য়হোশু 2
2
য়হোশুহা য়রিহোতা নিহসো জাসুস নিংপুওয়া
1আকো নোইতা নুনকো চেংওয়া য়হোশুহা শিত্তিমকো জায়গাসো নিহসো জাসুসহিং কনান দেশতা বিশেষ জোমসা য়রিহো শহরকো নাপোকো নুওয়াংবি কোইমসা গেকো নিংপুয়ে। আবি নিহসোহা আকু শহরতা হোয়ে আসা ইচো রাহাব মিং নিওয়া নুংনাংরিকো সাতা লিসুং য়ুংওয়াকো হোয়ে। 2য়রিহোকো জাইপুহা ইচো নিহসো ইস্রাইলিবিহা দেশকো নাপোকো নুওয়াংবি গেকো আত্রংকো লিসুং ওয়াংয়ে তাওয়া হিংয়ে, 3আসা রাহাবহিং এপাজিংওয়া দেরেং কাইপুয়ে, “নাকো সাতা নিওয়া দিংঙাবিহা য়োংকো দেশকো জাসুস জোকো ওয়াংমগা। আবিহিং ইতা পারামসা ওয়াং!” 4-6আকুহা জাংয়ে, “ইচো নিহসো দিংঙাবিহা কুংতা ওয়াংয়ো, আদো আবিহা হানিসো ওয়াংমমে আকুহা কা মেগে। সানি হুদাংনু শহরকো মাটা লাপুং গিদাংনুরোমা নাগাই আবিহা হ্যাপুয়ে। আবিহা হাংতা হ্যাকোমে কা মাউইতো, আদো সেন্নেপামি হ্যানাহা আবিহিংয়া নিংয়ারোওয়া।” (রাহাবহা নিহসো জাসুসহিংয়া সাকো কেংবুকো তোইতা পুরামসা আউতা এওয়া পাট্টাকো থাকতা ম্যইমসা এহে।) 7জাইপুকো দিংঙাবিহা শহরসো নোপুয়ে আসা শহরকো মাটা লাপুংহা গিজপুয়ে। আবিহা ইস্রাইলি জাসুসবিহিং মোমসা য়র্দন জোরা পেংওয়া জায়গা চোইপা দেকায়ে।
8লিসুং আকু জাসুসবি জিংনুরোমা নাগাই রাহাবহা কেংবুতা হোয়ে, 9আসা জাসুসবিহিং জাংয়ে, “কা গেদিংয়ো, পরমপ্রভুহা ই দেশহা নাবিহিং পিচাপুনতেমি নিও। ই দেশকো তাংসা দিংঙাবিহা নাবিহিংপা চুসুংদিংমি নিও। 10নাবি মিশ্র দেশসো নোদাংনুওয়া হেপা পরমপ্রভুহা আলুইওয়া ঝাহাদীহিং নাবিকো নাগাইতা সিপাপুমমে, আকুহা কাবি হিংমি নিও। য়র্দন জোরাকো নুব্যা কাটুতা নিহসো এমিরি জাইপু সিহোন আসা অৗগহিং নাবিহা হেপা স্যাপুমমে, আকুরে হিংমি নিও। 11আকু হিংতানি কাবিহা চুসুংপুয়ে। নাবিকো কারণসোরাং কাবি তাংসাকো সাহস য়াংপুমি নিও। পরমপ্রভু নাবিকো সেংজাহা লোডিংবা আসা বাসিমতিকো সেংজাগা। 12নেহা কা নাবিহিংপা ব্যবহার জোমি ত্যাবাপা নাবিরে কুং সাকো দিংঙাবিহিংপারে লামতুপা জোমসা ব্যবহার জোরোওয়া তামসা প্রভুসেংজাকো মিংতা নাপোই আসা কা নাবিহিং দেংকো ছুরোওয়া তামসা কোইপাকো হাইক্রি চিহ্ন পিচা। 13কুং আয়ু-আপা, ডুওয়া হুম্রিবি, আসা আবিকো সাকো দিংঙাবিহিংনে বাচাইরোওয়া তামসা প্রতিজ্ঞা জোপি। কাবিহিং সিদিংসো বাচাইপি!”
14আকু দিংঙাবিহা রাহাবহিংয়া জাংয়ে, “কাবিহা আপনিকো জাংমবেপা মোজোনাহা সেংজাহা কাবিকো প্রাণ লাংপুকো। কাবিহা হাং জোদিংমমে, আকুহা নাতিহা হাংসুহিংনে মাজাংনাহা, কাবিহা ই প্রতিজ্ঞা জোরোওয়া কি হাত্রং পরমপ্রভুহা ই দেশ কাবিহিং পিচা, আত্রংহা কাবিহা নাতিহিংপা কাবিকো লামতুওয়া তিংপারোওয়া।”
15শহরকো পার্কাহিংপা তেপামসা বানাইওয়া ইচো সাতা রাহাবহা য়ুংমি। আকুহা আকু দিংঙাবিহিংয়া পার্দি চুংপামসা চাব্যইসো লিতা উইপায়ে। 16আকুহা জাংয়ে, “য়্যাগ্যইবিতা ক্যাচপু, মেনাহা জাইপুকো দিংঙাবিহা নাবিহিংয়া দোসুরোওয়া। আবি ইতা মালারেনু চোইপা সাসুংয়ুংহা আউতারাং গুংমসা য়ুংপুই। আকো নোইতা নাবিহা হ্যাকো ছুরোওয়া।”
17আকু দিংঙাবিহা রাহাবহিংয়া জাংয়ে, “নাতিহা কাবিহিং প্রতিজ্ঞা জোপাওয়াহা কাবিহা পালন জোরোওয়া। 18নাতিহা এপা জোনেরোওয়া। কাবি নাকো দেশকো তোইতা হামলা জোনুওয়া, নাতিহা কাবিহিং উইপাওয়া লাপুংতা ই অ্যালুইওয়া সিংদি আসা আপনিকো আয়ু-আপা, ডুওয়া হুম্রিবি আসা আবিকো সাকো দিংঙাবিহিংনে আপনিকো সাতা পারামসা য়ুংকো। 19হাংসু সাহিং হুইতেমসা হ্যা, আকুহা আপনিকো সিদিংকো সোতাহা আপনিরাং জিম্মা জিংরোওয়া। কাবিহা আকো জিম্মাবার মাজিংরোওয়া। আদো সাতা নাতিহিংপা য়ুংওয়াবিতাহা হাংসুকো তোইতা খতি জিং, আবিকো জিম্মাবারহা কাবি জিংরোওয়া। 20আদো কাবি হাং কাম জোদাংমমে, আকুহা নাতিহা দোসরাহিংমি জাংনাহা কাবিকো নাতিহিং প্রতিজ্ঞা জোওয়াহা কাবিহা পালন মোজো।” 21ই নুওয়াংতাহা রাহাবহা রাজি জিংয়ে আসা আবিহিংয়া নিংপিয়ে। আবি হ্যাপুনতেনুকো নোইতাহা আকুহা চোব্যইতা আইলুইওয়া সিংদি তাইয়ে।
22জাসুসবিহা য়্যাগ্যইতা হোমসা গুংয়ায়ে। জাইপুকো দিংঙাবিহা সাসুংয়ু চোইপা ন্যাতা-তোইত্যাবিতা আবিহিং মোসোইয়ে, আদো আবিহিংয়া মোদোসুতো আসা আবিহা য়রিহোতা লারেয়ে। 23আকো নোইতা আকু নিহসো জাসুসবিহা য়্যাগ্যইসো উইপামসা লেয়ে আসা জোরা ত্যাপামসা য়হোশুকোতা লেয়ে। আসা আউতা হাং-হাং জিংমমে, আকু তাংসা নুওয়াংহা য়হোশুহিং হিংপায়ে। 24আবিহা জাংয়ে, “আকু তাংসা দেশহা পরমপ্রভুহা য়াংবিহিং পিচাপুনতেয়ো তামসা কাবিহা পক্কা গেয়ো। আকো তাংসা দিংঙাবিহা য়াংবিহিংপা সিওপারাং চুসুংদিংয়ো।”
Currently Selected:
য়হোশু 2: TXO
Highlight
Copy
Compare
Share
Want to have your highlights saved across all your devices? Sign up or sign in
2026 Bible Society of India in association with India Evangelical Mission