Mateu 1
1
U mukoga gwa Jesu u Mushaligwa
(Luk 3:23-38)
1Ili nde ñolo li bonisa u mukoga gwa Jesu, u Mushaligwa gwa Nyambe uju ka li mwiwe gwa Deviti no mwiwe gwa Abbulaama.
2Abbulaama ndege ka li isi gwa Isaka mi Isaka ndege ka li isi gwa Jakobo mi
Jakobo kale ga ba isi gwa Juda no bancegwe.
3Juda kale ga ba isi gwa Pelezi no Zela, mi nyinabo ka li Tamale.
Pelezi kale ga ba isi gwa Ezilomi mi Ezilomi ndege ka li isi gwa Lami.
4Lami ndege ka li isi gwa Aminadabi.
Aminadabi kale ga ba isi gwa Nashoni, mi
Nashoni kale ga ba isi gwa Salumoni.
5Salumoni kale ga ba isi gwa Bboazi, mi nyina ka li Laaba.
Bboazi kale ga ba isi gwa Obbedi, mi nyina ka li Luti, mi
Obbedi ndege ka li isi gwa Jese.
6Jese ndege ka li isi go mfumu Deviti,
mi Deviti kale ga ba isi gwa Solomoni#1:6 Solomoni sa ba u mfumu gwa Isilaele ku zwa ku mfumu Deviti.. Mi nyina gwa Solomoni sa ba u mukazi gwa Uliya.
7Solomoni ndeesi gwa Leoboami,
mi Leoboami kale ga ba isi gwa Abbija.
Abbija kale ga ba isi gwa Asa.
8Asa ndeesi gwa Jeosafati,
mi Jeosafati kale ga ba isi gwa Jeolami.
Jeolami ndege ka li isi gwa Uziya.
9Uziya ndeesi gwa Jotami, mi Jotami kale ga ba isi gwa Akaziya.
Akaziya kale ga ba isi gwa Ezekiya.
10Ezekiya ndeesi gwa Manase,
mi Manase ndeesi gwa Amoni.
Amoni kale ga ba isi gwa Josiya,
11mi Josiya ndeesi gwa Jekoniya no bancegwe uju sa bonigwa mu nako jo ntigilo jo bana ba Isilaele mwilonga lya Bbabbilona.
12Aa se ba la ka zwi mu ntigilo mwilonga lya Bbabbilona,
Jekoniya kale ga ba isi gwa Sheyalutiyele, mi
Sheyalutiyele kale ga ba isi gwa Zelubabele.
13Zelubabele ndege ka li isi gwa Abbiyudi,
mi Abbiyudi ndeesi gwa Eliyakimi.
Eliyakimi kale ga ba isi gwa Azoli.
14Azoli ndeesi gwa Zadoki,
mi Zadoki kale ga ba isi gwa Akimi.
Akimi kale ga ba isi gwa Eliyudi.
15Eliyudi kale ga ba isi gwa Eliza,
mi Eliza kale ga ba isi gwa Matani.
Matani ndeesi gwa Jakobo, mi
16Jakobo kale ga ba isi gwa Josefa, uju ka sesete Maliya.
Mi Maliya ndege ka li nyina gwa Jesu uju ka kugigwa u Mushaligwa.
17Jonse i mikoga ka ji itilila i kumi no jone ku tatikila kwa Abbulaama ku ja kwa Deviti, no mikoga je kumi no jone ku zwa kwa Deviti ku ja ku nako ka ba joja a bana ba Isilaele mu ntigilo mwilonga lya Bbabbilona, no mikoga je kumi no jone ku zwa ku ntigilo ja mwilonga lya Bbabbilona ku twala ku Mushaligwa.
Uku bonigwa kwa Jesu u Mushaligwa
(Luk 2:1-7)
18Uku bonigwa kwa Jesu u Mushaligwa mbuti se ku tendaalila buti, nyina ka gungilikizwe buti na sesegwe kwa Josefa. Kono na ba sini uku kala antu-onke, Maliya kale ga gwanaala buti sa li sumbele ko Moya go Kucena. 19Kakuli Josefa muka Maliya ka sepaala ku mulao, mi ta ka shaka buti a fwise Maliya inshoni ku bantu, kale ga gaja bulyo buti a mu lukulule bu ombelele.
20Kono aa sa la gaji byebyo, kale ga lota iñiloi lyo Mfumu na li bonaala kwakwe na li ta na lyo, “Josefa, mwana Deviti, u leke uku joga uku inda Maliya no ku mu twala ku njugo ku ba u mukazi gwako, kakuli u busumba bwakwe nku Moya go Kucena bu zwa. 21Kuti na bone u mwana go muninzana mi igwe no mu gulike izina lya Jesu kakuli kuti na jojese a bantu bakwe ku zwa ku bitendantu i bimangoju byabo.”
22Byonse byebyo kale bya tendaala ku vumbiliza ubu sa co u Mfumu ko muboni gwakwe buti,
23“U mwalyansho kuti na sumbale
no ku bona u mwana go muninzana
mi kuti na ba mu kugange buti ndi Imanuwele,#Isaya 7:14.
ku toloka buti, ‘Nyambe neswe a kele.’ ”
24Josefa aa buka, kale ga tenda ubu na lya mu lagila iñiloi lyo Mfumu, mi kale ga inda Maliya ku ba u mukazi gwakwe. 25Kono Josefa ta ka lalanga nage ku twala aa na ga bonena u mwana go muninzana. Mi kale ga mu gulika izina lya Jesu.
Currently Selected:
Mateu 1: TOI
Highlight
Copy
Compare
Share
Want to have your highlights saved across all your devices? Sign up or sign in
2026 The Seed Company
