Levítiku 14
14
Lei Kona Ba Hamoos Moras Lepra
1 Nai koalia ba Moisés no dehan, 2“Ida nee mak lei kona ba ema nebee iha moras lepra iha loron nebee halo nia moos. Tenki lori nia ba saserdote. 3No saserdote sei sai ba hosi akampamentu, no nia sei haree, no tebes, se ema moras lepra hetan kura ona hosi moras lepra, 4entaun saserdote sei foo orden kona ba nia nebee atu sai moos katak ema lori mai manu rua nebee sei moris no moos, ai teka, kabas mean no isope. 5Saserdote sei foo orden katak ema oho manu ida iha sanan rai nia laran nebee bee suli#14:5 Ebreu: ‘bee moris’. Haree ligasaun ho João 4:10. ba. 6No kona ba manu nebee sei moris nee, nia sei foti ai teka, kabas mean no isope no hoban buat sira nee hamutuk ho manu nebee sei moris iha raan hosi manu nebee oho tiha iha bee suli. 7No saserdote sei hisik dala hitu ba nia nebee atu sai moos hosi moras lepra, no nia sei foo sai katak ema nee moos ona. No nia sei foti manu nebee moris hela no husik manu nee iha rai luan. 8Ema nebee atu sai moos nee tenki fasi ninia ropa, koi nia fuuk hotu, hariis iha bee hodi nia sai moos. Depois nia bele tama akampamentu maibee hela iha nia tenda liur too loron hitu. 9Iha loron hitu, nia tenki koi nia fuuk hotu, inkuli nia ulun, hasan rahun no matan fulun. Bainhira nia koi fuuk hotu ona nia tenki fasi ninia ropa, no hariis ho bee, nunee nia sei moos.
10Iha loron ualu nia tenki foti bibi malae oan rua nebee aman no perfeitu, no bibi malae oan ida nebee inan, nebee tinan ida no perfeitu, trigu diak litru neen#14:10 Ebreu ‘efa parte tolu hosi sanulu’, nebee efa ida maizoumenus litru 22. hodi halo oferta trigu nian nebee kahur ho mina, no mina kopu ida.#14:10 Ebreu ‘mina log ida’, nebee log nee hanesan toples ida maizoumenus 300ml. 11Saserdote nebee halo moos sei lori ema nebee atu halo moos, no buat seluk nee, baa iha Nai nia oin, iha odamatan ba Tenda Enkontru. 12No saserdote sei foti bibi malae oan ida nebee aman no oferese nia nudar sakrifísiu multa, no mina kopu ida, no foti sae sira hodi halo oferta foti sae iha Nai nia oin. 13Nia sei oho bibi malae nee iha fatin nebee nia oho sakrifísiu sala nian no sakrifísiu tunu motuk, iha Fatin Santu. Tanba sakrifísiu multa nee hanesan ho sakrifísiu sala nian, buat rua nee mak saserdote nian, no santu liu. 14Saserdote sei foti raan balu hosi sakrifísiu multa, no nia sei kose ba ema nebee atu halo moos nee nia tilun loos nia ikun, no nia liman loos nia liman fuan boot, no nia ain loos nia ain fuan boot. 15Depois saserdote sei foti mina kopu ida nee no fui iha nia liman karuk nia laran 16no saserdote sei hoban nia liman loos nia liman fuan iha mina nebee iha nia liman karuk, no nia sei hisik mina nee ho nia liman fuan dala hitu iha Nai nia oin. 17No mina restu nebee sei iha nia liman, saserdote sei kose ba ema nebee atu halo moos nee nia tilun loos nia ikun, no nia liman loos nia liman fuan boot, no nia ain loos nia ain fuan boot, nebee nia kose iha raan hosi sakrifísiu multa nia leten. 18No mina restu nebee sei iha saserdote nia liman, nia sei fui ba iha ema nebee atu sai moos nia ulun leten, no saserdote sei taka nia sala iha Nai nia oin. 19Saserdote sei oferese sakrifísiu sala nian hodi taka nia sala, ba nia nebee atu sai moos hosi buat nebee halo nia la moos. Depois nia sei oho sakrifísiu tunu motuk. 20No Saserdote sei oferese sakrifísiu tunu motuk no oferta trigu nian iha altár leten. Nunee saserdote taka tiha ninia sala no nia sei sai moos.
21Se ema nee kiak, no nia la bele hetan buat sira nee, entaun nia tenki lori bibi malae oan ida nudar sakrifísiu multa nebee bele foti sae, hodi taka nia sala, no trigu diak litru rua nebee kahur ho mina hodi halo oferta trigu nian, no mina kopu ida, 22no manu lakateu rua, ka manu pombu oan rua, tuir buat nebee nia bele hetan. Ida sei sai sakrifísiu sala nian no ida fali mak sakrifísiu tunu motuk. 23Nia sei lori ba saserdote iha loron ba dala ualu hodi sai moos, ba odamatan iha Tenda Enkontru, iha Nai nia oin. 24No Saserdote nee sei foti bibi malae oan nebee sakrifísiu multa no mina kopu ida, no nia sei foti sae buat sira nee nudar oferta foti sae iha Nai nia oin. 25No nia sei oho bibi malae oan nebee sakrifísiu multa no saserdote sei foti raan balu hosi sakrifísiu multa no kose ba nia nebee atu sai moos nia tilun ikun, no nia liman loos nia liman fuan boot, no nia ain loos nia ain fuan boot. 26Saserdote sei fui mina balu ba iha nia liman karuk nia laran. 27Saserdote sei hatama nia liman fuan loos ba mina nebee iha nia liman karuk nia laran no hisik dala hitu ba iha Nai nia oin. 28No saserdote sei tau mina balu hosi nia liman ba iha nia nebee atu sai moos nia tilun ikun, no nia liman loos nia liman fuan boot, no nia ain loos nia ain fuan boot, nebee kose iha raan hosi sakrifísiu multa nia leten. 29No mina restu nebee sei iha saserdote nia liman, nia sei fui ba iha ema nebee atu sai moos nia ulun leten, hodi taka nia sala iha Nai nia oin. 30No nia sei oferese manu lakateu ida, ka manu pombu ida, tuir buat nebee nia hetan, 31no tuir buat nebee nia hetan nee, ida ba sakrifísiu sala nian no ida fali ba sakrifísiu tunu motuk, ho oferta trigu nian. No ba ema nebee atu sai moos nee, saserdote sei taka nia sala iha Nai nia oin. 32Ida nee mak lei ba ema nebee iha moras lepra nebee la bele hetan buat seluk nee hodi halo seremónia atu sai moos.”
Lei Kona Ba Halo Uma Moos
33 Nai koalia ba Moisés no Arão, no dehan, 34“Bainhira imi tama ba rai Kanaan, nebee Hau sei foo ba imi hodi sai imi nian, no Hau tau moras lepra iha uma ida iha rai nebee imi nian, 35no nia nebee uma nain mai no foo hatene ba saserdote no dehan, ‘Hau hanoin katak hau nia uma iha moras ida.’ 36Entaun saserdote tenki foo orden hodi sira hasai buat hotu hosi uma nee, molok saserdote tama hodi haree moras nee, hodi buat hotu iha uma laran la sai la moos. Depois saserdote sei tama hodi haree uma. 37No nia sei haree moras nee, no tebes, se moras iha uma nia didin laran no iha kór makerek nebee matak ka mean uitoan, nebee nia haree tama klean uitoan ba didin laran, 38entaun saserdote sei sai hosi uma ba uma nia odamatan no nia sei taka uma nee too loron hitu. 39Iha loron hitu, saserdote sei mai fali no haree, no tebes, se moras nee aumenta tan iha uma nia didin sira, 40entaun saserdote sei foo orden katak sira tenki hasai fatuk sira nebee iha moras nee no soe fatuk sira nee ba fatin nebee la moos iha sidade liur. 41No nia sei haruka sira koir reboka hosi didin hotu iha uma laran, no sira tenki lori reboka rahun nebee sira koir sai nee no soe ba sidade liur, ba fatin nebee la moos. 42No sira tenki foti fatuk seluk no tau fali iha fatin nebee sira hasai fatuk uluk nian, no halo masa foun no reboka fali uma.
43No se moras nee mai fali no mosu iha uma laran, iha uma nebee sira hasai tiha ona fatuk no koir sai tiha ona reboka, no reboka fali ona, 44entaun saserdote sei mai no haree, no tebes, se moras nee aumenta iha uma laran, no ida nee mak moras lepra nebee moruk iha uma laran, nunee uma nee la moos. 45No nia tenki sobu uma nee, inklui fatuk, ai no reboka hotu iha uma nee. Nia tenki lori sai buat hotu nee ba sidade liur, ba fatin nebee la moos. 46No mos, see see deit nebee tama uma durante tempu nebee uma taka, ema nee sei la moos too kalan. 47Ema nebee toba iha uma nee tenki fasi ninia ropa, no nia nebee haan iha uma nee tenki fasi ninia ropa.
48Se saserdote tama mai no haree, no tebes, moras nee la aumenta tan iha uma depois sira reboka tiha ona uma, entaun saserdote sei foo sai katak uma nee moos ona, tanba moras nee kura ona. 49No hodi halo uma moos, nia sei foti manu rua, ai teka, kabas mean no isope. 50Nia sei oho manu ida iha sanan rai nia laran nebee bee suli ba. 51No nia sei foti ai teka, isope no kabas mean, no manu nebee sei moris, no hoban sira iha raan hosi manu nebee oho ona iha bee suli, no hisik uma dala hitu. 52Nia sei halo uma nee moos ho raan hosi manu, no ho bee nebee suli nee, no ho manu nebee sei moris, no ai teka, isope no kabas mean. 53Maibee nia sei husik manu moris iha sidade liur, iha rai luan. Nunee nia sei halo dame ba uma nee, no uma nee sei sai moos.”
54Ida nee mak lei ba moras lepra oi-oin: ba moras katar, 55ba moras lepra iha ropa ka iha uma, 56no moras bubu, ka fisur ka fatin kór seluk, 57hodi nunee hanorin kona ba bainhira buat ida la moos no bainhira buat nee moos. Ida nee mak lei lepra nian.
Currently Selected:
Levítiku 14: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.