Roma 2
2
Maromak Tesi Lia Loos
1Nee duni, Oh ema, o la iha razaun atu tesi lia ba ema seluk. Tanba bainhira o tesi lia ba ema seluk, o kondena o nia aan rasik. Tanba maski o tesi lia, o mos halo hanesan sira. 2Ita hatene katak Maromak tesi lia lo-loos ba ema nebee halo buat sira nee. 3Oh ema nebee tesi lia ba ema seluk nebee halo buat sira nee, maibee o mos halo hanesan, o hanoin katak o bele halai sees hodi Maromak la tesi lia ba o ka? 4Ou karik o hakribi Maromak nia laran diak tebes, nebee Nia hein hela ho pasiénsia naruk. O la hatene katak Maromak hatudu laran diak nee hodi o bele arepende ka? 5Maibee o aumenta ba beibeik Maromak nia laran hirus hasoru o tanba o ulun toos no lakohi arepende. Laran hirus nee sei mai iha loron nebee Maromak tesi lia ho hahalok loos.
6Nia sei selu ema ida-idak tuir ema nia hahalok. 7Ba sira nebee halo diak ho pasiénsia hodi hetan glória, onra no moris nebee nunka mate, Maromak sei foo moris rohan laek. 8Maibee ba sira nebee buka aan deit#2:8 Ka ‘provoka ema seluk’. provoka ema seluk no lakohi halo tuir lia loos, maibee halo tuir hahalok nebee la loos, Maromak sei hatudu laran nakali no hirus. 9Ema hotu nebee halo aat sei hetan terus no susar, primeiru ba ema Judeu no mos ba ema Jentiu. 10Maibee ema hotu nebee halo diak sei hetan glória, onra no dame, primeiru ba ema Judeu no mos ba ema Jentiu. 11Tanba Maromak la fihir ba ema ida.#2:11 Nia la hanoin ema ida importante liu ema seluk. Haree Levítiku 19:15 no nota.
Ema Jentiu No Ema Judeu
12Tanba ema hotu nebee halo sala maski sira la hatene lei, sira sei lakon ketak hosi lei. No ema hotu nebee halo sala bainhira sira hatene lei, Maromak sei tesi lia ba sira tuir lei nee. 13Tanba laos ema nebee rona deit lei mak ema nebee sai loos iha Maromak nia oin, maibee sira nebee halo tuir lei mak sai loos. 14Tanba bainhira ema Jentiu sira, nebee la iha lei, halo tuir deit buat nebee lei haruka, sira sai lei ba sira nia aan rasik, maski sira la iha lei. 15Sira hatudu katak hahalok hosi lei nee hakerek ona iha sira nia fuan laran. Sira nia konsiénsia mos foo sasin, no sira nia hanoin mos akuza sira no mos defende sira. 16Tuir evanjelhu nebee hau haklaken, ida nee sei akontese iha loron nebee Maromak tesi lia ba ema nia segredu liu hosi Jesus Kristu.
17Maibee karik o dehan katak o mak ema Judeu ida, no o sadere ba lei, no o gaba aan tanba Maromak, 18no o hatene Ninia hakarak, no aprova buat nebee diak tebes, tanba o simu hanorin hosi lei. 19Karik o hanoin duni katak o rasik mak matadalan ba ema matan delek, no naroman ida ba sira nebee iha nakukun laran. 20Karik o koriji ema beik no hanorin labarik kiik-oan sira, tanba o iha lei nebee hatudu matenek no lia loos. 21Nunee o nebee hanorin ema seluk, o hanorin o nia aan rasik ka lae? O haklaken dehan keta naok, maibee o rasik naok ka lae? 22O dehan ema keta halo sala seksuál,#2:22 Sala seksuál nebee ema halo relasaun seksuál ho ema nebee laos ninia feen ka laen. maibee o halo sala seksuál ka lae? O hakribi estátua lulik sira, maibee o naok fali hosi templu sira ka lae? 23O gaba aan tanba lei, maibee o despreza Maromak tanba o la halo tuir lei nee. 24Nunee ema hakerek nanis ona, “Ema Jentiu sira hatete aat Maromak tanba imi.”#2:24 Haree Isaias 52:5 no Ezekiel 36:22.
25Tanba sirkunsizaun iha benefísiu, se o halo tuir lei karik. Maibee se o la halo tuir lei, o nia sirkunsizaun nee lakon deit no o sai hanesan ema nebee la hetan sirkunsizaun. 26Nunee se ema nebee la hetan sirkunsizaun halo tuir hahalok loos hosi lei, laos nia hanesan ema nebee hetan ona sirkunsizaun? 27Depois nia nebee la hetan sirkunsizaun iha isin maibee halo tuir lei, nia sei tesi lia ba o nebee iha regulamentu no sirkunsizaun maibee kontra fali lei. 28Tanba ema ida laos ema Judeu iha liur deit, no sirkunsizaun nee laos iha liur no kona ba isin lolon. 29Maibee ema ida mak ema Judeu iha ninia laran, no sirkunsizaun nee kona ba fuan laran, iha espíritu, no laos kona ba regulamentu. Laos ema mak foti aas nia, maibee Maromak.
Currently Selected:
Roma 2: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
