Apostolu 15
15
Sorumutu Iha Jerusalém
1Maibee ema balu tuun mai hosi Judeia no hanorin maun-alin sira, “Se imi la simu sirkunsizaun tuir kostumi hosi Moisés, imi la bele hetan salvasaun.” 2Paulo no Barnabé haksesuk malu no diskuti malu makaas ho sira. Entaun igreja nee desidi atu haruka Paulo no Barnabé, ho ema balu tan, atu sae ba Jerusalém hodi koalia ho apostolu sira no katuas sira kona ba asuntu nee. 3No bainhira igreja nee haruka ona sira, sira lao liu Fenísia no Samaria. Iha fatin nebaa sira konta buat hotu kona ba oinsaa ema Jentiu sira fiar. No liafuan nee foo ksolok boot ba maun-alin sira hotu. 4Bainhira sira mai too Jerusalém, igreja ho apostolu no katuas sira simu sira. No sira foo sai buat hotu nebee Maromak halo ona ho sira. 5Maibee ema balu hosi partidu Farizeu nian nebee fiar ona, hamriik no dehan, “Ita tenki foo sirkunsizaun ba ema sira nee, no haruka sira atu halo tuir lei hosi Moisés.”#15:5 Lee kona ba halo sunat iha Jénesis 17:11 no nota.
6Apostolu sira no katuas sira halibur hamutuk hodi koalia kona ba asuntu ida nee. 7Bainhira sira diskuti ba-mai kleur ona, Pedro hamriik, no dehan ba sira, “Maun-alin sira, imi hatene uluk Maromak hili hau hosi imi nia leet hodi ema Jentiu sira bele rona liu hosi hau nia ibun kona ba evanjelhu no sira bele fiar. 8No Maromak, nebee hatene ema nia fuan laran, foo sasin bainhira Nia foo Espíritu Santu ba sira, hanesan Nia foo ona ba ita. 9Nia haree sira hanesan deit ho ita, no Nia hamoos sira nia fuan laran liu hosi fiar. 10Nunee tanba saa mak imi koko Maromak, atu tau ai leba todan#15:10 Ai boot nebee tau ba karau nia kabaas hodi dada kareta karau nian. Haree Mateus 11:29 no dezenhu. iha eskolante sira nia kabaas, nebee ita nia bei-ala sira no ita mos la bele lori? 11Maibee ita fiar katak liu hosi Nai Jesus nia grasa ita sei hetan salvasaun, hanesan mos ho sira.”
12No ema hotu iha sorumutu nee sai nonook no rona ba Barnabé no Paulo. Nain rua nee konta kona ba milagre no sinál sira nebee Maromak halo iha ema Jentiu sira nia leet liu hosi sira. 13Bainhira sira koalia tiha ona, Tiago hataan, “Maun-alin sira, rona hau ba. 14Simeão deklara ona oinsaa uluk Maromak hanoin ema Jentiu sira hodi foti hosi sira povu ida ba Ninia naran. 15No profeta sira nia liafuan mos konkorda, tanba sira hakerek nanis ona,
16‘Tuir mai, Hau sei fila fali, no harii fali David nia tenda nebee monu ona;
no Hau sei harii fali buat nebee monu rahun iha nebaa,
no Hau sei hadia fali fatin nee,
17hodi ema restu bele buka tuir Nai,
no ema Jentiu hotu nebee lori Hau nia naran,
dehan Nai, nebee halo buat sira nee hotu,
18nebee ema hatene hori uluk kedas.’#15:16-18 Hosi Amos 9:11-12.
19Nee duni tuir hau nia hanoin, ita keta halo susar tan ba ema Jentiu sira nebee fila ba Maromak. 20Maibee ita sei hakerek ba sira atu hadook aan hosi buat sira nebee foer hosi ídulu sira, hosi sala seksuál, hosi animál nebee buti mate no hosi raan.#15:20 Sira la bele haan hahaan nebee oferese ba estátua (1 Korinto 8), sala seksuál (Levítiku 18), haan naan nebee sei iha raan (Jénesis 9:4) ka raan deit (Levítiku 17:10-12). 21Tanba hosi tempu antigu ema haklaken kona ba Moisés iha sidade hotu, no sira lee ninia liafuan Sabdu-Sabdu iha sinagoga sira.”
Surat Ba Ema Jentiu Sira
22Nunee apostolu sira no katuas sira, ho igreja tomak, konkorda atu hili ema balu hosi sira nia leet no haruka sira ba Antiokia ho Paulo no Barnabé. Entaun sira hili Judas, nebee ema bolu Barsabás, no Silas. Sira mak ema lideransa iha maun-alin sira nia leet. 23No sira hakerek surat ida nee: ‘Hosi maun-alin sira, inklui apostolu no katuas sira. Ba maun-alin sira nebee ema Jentiu sira iha Antiokia, Síria no Silísia. Kumprimentus! 24Ami rona katak ema balu sai hosi ami no kria problema ba imi ho liafuan ruma no halo imi nia laran dúvida maski ami la haruka sira. 25Nunee ami hanoin diak ho laran ida deit atu hili ema balu no haruka sira ba imi hamutuk ho ami nia doben Barnabé no Paulo. 26Sira hasoru ona perigu atu mate tanba ita nia Nai Jesus Kristu nia naran. 27Nunee ami haruka Judas no Silas, no sira mos sei hatoo liafuan hanesan nee ba imi liu hosi sira nia ibun. 28Tanba Espíritu Santu, no mos ami, hanoin atu la bele foo todan tan ba imi, liu fali buat nebee importante nee: 29katak imi hadook aan hosi buat sira nebee foer hosi ídulu sira, hosi raan, hosi animál nebee buti mate no hosi sala seksuál. Se imi hadook aan hosi buat sira nee, imi sei halo diak. Adeus.’
30Entaun bainhira apostolu sira husik sira, sira baa iha Antiokia. Bainhira sira halibur ema lubun boot hamutuk, sira entrega surat nee ba sira. 31Bainhira ema sira nee lee tiha surat nee, sira haksolok tanba sira simu korajen. 32Judas no Silas, nebee mos profeta sira, foo korajen ba maun-alin sira nee ho liafuan barak no hametin sira. 33Bainhira sira hela tiha iha nebaa too tempu ruma, maun-alin sira nee husik sira baa ho dame atu fila fali ba sira nebee haruka sira mai nee.#15:33 Manuskritu balu aumenta versíkulu 34 ‘Maibee Silas hanoin atu hela nafatin iha nebaa.’ 35Maibee Paulo no Barnabé kontinua hela iha Antiokia. Sira hanorin no haklaken Nai nia liafuan hamutuk ho ema barak tan.
Paulo No Barnabé Fahe Malu
36Liu tiha tempu ruma, Paulo dehan ba Barnabé, “Mai ita baa fali no vizita ita nia maun-alin sira iha sidade hotu nebee uluk ita haklaken Nai nia liafuan, no haree sira lao oinsaa.” 37Barnabé hakarak lori João ho sira, nebee ema bolu Marcos. 38Maibee Paulo hanoin la diak atu lori Marcos ho sira. Tanba nia husik sira iha Pamfília no la baa ho sira hodi halo servisu nee.#15:38 Marcos husik sira iha Apostolu 13:13. 39Sira diskuti malu makaas tebes too sira fahe malu. Barnabé lori Marcos, no nia sae roo ba Xipre. 40No Paulo hili Silas. Maun-alin sira entrega sira ba Maromak nia grasa no sira sai ba. 41Depois nia lao liu Síria no Silísia hodi hametin igreja sira.
Currently Selected:
Apostolu 15: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
