Gén 4
4
Ri Caín y ri Abel
1Ri Adán xk'oje' k'a rik'in ri Eva ri rixjayil, y ri Eva xk'oje' k'a jun ti ral ri xubini'aj Caín,*f5* kere' ri bi'aj xuya' chire ri ak'ual roma xubij k'a: Rik'in ri ruto'onik ri Jehová xink'ul jun ti wal ala', xcha'. 2Chirij re ak'ual re' xk'oje' chik jun ti ral y xubini'aj Abel y ri rusamaj ri xuben ja ri xerutik karne'l, y ri rusamaj ri Caín ja ri xusamajij ri ulew y xok jun tikonel.
3Y q'axineq chik k'a k'iy juna', ri Caín xuk'en-pe juba' chire ri ruwech ri rutiko'n richin jun sipanik chire ri Jehová. 4Y keri' chuqa' xuben ri Abel, xuk'en-pe jun sipanik: Xuk'en-pe kiq'anal jujun chike ri awej ri e rutikon, ri e nabey taq al. Y ri Jehová xqa' chuwech ri Abel y kan janila xuk'awomaj ri rusipanik. 5Jak'a ri Jehová man xqa' ta chuwech ri Caín y man xuk'awomaj ta ri rusipanik. Y ri Caín kan janila k'a xpe royowal y kan xjalatej-qa ri ruwech. 6K'ari' ri Jehová xubij chire ri Caín: ¿Achike roma janila xpe awoyowal y kan xjalatej la awech? 7Roma toq ja ri utz ri naben, nak'ul ri aq'ij; ja wi xa ja ri itzel ri naben, ri mak kan at ruq'eleben k'a y nrajo' yaruchop. Jak'a rat k'o chi yach'akon chirij, xcha'.
Ri rukamik ri Abel
8Y xapon k'a jun q'ij ri Caín xubij chire ri Abel ri ruchaq': Jo' pa juyu', xcha' chire. Y toq ek'o chik chiri' pa juyu', ri Caín xyakatej chirij ri rach'alal y xukamisaj.
9Y ri Jehová xubij chire ri Caín: ¿Akuchi k'o-wi ri achaq' Abel?, xcha'.
Y rija' xubij: Man wetaman ta. ¿Yin kami in chajiy richin ri nuchaq'?, xcha'.
10Y ri Jehová xubij chire: ¿Achike xaben? Roma ri rukik'el ri achaq' ri xbiyin chuwech re ruwach'ulew, achi'el xa ta nich'on-pe wik'in richin nuk'utuj rutojbalil pan awi'. 11Wakami k'a xtinben chawe chi kan xtiqaqa ri itzel pan awi', roma xaben chire ri ruwach'ulew chi xuk'ul ri rukik'el ri achaq' ri xakamisaj. Y man jun bey chik xtasamajij ri ulew. 12Roma wi xtasamajij chik ri ulew, xa kan man xtik'ase' ta chik ri atiko'n y kan xaxe k'a xkabe-kela' xkabe-kela' xtaben pa ruwi' re ruwach'ulew y kan man jun k'a akuchi xkak'oje-wi-qa, xcha'.
13K'ari' ri Caín xubij chire ri Jehová: Kan janila nim ri rutojbalil-mak ri naya' pa nuwi' richin chi yitikir ta ninkoch'. 14Wakami xa nawelesaj ri uchuq'a' pa nuq'a' pa ruwi' ri ulew y yin k'o chi ninwewaj-el-wi' chawech y akuchi na xkibe-wi pa ruwi' ri ruwach'ulew, y xabachike k'a xkik'ulun xkirukamisaj kan, xcha'.
15Y ri Jehová xubij chire: Kan qitzij ninbij chawe: Wi k'o ta jun ri achike xkakamisan kan, kan wuqu' k'a mul xtinya' rutojbalil pa ruwi', xcha'.
K'ari' ri Jehová xuya' jun retal ri Caín richin chi achike xtik'ulun man nukamisaj ta kan. 16Xel k'a el ri Caín rachibilan ri rixjayil chiri' chuwech ri Jehová y ja ri pa taq ruwach'ulew rubini'an Nod*f6* xebek'oje-wi, y ri ruwach'ulew ri' k'o pa relebel-q'ij chire ri qejoj ri kan nik'ases.
Ri e rijatzul kan ri Caín
17Y ri Caín xk'oje' rik'in ri rixjayil, y re ixoq re' xyawej kan y xk'oje' jun ti ral y re ak'ual re' xubini'aj Henoc. Y ri Caín xuyek-q'anej jun tinamit ri xubini'aj chuqa' Henoc, achi'el rubi' ri ruk'ajol. 18Y ri Henoc xralk'ualaj ri Irad y ri Irad xralk'ualaj ri Mehujael, ri Mehujael xralk'ualaj ri Metusael, ri Metusael xralk'ualaj ri Lámec. 19Y ri Lámec xerukanoj e ka'i' rixjayil, ri jun rubini'an Adá, y ri jun chik rubini'an Silá. 20Ri Adá xalex jun ti ral ri xubini'aj Jabal, y rija' jari' ri kitata' ri ojer taq winaqi' ri xek'oje' pa taq jay banon rik'in tzieq roma nikikanoj q'os richin ri kawej. 21Y ri Jabal xk'oje' chik k'a jun ruchaq' ri xubini'aj Jubal. Y rija' jari' ri kitata' ri ojer taq winaqi' ri yeq'ojoman ri arpa y ri xul. 22Y ri Silá xek'oje' chuqa' e ka'i' ral, jun xten y jun ala' y ri xten xubini'aj Naamá y ri ruxibal xubini'aj Tubal-Caín y ri rusamaj ja ri banoy samajibel rik'in ri ch'ich' y ri q'enq'oj-pueq.
23Y ri Lámec xch'on k'a kik'in ri rixjayil y xubij chike:
Adá y Silá, tiwak'axaj k'a re xtinbenbij chiwe:
Yin xinchoy jun wineq roma xirusok,
kan xinkamisaj k'a kan re ala' re' roma xiruch'ey.
24Wi wuqu' mul xtiya'ox rutojbalil roma ri Caín,
Yin ninbij chi oxk'al wuqlajuj mul xtiya'ox rutojbalil woma yin, xcha'.
Ri ralaxik ri Set
25Y ri Adán xk'oje' k'a rik'in ri Eva. Keri' ri Eva xyawej chik chirij jun ak'ual. Y xk'oje' chik k'a jun ti ral ti ala' y re' xubini'aj Set. Y xubij: Kere' xtubini'aj roma ri Dios xuya' chik pe jun wal pa ruk'exel ri Abel ri xkamisex roma ri Caín.
26Y ri Set chuqa' xek'oje' ralk'ual, y jun chike rije' xubini'aj Enós. Y jari' toq rije' xkichop nikiya' ruq'ij ri Jehová.
Currently Selected:
Gén 4: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
