Jénesis 50

José Hakoi Ninia Aman

1José monu ba ninia aman nia oin, no nia tanis ba nia no rei nia. 2No José haruka ninia atan sira nebee doutór sira hodi prepara#50:2 Ebreu ‘tau bumbu’, ida nee mak prosesu Ejitu nian hodi hamaran mate isin ho bumbu ruma no masin molok sira hakoi ema nee. ninia aman nia mate isin. Entaun doutór sira prepara Israel. 3Sira prepara ninia mate isin too loron haat-nulu, tanba sira presiza loron sira nee hodi prepara mate isin ida. No ema Ejitu sira tanis lelir too loron hitu-nulu.

4Bainhira loron tanis lelir nian hotu ona, José koalia ho Faraó nia uma kain no dehan, “Se hau hetan grasa iha ita boot sira nia oin, favór ida, koalia ho Faraó no dehan, 5‘Hau nia aman haruka hau jura, no nia dehan, “Tebes, hau atu mate. Hakoi hau iha rate nebee hau kee ona iha rai Kanaan.” Entaun, favór ida, husik hau baa no hakoi hau nia aman. Depois hau sei fila fali mai.’” 6Faraó dehan, “Baa, no hakoi o nia aman tuir buat nebee nia haruka o jura nee.” 7Entaun José sae baa hodi hakoi ninia aman. Faraó nia atan sira hotu sae baa hamutuk ho nia, no ema boot sira hosi Faraó nia uma kain, no ema boot sira hotu hosi rai Ejitu,#50:7 ‘Ema boot’ nee iha lian Ebreu mak ‘katuas’ nebee iha idade no mos posizaun aas iha Ejitu. 8no mos José nia uma kain, no ninia maun-alin sira, no ninia aman nia uma kain. Só sira nia kiik oan sira no sira nia bibi lubun no karau lubun sira nee mak sira husik deit iha rai Gosen. 9Kuda kareta sira no kuda sae baa hamutuk ho José, no ema sira hotu nee barak loos. 10Sira sae too Atad nia fatin nebee baku trigu, nebee iha Jordaun sorin ba, no iha nebaa sira tanis halerik makaas loos. José tanis lelir too loron hitu tanba ninia aman nee. 11Bainhira ema Kanaan sira nebee hela iha rai nebaa haree ema tanis lelir iha Atad nia fatin nebee baku trigu, sira dehan, “Ida nee mak tanis lelir makaas tebes hosi ema Ejitu sira.” Nunee sira hanaran fatin iha Jordaun sorin ba nee, Abel-Mizraim.#50:11 Abel-Mizraim katak ‘Ejitu Tanis Lelir.’ 12No Jacó nia oan mane sira halo tuir ninia orden ba sira. 13Tanba ninia oan mane sira lori nia ba rai Kanaan, no sira hakoi nia iha rai kuak iha toos nebee iha Makpela. Uluk Abraão sosa fatin nee ho toos hosi Efron nebee ema Hiti, iha Mamre, hodi sai ninia rate. 14Bainhira sira hakoi tiha Jacó, José fila ba Ejitu, nia no ninia maun-alin sira no ema hotu nebee sae baa hamutuk ho nia hodi hakoi ninia aman.

Maromak Nia Planu Diak

15Bainhira José nia maun sira haree katak sira nia aman mate ona, sira dehan, “Se karik José odi ita no nia sei selu fali ba ita tuir buat hotu nebee ita halo ona ba nia.” 16Entaun sira haruka manu-ain ba José no dehan, “Ita nia aman foo orden molok nia mate no dehan, 17‘Imi sei dehan ba José, “Favór ida, perdua o nia maun sira nia sala hasoru o no sira nia sala seluk, tanba sira halo ona buat aat ba o.” Entaun, agora favór ida, perdua ami nia sala nee, tanba ami mak ita nia aman nia Maromak nia atan sira.’” No José tanis bainhira sira koalia ho nia. 18Nia maun sira mos baa no monu ho oin ba rai iha nia oin no sira dehan, “Tebes, ami mak ita boot nia atan sira.” 19José dehan ba sira, “Keta tauk! Hau iha Maromak nia fatin ka? 20Tanba imi hanoin aat hasoru hau, maibee Maromak halo buat nee tuir Ninia planu diak, no Nia halao planu nee too ohin loron, hodi salva ema barak nia moris. 21Nunee, keta tauk. Hau sei foo haan ba imi no imi nia kiik oan sira.” No nia hamaus sira, no koalia diak ba sira.

José Mate

22José hela iha rai Ejitu hamutuk ho ninia aman nia uma kain. No José moris too tinan atus ida sanulu (110). 23José haree Efraim nia bei-oan nia oan sira. No Manasés nia oan mane Makir lori mos ninia oan sira ba José no tau ba José nia ain tuur.#50:23 Signifika katak sura nudar José nia oan sira. 24José dehan ba ninia maun-alin sira, “Hau atu mate. Maromak sei mai vizita imi no lori imi sai hosi rai nee ba rai nebee Nia promete ona ba Abraão, Isak no Jacó.” 25No José husu Israel nia oan sira nee halo juramentu, no nia dehan, “Maromak sei mai vizita duni imi, no imi tenki lori hau nia ruin hosi fatin nee.” 26Depois José mate ho idade tinan atus ida sanulu. No sira prepara ninia mate isin no tau nia iha kaixaun ida iha Ejitu.

Currently Selected:

Jénesis 50: BK

Highlight

Copy

Compare