Jénesis 9
9
Maromak Halo Aliansa Ho Noé
1Maromak foo bensaun ba Noé no ninia oan mane sira no dehan ba sira, “Halo oan#9:1 Ebreu dehan ‘foo fuan’ hanesan ai horis kuda no foo fuan. no habarak ba, no halo nakonu mundu nee. 2Animál hotu iha mundu, manu hotu iha lalehan, buat hotu nebee dolar iha rai no ikan hotu iha tasi sei sai tauk tebes tanba imi. No Hau foo sira ba imi nia liman. 3Buat hotu nebee muda no moris sei sai hahaan ba imi. Hanesan Hau foo ona ai tahan matak, nunee Hau foo buat hotu. 4Maibee imi keta haan naan nebee moris, katak naan nebee sei iha raan. 5Hau sei kastigu duni nia nebee fakar imi nia raan hosi imi nia moris: animál hotu tenki selu no ema tenki selu. Ema tenki selu tanba raan nebee nia fakar hosi ninia maluk nia moris.
6See mak fakar ema nia raan,
ema seluk sei fakar fali ninia raan,
tanba Maromak halo ema hotu tuir Nia ilas.
7No imi tenki halo oan tan no habarak ba. Aumenta barak iha mundu no habarak ba iha fatin nee.
8Maromak koalia ho Noé no nia oan mane sira nebee hamutuk ho nia, no dehan, 9“Tebes, Hau sei estabelese Hau nia aliansa ho o no ho o nia bei-oan sira nebee tuir mai, 10no ho kriatura hotu nebee moris, manu, animál hakiak no animál fuik sira nebee iha mundu hamutuk ho o, buat hotu nebee sai hosi roo boot, animál hotu iha mundu. 11Hau sei estabelese Hau nia aliansa ho o hodi nunka akontese fali katak udan boot halo rai nabeen too isin hotu mate, no rai nabeen sei nunka destrui fali mundu.” 12No Maromak dehan, “Aliansa ida nebee Hau halo entre Hau ho imi no kriatura hotu nebee moris, too jerasaun hotu ba futuru, nia sinál mak nee: 13Hau tau Hau nia arkuiris#9:13 Ebreu uza liafuan ho sentidu katak ‘rama’ nebee halo kurva. iha kalohan, no ida nee sei sai sinál ba aliansa entre Hau ho mundu. 14Bainhira Hau haruka kalohan iha mundu leten, Hau sei haree arkuiris nee iha kalohan. 15No Hau sei hanoin hetan Hau nia aliansa entre Hau ho o no kriatura hotu nebee moris, no udan nee sei la halo rai nabeen hodi destrui isin hotu. 16Arkuiris nee sei iha kalohan no Hau sei haree nia, no Hau sei hanoin hetan aliansa rohan laek nian entre Maromak ho kriatura hotu katak isin hotu iha mundu.” 17No Maromak dehan ba Noé, “Ida nee mak sinál ba aliansa nebee Hau estabelese ona entre Hau ho isin hotu iha mundu.”
Noé Nia Jerasaun
18Noé nia oan sira nebee sai hosi roo boot mak Sem, Kam no Jafet. Kam mak Kanaan nia aman. 19Nain tolu nee mak Noé nia oan sira, no hosi oan sira nee povu hotu tama ba mundu tomak.
20Noé sai ema ida nebee halo toos, no nia kuda toos uvas. 21Nia hemu tua uvas no nia lanu. Depois nia toba isin molik iha ninia tenda laran. 22No Kam, nebee Kanaan nia aman, haree ninia aman nia isin molik, no nia foo hatene ba ninia maun rua iha liur. 23Sem no Jafet foti manta ida no tau iha sira nia kabaas, no sira hakiduk hodi baa taka sira nia aman nia isin molik. Sira nia oin fila hodi sira la haree sira nia aman nia isin molik. 24Bainhira Noé hadeer fali hosi tua uvas nee, nia hatene saida mak ninia oan kiik halo ona ba nia, 25no nia dehan,
“Malisan ba Kanaan!
Nia sei sai atan ba ninia maun-alin sira nia atan sira.”
26Nia dehan mos,
“Haksolok ba Nai, Sem nia Maromak,
no husik Kanaan sai ninia atan.
27Maromak sei aumenta Jafet,
no husik nia hela iha Sem nia tenda,
no husik Kanaan sai ninia atan.”
28Liu tiha rai nabeen nee, Noé sei moris tan tinan atus tolu lima-nulu (350). 29Noé moris too tinan atus sia lima-nulu (950), depois nia mate.
Currently Selected:
Jénesis 9: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
