Exodu 34
34
Fatuk Kabelak Foun
1 Nai hatete ba Moisés, “Koa fatuk belar rua nebee hanesan ho fatuk primeiru nee. No Hau sei hakerek liafuan iha fatuk belar nee nebee hanesan ho liafuan iha fatuk belar uluk nebee o riba rahun tiha nee. 2Prepara hodi aban dadeer-saan o bele sae ba foho Sinai hodi hasoru Hau iha foho tutun. 3Maibee ema ida mos la bele sae hamutuk ho o no mos la bele iha ema ida iha foho huun nee. Bibi malae, bibi timor no karau sira la bele haan besik iha foho huun nee.” 4Depois Moisés koa fatuk belar rua hanesan ho ida primeiru nee. No iha aban dadeer-saan nakukun, nia hadeer no nia lori fatuk belar rua nee ho nia liman. Nia sae foho Sinai, tuir orden nebee Nai hatete ba nia. 5No Nai tuun mai iha kalohan no hamriik besik Moisés. Nia foo sai Ninia naran nebee ‘Nai’. 6No Nai lao liu iha Moisés nia oin no hatete ho lian makaas, “Nai, Nai Maromak nebee iha laran luak no grasa, neineik atu sai hirus, nakonu ho domin metin no fidelidade. 7Hau hatudu domin metin nafatin ba ema rihun ba rihun no foo perdaun ba ema nia sala no hahalok nebee kontra Hau no hahalok aat seluk. Maibee Hau sei la hamoos ema nebee halo hela sala, no Hau sei kastigu sira nia oan sira no bei-oan sira too jerasaun tolu ka haat.” 8Iha momentu nee kedas Moisés hakneak hodi adora Maromak. 9Nia dehan, “Nai, se hau hetan duni grasa iha O nia oin, Oh Nai, hau husu, favór ida, katak O sei lao hamutuk ho ami. Maski povu nee iha ulun toos, maibee foo perdaun ba ami nia sala no hahalok aat sira. No foti ami sai O nia liman rohan.”
Hafoun Fali Aliansa
10 Nai hatete ba Moisés, “Agora Hau halo aliansa ida. Hau sei halo milagre iha sira nia oin nebee nasaun seluk iha mundu nee nunka hetan. Povu hotu sei haree milagre sira nebee Hau halo. Tanba Hau, Nai, sei halo buat nebee halo imi hamtauk. 11Imi tenki halo tuir ukun fuan sira nebee Hau foo ba imi iha loron nee. No tebes Hau sei duni sai ema Amoreu, ema Kanaan, ema Hiti, ema Perizeu, ema Heveu no ema Jebuseu hosi imi nia oin. 12Imi keta halo aliansa ruma ho ema rai nain sira iha rai nebee imi tama nee. Tanba sira bele sai hanesan lasu ida iha imi nia leet. 13Maibee imi tenki harahun tiha sira nia altár sira, sobu tiha sira nia ídulu sira no tesi tiha sira nia Aserá sira. 14Keta adora maromak seluk, tanba Hau mak Nai, nebee iha naran ‘Laran Moras.’ No Hau mak Maromak nebee iha laran moras. 15Imi keta halo aliansa ho ema sira iha rai nebee imi atu tama nee. Tanba bainhira sira hafoer sira nia aan ho sira nia maromak sira no foo sakrifísiu ba sira nia maromak sira, nunee sira sei konvida imi, no imi sei haan sira nia sakrifísiu nee. 16Se imi nia oan mane sira kaben ho ema sira nee nia oan feto, nunee feto sira nee sei hafoer sira nia aan ho sira nia maromak sira. No sira sei hamaus imi nia oan mane sira hodi hafoer sira nia aan ho feto sira nia maromak sira nee. 17Keta halo estátua maromak sira.#34:17 Ebreu uza liafuan katak halo estátua nebee halo osan mean ka besi seluk nabeen no fui hodi forma nia.
18Tenki selebra Festa Paun Fermentu Laek. Iha loron hitu nia laran imi haan paun la kahur fermentu, hanesan Hau dehan ona ba imi. Halo iha fulan Abibi, tanba iha fulan Abibi nee imi sai hosi Ejitu. 19Buat hotu nebee loke oan fatin ba dala ida mak Hau nian, imi nia animál aman hotu, inklui karau oan primeiru no bibi oan primeiru. 20Maibee kuda buru nia oan primeiru nee o sei hola fali ho bibi ida. Se imi lakohi hola fali nia, entaun tenki silu tohar tiha ninia kakorok. Imi nia oan mane hotu nebee moris primeiru imi tenki hola fali. La bele iha ema ida nebee mai hasoru Hau ho liman mamuk.
21Iha loron neen nia laran o sei servisu. Maibee iha loron hitu o sei deskansa. Nunee mos iha tempu fila rai no tempu kolheta o tenki deskansa. 22Tenki selebra Festa Semana nian, iha tempu nebee kolheta foin hahuu, no Festa Haloot Rezultadu iha tinan remata. 23Dala tolu iha tinan ida, mane Israel sira hotu tenki mai iha Hau, Nai Maromak, nia oin, nebee Israel nia Maromak. 24Tanba Hau sei duni sai nasaun sira seluk hosi imi nia oin, no Hau sei halo imi nia rai sai luan tan. No la iha ema ida nebee brani atu hadau imi nia rai bainhira imi mai iha Nai nia oin, imi nia Maromak, dala tolu iha tinan ida.
25Keta oferese Hau nia sakrifísiu nia raan hamutuk ho fermentu. Animal nebee oho hodi halo sakrifísiu ba Festa Páskua tenki haan hotu kedas iha kalan nee, keta husik restu too aban. 26Tinan-tinan imi tenki lori ba Nai, imi nia Maromak, nia uma rezultadu primeiru hosi imi nia toos. Naan bibi keta tein ho nia inan nia susu been.”
27 Nai hatete ba Moisés, “O tenki hakerek liafuan nee, tanba tuir liafuan nee Hau halo aliansa ida ho o no ho Israel.” 28Durante loron haat-nulu no kalan haat-nulu, Moisés hela iha nebaa hamutuk ho Nai, no durante tempu nee nia la haan hahaan no la hemu bee. No nia hakerek iha fatuk belar nee liafuan hosi aliansa, nebee ukun fuan sanulu.
Moisés Tuun Fali Hosi Foho Sinai
29Tuir mai, Moisés tuun hosi foho Sinai ho fatuk belar rua aliansa nian iha ninia liman. Bainhira nia tuun hosi foho, nia la hatene katak nia oin nabilan loos, tanba nia koalia ona ho Nai. 30Bainhira Arão ho ema Israel hotu haree Moisés nia oin nabilan, sira tauk atu hakbesik ba nia. 31Maibee Moisés bolu sira. Nunee Arão ho povu nia lideransa hotu hakbesik fali ba nia, no Moisés koalia ho sira. 32Liu tiha nee, ema Israel hotu halibur besik mai. Moisés hatoo ba sira ukun fuan hotu nebee Nai foo ba nia iha foho Sinai. 33Bainhira Moisés koalia tiha ona ho sira, nia taka ninia oin ho veo ida.
34Bainhira Moisés tama ba iha Nai nia oin hodi koalia ho Nia, nia loke tiha veo nee too nia sai fali. Depois nia hatoo Nai nia lia menon ba ema Israel. 35No bainhira ema Israel haree Moisés nia oin nabilan. Nunee nia taka fila fali ninia oin too nia tama fali hodi koalia ho Nai.
Currently Selected:
Exodu 34: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
