Exodu 26

Tabernakulu Santu

1“Depois o tenki halo Tabernakulu ho hena sanulu hosi hena linhu nebee suku hamutuk ho kabas kór azúl, kór uvas, no kór mean, no suku dezenhu furak nebee iha kerubim sira.

2Hena ida naruk metru sanulu resin rua sentímetru neen-nulu no luan metru ida sentímetru ualu-nulu.#26:2 Ebreu ‘naruk liman rua-nulu resin ualu no luan liman haat’ nebee sira sukat ho liman, hosi liman sikun ba liman fuan, nebee naruk sentímetru haat-nulu resin lima. Hena sira nee tenki naruk hanesan. 3Hena lima tenki tutan hamutuk no hena lima seluk mos tenki tutan hamutuk. 4Iha hena sira primeiru nia ninin imi tenki halo tali kabuar nebee kór azúl, nunee mos halo iha hena sira seluk nee nia ninin. 5Halo tali kabuar lima-nulu iha hena ida no tali kabuar lima-nulu iha hena ida seluk nia ninin nebee iha segundu nian, nunee tali kabuar sira nee bele hasoru malu. 6No o tenki halo kait lima-nulu hosi osan mean no tutan malu hena sira nee hamutuk ho kait hodi nunee sira sai Tabernakulu ida.

7No mos o tenki halo hena sira hosi bibi nia fulun hodi taka nudar kakuluk ba Tabernakulu nee. O tenki halo hena sanulu resin ida. 8Hena ida naruk metru sanulu resin tolu ho balu no nia luan metru ida sentímetru ualu-nulu. No hena sanulu resin ida nee tenki sukat hanesan. 9Hena lima nee o tenki tutan hamutuk, no hena neen nee tutan hamutuk. Hena ba dala neen nian o tenki dobra ba rua iha Tabernakulu nee nia oin. 10O tenki halo tali kabuar lima-nulu iha hena primeiru nia ninin, no tali kabuar lima-nulu iha hena segundu nia ninin.

11O tenki halo kait lima-nulu hosi besi riti no hatama kait sira nee iha tali kabuar sira no tutan hena sira nee hodi sai ida deit. 12Bele husik hena nia rohan nebee naruk liu hodi taka Tabernakulu kotuk. 13No hena nia rohan iha sorin naruk, nebee sentímetru haat-nulu resin lima iha sorin ida no sentímetru haat-nulu resin lima iha sorin seluk, bele husik hodi taka iha Tabernakulu nia sorin rua. 14Nunee mos o tenki halo lona hosi bibi malae aman nia kulit ho kór mean no ida fali hosi animál seluk#26:14 Ebreu takhash, nebee ita la hatene loos. Ema balu dehan animál ida hanesan lumba lumba, maibee ema seluk dehan tenki kulit hosi animál ida nebee moos. Liafuan nee bele refere mos ba kulit nia kór ka dezenhu. nia kulit hodi taka tenda nee.

15O tenki prepara ai kabelak hosi ai kasi nebee hamriik loos hodi uza ba Tabernakulu nee. 16Ai kabelak ida aas metru haat ho balu no nia luan sentímetru hitu-nulu. 17Ai kabelak ida-idak tenki iha liman rua nebee monta hanesan. Nunee ai kabelak hotu iha Tabernakulu tenki halo hanesan. 18O tenki halo ai kabelak rua-nulu iha parte súl. 19No o tenki halo ain haat-nulu hosi osan mutin hodi tau iha ai kabelak rua-nulu nee nia okos, ain rua iha ai kabelak ida nia okos hodi simu nia liman, no ain rua iha ai kabelak seluk nia okos nebee tuir mai hodi simu ninia liman. 20No mos hosi sorin norte, o tenki halo ai kabelak rua-nulu 21ho nia ain hosi osan mutin nee haat-nulu, ain rua iha ai kabelak ida no ain rua iha ai kabelak ida nebee tuir mai. 22Iha Tabernakulu nia kotuk, hosi parte oeste, o tenki halo ai kabelak neen. 23Ai kabelak rua o tenki halo iha Tabernakulu nia lidun iha sorin rua. 24Ai kabelak rua nee tenki iha nia kait kaduak iha kraik no iha leten mos, besik iha kadeli primeiru; nunee halo ba ai kabelak rua nee no sira tenki sai lidun. 25Nunee tenki iha ai kabelak ualu ho sira nia ain nebee halo ho osan mutin: hamutuk ain sanulu resin neen nebee ain rua iha ai kabelak ida, no ain rua iha ai kabelak nebee tuir mai. 26O tenki halo ai naruk hosi ai kasi: ai naruk lima ba ai kabelak sira iha sorin ida, 27no ai naruk lima ba ai kabelak sira iha sorin seluk, no ai naruk lima ba ai kabelak sira iha kotuk, iha sorin oeste. 28No ai naruk iha ai kabelak nia klaran, tenki halo hosi rohan ida too ba rohan seluk. 29Ai kabelak sira nee tenki falun ho osan mean, no kadeli sira o tenki halo hosi osan mean hodi hatama ai naruk sira nee. No ai naruk sira nee o tenki falun ho osan mean. 30Nunee o tenki harii Tabernakulu tuir planu nebee Hau hatudu tiha ona ba o iha foho leten.

31O tenki halo veo ho kabas kór azúl, kór uvas no kór mean no halo ho hena linhu nebee suku ho dezenhu furak nebee inklui kerubim sira. 32O tenki tara veo nee iha ai riin haat nebee halo hosi ai kasi nebee falun ho osan mean, no halo sira nia kait ho osan mean hodi tama ba ain haat nebee halo ho osan mutin. 33Veo nee o tenki tara iha kait sira iha leten no o tenki lori Arka Aliansa nee ba iha veo nia kotuk, nunee veo bele fahe entre Fatin Santu no Fatin Santu Liu. 34O tenki taka Arka Aliansa ho nia matan iha Fatin Santu Liu. 35Meza nee o tenki tau iha veo nia sorin liu no tau kandelabru iha meza nia oin. Kandelabru nee iha sorin súl no meza iha sorin norte.

36O tenki halo odamatan hosi kabas kór azúl, kór uvas no kór mean. Halo ho hena linhu nebee suku borda ho kór oi-oin. 37O tenki halo ai riin lima hosi ai kasi no falun ho osan mean hodi tara hena odamatan nee. Halo sira nia kait ho osan mean no sira nia ain lima halo ho besi riti.”

Currently Selected:

Exodu 26: BK

Highlight

Copy

Compare