য়হোশু 13
13
জিয়োনেকো নিওয়া দেশবি
1য়হোশুহা সিওপারাং ওয়ারাংপুনতেমি। পরমপ্রভুহা আকুহিংয়া জাংয়ে, “নেহা নাতিহা ওয়ারাংপুনতেয়ো; আদো জিয়োকো নিওয়া দেশবিহা ন্যাসারাং নিও। 2তাংসা পলিশ্তিবি আসা গশুরিবিকো দেশ, 3আসা ম্যাম্যা কাটুতা অব্বিবিকো দেশ। (মিশ্রি লুংবিতা নিওয়া শিহোর জোরাসোহা দ্যাম্যাকো এক্রোন চোইপা কনানী দেশ তামসা মানেমগা। পলিশ্তিবিকো জাইপুবি গাজা, অশদোত, অশক্লোন, গাত আসা এক্রোনতা য়ুংমি।) 4নেচোইপা ই দেশবিহা বাকিরাং নিও: তাংসা কনানী দেশ আসা মারা (হাংসু সিদোনিবিমমে), এমোরি লুংবিতা নিওয়া অপেক চোইপা 5গবালিবিকো দেশ, নুব্যা কাটু হেম্রোন য়্যাগ্যই আসা ম্যাম্যা কাটুকো বাল-গাতসোহা হোমাতকো ওয়াংবোইকো আবেইতা নিওয়া লেবনান। 6ইকো নাপোতা নিওয়া লেবানানকো য়্যাগ্যইবি আসা মিশ্রপোত-মৈমকো প্যাকোকো য়্যাগ্যইকো জায়গাতা য়ুংওয়াহা সিদোনিবিকো তাংসা দেশ পরেমগা। ইস্রাইলকো দিংঙাবি নাগাই গ্যইপুমসা হোনুওয়া ই তাংসা জ্যাবিহিংয়া কা ঘীরোওয়া। কুং আজ্ঞা সেই নাতিহা ই দেশহা ইস্রাইলিবিকো প্যাকোতা পোপিনেরোওয়া। 7নেহা ই দেশ কুচো জিরিবিহিং আসা মনশ্শেকো ইপো জিরিহিং অধিকারকো সোতা পোপি।”
য়র্দনকো নুব্যাকো মোংটো পোসুওয়া
8রুবেন আসা গাদকো জিরি আসা মনশ্শেকো আধা জিরিহা প্রভুসেংজাকো ডেইয়া মোসাকো পিচাওয়া দেশ মুংচানতেওয়া নিমি, ইহা য়র্দন জোরাকো নুব্যা কাটুতা নিমি। 9আকো জায়গাহা অরোএর শহর চোইপা (অর্নন ওয়াংবোইকো আরিতা) আসা অর্নোন ওয়াংবোইকো প্যাকোতা নিওয়া শহর চোইপা আসা মেদবা আসা দিবোনকো তাংসা দ্যইংদিকো সমান জায়গাবিহা আকো হুরাপা নিমি। 10আসা হেসবোনতা রাজ্য জোকো এমোরীবিকো জাইপু সীহোনকো তাংসা শহরবিহা অম্মোনিবিকো সিমানা চোইপা, 11গিলাদ, গশুরী আসা মাকাতিকো জায়গা চোইপা, আসা তাংসা হেম্রোন য়্যাগ্যই, আসা সলকা চোইপা তাংসা বাশান 12অস্তারোত আসা এদ্রেইতা রাজ জোকো আখিরী রোপাইবিকো জ্যাইপু অৗগকো দেশ পরেনমগা। মোশাহা আকু দিংঙাবিহিংয়া জিয়োমসা ঘীইপুমি নিমি। 13আদো ইস্রাইলবিহা গশুরী মাকাতীকো দিংঙাবিহিংয়া মাঘীইতো, নেচোইপারাং আবিহা ইস্রাইলতারাং য়ুংমগা। 14লেবীকো জিরিবিহিংয়া মোসাহা মোংটো-কেটো মিচায়াংমগা। পরমপ্রভুহা মোসাহিং জাংওয়া সেই পরমপ্রভু ইস্রাইলকো সেংজাকো বেদীতা চড়াইওয়া ওংপাওয়া বলিবিকো ইচো ভাগহা আবিহা আপনিকো সম্পত্তিকো মিংতা মুংচাচাংমি।
রুবেনহিং পিচাওয়া জায়গা
15আকু দেশকো ইচো ভাগ মোসাহা রুবেন জিরিকো প্যাপাম্যামাবিহিংয়া আবিকো সম্পত্তি তামসা পিচাওয়া নিমি। 16আকো জায়গাহা অরোএর শহর চোইপা (অর্নন ওয়াংবোইকো আরিতা) আসা অর্নোন ওয়াংবোইকো প্যাকোতা নিওয়া শহর চোইপা আসা মেদবাকো তাংসা দ্যইংদিকো সমান জায়গাবিহা আকো হুরাপা নিমি। 17আকো নাপোতা হেসবোন আসা দোইংদিকো তাংসা শহরবি দীবোন, বামোত-বাল, বেথ-বাল-মোন 18য়হসা কদেমোত, মেপাত, 19ক্রিয়াতেম, সিব্মা আসা ওয়াংবোইকো য়্যাগ্যইতা নিওয়া সেরেথ শেহার, 20বেথ-পৗর, পিসগাকো বিবিইকোইওয়া য়্যাগ্যই আসা বেথ-য়শীমোত, 21দোইংদিকো সমান জায়গাকো তাংসা শহর আসা হেসবোনতা রাজ জোওয়া এমোরী জাইপু সীহোনকো তাংসা রাজ্যবি পরেমগা। মোসাহা আকুহিংয়া মিদ্দান, এবী, রেকেম, সুর, হুর, আসা রেবাকো জাইপুবিহিংয়া জিয়োয়ে। আকু তাংসা সীয়োন জাইপুকো অধিকারকো লিতা আকো দেশতা রাজ জোদিংমি। 22ইস্রালকো দিংঙাবিহা স্যাপুওয়াকো প্যাকোতাহা ইচো অৗরকো চেংওয়া মানাকাংওয়া ইচো বালামরে নিমি। 23রুবেনকো জিরিকো দিব্যা কাটুকো লুংবিতাহা য়র্দন জোরা নিমি। রুবেন জিরিকো প্যাপাম্যামাবিহিংয়া আকো সন্পত্তি বানাইকো পিচাওয়া টেবো আসা চিয়োওয়া শহরবিহা ইরাং নিমি।
গাদহিং পিচাওয়া জায়গা
24আকু জায়গাকো দোসরা ইচো ভাগ মোসাহা গাদ জিরিকো প্যাপাম্যামাবিহিংনে আবিকো সন্পত্তি তামসা পিচামি নিমি। 25য়াজের আসা গিলাদকো তাংসা শহরবি আসা অম্মোনীবিকো ইপো জায়গা, নুব্যা কাটুকো রব্বাকো আবেইকো অরোয়ের চোইপা আবিকো লুংবিবি নিমি। 26আসা হেসবোনসোহা রামতম্সপা আসা বেতোনিম চোইপা, আসা মহনোমসোহা দবিরকো জায়গা চোইপা, বেইপুয়ে। 27য়র্দন ওয়াংবোইকো বেথ-হারাম, বেথ নিম্রা, সুক্কোত, সাপোন আসা হেস্বোনকো জাইপু সীহোনকো রাজ্য চোইপা নিমি। আকো দিব্যা লুংবিহা য়র্দন জোরাকো গালীলকো ঝাহাদি চোইপা পরেমি নিমি। 28গাদ জিরিকো প্যাপ্যাম্যাম্যাহিংয়া সম্পত্তিকো মিংতা পিচাওয়া টেবো আসা আপেচিংওয়া শহরবিহা ইরাং নিমি।
মনশ্শেকো আদি জিরিহিং পিচাওয়া জায়গা
29আকো জায়গাকো দোসরা ইচো ভাগ মোসাহা মনশ্শেকো আদি জিরিকো প্যাপাম্যামাবিহিংনাং আপনিকো সম্পত্তি বানাইকো তামসা পিচাওয়া নিমি। 30আকো জায়গাহা মহনোমসোহা তাংসা বাশান, বাশানকো জাইপু অৗগকো তাংসা রাজ্য আসা বাশানকো য়াইরতা নিওয়া ষাটিওরা লোইবি, 31আসা গিলাদকো ইপো জায়গা, অস্তারোত আসা এদ্রই (বাশানতা অৗগকো রাজকীয় শহরবি)। ই তাংসা মনশ্শেকো চেংওয়া মাকীরকো সন্তানকো সোতা, অর্থাৎ মাকীরকো আদি সন্তানকো সোতা আবিকো চিমা-চিমা সেই পিচাওয়া নিমি। 32য়রিহো নুব্যা কাটুকো য়র্দন জোরাকো মোওয়াবকো ওয়াংবোইতা মোসাহা অধিকারকো সোতা পোওপিওয়া জায়গাবিহা ইবিরাংগা। 33আদো লেবি জিরিকো সোতা মোসাহা মোংটো-কেটোহা হাইরে মোপোপিতো। আকুহা আবিহিংয়া জাংয়ে, “পরমপ্রভু ইস্রাইলকো সেংজা আপনিরাং আবিকো ভাগগা।”
Currently Selected:
য়হোশু 13: TXO
Highlight
Copy
Compare
Share
Want to have your highlights saved across all your devices? Sign up or sign in
2026 Bible Society of India in association with India Evangelical Mission