Apostolu 5
5
Ananias No Safira
1Maibee mane ida naran Ananias ho ninia feen Safira faan sira nia rai ida. 2Ananias kaer hela osan nee balu, no ninia feen hatene. Depois nia lori osan balu deit no tau iha apostolu sira nia ain. 3Maibee Pedro dehan, “Ananias, tanba saa mak o nia fuan laran sai nakonu ho Satanás too o bosok Espíritu Santu, no kaer hela osan balu hosi rai nia folin nee? 4Bainhira o seidauk faan rai nee, laos rai nee o nian? No bainhira o faan tiha, laos o bele halo saida deit ho osan nee? Tanba saa mak o hanoin atu halo buat nee iha o nia fuan laran? O la bosok ema, maibee o bosok Maromak.” 5Bainhira Ananias rona tiha liafuan nee, nia monu kedas ba rai, no nia iis kotu. No ema hotu nebee rona kona ba buat sira nee sai tauk tebes. 6Depois joven mane sira hamriik, falun nia, lori nia sai no hakoi nia.
7Liu tiha maizoumenus oras tolu, ninia feen tama mai, maibee nia la hatene saida mak akontese ona. 8No Pedro dehan ba nia, “Foo hatene mai hau, imi faan rai ho folin nee ka?” No nia dehan, “Loos, folin mak nee.” 9Pedro dehan ba nia, “Oinsaa mak imi hanoin hamutuk atu koko Nai nia Espíritu? Tebes, ain hosi sira nebee foin hakoi o nia laen nee mai too odamatan ona, no sira sei lori o sai.” 10Iha momentu nee kedas, nia monu ba rai iha Pedro nia ain no nia iis kotu. Bainhira joven mane sira tama mai, sira hetan feto nee mate ona, entaun sira lori nia sai no hakoi nia iha ninia laen nia sorin. 11Igreja tomak no ema hotu nebee rona kona ba buat sira nee sai tauk tebes.
Milagre Barak
12Apostolu halo sinál no milagre oi-oin ho sira nia liman iha povu nia leet. No sira hotu halibur hamutuk iha Portiku Salomão nian. 13Ema seluk la brani atu tama hamutuk ho sira, maibee ema seluk foo respeitu boot ba sira. 14No ema nebee fiar ba Nai aumenta ba beibeik. Ema lubun sira nee inklui mane no feto. 15Sira mos lori sai ema moras ba dalan, no tau iha kama no biti, atu nunee Pedro nia lalatak bele kona sira balu bainhira nia lao liu. 16Ema barak mos mai hosi aldeia-aldeia besik Jerusalém. Sira lori ema nebee moras no ema nebee simu terus hosi espíritu aat. No ema ida-idak hetan isin diak.
Apostolu Sira Hetan Kastigu
17Maibee saserdote boot hamriik, no ema hotu nebee hamutuk ho nia (nee mak ema Saduseu sira), no sira sai nakonu ho laran moras. 18Sira kaer apostolu sira, no tau sira iha komarka públiku. 19Maibee iha kalan, Nai nia anju loke odamatan iha komarka. Nia lori sira sai ba liur, no dehan, 20“Baa hamriik iha Templu, no koalia ba povu liafuan hotu kona ba Moris nee.” 21Rona tiha nunee, sira tama ba Templu iha dadeer-saan sedu no hanorin ema. Tuir mai, saserdote boot mai ho sira nebee hamutuk ho nia. Nia bolu tribunál mai halibur hamutuk, no katuas sira hotu hosi povu Israel. Depois nia haruka ema atu lori mai apostolu sira hosi komarka. 22Maibee bainhira guarda sira baa, sira la hetan apostolu sira iha komarka. Sira fila fali no foo hatene ba sira, 23no dehan, “Ami haree komarka nee taka metin hela no seguru, no seguransa sira hamriik hela iha odamatan oin. Maibee bainhira ami loke odamatan, ami la hetan ema ida iha laran.” 24Bainhira xefi seguransa hosi Templu no xefi saserdote sira rona tiha buat sira nee, sira sai bilaan no la hatene saida mak sei akontese hosi ida nee. 25Depois ema ida mai no foo hatene ba sira, “Haree took! Ema sira nebee imi tau iha komarka nee agora hamriik hela iha Templu no hanorin povu.” 26Nunee xefi seguransa ho guarda sira baa no lori apostolu sira mai. Maibee sira la kaer ho brutu, tanba sira tauk povu nee bele tuda fatuk ba sira.
27No bainhira sira lori apostolu sira mai, sira tau sira iha tribunál nia oin. No saserdote boot husu sira, 28no dehan, “Laos ami manda imi atu imi keta hanorin hodi naran nee? No tebes, imi halo nakonu Jerusalém ho imi nia hanorin. No imi hakarak atu foo sala ba ami kona ba Mane nee nia raan.” 29Depois Pedro no apostolu sira seluk nee hataan, “Ami tenki halo tuir Maromak duké ema. 30Ita nia bei-ala sira nia Maromak halo Jesus moris hias ona, nebee imi oho bainhira imi prega Nia ba ai huun ida.#5:30 Sira la dehan ‘krús’ maibee dehan ‘ai’ ka ‘ai huun ida’ nebee iha ligasaun ho Deuteronómiu 21:23. 31Maromak foti aas Jesus ba Ninia liman loos atu sai Nai Ulun no Salvadór, atu foo hahalok arepende ba Israel no perdua ba sala. 32Ami mak sasin ba buat sira nee, hamutuk ho Espíritu Santu, nebee Maromak foo ona ba sira nebee halo tuir Nia.”
33Rona tiha nunee, sira sai hirus makaas, no hakarak oho apostolu sira. 34Maibee ema Farizeu ida naran Gamaliel hamriik iha tribunál. Nia mak ema nebee hanorin lei no ema hotu respeita nia. Nia haruka ema lori apostolu sira sai ba liur too tempu uitoan. 35Nia dehan ba sira, “Ema Israel, hanoin di-diak kona ba buat nebee imi hakarak atu halo ba ema sira nee. 36Tanba molok tempu nee, Teudas mosu mai no foti aan nudar ema boot ida. Maizoumenus ema nain atus haat tuir nia. Ema oho nia no ema hotu nebee tuir nia namkari deit no buat nee para ona. 37Tuir tempu nebaa, Judas mosu mai hosi Galileia iha tempu sensus nian. Ema barak lao tuir nia. Maibee nia mos lakon no ema hotu nebee tuir nia namkari deit. 38No agora hau dehan ba imi kona ba asuntu ida nee, hadook aan tiha hosi ema sira nee no husik sira ba. Tanba se karik planu nee ka hahalok nee mai hosi ema, ida nee sei lakon deit. 39Maibee se ida nee mai hosi Maromak, imi la bele halakon ida nee. Ikus mai, karik imi halo funu hasoru Maromak!” Entaun sira simu ninia liafuan. 40Depois sira bolu fali apostolu sira, no baku sira ho sikote. No sira manda apostolu sira nee atu la bele koalia hodi Jesus nia naran. Depois sira husik apostolu sira baa. 41Apostolu sira sai hosi tribunál nia oin, no sira haksolok katak sira merese atu simu terus tanba Naran nee. 42No loro-loron iha Templu no iha uma hotu sira la para atu hanorin no haklaken katak Jesus mak Kristu.
Currently Selected:
Apostolu 5: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
