Exodu 36

Moisés Bolu Badaen Sira

1“Nunee duni Belazalel tenki servisu ho Aoliabe, no ema matenek hotu nebee Nai foo tiha ona matenek no kompriensaun. Nunee nia hatene halo servisu oi-oin hodi harii Fatin Santu, no tuir lo-loos buat nebee Nai manda tiha ona.”

2Depois Moisés bolu Belazalel no Aoliabe no ema matenek hotu nebee Nai foo matenek ona iha sira nia fuan laran, sira ida-idak nebee sira nia fuan laran dudu sira atu mai hodi halo servisu. 3Sira simu hosi Moisés oferta nee hotu, nebee ema Israel sira lori hodi halo servisu atu harii Fatin Santu. No ema Israel sira lori tan oferta voluntáriu ba Moisés dadeer-dadeer. 4No ema matenek sira hotu nebee halo Fatin Santu nee, sira husik sira nia servisu hodi mai. 5No sira hatete ba Moisés, “Povu nee lori barak liu fali buat nebee ita presiza hodi halo servisu nebee Nai manda ona atu halo.” 6Depois Moisés foo orden, no sira foo sai iha akampamentu, nunee, “La presiza tan mane ka feto sira atu halo buat ruma hodi oferese ba Fatin Santu.” Nunee Moisés hapara povu sira atu lalika lori sasaan tan. 7Tanba sasaan too ona nebee sira hodi halo servisu nee, no sira iha barak liu tiha ona.

Ema Halo Tabernakulu

8Depois ema matenek hotu iha povu nia leet halo Tabernakulu nee ho hena sanulu. Hena nee mak diak nebee suku ho kabas kór azúl, kór uvas no kór mean. No sira suku dezenhu furak ho kerubim sira. 9Hena ida-idak naruk metru sanulu resin rua sentímetru neen-nulu, no luan metru ida sentímetru ualu-nulu, no hena sira nee hanesan deit.

10Sira tutan malu hena lima nee hodi halo hena boot ida deit no hena lima seluk mos sira tutan malu hodi halo hena boot ida fali. 11Iha hena boot ida nia ninin nee sira halo tali kabuar ho kór azúl, no iha hena boot seluk nia ninin nee sira halo hanesan. 12Sira halo tali kabuar lima-nulu iha hena boot ida, no tali kabuar lima-nulu tan iha hena boot seluk nee, hodi hena boot rua nee bele kait malu. 13Sira halo kait osan mean lima-nulu no tutan malu hena boot rua nee ho kait sira nee, nunee hena boot sira sai tenda ida deit.

14No sira halo hena hosi bibi nia fulun hodi halo lona nebee taka tenda. Sira halo hena sanulu resin ida. 15Hena ida-idak nia naruk mak metru sanulu resin tolu ho balu no nia luan metru ida sentímetru ualu-nulu. No hena sanulu resin ida nee hanesan deit. 16Sira tutan malu hena tahan lima hodi sai ida deit. No sira tutan malu hena tahan neen seluk hodi sai ida deit. 17Sira halo tali kabuar lima-nulu iha hena boot ida nia ninin, no sira halo tali kabuar lima-nulu tan iha hena boot seluk nee. 18No sira halo kait riti lima-nulu hodi tutan tenda. Nunee tenda nee sai ida deit. 19Sira halo lona ida ba Tenda nee hosi bibi malae aman nia kulit nebee kór mean. No sira halo lona ida fali hosi animál seluk nia kulit nebee taka fali lona primeiru.

20Sira halo ai kabelak hosi ai kasi nebee hamriik loos, 21nebee naruk metru haat ho balu no luan sentímetru hitu-nulu. 22Ai kabelak ida-idak iha liman rua nebee monta hanesan. Ema halo ai kabelak sira iha Tabernakulu hanesan nee. 23Ema halo ai kabelak sira iha Tabernakulu nee, iha ai kabelak rua-nulu iha parte súl. 24Sira halo ain haat-nulu hosi osan mutin iha ai kabelak rua-nulu nee nia okos: ain rua iha ai kabelak ida nia okos hodi simu nia liman rua, no ain rua iha ai kabelak ida nebee tuir mai nia okos hodi simu nia liman rua. 25Sira halo mos iha Tabernakulu nia sorin seluk nee, iha parte norte sira halo ai kabelak rua-nulu. 26No sira halo ain haat-nulu hosi osan mutin: ain rua iha ai kabelak ida nia okos, no ain rua iha ai kabelak ida nebee tuir mai nia okos. 27Iha Tabernakulu nia sorin iha parte oeste ema halo ai kabelak neen. 28Iha Tabernakulu nia lidun iha sorin rua, ema halo ai kabelak rua. 29No ai kabelak rua nee sira tutan malu iha kraik no tutan malu iha leten, besik kadeli primeiru. Ema halo hanesan nee iha Tabernakulu nia lidun rua. 30Nunee iha ai kabelak ualu ho nia ain sanulu resin neen hosi osan mutin: ain rua iha ai kabelak ida-idak nia okos.

31Ema halo ai naruk hosi ai kasi: lima ba ai kabelak iha Tabernakulu sorin ida, 32no ai naruk lima seluk ba ai kabelak iha Tabernakulu nia sorin seluk nee, no ai naruk lima ba ai kabelak sira iha Tabernakulu nia parte oeste. 33Ema halo ai naruk hodi tama iha ai kabelak sira nia klaran hosi rohan ba rohan. 34Ema falun ai kabelak sira nee ho osan mean, no sira halo kadeli hosi osan mean hodi hatama ai naruk sira nee. No sira falun ai naruk sira nee ho osan mean.

35Ema halo veo hosi hena kór azúl, kór uvas no kór mean, no hena diak. Sira suku dezenhu furak nebee iha kerubim sira. 36Ema halo ai riin haat hosi ai kasi no falun ho osan mean. Sira halo nia kait hosi osan mean, no nia ain haat halo hosi osan mutin. 37Ema halo mos hena ida tan ba Tenda nia odamatan ho kór azúl, kór uvas no kór mean, no hena diak. No ema suku borda ho kór oi-oin ba hena ida nee. 38Ema halo ai riin lima ho sira nia kait. No sira falun ai riin sira nee nia tutun no nia sasaan tutan ho osan mean. Maibee sira halo ai riin nia ain hosi riti.

Currently Selected:

Exodu 36: BK

Highlight

Copy

Compare