau la bele gaba aan. Tanba hau presiza duni atu halo ida nee. Susar mai hau se hau la haklaken evanjelhu! 17Tanba se hau halo ida nee tuir hau nia hakarak, entaun hau sei simu kolen. Maibee se ida nee laos tanba hau nia hakarak, entaun hau simu ona knaar atu halao ministériu nee. 18Entaun saida mak hau nia kolen? Katak bainhira hau haklaken hau bele foo sai evanjelhu gratis, atu nunee hau la simu tuir hau nia direitu iha evanjelhu.
19Tanba maski hau livre hosi ema hotu, maibee hau halo hau nia aan sai atan ba ema hotu atu nunee hau bele manaan ema barak liu tan. 20Ba ema Judeu sira, hau sai ema Judeu ida, atu nunee hau bele manaan ema Judeu sira. Ba sira nebee iha lei nia okos, hau sai hanesan ema nebee iha lei nia okos (maski hau laos iha lei nia okos), atu nunee hau bele manaan sira nebee iha lei nia okos. 21Ba sira nebee ketak hosi lei, hau sai hanesan ema nebee ketak hosi lei (maibee hau la ketak hosi Maromak nia lei, tanba hau iha Kristu nia lei nia okos), atu nunee hau bele manaan sira nebee ketak hosi lei. 22Ba ema nebee fraku, hau sai fraku, atu nunee hau bele manaan ema fraku. Hau sai buat hotu ba ema hotu, atu nunee liu hosi dalan hotu hau bele salva ema balu. 23Hau halo buat hotu nee tanba evanjelhu, atu nunee hau bele hetan bensaun hosi evanjelhu hamutuk ho sira.
24Imi hatene ka lae katak sira nebee halai taru mak halai duni, maibee ema ida deit mak manaan prémiu? Entaun halai ba atu manaan prémiu nee. 25Ema hotu nebee tama kompetisaun kontrola aan iha buat hotu. Sira halo ida nee hodi simu koroa nebee bele lakon, maibee ita sei hetan ida nebee nunka lakon. 26Entaun hau la halai arbiru deit. Hau la tuku hanesan ema nebee tuku anin deit. 27Maibee hau disiplina hau nia isin no halo hau nia isin sai nudar hau nia atan. Tanba bainhira hau haklaken tiha ba ema seluk, hau rasik lakohi atu lakon.
Currently Selected:
1 Korinto 9: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.