2 Korinto 5
5
Uma Iha Lalehan
1Tanba ita hatene katak se ita nia tenda nebee ita nia uma iha mundu nee mak lakon, ita sei iha uma hosi Maromak nebee la halo ho ema nia liman. Uma nee iha lalehan no hela too rohan laek. 2Tanba iha tenda nee ita tanis, tanba ita hakarak tebes atu hatais ita nia uma lalehan nian. 3Nunee bainhira ita hatais, ita la sai molik. 4Tanba bainhira ita sei hela iha tenda nee, ita tanis tanba todan nee. Ita lakohi sai isin molik, maibee ita hakarak hatais ho ida seluk nee atu nunee moris bele tolan buat nebee bele mate. 5Nia nebee prepara ona ita ba ida nee mak Maromak. No Nia foo ona Espíritu ba ita nudar garantia.
6Nunee ita sempre aten brani. Tanba ita hatene katak bainhira ita sei hela iha isin lolon nee ita la hela ho Nai. 7Tanba ita lao liu hosi fiar, laos liu hosi buat nebee ita haree. 8Nunee ita aten brani, no ita hakarak liu atu husik isin lolon nee hodi ita bele hela ho Nai. 9Nee duni, maski ita iha uma ka la hela iha uma nee, ita hakaas aan atu halo Nia kontenti. 10Tanba ita hotu tenki hamriik iha Kristu nia kadeira nia oin atu Nia bele tesi lia ba ita, hodi ema ida-idak simu ninia kolen tuir buat nebee nia halo iha ninia isin lolon, maski hahalok nee diak ka aat.
Kristu Mate Tanba Ema Hotu
11Nunee tanba ami hatene hamtauk Nai, ami dada ema seluk atu fiar. Maibee Maromak hatene ami nia laran, no hau hein katak imi nia konsiénsia mos hatene ami. 12Tanba ami la gaba aan fali ba imi, maibee ami foo razaun ida ba imi atu foti aan tanba ami, atu nunee imi bele hataan sira nebee foti aan kona ba buat nebee iha liur no laos kona ba buat nebee iha laran. 13Tanba se ami bulak karik, ida nee tanba Maromak. No se ami neon moos karik, ida nee tanba imi. 14Tanba Kristu nia domin obriga ami, tanba ami hatene ona ida nee: katak ema ida mate tanba ema hotu, nunee ema hotu mate ona. 15No Nia mate tanba ema hotu, atu nunee sira nebee moris la bele moris tan ba sira nia aan rasik maibee ba Nia nebee mate no moris hias ona tanba sira.
16Nunee hosi ohin ba oin, ami la haree tan ona ema ida tuir hanoin isin nian. Maski uluk ami haree Kristu tuir ami nia hanoin isin nian, maibee ami la haree tan ona Nia hanesan nee. 17Nee duni, se ema ida hela iha Kristu, nia mak kriasaun foun ida. Buat tuan sira liu tiha ona. Tebes, buat hotu sai foun ona. 18Buat hotu nee mai hosi Maromak. Nia halo ona ita dame malu ho Nia liu hosi Kristu. No Nia foo ministériu dame malu nian mai ami, 19katak Maromak halo ona mundu dame malu ho Nia iha Kristu, hodi Nia la sura sira nia sala atu hasoru sira. Nia foo fiar ba ami kona ba lia menon dame malu nian. 20Nunee ami mak Kristu nia embaixadór sira hodi Maromak bele dada imi liu hosi ami. Ami husu ho laran hodi Kristu nia naran atu imi dame malu ho Maromak. 21Maromak halo Nia nebee la hatene sala atu sai sala tanba ita, atu nunee iha Nia ita bele sai hahalok loos Maromak nian.
Currently Selected:
2 Korinto 5: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.