Luka 23
23
Pilato aa zekisa Jesu
(Mat 27:1-2,11-14; Male 15:1-5; Joa 18:28-38)
1Cwale a bantu bo nkuta bonse kale ba zimana no ku twala Jesu kwa Pilato. 2Mi kale ba tatika uku mu shangeza nabo, “Tula gwani joju unkosi na ungulula ilonga lyetu. Ga sa binda a bantu uku lifa i mitenteko kwa Sesale, ige kame na ta buti nde Mushaligwa,#23:2 “Mesiya” mu Ciebelu, “Kilesite” mu Cigelike. u mfumu.”
3Cwale Pilato kale ga buza Jesu nage, “Ndigwe mfumu go Majuda?” Jesu kale ga taba nage, “Bulyao u la teli!”
4Cwale Pilato kale ga lugwila a mapulisiti a bakulu mane no bantu a bangi nage, “Takuli u mulandu ndi la gwani go ku atwila joju unkosi.”
5Kono abo kale ba indikila nabo, “Ndege a leta inyungani ku bantu mwilonga lyonse lya Judeya ko nzigo jakwe. Ga li ka tatikila mwa Galileya mane ku ja no kwilonga lya Judeya konse, mane sa li li no ko kuno.”
Aa ba twala Jesu kwa Eloda
6Pilato aa shugwa bulyao, kale ga ba buza ati Jesu ka li Mugalileya. 7Aa sa la zibi buti Jesu mwilonga lyo bujendesi bwa Eloda ka zwa, kale ga mu tumina kwa Eloda, uju ka li mwa Jelusalema mwa jejo inako.
8Cwale Eloda aa bona Jesu, kale ga jangala lwini, kakuli ka lindile mu nako inde na shakite uku mu bona. Ku zwa ku bintu sa shugwa byakwe, ka kwesi insepo jo ku mu bona aa tenda i makazo jimwinya. 9Eloda kale ga buzagula Jesu a mabuzi a mangi, kono Jesu ta na ga mu taba cimwinya. 10A mapulisiti a bakulu no bazigi bo mulao aba ka ba zimeneo, kale ba shangeza Jesu i bintu i bingi ko ku mu indikiza. 11Cwale Eloda no masole bakwe kale ba mu sekelela no ku mu nyungulula. Kale ba mu jabika u mukanjo u mulotu, mi kale ba mu bogoza kwa Pilato. 12Ku zwa lelyo ijuba Eloda no Pilato kale ba ba a basele, byebyo na bi sini uku tendaala ka ba li zimbite.
Jesu aa atwilwa u lufu
(Mat 27:15-26; Male 15:6-15; Joa 18:39–19:16)
13Pilato kale ga kugila a mapulisiti a bakulu no bajendesi no bantu antu-onke, 14no ku ba ta nage, “Mu la ndi leteli joju unkosi ko ku ta buti ga sa letela a bantu buti ba li lwise. Ndi la mu buzaguli na mu shugwile mi ta ndi la gwani u mulandu mu bintu ibi mu mu shangeza. 15Nanga ndi Eloda a la ka kangwi mpaa a la ka mu bogozi kwangu, sinagwe aa mu liwenene, takuli ibi na ga tenda ibi a botele uku fwila. 16Cwale, kuti ndi mu bangise no ku mu lukulula.” 17A nako jonse jo Mukiti go Mpaseka, Pilato ka botele uku ba lukululela u muntu genke mu ntolongo.#23:17 A mabuka go Cigelike gamwinya no mabuka gamwinya ta ga kwesi intimana ja 17.
18Kono a bantu a bangi bonse kale ba kumbagana nabo, “U yage joju unkosi! U tu lukulwile Bbalabbasi!” 19Kono Bbalabbasi kame sa tuligwa mu ntolongo kebaka lyo nkondo na ja tendaala mu munzi, no lufu lo muntu.
20Ko ku shaka uku lukulula Jesu, Pilato kale ga buza a bantu kame. 21Kono kale ba zundamina uku kumbagana nabo, “U mu kankamine a cifapaano! U mu kankamine a cifapaano!”
22Pilato kale ga ba buza lya tatu nage, “Ncinzi? Mulandunzi na ga tenda joju unkosi? Takuli u mulandu ndi la gwani ugu a botele uku fwila. Cwale kuti ndi mu bangise no ku mu lukulula.”
23Kono kale ba kumbagana lwini buti a kankaminwe a cifapaano, mi u tukumbo twabo kale twa gola Pilato. 24Cwale Pilato kale ga tenda ubu ka ba shakila. 25Kale ga lukulula unkosi uju sa tuligwa mu ntolongo kebaka lyo ku leta inkondo no buyagi, uju ka ba kumbila, no ku ba wa Jesu ko ku ja ko bu ka ba shakila.
Aa ba kankamina Jesu a cifapaano
(Mat 27:32-44; Male 15:21-32; Joa 19:17-27)
26A masole aa ka ba indite Jesu, kale ba kwata Simoni uju ka zwa mu munzi gwa Silene na ka zwila ku lugwa. Kale ba mu kolekisa i cifapaano na umpilile Jesu. 27A bantu a bangi kale ba umpilila Jesu, no banakazi aba ka ba lila no ku mu fwila inse. 28Jesu kale ga zoka no ku ba ta nage, “Mwe banakazi ba Jelusalema, mu leke uku ndi lilila, mu li lile mwebeni no banenu. 29Kakuli inako ji la keza aa na mu te buti, ‘Imfwijaguzi nja banakazi a bagumba, aba ta ba la bona a bana no manshwe aga ta ga la nyonsa!’
30‘A bantu kuti na ba te a malundu buti,
“Mu tu gwile!”
mane no ku ta u tulundu-gana buti,
“Mu tu vwike!” ’#Oseya 10:8.
31Kakuli ati a bantu na ba tenda byebi i bintu i cishamu na ci si li citeke, mbuti na ku kalile aa na ci jume?”#23:31 Kakuli aa ku tendaala bulyao ku cishamu i citeke, ku cishamu co ku juma mbuti na ku kalile. Jesu ndege ka li ta aa ka bonisa a mapenzi gakwe jebo ka li Mwana Nyambe.
32Kale ba inda no bijoni byo bile mi kale ba bi twala nabyo ku ka bi kankamina. 33Aa ba ka sika a cibaka ici ka ci kugigwa Katendele, kale ba kankamina Jesu koko, no byebyo i bijoni. Cimwinya ku mulyo gwa Jesu, cimwinya ku monsho gwakwe. 34Jesu kale ga ta nage, “Tata, u ba kwatile, kakuli ta be zi ici ba tenda.”#23:34 A mabuka gamwinya go kale ta ga kwesi gogu u mugambilo. Kale ba li taila i bizwato byakwe ko ku tenda iñeela.
35A bantu mbulyo ka ba zimene na ba lolelele, mi a manduna na ba mu nyungulula nabo, “Ka jojesanga bamwinya, a li jojese gemwini nage ati nde Kilesite, Mushaligwa gwa Nyambe.#23:35 Mushaligwa ncitulo ca Jesu ci bonisa buti ndi Nyambe sa mu shala. Mu mushobo go Cigelike mbuti ka kugilwa buti ndi Kilesite, mi mu mushobo go Ciebelu mbuti ka kugilwa buti ndi Mesiya.”
36A masole nabo kale ba keza ku mu nyungulula. Kale ba mu wa waine go ku lyelyeta. 37Mi kale ba ta nabo, “Ati ndigwe mfumu go Majuda u li jojese gwemwini.”
38Egulu lyo mutwi gwakwe mpo ka ji li inzibiso iji ka ji ñoletwe buti, “Joju nde Mfumu go Majuda.”
39Cimwinya co bijoni ibi ka bi anzi koko kale ca nyungulula Jesu na co, “Ta li ndigwe Mushaligwa? U li jojese gwemwini no ku tu jojesa neswe!”
40Kono cimwinya kale ca mu jukukila na co, “Ncinzi aa to jogi Nyambe, no ku u li mu nkatulo jonke nage? 41Uku bangisigwa kwetu ku li lulikile, kakuli twa sa gwana ibi bi botele i bitendantu byetu. Kono joju unkosi takuli i cimangoju ici na ga tenda.”
42Cwale kale ca ta na co, “Jesu, no ndi gaje aa no keze mu mubuso gwako.#23:42 Gamwinya a mabuka mbuti ku ñolelwe buti, “aa no keze ko nguzu jako jo bumfumu.””
43Jesu kale ga taba nage, “Mbyaconse ndi ku lugwila, shunu kuti u kale neme mwa Paladaisi.”
U lufu lwa Jesu
(Mat 27:45-56; Male 15:33-41; Joa 19:28-30)
44Aa se ka ji li 12 jo kamwi, a kansindwe kale ka vwika ilonga lyonse ku twala ku nako jo ma 15. 45Kakuli ijuba na lya zima. Mi isila lya mu tempele kale lya ñatuka akati. 46Jesu kale ga kumba keejwi inene nage, “Tata, nda sa wa u moya gwangu mu maganja gako.”#Nimbo 31:5. Aa sa la gambi bulyao, kale ga uja lyo mamaninino.
47U mujendesi go masole ko ku bona ibi na bya tendaala, kale ga lumba Nyambe no ku ta nage, “Ndiconse joju unkosi ka lulikile.” 48A bantu bonse aba ka ba gwanene ku lolelela byebyo ka bi tendaala, kale ba bogola bu li kaba a bizuba byabo bu tompete. 49Kono bonse babo aba ka ba mu zekelele, ku indilila no banakazi aba na ba mu umpilila ka zwa mwa Galileya, kale ba zimanina u kule kanunu, na ba lolelele byebi i bintu.
I citupu ca Jesu aa ci tuligwa mwibita
(Mat 27:57-61; Male 15:42-47; Joa 19:38-42)
50Cwale nko ka li unkosi gwezina lya Josefa, uju ka li jumwinya go manduna bo nkuta jo Majuda, ka li nkosi ka kele nenja mi ka lulikile, 51ige ta na ga zumina ku migajalo jabo ne bi ka ba tenda. Mu munzi gwa Alimateya gwa mwilonga lya Judeya ka zwa, mi ige mubuso gwa Nyambe ka lindile. 52Kale ga ja kwa Pilato, mi kale ga ka kumbila i citupu ca Jesu. 53Cwale Josefa kale ga ka angula i citupu, no ku ci vungila mwisila ilotu no ku ci tula mwibita lyo ku conkomona mwibwe, u mu ta kwa la lalikigwa u muntu. 54Se ka lili Ijuba lyo Bulitukiso, mi lyo Nsabata se ka li shaka uku tatika.
55A banakazi aba ka ba keza no Jesu na ba ka zwa kwa Galileya kale ba umpilila Josefa buti ba ka bone ebita no bu ka ci ka lalikilwa i citupu ca Jesu mwibita. 56Cwale kale ba bogola ku munzi buti ba ka lukise a mafuta go minunko i milotu. Kono kale ba wisa lyo Nsabata ko ku kutika u mulao.
Currently Selected:
Luka 23: TOI
Highlight
Copy
Compare
Share
Want to have your highlights saved across all your devices? Sign up or sign in
2026 The Seed Company
