ᐅᐸᓓᑭᔅ ᒫᑎᐤ 24
24
ᒋᓴᔅ ᐋᓕᒧᑕᒻ ᑫ ᐃᔑ ᓂᔑᐗᓈᒋᒋᑳᑌᓕᒃ ᑭᒋ ᐊᔭᒥᐁᐎᑲᒥᒃ
(ᒫᕐᒃ 13:1–2; ᓘᒃ 21:5–6)
1ᒋᓴᔅ ᒫᑲ ᑮ ᐗᓚᐎᐤ, ᑭᒋᐋᔭᒥᐁᐎᑲᒥᑯᒃ ᒫᑲ ᑮ ᐅᒋ ᑭᑐᑌᐤ: ᑮ ᐯᒋ ᓈᑎᑯ ᒫᑲ ᐅ ᑭᔅᑭᓄᐊᒪᐙᑲᓇ ᐁ ᐎ ᐙᐸᑎᓕᑯᑦ ᑳ ᐃᔑᑖᓂᐗᓂᓕᒃ ᑭᒋᐋᔭᒥᐁᐎᑲᒥᑯᓕᐤ᙮ 2ᒋᓴᔅ ᒫᑲ ᑮ ᐃᑌᐤ, ᓇᒪ ᓈ ᑭ ᐙᐸᑌᓇᐗᐤ ᒥᓯᐌ ᐅᐅ ᑫᒀᓇ? ᑖᐺ ᑭᑦ ᐃᑎᓇᐗᐤ, ᓇᒪᐎᓚ ᐙᐙᒡ ᐯᔭᒃ ᐊᓯᓂ ᑲᑕ ᓇᑲᑖᑲᓂᐎᐤ ᐁ ᑌᑕᐱᑦ ᑯᑕᑭᔭ ᐊᓯᓂᔭ, ᐁᑳ ᑫ ᓂᒋᐌᐱᓈᑲᓂᐎᑦ᙮
ᒪᑯᔥᑳᑌᓕᑕᒧᐎᓇ ᓀᔥᑕ ᑲᒀᑕᑭᐃᑯᐎᓇ
(ᒫᕐᒃ 13:3–13; ᓘᒃ 21:7–19)
3ᒣᒀᒡ ᒫᑲ ᐁ ᐊᐱᑦ ᐊᓕᑉᔅ ᐗᒌᒃ, ᑭᒧᒡ ᑮ ᐯᒋ ᓈᑎᑯ ᑭᔅᑭᓄᐊᒪᐗᑲᓇ, ᐁ ᐃᑎᑯᑦ, ᐎᑕᒫᐎᓈᓐ, ᑖᓂᔅᐱ ᑫ ᐃᑭᑭ ᐅᐅ ᑫᒀᓇ? ᓀᔥᑕ ᑫᑯ ᑭᔅᑭᓄᐙᒋ ᐙᐸᑎᓕᐌᐎᓐ ᑫ ᐅᒋ ᑭᔅᑫᓕᑖᑾᒃ ᑭᒋ ᑕᑯᔑᓂᔭᓐ, ᓀᔥᑕ ᑭᒋ ᐃᔥᒀᐸᓕᒃ ᐊᔅᑭ?
4ᒋᓴᔅ ᒫᑲ ᐁ ᓇᔥᑴᐗᔑᐋᑦ, ᑮ ᐃᑌᐤ, ᔮᒀᒥᓰᒃ ᐁᑳᐎᓚ ᐊᐌᓇ ᑭᒋ ᐙᔦᔑᒥᑖᒃ: 5ᐌᓴ ᒥᒉᑦ ᑲᑕ ᑕᑯᔑᓋᒃ ᓂᑦ ᐃᔑᓂᑳᓱᐎᓂᒃ, ᐁ ᐃᑗᒋᒃ, ᓂᓚ ᐁᐗᒀᓇ ᙭; ᒥᒉᑦ ᒫᑲ ᑲᑕ ᐙᔦᔑᒣᐗᒃ᙮ 6ᑭ ᑳ ᐯᑌᓇᐗᐤ ᒫᑲ ᓇᑐᐸᓕᐎᓇ, ᓀᔥᑕ ᓇᑐᐸᓕᐎᓇ ᐁ ᑎᐹᑐᑖᑲᓂᐎᑭ: ᔮᒀᒥᓯᒃ ᒫᑲ ᐁᑳ ᑭᒋ ᒥᑯᔥᑳᑌᓕᑕᒥᐃᑲᐎᔦᒃ; ᐌᓴ ᒥᓯᐌ ᐅᐅ ᑫᒀᓇ ᑫᒋᓈᑦ ᑲᑕ ᐃᑭᓋ, ᒫᑲ ᓇᒪᐎᓚ ᐁᔥᑾ ᑲᑕ ᐃᔥᒀᐸᓕᐤ᙮ 7ᐌᓴ ᐁ ᐯᔭᑯᔅᑳᓀᓯᒋᒃ ᐃᓕᓕᐗᒃ ᑲᑕ ᐸᓯᑯᔅᑕᐌᐗᒃ ᐁ ᐱᑕᔥᐁᔅᑳᓀᓯᓕᒋ ᐃᓕᓕᐗ, ᓀᔥᑕ ᐅᑭᒫᐎᐎᓐ ᑯᑕᒃ ᐅᑭᒫᐎᐎᓐ: ᑲᑕ ᑲᐗᑲᑖᓂᐗᓐ ᒫᑲ, ᓀᔥᑕ ᐋᑯᐃᑖᔅᐱᓈᓂᐗᓐ, ᓀᔥᑕ ᑲᑕ ᑶᑾᓐ ᓇᓈᑐᒃ ᐃᔑ᙮ 8ᒥᓯᐌ ᐅᐅ ᐁᐗᑯ ᐱᒉᓚᒃ ᐁ ᒫᒋᐸᓕᑭ ᓇᓀᑳᑌᓕᑕᒧᐎᓇ᙮
9ᐁᑯ ᑫ ᐸᑭᑎᓂᑖᑾᒃ ᑭᒋ ᑲᒀᑕᑭᐃᑳᐎᔦᒃ, ᑭ ᑳ ᓂᐹᐃᑯᐙᐗᒃ ᒫᑲ: ᓀᔥᑕ ᑭ ᑳ ᐸᒀᑎᑯᐙᐗᒃ ᒥᓯᐌ ᐁ ᐃᑕᔅᑳᓀᓯᒋᒃ ᐃᓕᓕᐗᒃ ᓂᑦ ᐃᔑᓂᑳᓱᐎᓐ ᐅᒋ᙮ 10ᐁᑯ ᒥᒉᑦ ᑫ ᓈᔦᑕᐌᓕᑕᑭᒃ, ᑲᑕ ᒫᒥᔑᒥᑐᐗᒃ ᒫᑲ, ᓀᔥᑕ ᑲᑕ ᐸᒀᑎᑐᐗᒃ᙮ 11ᒥᒉᑦ ᒫᑲ ᓇᔅᐹᒡ ᐅᑭᔅᑭᐙᐃᑫᐗᒃ ᑲᑕ ᐃᑖᐗᒃ, ᒥᒉᑦ ᒫᑲ ᑲᑕ ᐙᔦᔑᐁᐗᒃ᙮ 12ᑫ ᐃᔅᐱᒋ ᒥᒉᑎᒃ ᒫᑲ ᒪᒑᑎᓯᐎᓐ, ᒥᒉᑦ ᐅ ᓵᑭᐃᐌᐎᓂᐗᐤ ᑲᑕ ᐊᑎ ᑕᑳᓕᐤ᙮ 13ᒫᑲ ᐊᓇ ᐁᑳ ᑫ ᔖᑯᒋᐋᑲᓂᐎᑦ, ᐁᐗᒀᓇ ᑫ ᐱᒫᒋᐋᑲᓂᐎᑦ᙮ 14ᐅᒪ ᐅᑭᒫᐎᐎᓂ ᒥᓗᐋᒋᒧᐎᓐ ᒫᑲ ᑲᑕ ᐙᐎᑖᑲᓂᐗᓐ ᒥᓯᐌ ᐊᔅᑮᒃ, ᑭᒋ ᐎᑕᒫᑯᒋᒃ ᒥᓯᐌ ᐁ ᐃᑕᔅᑳᓀᓯᒋᒃ ᐃᓕᓕᐗᒃ; ᐁᑯ ᒫᑲ ᑫ ᐃᔥᒀᐸᓕᒃ᙮
ᓂᐹᓯᓈᑯᓯᐎᓐ ᑳ ᓂᔑᐗᓈᒋᐃᐌᒪᑲᒃ
(ᒫᕐᒃ 13:14–23; ᓘᒃ 21:20–24)
15ᐃᔅᐱ ᒫᑲ ᐙᐸᑕᒣᑴ ᐊᓂᒪ ᓂᐹᓯᓈᑯᓯᐎᓐ ᑳ ᓂᔑᐗᓈᒋᐃᐌᒪᑲᒃ, ᑳ ᐋᓕᒧᑕᒃ ᑖᓂᔭᓪ ᐅᑭᔅᑭᐙᐃᑫᐤ, ᐁ ᓂᐸᐎᒪᑲᒃ ᐃᑕ ᐁ ᐸᓓᑲᒃ; (ᐊᐌᓇ ᐁᔭᒥᑖᑦ ᐁᑯᔑ ᑲᑕ ᓂᓯᑕᑐᒻ;) 16ᐁᑯ ᐊᓂᑭ ᒎᑎᐊᐃᒃ ᑳ ᐃᑖᒋᒃ ᐁᑯᔑ ᐗᒌᒃ ᑲᑕ ᐃᑎᔑᒧᐙᒃ: 17ᐊᓇ ᓀᔥᑕ ᑕᑯᒡ ᐙᔅᑳᔨᑲᓂᒃ ᑳ ᐃᑖᑦ, ᐁᑳᐎᓚ ᑲᑕ ᓂᔖᑕᐎᐤ ᑭᒋ ᐅᑎᓇᒃ ᑫᒀᓕᐤ ᐅ ᐙᔅᑳᔨᑲᓂᒥᒃ ᐅᒋ: 18ᐁᑳᐎᓚ ᓀᔥᑕ ᐊᓇ ᓂᑖᐎᑭᒋᑲᓂᒃ ᑳ ᐃᑖᑦ ᑲᑕ ᑭᐌᐤ ᑭᒋ ᐅᑎᓇᒃ ᐅ ᐎᓛᒋᑲᓇ᙮ 19ᑲᑕ ᑲᒀᑕᑭᓯᐗᒃ ᒫᑲ ᐊᓂᑭ ᑫ ᑭᓄᔥᑲᑖᐗᓱᒋᒃ ᐊᓂᑭ ᓀᔥᑕ ᑳ ᓄᔖᓂᐃᐌᒋᒃ ᒣᒀᒡ ᐅᐅ ᑫ ᑭᔑᑳᓕᑭ! 20ᒫᑲ ᓇᑐᑕᒫᑫᒃ ᐁᑳ ᒣᒀᒡ ᐁ ᐱᐴᒃ, ᐁᑳ ᓀᔥᑕ ᐁ ᐋᔭᒥᐁᑭᔑᑳᒃ ᑭᒋ ᐅᔑᒧᔦᒃ᙮ 21ᐌᓴ ᐁᑯᔅᐱ ᓈᔅᐱᒡ ᑲᑕ ᐊᓕᒥᓯᓈᓂᐗᓐ, ᐁᑳᐎᔅᑳᑦ ᑳ ᐃᔑ ᐯᒋ ᐋᓕᒪᒃ ᐊᔅᐱᓐ ᐁ ᑮ ᐅᔑᑖᓇᐗᒃ ᐊᔅᑭ ᐱᓕᔥ ᐊᓄᒡ, ᓇᒪᐎᓚ, ᐁᑳ ᓀᔥᑕ ᐎᔅᑳᑦ ᒥᓇ ᑫ ᐃᔅᐱᒋ ᐋᓕᒪᒃ᙮ 22ᑮᔥᐱᓐ ᒫᑲ ᐁᑳ ᑕᑯᑖᑲᓂᐎᑭ ᐊᓂᐃ ᑭᔑᑳᐗ, ᓇᒪᐎᓚ ᐊᐌᓇ ᑲᑕ ᐱᒫᒋᐅᐸᓐ: ᒫᑲ ᐎᓚᐗᐤ ᑳ ᐙᐌᓛᐸᒫᑲᓂᐎᒋᒃ ᑲᑕ ᐅᒋ ᑕᑯᑖᑲᓂᐎᐗ ᐊᓂᐃ ᑭᔑᑳᐗ᙮
23ᐁᑯᔅᐱ ᒫᑲ ᑮᔥᐱᓐ ᐊᐌᓇ ᑫ ᐃᑎᑖᑴ, ᒫᑎᑲ, ᐅᑕ ᐃᑖᐤ ᙭, ᓀᔥᑕᐱᑯ ᐊᓐᑕ ᐁᑳᐎᓚ ᑖᐺᑕᒧᒃ᙮ 24ᐌᓴ ᑲᑕ ᐃᑖᐗᒃ ᓇᔅᐹᒡ ᙭ᑕᒃ, ᓀᔥᑕ ᓇᔅᐹᒡ ᐅᑭᔅᑭᐙᐃᑫᐗᒃ, ᑲᑕ ᐙᐸᑎᓕᐌᐗᒃ ᒫᑲ ᑭᒋ ᑭᔅᑭᓄᐙᒋ ᐙᐸᑎᓕᐌᐎᓇ ᓀᔥᑕ ᑳ ᒫᒪᔅᑳᑌᓕᑖᑾᑭ ᑫᒀᓇ: ᑫ ᐅᒋ ᐙᔦᔑᐋᒋᒃ ᐊᓂᐃ ᑳ ᐙᐌᓛᐸᒥᒥᒋ, ᑮᔥᐱᓐ ᑮ ᑐᒋᑳᑌᑭᐸᓐ᙮ 25ᒫᑎᑲ, ᑭ ᑮ ᐎᑕᒫᑎᓇᐗᐤ ᓂᔮᑲᓇ ᐃᑭᑫ᙮
26ᐁᐗᑯ ᐅᒋ ᑮᔥᐱᓐ ᐃᑎᑖᑾᐌ, ᒫᑎᑲ, ᐸᑾᑕᔅᑲᒥᑳᒃ ᐃᑖᐤ; ᐁᑳᐎᓚ ᐊᓐᑕ ᐃᑐᑌᒃ: ᒫᑎᑲ, ᑳᑕᓄᒃ ᐱᑐᑲᒥᒃ ᐃᑖᐤ; ᐁᑳᐎᓚ ᑖᐺᑕᒧᒃ᙮ 27ᐌᓴ ᑖᐱᔅᑯᒡ ᐙᐸᓄᑖᒃ ᐁ ᐅᒋ ᐙᔅᑌᐸᓕᒃ, ᐁ ᐅᑎᑖᔅᑌᐸᓕᒃ ᒫᑲ ᓇᑳᐯᐊᓄᑖᒃ; ᐁᑯ ᒬᒋ ᑫ ᐃᑭᒃ ᐯᒋ ᑕᑯᔑᑫ ᐃᓕᓕᐎᑯᓯᓵᓐ᙮
28ᐌᓴ ᐃᑕ ᐁ ᐃᑕᑾᒃ ᒥᔭᐤ ᑳ ᓂᐱᒫᑲᒃ, ᐁᑯᑕ ᑫ ᒪᐗᒋᐃᑐᒋᒃ ᒥᑭᓯᐙᒃ᙮
ᐃᔅᐱ ᑖᑯᔑᑫ ᐃᓕᓖᐐᑯᓯᓵᓐ
(ᒫᕐᒃ 13:24–27; ᓘᒃ 21:25–28)
29ᑣᔦᒃ ᒫᑲ ᑭᐃᔥᑾ ᐊᓂᒪ ᐋᓕᒣᓕᑕᒧᐎᓐ ᑫ ᐃᑭᒃ ᒣᒀᒡ ᐊᓂᐃ ᑭᔑᑳᐗ, ᐱᓯᒻ ᑲᑕ ᐗᓂᑎᐱᔅᑭᓯᐤ, ᑎᐱᔅᑭᐱᓯᒻ ᓀᔥᑕ ᓇᒪᐎᓚ ᑲᑕ ᒐᑳᓯᑫᐤ, ᐊᒐᑯᔕᒃ ᓀᔥᑕ ᑲᑕ ᐸᑭᔑᓋᒃ ᑭᔑᑯᒃ ᐅᒋ, ᑲᔥᑭᐅᐎᓇ ᓀᔥᑕ ᑭᔑᑯᒃ ᑲᑕ ᓇᓂᑭᐸᓕᐗ: 30ᐁᑯ ᒫᑲ ᑫ ᓄᑾᓂᓕᒃ ᐅ ᑭᔅᑭᓄᐙᒋ ᐙᐸᑎᓕᐌᐎᓐ ᐃᓕᓕᐎᑯᓯᓵᓐ ᑭᔑᑯᒃ: ᐁᑯ ᒫᑲ ᒥᓯᐌ ᐁ ᐃᑕᑐᑌᐎᓯᒋᒃ ᐃᓕᓕᐗᒃ ᐅᑕ ᐊᔅᑮᒃ ᑫ ᓇᓀᑳᑌᓕᒧᒋᒃ, ᑲᑕ ᐙᐸᒣᐗᒃ ᒫᑲ ᐃᓕᓕᐎᑯᓯᓵᓇ ᐁ ᐯᒋ ᐃᑐᑌᓕᒋ ᑭᒋᑭᔑᑳᐎ ᐗᔅᑯᒃ, ᑲᔥᑭᐅᐎᓂᒃ ᓀᔥᑕ ᑭᒋ ᑭᔅᑌᓕᑖᑯᓯᐎᓂᒃ᙮ 31ᑲᑕ ᐃᔑᑎᔕᐌᐤ ᒫᑲ ᐅᑦ ᐁᓐᒐᓕᒪ ᓈᔅᐱᒡ ᐁ ᑭᔗᐌᒪᑲᒃ ᐳᑖᒋᑲᓐ, ᑲᑕ ᒪᐗᒋᐁᓕᐗ ᒫᑲ ᐊᓂᐃ ᑳ ᐙᐌᓛᐸᒥᒥᒋ ᓀᐤ ᐁ ᐅᒋᓚᐌᒃ ᐅᒋ, ᓀᔥᑕ ᒥᓯᐌ ᐁᔅᐱᔖᒃ ᐊᑖᒥᒃ ᑭᔑᑯᒃ᙮
ᓇᔅᐱᑕᐌᐎ ᐋᑕᓗᑳᓐ ᐸᑫᓵᓂᒥᓈᑎᒃ
(ᒫᕐᒃ 13:28–31; ᓘᒃ 21:29–33)
32ᐁ ᐎ ᑲᑴ ᑭᔅᑫᓕᑕᒧᒃ ᓇᔅᐱᑐᐌᐎ ᐋᑕᓗᑳᓐ ᐸᑫᓵᓂᒥᓈᑎᒃ ᐅᒋᔪᐤ ᐃᔅᐱ ᐗᑎᑾᓇ ᐁᔥᑾ ᐁ ᐅᔥᑭ ᓂᑖᐎᑭᑭ ᓀᔥᑕ ᓂᐱᔑᐗᑭ, ᑭ ᑭᔅᑫᓕᑌᓇᐗᐤ ᓂᐱᓐ ᐁ ᐯᔓᓈᑾᒃ: 33ᐁᑯ ᑖᐱᔅᑯᒡ ᑭᓚᐗᐤ, ᐃᔅᐱ ᐙᐸᑕᒣᑴ ᒥᓯᐌ ᐅᐅ ᑫᒀᓇ, ᑭᔅᑫᓕᑕᒧᒃ ᐁ ᐯᔓᓈᑾᒃ, ᐃᔥᒀᑌᒥᒃ ᐃᔥᐱᔥ᙮ 34ᑖᐺ ᑭᑦ ᐃᑎᓇᐗᐤ, ᐅᑯ ᐃᓕᓕᐗᒃ ᐊᓄᒡ ᑳ ᐱᒫᑎᓯᒋᒃ ᓇᒪᐎᓚ ᑲᑕ ᒣᒋᐸᓕᐗᒃ ᐹᑎᒫ ᒥᓯᐌ ᐅᐅ ᑫᒀᓇ ᑮ ᑎᐱᐸᓕᑾᐌ᙮ 35ᑭᔑᒃ ᓀᔥᑕ ᐊᔅᑭ ᑲᑕ ᐃᔥᒀᐸᓕᐗ, ᒫᑲ ᓂᑦ ᐋᔭᒥᐎᓇ ᓇᒪᐎᓚ ᑲᑕ ᐃᔥᒀᐸᓕᐗ᙮
ᓇᒪᐎᓚ ᐊᐌᓇ ᑭᔅᑫᓕᑕᒻ ᑖᓂᔅᐱ ᑫ ᑕᑯᔑᒃ ᐃᓕᓖᐐᑯᓯᓵᓐ
(ᒫᕐᒃ 13:32–37; ᓘᒃ 17:26–30, 34–36)
36ᒫᑲ ᐊᓂᒪ ᐁ ᑭᔑᑳᒃ ᓀᔥᑕ ᑎᐹᔨᑲᓐ ᐱᓯᒧᑳᓂᒃ ᓇᒪᐎᓚ ᐊᐌᓇ ᐃᓕᓕᐤ ᑭᔅᑫᓕᑕᒻ, ᓇᒪ ᓀᔥᑕ ᐁᓐᒐᓚᒃ ᑭᒋᑭᔑᑯᒃ, ᒫᑲ ᓄᑖᐎ ᐱᑯ᙮ 37ᒫᑲ ᑖᐱᔅᑯᒡ ᑳ ᐃᑭᓂᓕᒃ ᒣᒀᒡ ᓄᐊ ᐁ ᐅ ᑭᔑᑳᒥᑦ, ᐁᑯ ᓀᔥᑕ ᑫ ᐃᑭᒡ ᐯᒋ ᐃᑐᑌᑌ ᐃᓕᓕᐎᑯᓯᓵᓐ᙮ 38ᐌᓴ ᑖᐱᔅᑯᒡ ᒣᒀᒡ ᐊᓂᐃ ᑭᔑᑳᐙ ᐸᒧᔑ ᑳ ᓕᔅᑭᐯᒃ, ᑮ ᒥᒋᓱᐸᓇᒃ ᓀᔥᑕ ᑮ ᒥᓂᑴᐸᓇᒃ, ᑮ ᐎᑭᑐᐸᓇᒃ, ᓀᔥᑕ ᑮ ᐎᑭᑐᐃᐌᐸᓇᒃ, ᐱᓕᔥ ᐊᓂᒪ ᐁ ᑭᔑᑳᒃ ᐃᔅᐱ ᓄᐊ ᑳ ᐳᓯᑦ ᐋᕐᑯᒃ; 39ᓇᒪᐎᓚ ᒫᑲ ᐅᒋ ᑭᔅᑫᓕᑕᒶᒃ ᐹᑎᒫ ᐁᔅᐱᒋ ᓕᔅᑭᐯᓕᒃ, ᓀᔥᑕ ᒥᓯᐌ ᐌᑎᓂᑯᒋᒃ; ᐁᑯ ᓀᔥᑕ ᑫ ᐃᑭᒃ ᐯᒋ ᐃᑐᑌᑌ ᐃᓕᓕᐎᑯᓯᓵᓐ᙮ 40ᐁᑯᔅᐱ ᓂᔓ ᑲᑕ ᐃᑖᐗᒃ ᓂᑖᐎᑭᒋᑲᓇᒃ; ᐯᔭᒃ ᑲᑕ ᐅᑎᓇᐤ, ᑯᑕᒃ ᒫᑲ ᑲᑕ ᓇᑲᑕᐤ᙮ 41ᓂᔓ ᐃᔅᑴᐗᒃ ᑲᑕ ᐱᓂᐳᒋᑫᐗᒃ ᐱᓂᐳᒋᑲᓂᒃ; ᐯᔭᒃ ᑲᑕ ᐅᑎᓇᐤ, ᑯᑕᒃ ᒫᑲ ᑲᑕ ᓇᑲᑕᐤ᙮
42ᐁᐗᑯ ᐌᒋ ᐊᔕᐙᐱᒃ; ᐌᓴ ᓇᒪᐎᓚ ᑭ ᑭᔅᑫᓕᑌᓇᐗᐤ ᑫᑯ ᑎᐹᔨᑲᓐ ᐱᓯᒧᑳᓂᒃ ᐃᔅᐱ ᑫ ᐯᒋ ᐃᑐᑌᒃ ᑭ ᑎᐯᓕᒋᑫᒥᐗᐤ᙮ 43ᒫᑲ ᐅᒪ ᑭᔅᑫᓕᑕᒧᒃ, ᑮᔥᐱᓐ ᑌᐯᓕᑕᒃ ᐙᔅᑳᔨᑲᓂᓕᐤ ᑭ ᑭᔅᑫᓕᑕᒧᑯᐸᓀ ᑫᑯ ᑎᐸᔨᑲᓐ ᐱᓯᒧᑳᓂᒃ ᒣᒀᒡ ᑫ ᑕᑯᔑᓂᓕᒋ ᑭᒧᑌᔅᑾ, ᑲᑕ ᑮ ᐊᔕᐙᐱᐸᓐ ᐁᑯ ᒫᑲ ᐅ ᐙᔅᑳᔨᑲᓂᒻ ᐁᑳ ᑫ ᑮ ᐱᑯᐃᑳᑌᓕᔅᐸᓐ 44ᐁᐗᑯ ᐌᒋ ᑭᓚᐗᐤ ᓀᔥᑕ ᐋᔦᔅᑲᐎᓰᒃ: ᐌᓴ ᐊᓂᒪ ᑎᐹᔨᑲᓐ ᐱᓯᒧᑳᓂᒃ ᒣᒀᒡ ᐁᑳ ᐁ ᐃᑌᓕᑕᒧᒃ ᐃᓕᓕᐎᑯᓯᓵᓐ ᑲᑕ ᑕᑯᔑᓐ᙮
ᒀᔭᔉ ᐊᑐᔅᑫᓛᑲᓐ ᓀᔥᑕ ᒪᒋ ᐊᑐᔅᑫᓛᑲᓐ
(ᓘᒃ 12:41–48)
45ᐊᐌᓇ ᒫᑲ ᑳ ᒀᔭᔅᑭᑎᑦ ᓀᔥᑕ ᑲᑫᑕᐌᓕᑕᒃ ᐊᑑᔅᑫᓛᑲᓐ, ᑳ ᑮ ᑎᐯᓕᑕᒥᐃᑯᑦ ᐅᑦ ᐅᑭᒫᒪ ᐊᓂᐃ ᑳ ᐃᑖᓕᒋ ᐅ ᐙᔅᑳᔨᑲᓂᒥᓕᒃ, ᑭᒋ ᐊᔕᒫᑦ ᐌᑎᒋᐸᓕᓕᑭ? 46ᔕᐌᓕᑖᑯᓯᐤ ᐊᓇ ᐊᑑᔅᑫᓛᑲᓐ ᑫ ᒥᔅᑳᑯᑦ ᐅᑦ ᐅᑭᒫᒪ ᐅᒪ ᐁ ᐃᔑ ᑐᑕᒃ ᑕᑯᔑᓂᓕᑌ᙮ 47ᑖᐺ ᑭᑦ ᐃᑎᓇᐗᐤ, ᑲᑕ ᑎᐯᓕᑕᒥᐃᑯ ᒥᓯᐌ ᐅᑦ ᐋᔮᓂᓕᐗ᙮ 48ᒫᑲ ᑮᔥᐱᓐ ᐊᓇ ᒪᒋ ᐊᑑᔅᑫᓛᑲᓐ ᑫ ᐃᑗᑴ ᐅᑌᐃᒃ, ᓂᑦ ᐅᑭᒫᒻ ᑆᔅᑕᐎ ᑕᑯᔑᓐ; 49ᑫ ᒫᒋ ᐅᑖᒪᐙᑴ ᒫᑲ ᐎᒋ ᐊᑑᔅᑫᓛᑲᓇ ᓀᔥᑕ ᐙᒋᒥᒋᓱᒪᑴ ᓀᔥᑕ ᐙᒋᒥᓂᑴᒫᑴ ᐅᑭᔥᑴᐯᐗ; 50ᐊᓇ ᐊᑑᔅᑫᓛᑲᓐ ᐅᑦ ᐅᑭᒫᒪ ᑲᑕ ᑕᑯᔑᓂᓕᐗ ᐊᓂᒪ ᐁ ᑭᔑᑳᓕᒃ ᐃᔅᐱ ᐁᑳ ᐁ ᐊᔕᐙᐸᒫᑦ, ᓀᔥᑕ ᐊᓂᒪ ᑎᐹᔨᑲᓐ ᐱᓯᒧᑳᓂᒃ ᒣᒀᒡ ᐁᑳ ᐁ ᐃᑌᓕᑕᒃ; 51ᑲᑕ ᑮᔥᑭᔓᑯ ᒫᑲ, ᓀᔥᑕ ᑲᑕ ᐃᑎᔕᐅᑯ ᒫᑲ ᑭᒋ ᐎᒉᐙᑦ ᐅᑕᔭᒥᐁᑳᓱᐗ; ᐁᑯᑕ ᑫ ᐃᑕᑾᒃ ᒫᑐᐎᓐ ᓀᔥᑕ ᑫ ᐃᔑ ᒫᑗᐋᐱᑌᔑᓂᓈᓂᐗᒃ᙮
Currently Selected:
ᐅᐸᓓᑭᔅ ᒫᑎᐤ 24: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
