Apostolu 20
20
Paulo Iha Masedónia No Grésia
1Bainhira barulhu nee para tiha, Paulo bolu eskolante sira no foo korajen ba sira. Depois nia foo adeus ba sira no sai ba Masedónia. 2Bainhira nia lao haleu ona fatin nebaa no foo korajen boot ba sira, nia baa iha Grésia. 3Nia hela too fulan tolu iha nebaa. Maibee bainhira nia atu sae roo hodi baa Síria, nia rona ema Judeu sira halo planu aat hasoru nia. Entaun nia desidi atu fila fali liu hosi Masedónia. 4Ema nebee lao hamutuk ho Paulo inklui Piro nia oan Sopater, nebee ema Bereia, Aristarco no Asiku, nebee ema Tesalónika, Gaio hosi Derbe, Timóteo, no Tíkiko ho Trófimo hosi Ázia. 5Ema sira nee lao uluk hodi hein ami iha Tróade. 6Bainhira festa Paun Fermentu Laek hotu tiha,#20:6 Ida nee mak ema Judeu sira nia festa nebee inklui Páskua. Haree Exodu 12:17. ami sae roo iha Filipe. Liu tiha loron lima, ami too ba sira nebee iha Tróade. No ami hela loron hitu iha nebaa.
Éutiko Moris Hias Hosi Mate
7Iha loron primeiru ba semana nee, bainhira ami halibur hamutuk hodi silu paun, Paulo haklaken ba ema sira nee. Nia atu husik sira iha loron aban entaun nia kontinua koalia too kalan boot. 8Sira iha ahi oan barak iha andar leten iha fatin nebee sira halibur hamutuk. 9Joven mane ida naran Éutiko tuur iha janela. Bainhira Paulo haklaken kleur ona, joven mane nee toba dukur loos. No tanba nia matan dukur haluha rai, nia monu tuun hosi andar tolu nee. Ema baa foti nia maibee nia mate ona. 10Paulo tuun ba, hakruuk ba nia no hakuak nia, no dehan, “Keta laran taridu, tanba nia sei moris.” 11Bainhira Paulo sae fila fali, nia silu paun no haan hamutuk ho sira. Nia koalia kleur ho sira too loron sae. Depois nia baa. 12No sira lori joven mane nee, no sira haksolok tebes tanba nia moris hela.
13Maibee ami lao uluk ba roo. Ami sae roo no baa Asós hodi foti Paulo iha nebaa. Tanba nia halo planu hanesan nee hodi nia bele lao ain deit. 14No bainhira nia hasoru ami iha Asós, ami foti nia no baa too iha Mitilene. 15Ami sae roo iha nebaa no loron tuir mai ami too iha Kio nia oin, no loron tuir mai ami too iha Samos. #20:15 Manuskritu balu aumenta, ‘Bainhira ami hela ona iha Trogilium...’Loron tuir mai, ami too iha Mileto. 16Tanba Paulo desidi ona atu liu deit Éfezu hodi la haan tempu iha Ázia. Nia hakaas aan atu too iha Jerusalém, se bele karik, iha loron Pentekosta.#20:16 Loron boot ba ema Judeu sira. Haree Apostolu 2:1 no nota.
Paulo Koalia Ba Ema Éfezu
17Hosi Miletus Paulo haruka lia menon ba Éfezu atu bolu katuas sira hosi igreja nee. 18Bainhira sira too mai, nia dehan ba sira, “Imi hatene oinsaa hau hela iha imi nia leet hosi loron primeiru nebee hau tama Ázia too tempu hotu. 19Hau serví Nai ho laran haraik aan, ho matan been, no ho terus nebee hasoru hau tanba planu aat hosi ema Judeu sira. 20Hau la subar buat ida nebee diak hosi imi, maibee hau hatudu imi. Hau hanorin imi iha fatin publiku no hosi uma ba uma. 21Hau foo sasin ba ema Judeu sira no mos ba ema Gregu sira, atu arepende ba Maromak no tau fiar ba ita nia Nai Jesus Kristu. 22No agora, tebes, hau atu baa Jerusalém, tanba Espíritu obriga hau. No hau la hatene saida mak sei akontese mai hau iha nebaa. 23Só deit Espíritu Santu foo hatene mai hau iha sidade hotu katak kastigu no terus sei hasoru hau. 24Maibee hau la foo folin ba hau nia moris se hau bele kontinua too rohan no halo kompletu ministériu nebee hau simu hosi Nai Jesus, atu foo sasin ba evanjelhu kona ba Maromak nia grasa. 25No agora, tebes, hau hatene katak imi hotu iha fatin nebee hau lao ba-mai hodi haklaken Maromak nia reinu, sei la haree tan hau nia oin. 26Nunee, ohin loron, hau foo sasin ba imi katak hau moos hosi imi hotu nia raan. 27Tanba hau la subar aan, maibee hau foo sai ba imi Maromak nia hakarak hotu. 28Nunee tau matan di-diak ba imi nia aan rasik no ba bibi lubun nee. Espíritu Santu hili imi atu tau matan no foo haan ba Maromak#20:28 Manuskritu balu dehan ‘Nai’. nia igreja, nebee Nia hola ho Ninia raan rasik. 29Tanba Hau hatene katak, bainhira hau baa tiha, asu fuik boot sira sei tama iha imi nia leet, no sira sei la husik bibi lubun nee. 30No hosi imi rasik, ema sei mosu mai no bobar lia hodi dada eskolante sira atu lao tuir sira. 31Nunee matan moris ba! Hanoin hetan katak durante tinan tolu hau la para atu foo hanoin ba imi ida-idak loron-kalan ho matan been. 32Agora, hau entrega imi ba Maromak, no ba Ninia liafuan grasa nian. Liafuan nee bele hametin imi, no foo ba imi liman rohan hamutuk ho ema hotu nebee sai santu ona. 33Hau la hanoin atu hetan ema nia osan mutin, osan mean ka ropa. 34Imi rasik hatene katak liman nee serví hau atu hetan buat nebee hau presiza no mos sira nebee hamutuk ho hau. 35Iha buat hotu hau hatudu ona ba imi katak liu hosi servisu makaas hanesan nee ita tenki ajuda sira nebee fraku. Hanoin hetan Nai Jesus nia liafuan, oinsaa Nia rasik dehan, ‘Haksolok liu atu foo, duké atu simu.’”
36Koalia tiha nunee, nia hakneak no halo orasaun ho sira hotu. 37No sira hotu tanis makaas. Sira hakuak Paulo no rei nia. 38Liu-liu sira tristi kona ba ninia liafuan nebee nia dehan katak sira sei la haree tan ninia oin. Depois sira lao hamutuk ho nia too iha roo.
Currently Selected:
Apostolu 20: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
