Apostolu 27
27
Paulo Sae roo Ba Roma
1Bainhira sira desidi katak ami sei sae roo ba Itália, sira entrega Paulo no ema dadur sira seluk ba komandante ida naran Júlio, hosi batalhaun Augusto nian. 2Ami sae roo ida hosi Adramítio no komesa baa ho planu atu baa fatin balu iha Ázia. Aristarco, ema Masedónia nebee hosi Tesalónika, baa hamutuk ho ami. 3Loron tuir mai, ami para iha Sidon. Júlio hatudu laran diak ba Paulo no foo lisensa ba nia atu baa haree ninia belun sira hodi sira bele tau matan ba nia. 4Bainhira ami sai hosi fatin nee, ami baa liu hosi Xipre nia sorin hakmatek, tanba anin huu hasoru ami. 5Bainhira ami baa liu hosi Silísia no Pamfília, ami too iha Mira iha Lícia. 6Iha nebaa komandante hetan roo ida hosi Alexandria#27:6 Iha tempu nebaa roo boot sira hosi Alexandria iha Ejitu lori trigu atu faan fali iha sidade Roma, Itália. Se sira bele lori ai haan nee besik tempu nebee tasi la diak karik, sira bele hetan folin diak. nebee atu baa Itália, no nia hatama ami iha roo nee. 7Roo halai neineik deit too loron barak no ami liu hosi Knido ho susar tanba anin huu hasoru ami. Nunee ami baa liu hosi Kreta nia sorin hakmatek, iha Salmone nia oin. 8Ami kontinua baa ho susar, no ami too iha fatin ida naran Ibun Diak, nebee besik sidade Laseia.
9Viajen nee haan tempu kleur no agora tempu perigu atu baa tasi, tanba tempu jejún#27:9 Loron boot ba ema Judeu sira nebee saserdote boot halo sakrifísiu hodi taka povu nia sala. Levítiku 16:29-30. liu ona. Nunee Paulo foo hanoin ba sira, 10no dehan, “Senhor sira, hau haree katak viajen nee sei lori susar ba ita no estraga buat barak, laos ba sasaan no roo nee, maibee mos ba ita nia moris.” 11Maibee komandante fiar ema nebee kaer roo no roo nain liu fali buat nebee Paulo dehan. 12No tanba tasi ibun nee laduun diak atu hela durante tempu malirin, ema barak liu hanoin atu tama ba tasi no koko atu baa too iha Fenix. Fatin nee mak pontikais ida iha Kreta, nebee haree ba parte súl too loromonu no mos ba parte norte too loromonu.
Tasi Boot Hadau Roo
13Bainhira anin hosi parte súl huu neineik, sira hanoin katak sira hetan oportunidade diak. Entaun sira hasae ankor no lori roo besik rai maran Kreta. 14Maibee la kleur, anin makaas ida naran ‘Anin Lorosae’ huu hasoru ami. 15Bainhira anin kaer roo nee, no ami la bele kontra anin, ami husik anin lori ami. 16Ami baa liu hosi ilha ida nia sorin hakmatek, naran Kauda. No ho susar boot ami konsege hatama roo nee nia roo kiik.#27:16 Roo boot bele dada roo kiik iha kotuk hodi ba-mai tasi ibun. 17Bainhira sira hasae tiha roo kiik, sira kesi tali liu hosi roo okos hodi hametin roo. Depois sira hatuun ankor#27:17 Roo nia sasaan, karik ankor, laan ka sasaan seluk hodi ajuda lori roo iha tasi boot. tanba sira tauk atu kona rai iha Sirte. No anin lori deit ami. 18Laloran boot baku makaas ami. Nunee loron tuir mai sira komesa soe sasaan balu ba tasi laran. 19No iha loron terseiru, sira soe roo nia sasaan ho sira nia liman rasik. 20Bainhira ami la haree hetan loro matan ka fitun ba loron barak, no laloran boot makaas baku hela ami, ema hotu lakon esperansa atu hetan salvasaun.
21Kleur ona, ema sira nee la haan. Entaun Paulo hamriik iha sira nia leet, no nia dehan, “Senhor sira, diak liu imi rona tuir hau nia liafuan uluk nee no la sai hosi Kreta. Nunee ita la hetan susar nee no ita mos la lakon sasaan. 22Agora, hau foo korajen ba imi, aten brani ba! Tanba imi ida sei la lakon ninia moris, só roo deit mak sei lakon. 23Tanba horikalan anju ida hosi hau nia Maromak, nebee hau serví, hamriik iha hau nia oin. 24Anju nee dehan, ‘Keta tauk, Paulo, tanba o tenki hamriik iha César nia oin. No tebes, Maromak foo ba o ema hotu nebee iha roo laran hamutuk ho o.’ 25Nee duni, maluk sira, aten brani ba. Tanba hau fiar Maromak katak buat hotu nebee Nia foo hatene mai hau nee sei akontese duni. 26Maski nunee ita tenki kona rai iha ilha ida.”
27Bainhira too kalan sanulu resin haat, no anin huu hela ami iha tasi Adria, maizoumenus iha kalan boot, ema nebee servisu iha roo senti katak ita besik rai maran. 28Sira sukat tasi klean no hetan metru tolu-nulu resin neen. Bainhira sira baa tan uitoan, sira sukat fali, no hetan metru rua-nulu resin hitu.#27:28 Gregu dehan ‘orguia 20’ no ‘15’, nebee orguia ida maizoumenus 1.8m. 29Sira tauk ita sei xoke fatuk. Entaun sira soe ankor ba roo kotuk no harohan atu loron mai lalais. 30Ema nebee servisu iha roo buka atu halai husik hela roo. Entaun sira finji atu soe ankor hosi roo ulun, maibee tuir lo-loos sira hatuun roo kiik ba tasi. 31Paulo dehan ba komandante no ba soldadu sira, “Se ema sira nee la hela iha roo laran, ita sei la hetan salvasaun.” 32Nee duni soldadu sira tesi kotu tali hosi roo kiik, no husik roo kiik nee ba.
33Bainhira rai besik naroman ona, Paulo husu sira atu simu hahaan. Nia dehan, “Agora loron sanulu resin haat ona, no imi hein hela deit no la haan buat ida. 34Nunee hau husu imi atu haan buat ruma. Ida nee bele foo forsa ba imi. Tanba fuuk lahan ida mos sei la monu hosi imi ida nia ulun.” 35Koalia tiha nunee, nia foti paun, no foo agradese ba Maromak iha sira hotu nia oin. No bainhira nia silu tiha paun nee, nia komesa haan. 36Depois sira hotu hetan korajen, no sira mos haan buat ruma. 37Ami hotu iha roo laran nee hamutuk ema nain atus rua hitu-nulu resin neen (276). 38Bainhira sira haan natoon ona, sira soe trigu ba tasi laran hodi halo roo kamaan liu tan.
Roo Sai Aat
39Bainhira rai naroman ona, sira la hatene rai. Maibee sira haree hetan tasi ibun ho rai henek. Entaun sira hanoin atu koko, se bele karik, atu lori roo baa iha nebaa. 40No bainhira sira tesi tiha talin ba ankor sira nee, sira husik ankor sira iha tasi. No iha momentu nee mos sira kore tali kamudi nian. Sira hasae tiha laan iha roo ulun hodi simu anin no koko lori roo ba rai maran. 41Depois sira xoke rai iha fatin nebee seidauk too rai maran.#27:41 Lian Gregu dehan ‘iha tasi rua nia klaran’. Karik fatuk iha tasi okos ka fatin nebee ilha kiik besik rai maran inus. Roo nia ulun kona metin no la muda, maibee laloran boot komesa baku rahun roo nia kotuk. 42Soldadu sira hanoin atu oho ema dadur hotu hodi sira la bele nani sai no halai lakon. 43Maibee komandante hakarak salva Paulo entaun nia la husik sira halao planu nee. Nia haruka sira nebee bele nani atu haksoit uluk ba tasi no baa too rai maran. 44Depois sira seluk bele uza ai kabelak no buat rahun hosi roo. Nunee ami hotu too iha rai maran ho diak.
Currently Selected:
Apostolu 27: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
