Apostolu 3
3
Ema Ain Aat Sai Diak
1Pedro no João sae ba Templu iha oras orasaun nian, nebee tuku tolu lokraik.#3:1 Lian Gregu dehan ‘oras ba dala sia’ nebee 3pm. 2No iha mane ida nebee ain aat hosi moris mai kedas. Loro-loron ema lori nia no tau nia iha Templu nia portaun ida naran Furak, atu nunee nia bele husu ezmola hosi sira nebee tama ba Templu. 3Bainhira nia haree Pedro no João atu tama ba Templu, nia husu ezmola. 4Pedro, no mos João, fihir ba nia no dehan, “Hateke mai ami.” 5No nia foo atensaun ba sira, tanba nia hanoin atu simu buat ruma hosi sira. 6Depois Pedro dehan, “Hau la iha osan mutin ka osan mean, maibee buat nebee hau iha mak hau foo ba o. Hodi Jesus Kristu hosi Nazaré nia naran, hamriik no lao ba!” 7Pedro kaer ninia liman loos no ajuda nia hamriik. No ninia ain no ain fukun sai forti kedas. 8No nia haksoit no hahuu lao. Nia tama ba Templu ho sira no nia lao, haksoit no hahii Maromak. 9Povu hotu nee haree nia lao no hahii Maromak. 10Sira hatene katak nia mak ema nebee tuur hodi husu ezmola iha Portaun Furak iha Templu. No sira admira no hakfodak tebes kona ba buat nebee akontese ba nia.
Pedro Koalia Iha Salomão Nia Pátiu
11Bainhira mane nee kaer dadaun Pedro no João, povu hotu admira tebes no halai hamutuk ba sira iha portiku nebee bolu Salomão nian. 12Bainhira Pedro haree ida nee, nia dehan ba povu, “Ema Israel, tanba saa mak imi hakfodak kona ba ida nee? Ka tanba saa mak imi hateke mai ami atu hanoin katak liu hosi ami nia kbiit rasik ka hahalok santu mak ami halo mane nee lao? 13Abraão nia Maromak, Isak nia Maromak, no Jacó nia Maromak, nebee ita nia bei-ala sira nia Maromak, foo ona glória ba Ninia Atan#3:13 Ou ‘labarik’, iha mos versíkulu 26. Jesus. Imi entrega Nia no nega Nia iha Pilatos nia oin, maski Pilatos desidi ona atu husik Nia. 14Maibee imi nega Ida Nebee Santu no Loos, no imi husu fali atu hetan ema nebee mak oho door.#3:14 Bele lee kona ba Pilatos hakarak husik Jesus, maibee povu husu fali Barabas iha Lucas 23:13-25. 15Imi oho Moris Nia Huun, maibee Maromak halo Nia moris hias ona. No ami mak sasin ba ida nee. 16No hodi Ninia naran, no liu hosi fiar ba Ninia naran, mak mane nee sai forti, nebee imi haree no hatene. Fiar ba Jesus mak foo saude kompletu ba mane nee iha imi hotu nia oin.
17Agora, maun-alin sira, hau hatene katak imi la hatene buat nebee imi halo ona nee, hanesan mos imi nia nai ulun sira. 18Maibee buat nebee Maromak foo sai nanis ona liu hosi profeta hotu nia ibun, katak Kristu sei hetan terus, buat nee Nia kumpri ona. 19Nunee arepende ba, no fila fali ba Maromak hodi Nia bele hamoos#3:19 Liafuan iha Gregu bele refere ba ‘apaga’, nebee hamoos liafuan ruma hosi surat. Haree Isaias 43:25 no nota. imi nia sala, no imi bele hetan tempu hakmatek#3:19 Liafuan iha Gregu katak ‘dada iis’. Iha tradusaun balu, fraze nee iha versíkulu 20. iha Nai nia prezensa. 20No Nia bele haruka Kristu nebee Nia foo ona ba imi, nee mak Jesus. 21Lalehan tenki simu Jesus too tempu atu halo buat hotu sai foun. Maromak koalia ona hosi tempu antigu kona ba tempu nee liu hosi Ninia profeta santu sira nia ibun. 22Tanba Moisés dehan, ‘Nai, imi nia Maromak, sei foti Profeta ida ba imi hosi imi nia maun-alin sira nia leet, nebee hanesan hau. Imi tenki rona buat hotu nebee mak Nia hatete ba imi. 23No ida nee sei akontese, katak ema hotu nebee la rona tuir Profeta nee sei lakon hosi ninia povu nia leet.’#3:23 Moisés koalia kona ba Profeta iha Deuteronómiu 18:15-19. 24No profeta hotu nebee koalia ona, hosi Samuel no sira nebee tuir nia, sira mos foo sai kona ba tempu agora nee. 25Imi mak profeta sira nia oan, no oan hosi aliansa nebee Maromak halo ona ho imi nia bei-ala sira, bainhira Nia dehan ba Abraão, ‘Liu hosi o nia bei-oan mak família hotu iha mundu sei hetan bensaun.’#3:25 Haree Jénesis 22:18 no 26:4. 26Maromak hili tiha ona Ninia Atan no haruka Nia uluk ba imi, atu foo bensaun ba imi, no fila imi ida-idak hosi imi nia hahalok aat.”
Currently Selected:
Apostolu 3: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
