Exodu 2

Moisés Moris

1Iha tempu nebaa, iha mane ida hosi suku Levi nebee kaben ho feto ida hosi suku Levi. 2Depois feto nee isin rua no tuur ahi hetan oan mane ida. Bainhira nia haree katak ninia oan nee bonitu nia subar ninia oan too fulan tolu. 3Maibee nia la bele subar nia oan nee kleur liu tan. Nunee nia foti luhu ida nebee halo ho duut teberau no taka ho alkatraun. Nia tau nia oan ba iha luhu laran nee, no tau iha duut teberau nia leet iha mota ninin.

4Bebee nee nia biin hamriik dook hodi haree saida mak sei akontese ho nia alin mane.

5Iha tempu nee Faraó nia oan feto mai hariis iha mota nee, no ninia atan sira lao ba-mai iha mota ninin. Derepenti liurai nia oan feto haree luhu ida iha teberau nia leet, no nia haruka ninia atan ida ba foti luhu nee. 6Bainhira nia loke luhu, nia haree bebee ida iha laran no bebee nee tanis hela. Nia hanoin tebe-tebes bebee nee no dehan, “Bebee nee mak ema Ebreu nia oan.” 7Depois bebee nia biin husu ba Faraó nia oan feto, “Hau bele bolu feto Ebreu ida atu mai foo susu ba bebee nee ka?” 8Faraó nia oan feto hataan, “Bele!” Nunee labarik feto nee baa bolu bebee nia inan rasik. 9Faraó nia oan feto hatete ba feto Ebreu nee, “Lori bebee nee, foo susu no hakiak ba. Depois hau sei selu o nia kolen.” Senhora nee lori bebee nee no foo susu ba nia. 10Bainhira bebee nee komesa boot ona, ninia inan entrega nia ba Faraó nia oan feto. Depois Faraó nia oan feto foti bebee nee sai nia oan hakiak, no nia foo naran Moisés#2:10 Liafuan ‘Moisés’ bele iha sentidu rua: iha lian Ejitu – ‘oan hosi’ no lian Ebreu – ‘foti hosi (bee)’. Tuir fali mai, ema Israel sira halo ligasaun ho nia naran Moisés no tempu nebee nia lori povu liu hosi tasi. (Ex. 14:22, Isa. 63:11) ba labarik nee no nia dehan, “Tanba hau foti nia hosi bee.”

Moisés Halai ba Rai Midian

11Iha tempu nebaa, bainhira Moisés idade boot ona, nia baa vizita ninia maluk sira. Nia haree oinsaa sira halo servisu todan. Nia haree mos ema Ejitu ida baku ema Ebreu ida nebee ninia maluk ida. 12Moisés haree ba-mai, no nia la haree ema ida, entaun nia baku mate ema Ejitu nee no subar ema Ejitu nia mate isin iha rai henek laran. 13Loron tuir mai, Moisés baa fali no nia haree ema Ebreu nain rua baku malu. No nia husu ba ema ida nebee sala nee, “Tanba saa mak o baku#2:13 Iha lian Ebreu, ‘oho’ iha versíkulu 11 no 12 mak liafuan katak ‘baku’ iha versíkulu 13. Liafuan nee bele sentidu ‘baku’ ka ‘baku mate’. o nia maluk?” 14Ema nee hataan, “See mak foti ita sai ami nia xefi no juis? Ita atu oho hau hanesan mos ema Ejitu nebee ita oho tiha ona nee ka?” Nunee Moisés tauk no hanoin, “Hau nia hahalok nee ema hatene ona.” 15Kuandu Faraó rona kona ba ida nee, nia buka dalan atu oho Moisés. Maibee Moisés halai hosi Faraó nia oin. Nia baa hela iha rai Midian no nia tuur iha bee posu ida.

16Iha Midian nee iha amu lulik ida nebee iha oan feto nain hitu. Feto sira nee mai atu kuru bee. Sira enxe nakonu tanki badak hodi foo hemu ba sira nia aman nia bibi. 17Maibee bibi atan sira seluk mai duni sees feto sira nee. Depois Moisés hamriik no salva feto sira nee no foo bee hodi sira nia bibi bele hemu. 18Bainhira feto sira nee fila fali ba sira nia aman Reuel,#2:18 Reuel iha sentidu ‘Maromak nia kolega.’ Mane nee nia naran seluk mak Jetro. (Ex. 3:1) nia husu, “Tanba saa mak ohin imi fila sedu?” 19Sira hataan, “Iha ema Ejitu ida nebee salva ami hosi bibi atan sira nia liman. No nia rasik kuru bee no foo mai ami no foo hemu ba ita nia bibi sira.” 20Depois aman nee husu ba ninia oan feto sira, “Nia agora iha nebee? Nusaa mak imi husik ema nee? Imi ba bolu nia mai haan lai.” 21Moisés kontenti atu hela hamutuk ho mane nee. Tuir mai, mane nee foo ninia oan feto Zipora kaben ho Moisés. 22Depois Zipora tuur ahi oan mane ida. Moisés hanaran nia Gerson,#2:22 Gerson nee besik atu hanesan liafuan iha Ebreu katak ‘ema rai liur’. tanba Moisés hanoin, “Hau ema rai liur nebee lao iha rai estranjeiru nee.”

23Liu tiha tinan barak, liurai Ejitu nee mate ona. Maibee povu Israel sei halerik tanba sira servisu todan hela. Nunee sira hakilar, no sira nia lian sae too iha Maromak tanba sira nia servisu todan. 24Maromak rona sira nia lian, no Maromak hanoin hetan Ninia aliansa nebee Nia halo ona ho Abraão, Isak no Jacó. 25Maromak haree ema Israel sira, no Maromak hatene ona.

Currently Selected:

Exodu 2: BK

Highlight

Copy

Compare