Lucas 7

Jesus Kura Komandante Nia Atan

1 #7:1-10 Haree Mateus 8:5-13. Bainhira Jesus koalia hotu ona hodi povu nee bele rona, Nia tama ba Kafarnaum. 2No komandante#7:2 Komandante ba soldadu, naran ‘senturiaun’, nebee xefi ba soldadu nain atus ida. ida iha atan ida nebee nia hadomi. Maibee atan nee moras too besik atu mate. 3Bainhira komandante rona kona ba Jesus, nia haruka ema Judeu sira nia katuas balu ba Jesus hodi husu Jesus atu mai no kura ninia atan. 4No bainhira sira mai ba Jesus, sira husu kedas ba Nia, no dehan, “Ema nee merese atu Ita Boot halo nunee ba nia. 5Tanba nia hadomi ita nia nasaun, no nia harii ami nia sinagoga.” 6No Jesus baa ho sira. No bainhira Nia la dook hosi uma nee, komandante haruka ninia maluk sira ba Jesus hodi dehan, “Nai, lalika halo kole Ita Boot nia aan. Tanba hau la merese atu simu Ita Boot iha hau nia uma. 7Nunee hau hanoin katak hau la merese atu baa hasoru Ita Boot. Maibee foo sai liafuan deit, no hau nia atan sei sai diak. 8Tanba hau mos mane ida nebee iha autoridade okos, no hau iha soldadu sira iha hau nia okos. Hau dehan ba ida, ‘Baa!’ no nia baa; no hau dehan ba ida seluk, ‘Mai!’ no nia mai. No ba hau nia atan, ‘Halo ida nee!’ no nia halo tuir.” 9Bainhira Jesus rona tiha liafuan nee, Nia admira komandante nee. Nia fila aan no dehan ba sira nebee lao tuir Nia, “Hau dehan ba imi, Hau seidauk hetan ema ho fiar nebee hanesan nee iha Israel.” 10No bainhira sira nebee komandante haruka nee fila fali ba uma, sira hetan atan nee ho isin diak ona.

Feto Faluk Nia Oan Mane Moris

11Liu tiha tempu nee, Jesus tama sidade ida naran Naim. Eskolante sira no povu barak lao hamutuk ho Nia. 12Bainhira Nia besik ona sidade nia portaun, tebes, ema lori sai mane ida nebee mate ona. Mane nee mak oan mane mesak hosi inan ida, no inan nee mak feto faluk. Ema barak hosi sidade lao ho feto faluk nee. 13No bainhira Nai haree feto nee, Nia hanoin tebes feto nee, no dehan ba nia, “Keta tanis.” 14Depois Jesus hakbesik no tau liman ba kaixaun. No sira nebee lori kaixaun nee para tiha no hamriik deit. Jesus dehan, “Joven, Hau dehan ba o, hadeer ba.” 15No ema ida nebee mate nee hadeer, no tuur, no nia hahuu koalia. No Jesus entrega nia ba ninia inan. 16Ema hotu sai tauk tebes no sira hahii Maromak, no dehan, “Profeta boot ida mai ona iha ita nia leet!” no “Maromak mai vizita ona Ninia povu!” 17Ema habelar liafuan nee kona ba Nia iha rai Judeia tomak no iha área hotu nebee besik iha nebaa.

Ema Mai Hosi João Batista

18 #7:18-35 Haree Mateus 11:2-19. João nia eskolante sira foo hatene ba João kona ba buat hotu nee. No João 19bolu ninia eskolante nain rua no haruka sira ba Jesus hodi dehan, “O mak Nia nebee atu mai, ka ami tenki hein ema seluk?” 20Bainhira ema nee too iha Jesus, sira dehan, “João Batista haruka ami ba O, no dehan, O mak Nia nebee atu mai, ka ami tenki hein ema seluk?” 21No iha oras nee, Jesus foin kura ema barak ho isin moras no moras peste, no Nia duni sai espíritu aat sira, no Nia halo ema barak nebee matan delek bele haree fali. 22No Jesus hataan ba sira, “Fila fali ba, no foo hatene ba João kona ba buat nebee imi haree no rona nee, katak ema matan delek sira bele haree, ema ain kudeik sira bele lao, ema moras lepra sira sai moos, ema tilun diuk sira bele rona, ema mate sira moris fali, no ema kiak sira rona evanjelhu. 23Haksolok ba ema nebee la monu ba sala#7:23 Lian Gregu skandalidzo katak ‘tama lasu’ ka ‘sidi’. Haree Mateus 11:6 no nota. tanba Hau.”

24No bainhira João nia manu-ain sira sai ona, Jesus hahuu koalia ba povu nee kona ba João, “Imi lao sai ba rai fuik hodi haree saida? Duut manulain nebee anin doko ka? 25Entaun imi lao ba hodi haree saida? Mane ida nebee hatais ropa furak ka? Tebes, sira nebee hatais ropa furak no iha moris diak nee hela iha liurai sira nia uma. 26Entaun imi lao ba hodi haree saida? Profeta ida ka? Sin, no Hau hatete ba imi, ema ida nee boot liu fali profeta sira. 27Tanba sira hakerek nanis ona kona ba nia nunee,

‘Tebes, Hau haruka Hau nia manu-ain uluk O,

no nia sei prepara O nia dalan iha O nia oin.’#7:27 Haree Malakias 3:1.

28Tebes Hau hatete ba imi, hosi ema nebee moris hosi feto, la iha ema ida mak boot liu João Batista. Maibee ema nebee kiik liu iha reinu Maromak nian mak boot liu fali nia.” 29No bainhira povu hotu rona nunee, inklui mos kobradór impostu sira, sira foo sai katak Maromak justu, tanba sira simu ona batizmu hosi João. 30Maibee ema Farizeu sira no ema nebee hatene lei lakohi tuir Maromak nia hakarak, no sira la simu batizmu hosi João.

31“Maibee Hau kompara jerasaun nee ho see? No sira hanesan saida? 32Sira hanesan labarik sira nebee tuur iha merkadu, no bolu ba malu dehan,

‘Ami huu flauta ba imi, maibee imi la dansa;

ami tanis lelir ba imi, maibee imi la halerik.’

33Tanba João Batista mai no nia la haan paun no la hemu tua uvas, no imi dehan, ‘Nia iha diabu ida.’ 34Ema Nia Oan mai no Nia haan no hemu, no imi dehan, ‘Tebes, mane nee mak ema kaan-teen no lanu-teen ida! Nia halo kolega ho kobradór impostu no sala nain sira!’ 35Maibee matenek klean sei hatudu aan loos liu hosi ninia oan sira.”

Feto Tanis Iha Jesus Nia Ain

36 #7:36-50 Haree Mateus 26:6-13, Marcos 14:3-9, João 12:1-8. Ema Farizeu ida husu Jesus atu haan hamutuk ho nia. Entaun Jesus tama ba ema Farizeu nia uma no tuur hodi haan. 37No tebes, feto ida hosi sidade nee, nebee sala nain, rona katak Jesus tuur hodi haan iha Farizeu nia uma. Nunee feto nee lori mina morin iha botir alabastro.#7:37 Botir nebee halo ho fatuk mutin ida nebee hanesan ho marmore maibee laduun toos. 38Nia hamriik iha Jesus nia ain iha kotuk. Nia komesa habokon Jesus nia ain ho ninia matan been, no nia hamaran Jesus nia ain ho ninia fuuk. Depois nia rei no fui mina morin ba Jesus nia ain. 39Bainhira ema Farizeu nebee konvida Jesus haree buat nee, nia hanoin iha nia laran, “Se Mane nee profeta ida karik, Nia sei hatene feto nee see loos nebee kona hela Nia, katak feto nee mak sala nain ida.” 40No Jesus hataan ba ema Farizeu nee, “Simão, Hau iha liafuan ruma atu koalia ba o.” No nia dehan, “Mestri, koalia ba.”

41“Iha ema ida nebee foo osan debe ba ema nain rua. Ema ida debe osan denáriu atus lima (500), no ida fali debe osan denáriu lima-nulu (50).#7:41 Osan denáriu ida bele selu ema nia servisu ba loron ida. 42No bainhira sira la iha buat ida atu selu fali, nia foo perdaun tiha sira nain rua nia tusan.#7:42 ‘perdua tusan’ iha lian Gregu mak ekarisato katak ‘hatudu grasa atu husik sira livre’. Entaun foo hatene mai Hau, ida nebee mak sei hadomi nia liu tan?” 43Simão hataan, “Hau hanoin karik ida nebee simu perdaun hosi tusan boot liu.” No Nia dehan ba Simão, “O tesi lia loos.” 44Depois Nia fila oin ba feto nee, no dehan ba Simão, “O haree feto nee ka? Hau tama o nia uma, no o la foo bee mai Hau atu fase Hau nia ain, maibee nia habokon Hau nia ain ho ninia matan been, no hamaran ho ninia fuuk. 45O la rei Hau, maibee hosi oras nebee Hau tama, feto nee la para atu rei Hau nia ain. 46O la fui mina ba Hau nia ulun, maibee feto nee fui mina morin ba Hau nia ain. 47Nunee Hau hatete ba o katak, ninia sala, maski barak, hetan ona perdaun. Tanba nee, nia hatudu domin boot. Maibee ba nia nebee hetan perdaun uitoan, nia mos hadomi uitoan.” 48No Jesus dehan ba feto nee, “O nia sala sira hetan perdaun ona.” 49No sira nebee tuur no haan hela ho Nia komesa koalia ba malu, “See mak ema nee, atu Nia foo mos perdua ba sala?” 50No Nia dehan ba feto nee, “O nia fiar salva ona o. Lao ba ho dame.”

Currently Selected:

Lucas 7: BK

Highlight

Copy

Compare