Levítiku 7
7
Lei Kona Ba Sakrifísiu Seluk Tan
1Ida nee mak lei kona ba sakrifísiu multa. Sakrifísiu nee mak santu liu. 2Iha fatin nebee sira oho sakrifísiu tunu motuk sira tenki oho sakrifísiu multa. No sira sei fakar raan hosi sakrifísiu nee haleu altár nia sorin hotu. 3Nia sei oferese bokur hotu hosi sakrifísiu nee, inklui ikun no bokur nebee iha animál nia teen boot, 4no rins rua no bokur nebee belit iha sira, nebee iha nia kanotak, no bokur nebee taka aten, nia tenki hasai ho rins sira. 5Saserdote sei tunu motuk iha altár leten nudar oferta ida halo ho ahi ba Nai, buat nee sakrifísiu multa nian. 6Mane hotu iha saserdote sira nia leet sei haan buat nee, no sira haan iha Fatin Santu nee. Sakrifísiu nee santu liu. 7Sakrifísiu multa nian hanesan ho sakrifísiu sala nian: buat rua nee iha lei ida. Saserdote ida nebee taka sala ho sakrifísiu nee sei hetan buat nee. 8Saserdote ida nebee oferese ema naran deit nia sakrifísiu tunu motuk nian sei hetan animál kulit hosi sakrifísiu tunu motuk nian nebee nia foin oferese tiha. 9No oferta trigu hotu nebee tunu iha fugaun, no buat hotu nebee prepara iha sanan rai no taxu nee sei sai saserdote nian nebee oferese buat sira nee. 10No oferta trigu hotu nebee kahur ho mina ka maran hela, buat nee sei fahe hanesan ho Arão nia oan mane sira hotu.
11“Ida nee mak lei kona ba sakrifísiu dame nian nebee nia sei oferese ba Nai. 12Se nia oferese hodi foo agradese, entaun nia sei oferese paun hamutuk ho sakrifísiu agradesimentu nian, nebee paun nebee la iha fermentu nebee kahur ho mina, no paun belar nebee la iha fermentu nebee kose ho mina, no paun nebee halo ho trigu diak, kahur ho mina no sona. 13No mos ho ninia sakrifísiu dame nian nebee foo agradese nia sei oferese paun nebee iha fermentu. 14Hosi sakrifísiu ida-idak nee nia sei foti paun ida hodi sai prezenti ida ba Nai, no paun nee sai saserdote nian nebee hisik raan hosi sakrifísiu dame sira. 15Naan nebee mai hosi sakrifísiu dame sira nebee foo agradese, nia tenki haan iha loron hanesan nebee nia oferese sakrifísiu nee. Nia keta husik naan nee too aban dadeer fali. 16Maibee se sakrifísiu hosi ninia oferta nee mak juramentu nian ka voluntáriu nian, entaun nia bele haan iha loron hanesan nia oferese sakrifísiu nee no mos nia bele haan restu iha loron nebee tuir mai. 17Maibee naan restu hosi sakrifísiu nee nebee sei iha hela iha loron terseiru tenki tunu motuk ho ahi. 18Se karik ema haan naan hosi sakrifísiu dame sira iha loron terseiru, buat nee Hau la simu, no sakrifísiu nee la iha folin ba nia nebee oferese. Sakrifísiu nee sai foer loos no ema nebee haan buat nee iha hahalok aat.
19“Keta haan naan nebee kona buat nebee foer, naan nee tunu motuk ho ahi. Ema hotu nebee moos bele haan naan, 20maibee ema foer nebee haan naan hosi sakrifísiu dame nebee Nai nian, imi tenki hakotu nia hosi ninia povu. 21No ema nebee kona buat nebee foer hanesan ema nia foer, ka animál foer, ka buat naran deit nebee foer loos, no nia haan naan hosi sakrifísiu dame sira nebee Nai nian, imi tenki hakotu nia hosi ninia povu.”
22 Nai koalia ba Moisés, no dehan, 23“Koalia ba ema Israel sira no dehan, Imi keta haan bokur hosi karau, ka bibi malae ka bibi timor. 24Imi bele uza bokur hosi animál nebee mate rasik no bokur hosi animál nebee animál fuik lees mate tiha. Bokur nee bele uza naran deit maibee imi keta haan. 25See-see deit nebee haan bokur hosi animál, nebee ema oferese tiha nudar sakrifísiu halo ho ahi ba Nai, ema nebee haan nee tenki hakotu nia hosi ninia povu. 26No mos, imi keta haan raan saida deit, hosi manu ka hosi animál, iha fatin nebee deit nebee imi hela. 27See-see deit nebee haan raan saida deit, imi tenki hakotu ema nee hosi ninia povu.”
28 Nai koalia ho Moisés, no dehan, 29“Nia nebee oferese ninia sakrifísiu dame sira ba Nai, nia rasik tenki lori ninia oferta nee hosi ninia sakrifísiu dame sira ba Nai. 30Ninia liman rasik tenki lori sakrifísiu sira nebee halo ho ahi ba Nai. Nia tenki lori bokur nee ho naan hirus matan hodi nia bele hasae naan hirus matan nudar oferta nebee hasae iha Nai nia oin. 31Saserdote sei tunu bokur iha altár leten, maibee naan hirus matan sei sai Arão nian no ninia oan mane sira nian. 32Tenki foo kelen iha sorin loos ba saserdote nudar oferta nebee hasae hosi imi nia sakrifísiu dame sira. 33Arão nia oan mane ida nebee oferese raan hosi sakrifísiu dame sira, no bokur nee, nia sei hetan kelen hosi sorin loos hodi sai ninian. 34Tanba Hau foti naan hirus matan nebee hasae no kelen nebee oferese hosi ema Israel sira, Hau foti hosi sira nia sakrifísiu dame sira no Hau foo ba saserdote Arão no ninia oan mane sira. Ida nee mak estatutu too tinan ba tinan iha ema Israel sira nia leet. 35Buat nee sei ba Arão nebee simu tiha unsaun, no ninia oan mane sira nebee simu unsaun, hosi oferta sira nebee halo ho ahi ba Nai, hosi loron nebee sira mai hodi serví Nai nudar saserdote. 36Nai foo orden katak tenki foo hahaan sira nee hosi ema Israel sira ba saserdote sira iha loron nebee Nia foo unsaun ba sira, no orden nee sei sai estatutu too tinan ba tinan durante sira nia jerasaun sira. 37Ida nee mak lei kona ba sakrifísiu tunu motuk, sakrifísiu sala nian, sakrifísiu multa, buat sira nebee santu no sakrifísiu dame sira 38nebee Nai foo orden ba Moisés iha foho Sinai, iha loron nebee Nia foo orden ba ema Israel sira hodi oferese sira nia oferta sira ba Nai, iha rai fuik Sinai.
Currently Selected:
Levítiku 7: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.