Maréko 3
3
É nama tiàu maagé kà pwi âboro na tòotù pwicîri
Mataio 12.9–14; Luka 6.6–11
1Gée na càùé, â é wâjué côwâ naa na *wâra pitapitiri wà Iésu. É tâa wê mwara wà pwi âboro na bà ê îê. 2Â wà tàpé na rà tâa wê, âna rà côo bwàti wà Iésu pâ, pwiri é pwa ma é wâdé côwâ wà pwi âboro bèepwiri, na *tòotù pwicîri? Ba rà mudàra cè pai pwa wèe, ba na rà o mwa pitòtié.
3Â é ina wà Iésu tà pwina bà i îê pâ: «Gà me naani.»
4 # Luka 14.3 Â é ina tà tàpé na rà tâa wê pâ: «Wànau? Pwa tàrù kâjè na tòotù pwicîri, ma jè pwa na wâdé, é, ma jè pwa pwina èpà? Wâdé na jè pawâro pwi âboro, é, wâdé na jè panuâê ma é bà#3.4 Panuâê ma é bà—Grec: Tanooriê.?»
Êco na càra caa tòpi têe. 5Â é po niârirà burà putàmu wà Iésu. É pikîri, ba bwaa dau gòo pûrurà. Â é ina tà pwi âboro bèeni pâ: «Gà patàrù ê îgà.»
 é patàrù i îê, â é nye wâdé kaa.
6 # Mataio 22.15–16 Â rà còobé gée na wâra pitapitiri wà tèpa *Farasaio. Â rà nye pitùra kaa ma tèpa âboro gée na ére kà *Héroda Antipas. [Càra caa mu pitêrerà béaa, êco na] rà pimudàra naima cè pai pwa wèe ba na rà pòtàmwara Iésu.
Wâru âboro na rà medari Iésu
7Rà pâra jiirà wà Iésu ma wà tèpa *câmu kêe, dàra bàrawià Galilée. Â wâru ê pâ âboro na rà pâra wiârà—âboro me gée pâ napô Galilée, ma *Judée, 8ma Idumée. Â rà me mwara gée *Iérusaléma, ma gée na ére gée côwâ kâra nairiwâ Ioridano, ma gée na ére wâgoro jènere du ville Tyr ma Sidon. Ba rà pitêre ê jèkutâ goro ê pâ muru na é pwa wà Iésu, â nümarà na rà côoê.
9Â é ina tà tèpa câmu kêe wà Iésu pâ: «Guwà pwabwàti ê jè nari wànga, ba na o càra caa igabiao#3.9 Igabia—Être serré, pressé. Piti gée goo. ê pâ âboro bèeni.»
10 # Mataio 14.36 Ba rà gére itàa me dèe wà diri tèpa maagé, ba na rà tu naa gooé, ma rà o wâdé. Ba [rà têre pâ] é jèe pawâro ê pâ âboro na wâru. 11#Luka 4.41Â, na rà côoê ê pâ duée [na tâa goo tèpa âboro] â rà tûuboo, â rà tùu jùrurà béaa kêe, â rà tomara too pâ: «Gà *Pwina naî Pwiduée!»
12 # Mataio 12.16; Maréko 1.34 Â é tûâri tàra wà Iésu pâ: «Guwà cibwaa inapàpario!»
É pitòrigari tèpa 12 apostolo kêe
Mataio 10.1–4; Luka 6.12–16
13Gée na càùé, â wà Iésu, âna é too naa gòrojaa. Â é todà tèpa âboro na nümee goorà, â rà medarié. 14Â é mwa pitòrigari gée jaarà tèpa 12 âboro, ba na o tèpa bée {â é nama neerà pâ *apostolo}. Â é panuârà, ba na rà picémara ê *Mwaciri kà Pwiduée. 15Â é naa tàra ê tàrù ma pàtàmee, ba na rà tü târa ê pâ duée. 16#Ioane 1.42Wàilà-ni tèpa 12 apostolo:
Simona (é pitunee têe wà Iésu pâ Pétéru);
17 # Luka 9.54 Jacques, pwina naî Zébédée;
Ioane, pwi aéjii kà Jacques (é pitunee tà tupédu aéjii-bà pâ Boanergès, na pai ina wèe pâ ‘Tupédu a tòoka’)#3.17 ‘Tupédu atòoka’—Grec: Tupédu naîri tikakara. Nee bèepwiri, âna pai ina wèe pâ, ru tupédu aputàmu wài. Càcaa teeru ê tikakara.;
18André;
Filipo;
Barthélemy;
Mataio;
Toma;
Jacques, pwina naî Alphée;
Thaddée#3.18 Thaddée—Nee mwara Jude. Pwina naî Jacques. (Côo Ioane 14.22, Apostolo 1.13.);
Simona, pwi Zélote#3.18 Zélote—Grec: Cananite. Pwi âji âboro Judée na nümee na é paêgò tèpa Roma gée napô kêe.;
19Judas Iscariote, wà pwina ée mwa ipwa tûâ tà Iésu.
20É wâjué côwâ naa pwârawâ wà Iésu. Â wâru ê pâ âboro na rà pitànaima mwara naawê. Â ticè pai pwa wèe ma rà ija wà Iésu ma wà tèpa apostolo kêe. 21Â wà tèpa âboro gée na tâa kà Iésu, âna rà me nau popaé jiirà, ba rà niimiri pâ é jèe piwârau.
É tòpi tà tèpa âboro Iésu
Mataio 12.22–50; Luka 11.14–23, 8.19–21
22 # Mataio 9.34, 10.25 Pwa tèpa *dotée goro ê Naèà, na rà boo gée Iérusaléma. Â rà ina pâ: «É wâgoo wà Iésu wà Caatana#3.22 Caatana—Grec: Béelzébul. Côo mwara Caatana naa na Neeremuru (Vocabulaire) naa pwâadàra tii., pwi caa kà tèpa duée. Ba wàé kaa, na é naa têe ê pàtàmee, ba na é tü târa ê pâ duée.»
23Â é todàra wà Iésu, â é tawèerirà pâ: «Gona é wànau târa cè pai pitü têe côwâ wà Caatana?»
 é ina tàra ê pâ ucina bèeni: 24«Wiàna é pipaa dèe côwâ ê jè mwaciri, â o pwacoé ma é cimwü. 25 wiàna é picicaraé côwâ ê caapwi tâa, â o càcaa cimwü. 26 wiàna é pipaa dèe côwâ wà Caatana, é, wiàna câé caa pitêre dèe côwâ, â o jèe nye càcaa gòiri pâ ê pàtàmee.  jèe nye êkaa ê pai pitubatiàué. 27 wiàna nümajè na jè too gòro gòori naa na ê wâ kà pwi jè âboro na é gòo, ma jè popa ê pâ neemuruê, â wâdé na jè mara piié.  géewê, â jè mwa bàra pa ê pâ neemuruê na tâa na wâ kêe.
Popai na èpà na o càcaa pwanauri
28 # Luka 12.10 «Guwà têre bwàti, ba go ina tàwà ê âjupâra pâ: O pâri ma pwanauri pwi âboro na é pwa na èpà, â wâpà, wiàna é piècaari Pwiduée. 29Êco na wà pwina é tùra ba èpà naa goo ê Nyuâaê Pwicîri, âna o càcaa pwanauri. Ba o jèe nye tà tâa dàra gòiri awé.»
30É ina pwiri wà Iésu, ba kà tèpa dotée goro ê Naèà. Ba rà ina pâ pwa duée gooé.
Âji tâa kà Iésu
31 # Maréko 6.3; Ioane 2.12; Apostolo 1.14 Gée na càùé, â rà tèepaa me wà nyaa kà Iésu, ma wà tèpa jiié. Â rà tâa boo naa pé gòroigé. Â rà panuâ dò pwi jè âboro naa na i wâ, ba na é todèe.
32Wâru ê pâ âboro na rà tâbèepi Iésu, [naa na i wâ] â rà ina pâ: «Gà côo, rà wâboo gòroigé wà nyaa'gà ma wà tèpa aéjii'gà. Â rà mudàgà.»
33Â é tòpi tàra pâ: «Wàilàapà nyaa kôo? Ma wàilàapà cè tèpa aéjii kôo?»
34Â é po niâri tèpa âboro na rà gére tâbèepié, â é ina tàra pâ: «Guwà côo, wàilà-ni wà nyaa kôo, ma wà tèpa aéjii kôo. 35Ba wà pwina é pwa ê câbawâdé kà Pwiduée, âna wàé kaa pwiri, ê pwi aéjii kôo, ma tô naigé kôo, ma nyaa kôo.»
Currently Selected:
Maréko 3: pri
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
