Gn 21
21
Yaljubal Isaac
1Axca max yun yalon Jehová Dios bay xal Sara, tol ok jay jun is yune', cayton tu' max yun yion el ba tzet max yal Cham. 2Yuj tu' max oc xal yobixal, max jay jun is yune' yet caw ichamxa Abraham tu'. Max alji nak unin tu' axca wal is tiempoal albilcan yuj Dios. 3Isaac max yik nak unin tu' yuj Abraham. 4Yet yukubixial wal yalji nak unin tu', cax max ak'lay circuncidar yuj Abraham axca chekbanilej albil yuj Dios. 5100 abilxa is k'inal Abraham yet max alji Isaac. 6Max naon ba c'ul xal Sara, max yaloni: Max quin yak' tzewok co Mam Dios; masanil eb chi aben tol ayxa wune', ok tzewok eb wetok, ẍi xal. 7Max yalon pax xal: Tok ay eb anima max alon bay Abraham, tatol okto wak' txutxwok unin, palta xin, maxto wil unin, max jay jun is c'ajol Abraham wetok, caxc'al yel ichamxa, ẍi xal Sara.
Max uktelay el ix Agar yetok Ismael
8Axa yet max el nak Isaac yin im, max chaon cham Abraham jun miman k'in. 9Axa max yilon xal Sara tol a nak is c'ajol Abraham bay ix Agar, ix aj Egipto, tol chi buchwaj yin nak Isaac. 10Yuj tu' max ak'wi c'ulej xal Sara bay cham Abraham, max yaloni: Tokokab ix mosejal yayji ti' yetok is yune' tu', yujtol man ok je' yion nak yune' ix ti' is satak yetok nak wune' Isaac ti', ẍi xal Sara tu'.
11A wal jun k'anej tu' caw wal ya' max yab cham Abraham tu', yujtol is c'ajol c'apax cham nak Ismael tu'. 12Axa Dios max alon bay cham: Manchak tac a c'ul yuj nak unin ti', c'al yuj ix a chekbej ti'. Ikej masanil tzet chi yal Sara tu', yujtol a yin nak Isaac, a tu' ok beyc'altok enatil, axca max yun walon ayach. 13A pax nak yune' ix mosejal tu xin, ayin ok in watx'nej jun miman nación yin is yinatil nak yujtol a c'ajol nak, ẍi Dios.
14Puch k'inibalil yet junxa c'ual max yak' cham Abraham lobej, c'al jun tz'um nojnak yuj aej bay ix Agar. Max yak'on yiktok ix, cax max yak'on c'apax nak unin yul k'ab ix. Max toj ix xin yin tol man txequelok bay chi ca toji bay tz'inan tx'otx' yul yet Beerseba. 15Axa yet max lajwi a' aej ay yul no tz'um tu xin, cax max bekoncan ix nak unin bay yich jun te yaliẍ te'. 16Najatta max toj ay chotan ix, yet watx' c'am chi yil ix camil nak unin tu' yaloni; axa yet max ay chotan ix, max ok'aj ix.*fn*
17Max yab Dios yok' c'apax aj nak unin tu'; atac'al bay satcan max k'anjab aytek cham yángel Dios bay ix Agar tu', max yaloni: ¿Tzet chach on Agar? C'am chach xiwi, a Dios mayal yab yaj yaw nak unin bay max ak'can tu'. 18Asi', il nak unin tu', cheon aj wan nak, cax cha mimanc'ulneni, yujtol ayin ok in watx'nej jun miman nación yin nak, ẍi Cham, ẍi jun ángel tu'.
19Axa Dios max tx'oxon jun aej bay Agar, cax max toj ix, max yak'on noj ix no' tz'um yuj aej, cax max yak'on yuc' nak Ismael tu'. 20-21A Dios max colwajc'al yetok nak unin tu', cax max ch'ibc'al aj nak. Max ayjic'al ec' nak bay tz'inan tx'otx' bay yul yet Parán; julom no' max elocok. Axa max yun xin, max mojay nak yetok jun ix aj Egipto yuj is txutx.
Is trato Abraham yetok Abimelec
22A yet cajan ec' Abraham yul yet Néguev, max betic' Abimelec k'anjab yetok, cax ajun Ficol yetok, sat yajaw yayji xol eb soldado. Axa Abimelec max alon bay cham Abraham axca ti':
—Chi jila' tol a Dios ayc'al oc etok yin masanil tzet chonej. 23Yuj wal tu', ak' a ti' ayin satak Dios, tol c'am chon etnej bay jun lugar ti', tamwal eb in c'ajol, tamwal eb winatil; cax chak'on a ti' ayin, tol watx'c'al ok ot a c'ul win. Axca max ach wutej, cac'al tu' ok ot pax a c'ul yin masanil eb anima bay jun conob bay cajan ach ec' ti' tinani', ẍi Abimelec.
24—Chi wak' in ti' ayach, ẍi cham.
25Axa yalontek cham bay Abimelec yuj jun a' uc'bala', tol a eb is chekbej Abimelec tu' max ion ec' a'. 26Max yalon Abimelec:
—A wal caw wal man wojtakok tzet yayji jun k'anej ti', yujtol ach c'am chal ayin, man wojtakok mactxel max uten jun tu', ẍi.
27Catatu' max yiontek cham Abraham calnel c'al wacax, cax max yak'on bay Abimelec. A yet jun c'ual tu', max watx'nej eb cawanil jun is trato. 28Axa cham Abraham max pojon el ukc'on no k'opoj calnel xol is calnel tu'. 29Yuj tu xin max k'anlej Abimelec:
—¿Tzet yuj xan cha pojil ukc'on no calnel tu'? ẍi.
30Axa yalon cham axca ti':
—Cha' no ukc'on calnel ti' ayin, yin tx'oxon elok tol yel ayin max in watx'nej jun a' uc'bala' ti', ẍi cham.
31Yuj wal tu' xan max yikcan jun lugar tu' Beerseba,*fn* yujtol a bay tu' max yak' eb is ti' bay junjun.
32Junelnej max watx'nej can eb is trato tu', cax max meltzoj Abimelec yetok Ficol bay is conobal eb nak filisteo, yujtol filisteo eb. 33A bay Beerseba tu', a tu' max yaw cham Abraham jun te te' chi yik tamarisco. A bay tu' max oc cham yin ayilal bay Jehová, Cham Dios tol ayc'al ec' yin tojbalk'inal. 34Najatil max ayji cham Abraham bay is tx'otx'al eb nak filisteo tu'.
Currently Selected:
Gn 21: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
