Lucas 10
10
Jesus Haruka Ema Hitu-nulu Resin Rua
1Tuir mai, Nai foo knaar ba ema nain hitu-nulu resin rua,#10:1 Manuskritu balu dehan ‘hitu-nulu’. Iha mos versíkulu 17. no haruka sira nain rua-rua baa uluk Nia no tama sidade no fatin hotu nebee Nia atu baa. 2Nunee Nia dehan ba sira, “Loos duni, toos nee boot, maibee ema hodi servisu mak uitoan deit. Nunee halo orasaun ba Toos Nain hodi Nia bele haruka ema hodi servisu iha Ninia toos.#10:2 Haree Mateus 9:37-38 no nota. 3Baa deit. Tebes, Hau haruka imi baa nudar bibi oan iha asu fuik sira nia leet. 4Keta lori osan fatin ka pasta ka sandálias. Keta kumprimenta ema iha dalan. 5Ba uma hotu nebee imi tama, dehan uluk, ‘Dame ba uma nee!’ 6No se ema dame hela iha nebaa, husik imi nia dame hela ho nia. Se lae, dame nee sei fila fali ba imi. 7No hela iha uma nee. Haan no hemu buat nebee sira foo. Tanba ema servisu merese atu simu ninia kolen.#10:7 Haree 1 Timóteo 5:18. La bele muda hosi uma ba uma. 8No iha sidade hotu nebee imi tama, no sira simu imi, haan buat nebee sira tau iha imi nia oin. 9Kura ema moras iha nebaa, no dehan ba sira, ‘Maromak nia reinu besik ona imi.’ 10Maibee iha sidade hotu nebee imi tama, no sira la simu imi, tama ba dalan boot iha sidade nee, no dehan, 11‘Rai rahun mos hosi imi nia sidade, nebee belit ba ami nia ain, ami liki tiha hasoru imi. Maski nunee, hatene metin ba, katak Maromak nia reinu besik ona.’ 12Maibee Hau hatete ba imi, katak iha Loron nebaa,#10:12 Ida nee loron boot tesi lian. Sodoma sei simu kastigu kamaan liu sidade nee.
Sidade Nebee La Arepende
13 #10:13-15 Haree Mateus 11:21-24. Susar ba o, Korazin! Susar ba o, Betsaida! Tanba se karik milagre boot nebee halo ona iha imi nia leet sei halo fali iha Tiro#10:13 Haree profesia no dezenhu kona ba Tiro iha Ezekiel 26. no Sidon, sira sei arepende kleur ona no tuur iha hena karoon no ahi kdesan. 14Maibee iha Loron Tesi Lia, Tiro no Sidon sei simu kastigu kamaan liu fali imi. 15No o, Kafarnaum, o sei sae ba lalehan ka? O sei tuun ba infernu!#10:15 Gregu ades, katak fatin nebee ‘la haree’.
16Ema nebee rona imi rona mos Hau. No ema nebee hakribi imi, hakribi mos Hau. No ema nebee hakribi Hau, hakribi mos Nia nebee haruka Hau mai.”
Nain Hitu-nulu Resin Rua Fila Fali
17Ema nain hitu-nulu resin rua fila fali ho haksolok. Sira dehan, “Nai, diabu sira mos tuir ami nia orden hodi O nia naran.” 18No Jesus dehan ba sira, “Hau haree Satanás monu hosi lalehan hanesan rai lakan. 19Tebes, Hau foo ona kbiit ba imi atu sama samea no sakunar sira, no atu domina kbiit hotu hosi inimigu. La iha buat ida bele hakanek imi. 20Maski nunee, lalika haksolok katak espíritu sira tuir imi nia orden, maibee haksolok ba tanba imi nia naran sira hakerek ona iha lalehan.
Jesus Haksolok Ba Aman
21 #10:21-22 Haree Mateus 11:25-27. Iha tempu nee, Jesus haksolok iha Espíritu Santu no dehan, “Hau foo agradese ba O, Aman, lalehan no mundu nia Nain, tanba O subar tiha buat sira nee hosi ema matenek klean no hosi ema nebee kompriende, no O hatudu fali buat sira nee ba kiik-oan sira. Loos duni, Aman, tanba O hanoin buat nee diak. 22Hau nia Aman entrega ona buat hotu mai Hau. La iha ema ida mak konhese Oan Mane, só Aman deit. No mos, la iha ema ida mak konhese Aman nee, só Oan Mane deit, no sira nebee Oan Mane hakarak hatudu Aman ba sira.”
23Depois Nia fila ba Ninia eskolante sira, no bainhira sira mesak, Nia dehan, “Haksolok ba matan nebee haree buat nebee imi haree. 24Tanba Hau hatete ba imi katak profeta no liurai barak hakarak haree buat nebee imi haree, maibee sira la haree. No sira hakarak rona buat nebee imi rona, maibee sira la rona.”
Ai Knanoik: Ema Samaria Diak
25No tebes, ema ida nebee hatene lei hamriik atu koko Jesus, no nia dehan, “Mestri, hau tenki halo saida atu hetan moris rohan laek? 26Jesus dehan ba nia, “Saida mak hakerek ona iha Lei? O lee oinsaa? 27Nia hataan, “O sei hadomi Nai, o nia Maromak, ho o nia fuan laran tomak, o nia klamar tomak, o nia forsa tomak, no o nia neon tomak; no hadomi o nia maluk hanesan o nia aan rasik.”#10:27 Haree Deuteronómiu 6:5 no Levítiku 19:18. 28No Jesus dehan ba nia, “O hataan loos. Halo ida nee, no O sei hetan moris.”
29Maibee nia hakarak hatudu aan nudar ema loos. Entaun nia dehan ba Jesus, “No see mak hau nia maluk?” 30Jesus hataan dehan, “Iha mane ida sai hosi Jerusalém no tuun ba Jerikó. No nia monu ba naok-teen sira. Sira hadau ninia sasaan, baku tasak nia no husik hela nia besik atu mate. 31Sorti deit, saserdote ida lao iha dalan nee. Maibee bainhira nia haree mane nee, nia lao liu iha dalan sorin ba. 32Hanesan mos ema Levi ida mai too iha fatin nebaa. Maibee bainhira nia haree mane nee, nia lao liu iha dalan sorin ba. 33Maibee ema Samaria ida lao iha dalan no mai too mane nia fatin nee. No bainhira ema Samaria haree mane nee, nia hanoin tebes mane nee. 34Nia hakbesik ba mane nee, no falun tiha mane nia kanek no fui mina no tua uvas ba kanek nee. Depois nia tula mane nee ho ninia animál no lori mane ba uma aluga ida hodi tau matan ba nia. 35Aban dadeer, nia foti osan denáriu rua,#10:35 Osan denáriu ida selu ema nebee servisu loron ida. no foo ba uma nain. Nia dehan ba uma nain, ‘Tau matan ba mane nee, no se ita gasta osan tan karik, hau sei selu fali ita bainhira hau mai fali.’ 36Agora, tuir o nia hanoin, entre sira nain tolu nee, ida nebee mak sai maluk ba mane nebee monu ba naok-teen sira?” 37Ema nee hataan, “Nia nebee hatudu laran luak ba mane nee.” Nunee Jesus dehan ba nia, “Baa, no halo hanesan.”
Marta No Maria
38Bainhira sira lao ba, sira tama aldeia ida. No feto ida naran Marta simu Jesus iha ninia uma. 39Marta iha alin feto ida naran Maria, nebee tuur iha Jesus nia ain hodi rona Ninia liafuan. 40Maibee Marta preokupa ho servisu barak atu serví sira. No nia hakbesik ba Jesus no dehan, “Nai, O la hanoin ka katak hau nia alin husik hela hau mesak atu serví? Nunee haruka nia ajuda hau ba.” 41No Jesus hataan ba nia, “Marta, Marta, o preokupa no hanoin resin kona ba buat barak. 42Maibee o presiza buat ida deit. Maria hili tiha ona parte ida nebee diak, no ema ida sei la foti ida nee hosi nia.”
Currently Selected:
Lucas 10: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
