ᐅᐸᓓᑭᔅ ᒫᑎᐤ 26
26
ᑮᒧᒡ ᐐ ᐅᑎᓀᐗᒃ ᒋᓴᓴ
(ᒫᕐᒃ 14:1–2; ᓘᒃ 22:1–2; ᒑᓐ 11:45–53)
1ᑮ ᐃᑭᓐ ᒫᑲ, ᐃᔅᐱ ᒋᓴᔅ ᑳ ᑮ ᔑᐃᑗᑦ ᒥᓯᐌ ᐅᐅ ᐃᑗᐎᓇ, ᑮ ᐃᑌᐤ ᐅ ᑭᔅᑭᓄᐊᒪᐙᑲᓇ, 2ᑭ ᑭᔅᑫᓕᑌᓇᐗᐤ ᑮ ᓂᔓ ᑭᔑᑳᑫ ᑫ ᒥᔮᔥᑳᑫᐎ ᒪᑯᔖᓂᐗᒃ, ᐃᓕᓕᐎᑯᓯᓵᓐ ᒫᑲ ᐙᔦᔑᐸᑭᑎᓇᐤ ᑭᒋ ᒋᔅᑖᔅᑾᐙᑲᓂᐎᑦ᙮
3ᐁᑯ ᒥᔭᐗᒋᐃᑐᒋᒃ ᑭᒋ ᓵᓵᑭᐎᓕᐌᐎᓕᓕᐗᒃ, ᓀᔥᑕ ᐅᒪᓯᓇᐃᑫᐗᒃ, ᓀᔥᑕ ᑳ ᓂᑳᓀᓕᑖᑯᓯᒋᒃ ᐃᓕᓕᐙᒃ, ᒫᐗᒋ ᑭᒋ ᓵᓵᑭᐎᓕᐌᐎᓕᓕᐗ ᐅ ᑭᒋᐙᔅᑳᔨᑲᓂᒥᓕᒃ, ᑳᔭᐸᔅ ᑳ ᐃᔑᓂᑳᓱᓕᒋ, 4ᑮ ᐋᔭᒥᒥᐃᑐᐗᒃ ᒫᑲ ᑭᒧᒡ ᑭᒋ ᐅᑎᓈᒋᒃ ᒋᓴᓴ, ᓀᔥᑕ ᑭᒋ ᓂᐸᐋᒋᒃ᙮ 5ᒫᑲ ᑮ ᐃᑗᐗᒃ, ᓇᒪᐎᓚ ᒣᒀᒡ ᐁ ᒪᑯᔐ ᑭᔑᑳᒃ, ᐌᓴ ᑭᔅᑎᓈᒡ ᑲᑕ ᓈᔦᑕᐌᓕᑕᒶᒃ ᐃᓕᓕᐗᒃ᙮
ᒋᓴᔅ ᑖᒫᔅᑯᓇᑲᓂᐐ ᐯᑕᓂᐃᒃ
(ᒫᕐᒃ 14:3–9; ᒑᓐ 12:1–8)
6ᒣᒀᒡ ᒋᓴᔅ ᐯᑕᓂᐃᒃ ᐁ ᐃᑖᑦ, ᐅ ᐙᔅᑳᔨᑲᓂᒥᓕᒃ ᓵᐃᒪᓇ ᐅᓓᑉᕈᓯᐃᑖᔅᐱᓀᐗ, 7ᑮ ᐯᒋ ᓈᑎᑯ ᐃᔅᑴᐗ ᐁ ᐋᔮᓕᒋ ᓈᔅᐱᒡ ᐁ ᒥᒉᑦ ᐗᑕᔦᔮᓕᒃ ᑕᒪᔅᑯᐎᓂᓕᐤ ᐊᓯᓂᐗᑎᒃ, ᑮ ᓯᑭᓇᒥᓕᐗ ᒫᑲ ᐅᔅᑎᒀᓂᒃ, ᒣᒀᒡ ᐁ ᐊᐱᑦ ᐁ ᒥᒋᓱᑦ᙮ 8ᒫᑲ ᐃᔅᐱ ᐅ ᑭᔅᑭᓄᐊᒪᐙᑲᓇ ᐎᐋᐸᑕᒥᓕᒋ, ᓈᔅᐱᒡ ᑮ ᑭᓯᐙᓯᓕᐗ, ᐁ ᐃᑗᓕᒋ, ᑖᓀᑭ ᐌᒋ ᐅᒪ ᓂᔑᐗᓈᒋᑖᓂᐗᒃ? 9ᐌᓴ ᐅᒪ ᑕᒪᔅᑯᐎᓐ ᑲᑕ ᑮ ᐊᑖᐗᑲᓂᐗᓄᐸᓐ ᒥᔅᑕᐃ, ᐁᑯ ᒫᑲ ᑭᒋ ᑮ ᒥᓕᑣᐸᓐ ᐅᑭᑎᒫᑭᓯᐗᒃ᙮
10ᐃᔅᐱ ᒋᓴᔅ ᓀᓯᑐᑕᒃ, ᑮ ᐃᑌᐤ, ᑖᓀᑭ ᐌᒋ ᒥᑯᔅᑳᒋᐁᒃ ᐊᐗ ᐃᔅᑴᐤ? ᐌᓴ ᒥᓗ ᑫᒀᓕᐤ ᓂ ᑮ ᑐᑖᒃ᙮ 11ᐌᓴ ᑭᓚᐗᐤ ᒧᔕᒃ ᑭᑦ ᐋᔮᐗᐗᐗᒃ ᐁ ᐎᒋᑕᔑᑫᒥᑖᑾᒃ ᐅᑭᑎᒫᑭᓯᐗᒃ, ᒫᑲ ᓂᓚ ᓇᒪᐎᓚ ᒧᔕᒃ ᑭᑦ ᐋᔭᐎᓇᐗᐤ᙮ 12ᐌᓴ ᐅᒣᓕᐤ ᑕᒪᔅᑯᐎᓂᓕᐤ ᐁ ᑮ ᓯᑭᓇᒃ ᓂᔮᐎᒃ, ᑭᒋ ᓇᐃᑳᑲᐎᐗᒃ ᑮ ᐅᒋ ᑐᑕᒻ᙮ 13ᑖᐺ ᑭᑦ ᐃᑎᓇᐗᐤ, ᐱᑯ ᐃᑕ ᐅᒪ ᒥᓗᐋᒋᒧᐎᓐ ᑫ ᐎᑖᑲᓂᐎᑴ ᒥᓯᐌ ᐊᔅᑮᒃ, ᐁᑯᑕ ᓀᔥᑕ ᐊᐗ ᐃᔅᑴᐤ ᑳ ᑐᑕᒃ ᑫ ᐋᓕᒧᒋᑳᑌᓕᒃ ᑭᒋ ᑭᔅᑭᓯᑐᑕᐙᑲᓂᐎᑦ᙮
ᒎᑕᔅ ᓇᔅᑯᒧ ᒋ ᐙᔦᔑᐸᑭᑎᓈᑦ ᒋᓴᓴ
(ᒫᕐᒃ 14:10–11; ᓘᒃ 22:3–6)
14ᐁᑯ ᐯᔭᒃ ᐊᓂᑭ ᓂᔓᔖᑉ, ᒎᑕᔅ ᐃᔅᑳᕆᔭᑦ ᐁᔑᓂᑳᓱᑦ, ᓂᔮᑖᑦ ᑭᒋ ᓵᓵᑭᐎᓕᐌᐎᓕᓕᐗ, 15ᑮ ᐃᑌᐤ ᒫᑲ, ᑫᒀᓐ ᑫ ᒥᓕᔦᒃ, ᐁᑯ ᒫᑲ ᑫ ᐸᑭᑎᓇᒫᑕᑾᒃ? ᑮ ᓇᔅᑯᒣᐗᒃ ᒫᑲ ᑭᒋ ᒥᓛᒋᒃ ᓃᔅᑐᒥᑕᓇᐤ ᐙᐱᓯᔔᓕᐊᓈᐱᔅᑾ᙮ 16ᐁᑯᔅᐱ ᐅᒋ ᒫᑲ ᑮ ᓈᓇᑕᐌᓕᑕᒻ ᑫ ᐃᔑ ᓇᐃᐸᓕᓕᒃ ᐙᔦᔑᐹᑭᑎᓈᑦ᙮
ᒋᓴᔅ ᐁ ᐐᒋ ᒦᒋᓱᒫᑦ ᐅᑭᔅᑭᓄᐊᒪᐙᑲᓇ
(ᒫᕐᒃ 14:12–21; ᓘᒃ 22:7–13, 21–23; ᒑᓐ 13:21–30)
17ᐃᔅᐱ ᓃᔥᑕᒻ ᐁ ᑭᔑᑳᒃ ᐁᑳ ᐁ ᐅᐱᓱᑦ ᐊᓚᑯᓇᐤ ᐁ ᐋᐸᒋᐋᑲᓂᐎᑦ, ᑭᔅᑭᓄᐊᒪᐙᑲᓇ ᑮ ᐯᒋ ᓈᑎᑯ ᒋᓴᔅ, ᐁ ᐃᑎᑯᑦ, ᑖᓐᑌ ᐁᔑ ᓇᑕᐌᓕᒥᔮᒃ ᑭᒋ ᐋᔦᔅᑲᐎᑕᒫᑖᒃ ᑭᒋ ᒥᒋᔭᓐ ᒥᔮᔥᑳᑫᐎ ᒪᑯᔐᐎᓐ?
18ᑮ ᐃᑗᐤ ᒫᑲ, ᐃᑐᑌᒃ ᐃᑖᐎᓂᒃ, ᓈᑎᒃ ᒫᑲ ᐯᔭᒃ ᐃᓕᓕᐤ, ᐅᒪ ᒫᑲ ᑭ ᑳ ᐃᑖᐗᐤ, ᐅᑭᔅᑭᓄᐊᒫᑫᐤ ᐃᑗᐤ, ᓂ ᑭᔑᑳᒻ ᐯᔓᓈᑾᓐ; ᓂ ᑳ ᑲᓇᐌᓕᑌᓐ ᒥᔮᔥᑳᑫᐎ ᒪᑯᔐᐎᓐ ᑭ ᐋᔅᑳᔨᑲᓂᒥᒃ ᐊᓯᒋ ᓂ ᑭᔅᑭᓄᐊᒪᐙᑲᓇᒃ᙮
19ᑭᔅᑭᓄᐊᒪᐙᑲᓇᒃ ᒫᑲ ᑮ ᑐᑕᒶᒃ ᑳ ᑮ ᐃᑌᑯᒋᒃ ᒋᓴᓴ; ᑮ ᐋᔦᔅᑲᐎᑖᐗᒃ ᒫᑲ ᒪᑯᔐᐎᓂᓕᐤ᙮
20ᐃᔅᐱ ᐌᑎᒋᐸᓕᒃ ᐁ ᐅᑖᑯᔒᒃ, ᑮ ᐎᒋᓇᐊᐱᒣᐤ ᐊᓂᐃ ᓂᔓᔖᑉ᙮ 21ᒣᒀᒡ ᒫᑲ ᐁ ᒥᒋᓱᒋᒃ, ᑮ ᐃᑗᐤ ᑖᐺ ᑭᑦ ᐃᑎᓇᐗᐤ, ᐯᔭᒃ ᐁ ᐃᑕᔑᔦᒃ ᓂ ᑳ ᐙᔦᔑᐸᑭᑎᓂᒃ᙮
22ᓈᔅᐱᒡ ᒫᑲ ᑮ ᒥᒋᓚᐌᓯᐗᒃ, ᒥᓯᐌ ᐁ ᐃᑕᓯᒋᒃ ᒫᑲ ᑮ ᒫᒋ ᐃᑌᐗᒃ, ᑌᐯᓕᒋᑫᔭ, ᓂᓚ ᓈ?
23ᐁ ᓇᔥᑴᐗᔑᐃᐌᑦ ᒫᑲ ᑮ ᐃᑗᐤ, ᐊᓇ ᑖᐱᔅᑯᒡ ᑳ ᑭᑖᓇᒃ ᐅᒋᒋ ᐅᓛᑲᓂᒃ ᐊᓯᒋ ᓂᓚ, ᐁᐗᒀᓇ ᑫ ᐙᔦᔑᐸᑭᑎᓂᑦ᙮ 24ᐃᓕᓕᐎᑯᓯᓵᓐ ᑭᑐᑌᐤ ᐁ ᐃᔑ ᒪᓯᓇᐃᑳᑌᓕᒃ; ᒫᑲ ᑲᑕ ᑲᒀᑕᑭᓯᐤ ᐊᓇ ᐃᓕᓕᐤ ᑳ ᐋᔦᔑᐸᑭᑎᓈᑦ ᐃᓕᓕᐎᑯᓯᓵᓇ! ᑲᑕ ᑮ ᒥᓨᔑᓂᓕᐸᓐ ᐊᓇ ᐃᓕᓕᐤ ᑮᔥᐱᓐ ᐁᑳ ᑮ ᐅᒋ ᓂᑖᐎᑭᑦ᙮
25ᐁᑯ ᒎᑕᔅ, ᐊᓇ ᑳ ᐙᔦᔑᐸᑭᑎᓈᑦ, ᓀᔥᑴᐗᔑᐃᐌᑦ, ᑮ ᐃᑗᐤ ᒫᑳ, ᐅᑭᒪᐤ, ᓂᓚ ᓈ?
ᑮ ᐃᑌᐤ, ᑭ ᑮ ᐃᑣᓐ᙮
ᑳ ᑎᐯᓕᒋᑫᑦ ᐅᓂᐯᑴᐎᓐ
(ᒫᕐᒃ 14:22–26; ᓘᒃ 22:14–20; ᓂᔥᑕᒻ ᑯᕆᓐᑎᔮᓇ 11:23–25)
26ᒣᒀᒡ ᒫᑲ ᐁ ᒥᒋᓱᒋᒃ, ᒋᓴᔅ ᑮ ᐅᑎᓀᐤ ᐊᓚᑯᓇᐗ, ᑮ ᒥᓦᑭᒣᐤ ᒫᑲ, ᑮ ᐱᑯᓀᐤ ᒫᑲ, ᐁᑯ ᒫᓚᑦ ᑭᔅᑭᓄᐊᒪᐙᑲᓇ, ᐁ ᐃᑖᑦ ᒫᑲ, ᐅᑎᓂᒃ, ᒧᐎᒃ; ᐁᐗᑯ ᐅᒪ ᓂᔭᐤ᙮
27ᑮ ᐅᑎᓇᒻ ᓀᔥᑕ ᒥᓂᒀᑲᓀᓕᐤ, ᑮ ᓇᓈᔅᑯᒧ ᒫᑲ, ᐁᑯ ᒫᓛᑦ, ᐁ ᐃᑗᑦ, ᒥᓂᑴ ᒥᓯᐌ ᐁ ᐃᑕᔑᔦᒃ᙮ 28ᐌᓴ ᐁᐗᑯ ᐅᒪ ᓂᒥᑯᒻ ᐅᔥᑭ ᓇᔅᑯᒥᑐᐎᓂᒃ, ᒥᒉᑦ ᑳ ᐅᒋ ᓯᑲᐃᑳᑌᒃ ᑭᒋ ᐌᐯᓕᒋᑳᑌᑭ ᒪᒋᑣᐎᓇ᙮ 29ᒫᑲ ᑭᑦ ᐃᑎᓇᐗᐤ, ᐊᓄᒡ ᐅᒋ ᓇᒪᐎᓚ ᓂ ᑳ ᐅᒋ ᒥᓂᒀᑐᑕᒸᓐ ᐅ ᒥᓂᔕ ᔓᒥᓈᑎᒃ ᐹᑎᒫ ᐊᓂᒪ ᐁ ᑭᔑᑳᒃ ᐃᔅᐱ ᐅᔥᑭ ᒥᓂᑴᔮᓀ ᐊᓯᒋ ᑭᓚᐗᐤ ᓄᑖᐎ ᐅᑦ ᐅᑭᒫᐎᐎᓂᒃ᙮
30ᐃᔅᐱ ᒫᑲ ᑳ ᑮ ᓂᑲᒧᒋᒃ ᓂᑲᒧᐎᓂᓕᐤ ᑮ ᐗᓚᐎᐗᒃ ᐊᓕᑉᔅ ᐗᒌᒃ ᐁ ᐃᑐᑌᒋᒃ᙮
ᒋᓴᔅ ᓃᑳᓂᐐ ᐐᑕᒻ ᑫ ᐋᑕᐌᓂᒥᑯᑦ ᐱᑕᕋ
(ᒫᕐᒃ 14:27–31; ᓘᒃ 22:31–34; ᒑᓐ 13:36–38)
31ᐁᑯ ᒋᓴᔅ ᐁᑖᑦ, ᒥᓯᐌ ᐁ ᐃᑕᔑᔦᒃ ᑭ ᑳ ᓈᔦᑕᐌᓕᑌᓇᐗᐤ ᓂᓚ ᐅᒋ ᐊᓄᒡ ᑫ ᑎᐱᔅᑳᒃ: ᐌᓴ ᐃᑕᓯᓇᐃᑳᑌᐤ, ᓂ ᑳ ᐸᑲᒪᐗᐤ ᒫᓂᔥᒑᓂᔑᐎᓕᓕᐤ, ᒫᓂᔥᒑᓂᔕᒃ ᒫᑲ ᑲᑕ ᐊᓴᓶᑎᔕᐙᐗᒃ᙮ 32ᐃᔅᐱ ᒫᑲ ᑭ ᐗᓂᔥᑳᔮᓀ, ᑭ ᑳ ᓇᑕᐎ ᐯᐃᑎᓇᐗᐤ ᑳᓕᓕᒃ᙮
33ᐱᑕᕐ ᑮ ᓇᔥᑴᐗᔑᐁᐤ ᒫᑲ, ᐁ ᐃᑖᑦ, ᑮᔥᐱᓐ ᒥᓯᐌ ᐃᓕᓕᐗᒃ ᓈᔦᑕᐌᓕᑕᒀᐌ ᑭᓚ ᐅᒋ, ᓇᒪᐎᔅᑳᑦ ᓂᓚ ᓂ ᑳ ᓈᔦᑕᐌᓕᑌᓐ᙮
34ᒋᓴᔅ ᑮ ᐃᑌᐤ, ᑖᐺ ᑭᑦ ᐃᑎᓐ, ᐊᓄᒡ ᑫ ᑎᐱᔅᑳᒃ, ᐸᒧᔑ ᓈᐯ ᐹᑲᐋᒀᓐ ᓄᑖᑯᓯᑦ, ᓂᔅᑡᐤ ᑭ ᑳ ᐋᓉᑌᓐ ᐁ ᑭᔅᑫᓕᒥᔭᓐ᙮
35ᐱᑕᕐ ᑮ ᐃᑌᐤ, ᑮᔥᐱᓐ ᐎᒋᓂᐱᒥᑖᓀ, ᐁᓕᐌᒃ ᒫᑲ ᓇᒪᐎᓚ ᓂ ᑳ ᐋᓉᑌᓐ ᐁ ᑭᔅᑫᓕᒥᑖᓐ᙮
ᐁᑯ ᓀᔥᑕ ᑳ ᐃᑗᒋᒃ ᒥᓯᐌ ᑭᔅᑭᓄᐊᒪᐙᑲᓇᒃ᙮
ᒋᓴᔅ ᐋᔭᒥᐁᐤ ᑫᑦᓭᒪᓂᒃ ᐁᔑᓂᑳᑌᒃ
(ᒫᕐᒃ 14:32–42; ᓘᒃ 22:39–46)
36ᐁᑯ ᒋᓴᔅ ᐁ ᐎᒉᐙᑦ ᐱᐁᒋ ᐃᑐᑌᑦ ᐊᓐᑕ ᑫᑦᓭᒪᓂ ᐁᔑᓂᑳᑌᒃ, ᐃᑌᐤ ᒫᑲ ᑭᔅᑭᓄᐊᒪᐙᑲᓇ, ᐅᑕ ᐊᐱᒃ ᑭᓚᐗᐤ, ᒣᒀᒡ ᓀᑌ ᐁ ᐃᑐᑌᔮᓐ ᑭᒋ ᐋᔭᒥᐋᔮᓐ᙮ 37ᑮ ᐎᒉᐌᐤ ᒫᑲ ᐱᑕᕋ ᓀᔥᑕ ᓭᐸᑎ ᐅᑯᓯᓴ ᑳ ᓂᔑᓕᒋ, ᑮ ᐊᑎ ᒪᒥᔑᒣᓕᑕᒻ ᒫᑲ, ᓀᔥᑕ ᓈᔅᐱᒡ ᑮ ᑯᓯᑯᒪᒋᐅ᙮ 38ᐁᑯ ᐁᑖᑦ, ᓂᑦ ᐊᒑᒃ ᓈᔅᐱᒡ ᒪᒥᔑᒣᓕᑕᒻ, ᐱᓕᔥ ᓂᐱᐎᓂᒃ ᐃᔑ: ᐅᑕ ᑕᔑᑫᒃ, ᐎᒋᐊᔕᐗᐱᒥᒃ ᒫᑲ᙮
39ᐊᐙᓯᑌᔑᔥ ᒫᑲ ᑮ ᐃᑐᑌᐤ, ᑮ ᐅᑎᑕᐱᐸᓕᐅ ᒫᑲ, ᑮ ᐋᔭᒥᐊᐤ ᒫᑲ, ᐁ ᐃᑗᑦ, ᐅ ᓄᑖ ᑮᔥᐱᓐ ᑮ ᑐᒋᑳᑌᒃ, ᐁᑯᔑ ᓂ ᑳ ᒥᔮᔥᑳᑯᓐ ᐅᒪ ᒥᓂᒀᑲᓐ: ᐁᓕᐌᒃ ᒫᑲ ᓇᒪᐎᓚ ᓂᓚ ᐁ ᐃᑌᓕᑕᒫᓐ, ᒫᑲ ᐁ ᐃᑌᓕᑕᒪᓐ ᑭᓚ᙮
40ᐯᒋ ᓈᑌᐤ ᒫᑲ ᑭᔅᑭᓄᐊᒪᐙᑲᓇ, ᒥᔅᑲᐌᐤ ᒫᑲ ᐁ ᓂᐹᓕᒋ, ᐃᑌᐤ ᒫᑲ ᐱᑕᕋ, ᑖᓀᑫ, ᓇᒪ ᓈ ᑭ ᑲᔥᑭᑖᓇᐗᐤ ᑭᒋ ᐎᒋᐊᔕᐙᐱᒥᔦᒃ ᐃᔥᐱᔥ ᐯᔭᒃ ᑎᐹᔨᑲᓐ ᐱᓯᒧᑳᓂᒃ? 41ᐊᔕᐙᐱᒃ ᓀᔥᑕ ᐋᔭᒥᐋᒃ, ᐁᑳ ᑭᒋ ᐃᔅᐸᓕᔦᒃ ᑲᑴᒋᐃᐌᐎᓂᒃ: ᐊᒑᒃ ᑖᐺ ᒪᔥᑲᐌᓕᑕᒻ, ᒫᑲ ᐎᔮᔅ ᓕᓚᒥᓯᒪᑲᓐ᙮
42ᒥᓇ ᒫᑲ ᑮ ᐃᑐᑌᐤ ᐁᑯ ᓂᔡᐤ, ᑮ ᐋᔭᒥᐊᐤ ᒫᑲ, ᐁ ᐃᑗᑦ, ᐅ ᓄᑖ, ᑮᔥᐱᓐ ᐅᒪ ᒥᓂᒀᑲᓐ ᐁᑳ ᑫ ᑮ ᒥᔮᔕᑳᑯᐙᓀ ᐹᑎᒫ ᑮ ᒥᓂᑴᔮᓀ, ᐁᑯᔑ ᑭᑦ ᐃᑌᓕᑕᒧᐎᓐ ᑲᑕ ᐃᑭᓐ᙮ 43ᑮ ᐯᒋ ᐃᑐᑌᐤ ᒫᑲ, ᒥᓇ ᒫᑲ ᑮ ᒥᔅᑲᐌᐤ ᐁ ᓂᐹᓕᒋ; ᐌᓴ ᑮ ᑯᓯᑯᒪᒋᑕᐗᒃ ᐅᔅᑭᔑᑯᐙᐗ᙮
44ᑮ ᓇᑲᑌᐤ ᒫᑲ, ᒥᓇ ᒫᑲ ᐁ ᐃᑐᑌᑦ, ᑮ ᐋᔭᒥᐊᐤ ᐁᑯ ᓂᔅᑡᐤ, ᑫᔮᐸᒡ ᐁ ᐃᑗᑦ ᑳ ᐃᑗᑦ᙮ 45ᐁᑯ ᐱᐁᒋ ᓈᑖᑦ ᐅ ᑭᔅᑭᓄᐊᒪᐙᑲᓇ, ᐃᑌᐤ ᒫᑲ, ᐁᑯ ᓂᐹᒃ, ᐋᓜᔑᓄᒃ ᒫᑲ: ᒫᑎᑲ, ᐋᔕᔾ ᐯᔓᓈᑾᓐ ᐊᓂᒪ ᑎᐹᔨᑲᓐ ᐱᓯᒧᑳᓂᒃ, ᐃᓕᓕᐎᑯᓯᓵᓐ ᒫᑲ ᐙᔦᔑᐸᑭᑎᓇᐤ ᐅᒋᒋᓕᒃ ᐅᒪᒋᑣᐗ᙮ 46ᐗᓂᔥᑳᒃ, ᐁᑯ ᑭᑐᑌᑕᐤ: ᒫᑎᑲ, ᐯᔓᒡ ᐃᑖᐤ ᐊᓇ ᑳ ᐙᔦᔑᐸᑭᑎᓂᑦ᙮
ᐅᑎᓀᐗᒃ ᒋᓴᓴ
(ᒫᕐᒃ 14:43–50; ᓘᒃ 22:47–53; ᒑᓐ 18:3–12)
47ᒣᒀᒡ ᑫᔮᐸᒡ ᐁ ᐋᔭᒥᑦ ᒫᑲ, ᒫᑎᑲ, ᒎᑕᔅ, ᐯᔭᒃ ᐊᓂᑭ ᓂᔓᔖᑉ, ᑮ ᐯᒋ ᐃᑐᑌᐤ, ᐁ ᐎᒉᐙᑦ ᓈᔅᐱᒡ ᒥᔮᒪᐎᒥᒉᑎᓕᒋ ᐃᓕᓕᐗ, ᔑᒫᑲᓇ ᓀᔥᑕ ᓴᔅᑲᐅᓇ ᐁ ᐋᔮᓕᒋ, ᑳ ᐯᒋᑎᔕᐅᑯᓕᒋ ᑭᒋ ᓵᓵᑭᐎᓕᐌᐎᓕᓕᐗ ᓀᔥᑕ ᑳ ᓂᑳᓀᓕᑖᑯᓯᓕᒋ ᐃᓕᓕᐗ᙮ 48ᐊᓇ ᒫᑲ ᑳ ᐙᔦᔑᐸᑭᑎᓈᑦ ᑮ ᒥᓓᐤ ᑭᔅᑭᓄᐙᒋᒋᑲᓂᓕᐤ, ᐁ ᐃᑗᑦ, ᐊᐌᓇ ᑫ ᐅᒉᒪᐗᑫ, ᐁᐗᒀᓇ; ᒥᒋᒥᓂᒃ᙮
49ᑣᔦᒃ ᒫᑲ ᑮ ᐯᒋ ᓈᑌᐤ ᒋᓴᓴ, ᑮ ᐃᑗᐤ ᒫᑲ, ᐙᒋᔭ, ᐅᑭᒪᐤ; ᑮ ᐅᒉᒣᐤ ᒫᑲ᙮
50ᒋᓴᔅ ᒫᑲ ᑮ ᐃᑌᐤ, ᓂᑐᑌᒻ, ᑖᓀᑭ ᐌᒋ ᑕᑯᔑᓇᓐ?
ᐁᑯ ᐱᐁᒋ ᒫᑯᓈᒋᒃ ᒋᓴᓴ, ᓀᔥᑕ ᑮ ᐅᑎᓀᐗᒃ᙮ 51ᒫᑎᑲ, ᒫᑲ ᐯᔭᒃ ᐊᓂᑭ ᑳ ᐎᒉᐙᒋᒃ ᒋᓴᓴ, ᑮ ᔓᐎᓂᔅᑫᓕᐤ, ᑮ ᓛᓕᔅᑭᐱᑕᒻ ᒫᑲ ᐅ ᔑᒫᑲᓐ, ᑮ ᐅᑖᒪᐅᒣᐤ ᒫᑲ ᐅᑦ ᐊᑑᔅᑫᓛᑲᓂᒪ ᑭᒋ ᓵᓵᑭᐎᓕᐌᐎᓕᓕᐤ, ᑮ ᒪᓂᑕᐊᑳᔦᔗᐤ ᒫᑲ᙮ 52ᐁᑯ ᒋᓴᔅ ᐁᑖᑦ, ᐱᑕᐊ ᑭ ᔑᒫᑲᓐ ᐃᑕ ᑫ ᐃᔑ ᐊᔅᑌᑭᐸᓐ: ᐌᓴ ᒥᓯᐌ ᑳ ᐅᑎᓇᑭᒃ ᔑᒫᑲᓂᓕᐤ, ᑲᑕ ᐅᒋ ᓂᔑᐗᓈᑎᓯᐗᒃ ᔑᒫᑲᓂᓕᐤ᙮ 53ᓇᒪ ᓈ ᓂ ᑳ ᑮ ᓇᑐᑕᒪᐗᐤ ᓄᑖᐎ ᑭᑦ ᐃᑌᓕᑌᓇᐗᐤ, ᐁᑯ ᑣᔦᒃ ᑫ ᒥᓕᑦ ᐊᐙᓯᑌ ᐃᔥᐱᔥ ᓂᔓᔖᑉ ᓕᒐᓇ ᐁᓐᒐᓚ? 54ᒫᑲ ᑖᓐᑌ ᑫ ᐅᒋ ᑎᐱᐸᓕᒃ ᑳ ᐃᑕᔅᑌᒃ ᑭᒋ ᒪᓯᓇᐃᑫᐎᓂᒃ, ᐁᑯ ᑭᒋ ᐃᔑ ᐃᑭᑭᐸᓐ?
55ᒣᒀᒡ ᐊᓂᒪ ᑎᐹᔨᑲᓐ ᐱᓯᒧᑳᓂᒃ ᒋᓴᔅ ᑮ ᐃᑌᐤ ᒥᔮᒪᐎᒥᒉᑎᓕᒋ ᐃᓕᓕᐗ, ᑭ ᐯᒋ ᐃᑐᑖᓇᐗᐤ ᓈ ᑖᐱᔅᑯᒡ ᐁ ᓈᑌᒃ ᑭᒧᑎᔉ, ᐁ ᐋᔮᔦᒃ ᔑᒫᑲᓇ ᓀᔥᑕ ᓴᔅᑲᐅᓇ ᐁ ᐎ ᐅᑎᓂᔦᒃ? ᑭ ᑮ ᐎᑕᐱᒥᑎᓇᐗᐤ ᑕᑡᐤ ᑳᔑᑳᑭ ᐁ ᑭᔅᑭᓄᐊᒫᑫᔮᓐ ᑭᒋᐋᔭᒥᐁᐎᑲᒥᑯᒃ, ᓇᒪᐎᓚ ᒫᑲ ᑭ ᐅᒋ ᐅᑎᓂᓇᐗᐤ᙮ 56ᒫᑲ ᒥᓯᐌ ᐅᒪ ᑮ ᐃᑭᓐ ᑭᒋ ᑎᐱᐸᓕᓕᑭ ᐅᑭᔅᑭᐙᐃᑫᐗᒃ ᐅ ᑭᒋ ᒪᓯᓇᐃᑫᐎᓂᐙᐗ᙮
ᐁᑯ ᒥᓯᐌ ᑭᔅᑭᓄᐊᒪᐙᑲᓇᒃ ᓀᑲᑖᒋᒃ, ᑮ ᐅᔑᒧᐗᒃ ᒫᑲ᙮
ᒋᓴᔅ ᐅᑎᔥᑲᐤ ᑎᐹᔅᑯᓂᑫᐗ
(ᒫᕐᒃ 14:53–65; ᓘᒃ 22:54–55, 63–71; ᒑᓐ 18:13–14, 19–24)
57ᐊᓂᑭ ᒫᑲ ᑳ ᑮ ᐅᑎᑎᓈᒋᒃ ᒋᓴᓴ, ᑮ ᐃᑐᑕᐁᐗᒃ ᐃᑕ ᑳᔭᐸᔅ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐗ ᑳ ᐃᑖᓕᒋ, ᐃᑕ ᑳ ᐃᔑ ᒫᐗᒋᐃᑐᒋᒃ ᐅᒪᓯᓇᐃᑫᐗᒃ ᓀᔥᑕ ᑳ ᓂᑳᓀᓕᑖᑯᓯᒋᒃ᙮ 58ᒫᑲ ᐱᑕᕐ ᐙᓚᐤ ᑮ ᐅᒋ ᓄᔅᐱᓇᑌᐤ, ᐱᓕᔥ ᑭᒋ ᓵᓵᑭᐎᓕᐌᐎᓕᓕᐗ ᐅ ᑭᒋᐙᔅᑳᔨᑲᓂᒥᓕᒃ, ᑮ ᐱᑐᑫᐤ ᒫᑲ, ᓀᔥᑕ ᑮ ᐃᑡᐱᒣᐤ ᐊᑑᔅᑫᓛᑲᓇ ᐁ ᐎ ᐙᐸᑕᒃ ᑫ ᐃᔑ ᐳᓂᐸᓕᓕᒃ᙮ 59ᑭᒋ ᓵᓵᑭᐎᓕᐌᐎᓕᓕᐗᒃ ᒫᑲ, ᓀᔥᑕ ᑳ ᓂᑳᓀᓕᑖᑯᓯᒋᒃ, ᓀᔥᑕ ᒥᓯᐌ ᑳ ᐎᑕᐱᒥᑯᒋᒃ, ᑮ ᓈᓇᑕᐌᓕᑕᒶᒃ ᑭᒋ ᑭᓛᔅᑭ ᐃᑎᒥᒋ ᒋᓴᓴ, ᑭᒋ ᓂᐸᐋᒋᒃ; 60ᓇᒪᐎᓚ ᒫᑲ ᑮ ᒥᔅᑲᒶᒃ: ᐁᐁ, ᐋᑕ ᒥᒉᑦ ᑭᓛᔅᑭ ᐅᑎᐹᒋᒧᐗ ᐁ ᑮ ᐯᒋ ᐃᑐᑌᓕᒋ, ᐁᓕᐌᒃ ᒫᑲ ᓇᒪᐎᓚ ᑮ ᒥᔅᑲᒶᒃ᙮ ᐃᔅᒀᔮᒡ ᒫᑲ ᑮ ᐯᒋ ᐃᑐᑌᐗᒃ ᓂᔓ ᑭᓛᔅᑭ ᐅᑎᐹᒋᒧᐗᒃ, 61ᑮ ᐃᑗᐗᒃ ᒫᑲ, ᐊᐗ ᐅᒪ ᑮ ᐃᑗᐤ, ᓂ ᑲᔥᑭᑖᓐ ᑭᒋ ᓂᔑᐗᓈᒋᑖᐗᒃ ᑭᒋᒪᓂᑐ ᐅ ᑭᒋᐋᔭᒥᐁᐎᑲᒥᒃ, ᑭᒋ ᐅᔑᑖᔮᓐ ᒫᑲ ᑮ ᓂᔅᑐ ᑭᔑᑳᑭ᙮
62ᑭᒋ ᓵᓵᑭᐎᓕᐌᐎᓕᓕᐤ ᒫᑲ ᑮ ᐸᓯᑯ, ᑮ ᐃᑌᐤ ᒫᑲ, ᓇᒪ ᓈ ᐙᔦᔥ ᑭ ᓇᔥᑴᐗᔑᐃᐙᓐ? ᑫᒀᓕᐤ ᑳ ᐎᑕᑭᒃ ᐅᑯ ᑳ ᒫᒥᔑᒥᔅᑭᒃ? 63ᒫᑲ ᒋᓴᔅ ᓇᒪᐎᓚ ᐅᒋ ᑭᑐ᙮ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ ᒫᑲ ᐁ ᓇᔥᑴᐗᔑᐃᐌᑦ ᑮ ᐃᑌᐤ, ᑭ ᑭᒋᐃᑗᐃᑎᓐ ᐁ ᓇᑐᑖᔉ ᐯᒫᑎᓰᑦ ᑭᒋᒪᓂᑐ, ᑭᒋ ᐎᑕᒫᐎᔮᒃ ᑮᔥᐱᓐ ᑖᐺ ᐃᔭᐎᐗᓀ ᙭, ᑭᒋᒪᓂᑐ ᐅᑯᓯᓴ᙮
64ᒋᓴᔅ ᐃᑌᐤ, ᑭ ᑮ ᐃᑣᓐ: ᐁᓕᐌᒃ ᒫᑲ ᑭᑦ ᐃᑌᓇᐗᐤ, ᐹᑎᒫ ᑭ ᑳ ᐙᐸᒪᐤ ᐃᓕᓕᐎᑯᓯᓵᓐ ᐁ ᐊᐱᑦ ᑭᒋᓂᔅᑮᒃ ᑲᔥᑭᐅᐎᓂᒃ, ᓀᔥᑕ ᐁ ᐯᒋ ᐃᑐᑌᑦ ᑭᒋᑭᔑᑳᐎ ᐗᔅᑯᒃ᙮
65ᐁᑯ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ ᑎᐋᑐᐱᑕᒃ ᐅ ᐎᓛᒋᑲᓇ, ᐁ ᐃᑗᑦ, ᑮ ᐸᐹᔅᑖᒧ; ᑫᒀᓐ ᐌᒋ ᑫᔮᐸᒡ ᓇᑕᐌᓕᒪᑯᒃ ᐅᑎᐹᒋᒧᐗᒃ? ᒫᑎᑲ, ᐊᓄᒡ ᑭ ᑮ ᐯᑕᒸᓈᓇᐤ ᐅ ᐹᔅᑕᒧᐎᓐ᙮ 66ᑖᓐ ᐁᑌᓕᑕᒣᒃ?
ᐁ ᓇᔥᑴᐗᒋᐃᐌᒋᒃ ᒫᑲ, ᑮ ᐃᑗᐗᒃ, ᐃᑌᓕᑖᑯᓯᐤ ᑭᒋ ᓂᐱᑦ᙮
67ᐁᑯ ᓭᒀᑖᒋᒃ ᐅᑖᔅᑕᒥᑯᓕᒃ, ᐅᒋᒋᐙᐗ ᒫᑲ ᑮ ᐅᒋ ᐅᑖᒪᐌᐗᒃ; ᑯᑕᑭᔭᒃ ᒫᑲ ᑮ ᐸᐸᓯᑴᐌᐗᒃ, 68ᐁ ᐃᑗᒋᒃ, ᐸᑾᓇᐤ ᐎᑕᒫᐎᓈᓐ, ᑭᓚ ᙭, ᐊᐌᓇ ᑳ ᐸᓯᑴᐅᔉ?
ᐱᑕᕐ ᐋᑕᐌᓕᒣᐤ ᒋᓴᓴ
(ᒫᕐᒃ 14:66–72; ᓘᒃ 22:56–62; ᒑᓐ 18:15–18, 25–27)
69ᐱᑕᕐ ᒫᑲ ᐗᓚᐎᑎᒥᒃ ᑭᒋᐙᔅᑳᔨᑲᓂᒃ ᑮ ᐊᐱᐤ: ᑮ ᐯᒋ ᓈᑎᑯ ᒫᑲ ᐅᔥᑭᓂᑭᔅᑴᐗ, ᐁ ᐃᑎᑯᑦ, ᑭᓚ ᓀᔥᑕ ᑭ ᑮ ᐎᒉᐗᐤ ᒋᓴᔅ ᓈᓴᕆᑎᒃ ᑳ ᐅᒋᑦ᙮
70ᒫᑲ ᑮ ᐋᓉᑕᒻ ᒥᓯᐌ ᐁ ᑲᓇᐙᐸᒥᑯᑦ, ᐁ ᐃᑗᑦ, ᓇᒪᐎᓚ ᓂ ᑭᔅᑫᓕᑌᓐ ᑳ ᐃᑗᔭᓐ᙮ 71ᐃᔅᐱ ᒫᑲ ᑳ ᐗᓚᐐᑦ ᐱᔅᑭᒋ ᐙᔅᑳᔨᑲᓂᒃ, ᑮ ᐙᐸᒥᑯ ᑯᑕᑭᔭ ᐆᔅᑭᓂᑭᔅᑴᐗ, ᑮ ᐃᑌᓕᐗ ᒫᑲ ᐊᓂᐃ ᐁᑯᑕ ᑳ ᐃᑖᓕᒋ, ᐊᐗ ᓀᔥᑕ ᑮ ᐎᒉᐌᐤ ᒋᓴᓴ ᓈᓭᕋᑎᒃ ᑳ ᐅᒋᓕᒋ᙮
72ᒥᓇ ᒫᑲ ᑮ ᐋᓉᑕᒻ ᐁ ᑭᒋᐃᑗᑦ, ᓇᒪᐎᓚ ᓂ ᑭᔅᑫᓕᒪᐤ ᐊᓇ ᐃᓕᓕᐤ᙮
73ᓈᑫ ᒫᑲ ᑮ ᐯᒋ ᓈᑎᑯ ᐊᓂᐃ ᐊᓐᑕ ᐁ ᓂᐸᐎᓕᒋ, ᐱᑕᕐ ᒫᑲ ᑮ ᐃᑎᑯ, ᐅᒋᑕᐤ ᑭᓚ ᓀᔥᑕ ᐯᔭᒃ ᐊᓂᑭ, ᐌᓴ ᑭᑦ ᐃᔑᑭᔗᐎᓂᒃ ᑭᑦ ᐅᒋ ᓂᓯᑐᑖᑯᓯᓐ᙮
74ᐁᑯ ᒥᐋᒋ ᒪᒋᐃᑗᑦ ᓀᔥᑕ ᑭᒋᐃᑗᑦ, ᐁ ᐃᑗᑦ, ᓇᒪᐎᓚ ᓂ ᑭᔅᑫᓕᒪᐤ ᐊᓇ ᐃᓕᓕᐤ᙮
ᑣᔦᒃ ᒫᑲ ᑮ ᓄᑖᑯᓯᐤ ᓈᐯ ᐹᑲᐋᒀᓐ᙮ 75ᐱᑕᕐ ᒫᑲ ᑮ ᑭᔅᑭᓯᐤ ᑳ ᑮ ᐃᑗᓕᒋ ᒋᓴᓴ, ᐁ ᑮ ᐃᑎᑯᑦ, ᐸᒧᔑ ᓄᑖᑯᓯᑦ ᓈᐯ ᐹᑲᐋᒀᓐ, ᓂᔅᑡᐤ ᑭ ᑳ ᐋᓉᑌᓐ ᐁ ᑭᔅᑫᓕᒥᔭᓐ᙮ ᑮ ᐗᓚᐎᐤ ᒫᑲ, ᓱᑲ ᒫᑲ ᑮ ᒫᑐ᙮
Currently Selected:
ᐅᐸᓓᑭᔅ ᒫᑎᐤ 26: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
