Gn 24
24
Max saylay yetbi Isaac
1Caw wal icham winakxa cham Abraham, axa Jehová max yak' yaxilal bay yin masanil is tzet yetal. 2A yet jun c'ual max yawtej cham jun is sat chekbej, cham ayoc yilomalok masanil is tzet yetal, max yalon bay:
—Aoc a k'ab yalan in xub ti', 3cax chak'on a ti' satak Cham Jehová, Diosal satcan c'al tx'otx' tx'otx', tol man ok a say yetbi in c'ajol xol eb aj Canaán, bay cajan on ec' ti'; 4palta chach toj bay in conobal, chi toj e' junok yetbi nak in c'ajol bay xol eb ayto wuj in ba yetok, ẍi cham Abraham tu'.
5Max tak'wi is chekbej tu':
—Palta ta c'am chi jetek ba ix wetok: ¿Tzet chi wun paxok? ¿Yowalil mi chi witok nak a c'ajol ti' bay titnak ach tu'? ẍi is chekbej tu' bay.
6Max tak'wi cham Abraham:
—C'amak, e talaj tok nak in c'ajol bay tu'. 7A Jehová, is Diosal satcan, max in ion eltek bay yatut in mam c'al bay in conob bay ec'nak in, cax max yak'on is ti' yak'on jun tx'otx' ti' bay winatil. Ac'ala' Cham ok chek is yángel etok, yet watx' cheontek yetbi nak in c'ajol bay tu'. 8Palta ta a ix ix tu' c'am chi yal c'ul chi tit etok xin, bekan ach yin jun k'anej ti'; palta xin, c'am chi je' eontok nak in c'ajol bay tu', ẍi cham Abraham.
9Lajwi tu xin, max yaon octok jun chekbej tu' is k'ab yalan is xub cham Abraham tu', max yak'on is ti', tol chi yikej masanil tzet max yal is patrón tu' bay. 10Max lajwi tu xin, max sic'on el sabalej xol masanil is tzet yetal is patrón tu', wal juntzan tzet yetal tol watx', max yiontek lajonc'on no camello yet chi yaon oc sabalej tu' yiban no', cax chi toj bay is conobalben camom Nacor bay yul yet Mesopotamia.
11Axa yet max apni oc cham chekbej tu' bay tiel conob tu', yet numumixa yayi, max xew cham yetok no camello bay is ti' jun a' uc'bala' bay tu'. A yet jun hora tu' chi elcantok eb ix ix ioj aej. 12Yak'ban tu' max c'oli txajli cham bay Dios: Mamin Jehová, ach co Diosal yetok Abraham in patrón, chin k'an ayach tol watx'okab chi eloc jun in viaje ti', cax cha tx'oxon a watx'c'ulal bay in patrón tu'. 13Ti chin cancan ti a' uc'bala' ti', yak'ban chi jay eb ix k'opoj aj conob ti' ul ioj aej. 14Elok yin a c'ul tol a' ix k'opoj ok ul yiajtek ya', ok wal bay ix: Yuj wal dios ayach, iaytek a moc cax chak'on wuc' jabok aej ay yul a moc tu', quin chiokab bay ix, cax ok yalon ix: Uc' a', cax chi wak'on c'apax yuc'a' no' a camello ti', ẍiokab ix, aokab ix tu' cha siq'uilok yet chi oc yetbiok nak a chekbej Isaac. Axca tu' ok yun nachaj el wuj tol caw wal watx' a c'ul yin in patrón, ẍi cham chekbej tu'.
15C'amtoc'al chi lajwi txajli cham, cax max yiloni chi jayoc jun ix k'opoj, ayajtok is moc jolom is xic', a ton ix Rebeca is cutz'in Betuel. A Betuel tu', a ton is c'ajol Nacor yetok xal Milca; yuẍtak cham Abraham Nacor tu'. 16A ix Rebeca tu' caw wal watx' yili ix, cax k'opoj wali, tol c'amto winak chi k'umej. Max aytok bay a' uc'bala' tu' yet chi yion ajtek ya', max yak'on noj is moc, axa toj tu'. 17Axa toj lemnaj cham chekbej tu' yintak ix, max yalon cham bay axca ti':
—Yuj wal dios ayach, ak' wuc' jabok a' aej yul a moc tu', ẍi cham bay.
18—Uc' a' mamin, ẍi ix.
Yin aymanil max yaay ix is moc, max yak'on ix a' yuq'uej. 19Yet max lajwi yuq'uen cham chekbej tu' a' xin, max yalon Rebeca tu':
—Chi wi' c'apax ajtek yuc'a' no' a camello ti' atac'ala' jantak chi yochej no', ẍi ix.
20Jun bek max secay ix aej yul jucub bay chi yuc'c'alta' a' no no', xiwil el max yak' ix yion ajtek a' masantac'al max yuc'a' no' masanil. 21A pax cham chekbej tu xin, toc'al tucan oc cham yin ix. C'amc'al tzet max yal cham bay, asan tol chi na yin yojtaknen elok tzet lanan yunen Jehová yet watx' chi eloc jun is viaje tu'. 22Axa yet max xew yuq'uena' no camello tu xin, max yion ajtek cham jun ch'en oro axca yutxiquinej nan siclo*fn* is yalil, max yaon oc cham yin is txam ix, cax max yak'on c'apax cab ch'en brazalete naba oro, tol ec'ban 10 siclo is yalil. 23Max yaloni:
—Yuj wal dios ayach, al ayin mac ayach yet, talaj c'uxan colan chon can way bay yatut a mam tu' yet jun ak'bal ti', ẍi cham bay ix.
24Max yalon ix:
—Is cutz'in in Betuel, is c'ajol Nacor yetok xal Milca. 25A bay co na colan chex wayi. Ay c'apax ac'un bay watx' chi low no camello ti', ẍi ix.
26Maxc'al yab cham chekbej tu', max ay jajanok, max txajli bay Jehová, max yalon yuj diosalil. 27Max yaloni: Al-layokab watx' k'anej bay Jehová, co Diosal yetok Abraham in patrón. Caw wal ayc'al oc yetok, cax ayc'al is watx'c'ulalil yin, cax chin yikban pax bay yulak be ti' masantac'al bay xol eb yican in patrón tu', ẍi cham.
28Axa ix Rebeca max toj lemnaj bay yatut is txutx, yet chi yal masanil tzet max yal cham chekbej tu' bay. 29Ay jun is nuej ix chi yik Labán, ayman max toj lemnaj Labán tu' bay a' uc'bala' tu' yet chi toj ilay jun cham winak tu' yuj, 30yujtol max yil oc ch'en axca yutxiquinej c'al ch'en brazalete ayoc yin is k'ab is yanab tu'. Cax max yaben c'apax tzet max yut yalon ix tzet max yal cham winak tu', xan max toj Labán bay ayic' cham chekbej Abraham tu'. 31Max yalon bay:
—Ton wetok bay in na mamin, tol watx' ayach yuj Jehová. C'am chi je' a cancan cayti'. Mayal in watx'nej bay ok ach wayok, ay c'apax bay watx' ok low no' a camello ti', ẍi Labán.
32Catatu' bian, max toj cham chekbej tu' bay na. Axa Labán max colwaj yion el yikatz no camello tu'. Max yak'on nak lobej no'. Yinxac'al aymanil max yitek nak aej yet chi tx'aj cham chekbej tu' yakan yetok eb nak ajun yetok cham.
33Axa yet max eltek lobej eb xin, max yalon cham chekbej tu':
—Ayin ti' majto in lowok; tol yowalil ok walcan in chekbanil tzet ibil oc wuj, ẍi cham.
—K'anjaban xin, mamin, ẍi Labán.
34Max yalon cham chekbej tu':
—Ayin ti' is chekbej in cham Abraham. 35Max yak' Jehová watx'c'ulalil yiban in patrón tu', caw wal beyom wal sic'libil. Ay is calnel, ay is wacax, ay is camello, ay is burro, caw wal ay oro c'al plata bay, ay c'apax eb nak is chekbej c'al eb ix is chekbej. 36Ac'ala' c'apaxok, a xal Sara yetbi cham in patrón tu', yinxa wal ixnamil, max jay jun yune'. Axa masanil tzet ay in patrón tu', yetc'al oc nak c'ajolej tu'. 37A in patrón tu' max yala' tol chi wak' in ti' bay wiken is chekbanil, cax max yaloni: Maj je' tol ok mojay nak in c'ajol ti' cayti' yetok junok eb ix ix aj Canaán bay cajan in ec' ti'. 38Yuj tu xin, chi toj e' yetbi nak in c'ajol tu' bay xol eb ayto wuj in ba yetok. A tu' chach toji, ẍi cham ayin. 39Max walon bay in patrón tu': A ix ix chi toj wi' tu', ta c'am chi jetek ba ix cayti', quin chi. 40Max tak'wi cham ayin: Ayin ti' yikemc'al chi wut in ba bay Jehová. A Cham ok chektok yángel etok, yet watx'c'al ok yun yel oc jun a viaje tu', cax cheontek junok yetbi nak in c'ajol xol eb ayto wuj in ba yetok. 41Asan ta a eb tu' c'am chi ak'on ix k'opoj tu' ayach xin, bekan ach yin bay chak' a ti' ayin ti', ẍi in patrón Abraham tu' ayin.
42Axca tu xin, max in jay bay ti a' uc'bala' tu' tinani', cax max walon yin txajil axca ti': Ach Jehová co Diosal yetok in patrón Abraham, ta yel ayach oc wetok, cax watx' ok yun yel oc jun in viaje ti', 43chin tewi ayach tinani xin, yak'ban ayin ec' bay ti' a' uc'bala' ti', axa ok yunej, tol a' ix k'opoj ok jay ul ioj aej, ayin ok wal bay ix: Yuj wal dios ayach, ak' wuc' jabok a' aej yul a moc tu', quin chiokab bay. 44Axa yalon ix tu': Uc'a', chi wi' c'apax ajtek yuc'a' no' a camello ti', ẍiokab ix. A ton wal ix tu' max a siq'uil yet chi oc yetbiok nak is c'ajol cham in patrón, quin chi yin in txaj tu'. 45Ayto wal lajwi in txaj tu' yin tz'inanil, cax max wiloni, max jayoc ix Rebeca, max aytok ix bay uc'bala' ayajtok is moc ix jolom xic', max walon bay ix: Yuj wal dios ayach, ak' wuc' jabok a' aej tu', quin chi bay ix. 46Yin aymanil max yiaytek ix is moc, max yalon ix: Uc'a' mamin, yetok c'apaxok chi wak' yuc'a' no a camello ti', ẍi ix. Axca tu xin max yak' ix aej wuq'uej, cax max yak'on c'apax yuc'a' no camello. 47Cax max in k'anlen bay ix: ¿Mac ayach cutz'in? quin chi bay ix. Max yalon ix ayin: Is cutz'in in cham Betuel, is c'ajol cham Nacor yetok xal Milca, ẍi ix. Cax max waon oc jun ch'en axca yutxiquinej yin is txam ix, cax max waon c'apax oc junjun ch'en brazalete yin junjun is k'ab ix. 48Lajwi tu' max in ay jajanok max walon in watx' k'anej yin txajil bay Jehová Dios, tol a' max occ'al wetok yet max in titc'al yulak be. Watx'c'al max yun in tita, yet chi ul wi' yetbi is c'ajol in patrón bay e xol ayex yican ex cham ti'. 49A tinani xin, k'anjabanek. ¿Watx' mi ok e yut e c'ul yin in patrón tu'? Ta c'amak xin, alek c'apaxok, yet watx' chi je' nachaj el wuj tzet chi wunej, ẍi cham chekbej tu'.
50Lajwi tu' max yalon Labán yetok Betuel:
—Masanil juntzan ti' max tit bay Jehová, ayon ti' c'amxa tzet watx' jalon ayach. 51Ilabi, tix ix ti', itok ix, tokokab ix yetbiok is c'ajol a patrón tu', axca wal max yun nabalnen el Jehová, ẍi eb.
52Axa yet max yaben cham chekbej tu xin, max ay jajan satak Jehová yuj yalon yuj diosalil. 53Yin aymanil max yiajtek xiwil sabalej oro, c'al plata, c'al pichilej, max yak'on bay Rebeca c'al bay is nuej ix c'al bay is txutx ix. 54Catatu' max low yetok eb ajun yetok, cax max can eb yet jun ak'bal tu'. Axa yet max k'inibi aj yet junxa c'ual xin, max aj wan cham chekbej tu', max yaloni:
—A tinani' xin, chekektok ix wetok bay in patrón, ẍi cham.
55Max tak'wi nak is nuej ix, c'al is txutx ix, max yalon eb:
—Canokab ix lajonebokxa c'ual jetok, catatu' ok tok ix etok, ẍi eb bay.
56Axa tak'wi cham chekbej tu':
—Manchakxa quin e mitx' waayok. A Jehová max occ'al wetok, yuj tu' xan watx' max yun yel oc jun in viaje ti'. Chaek in pax bay yatut in patrón tu', ẍi cham.
57Cax max yalon eb xin:
—Awtelayokab ix k'opoj tu xin, ok jabej tzet ẍi ix, ẍi eb.
58Max awtelay Rebeca tu', max k'anlen el eb bay:
—¿Chi mi cha a c'ul chach toj yetok jun cham winak ti'? ẍi eb.
—Ja' chin toji, ẍi ix.
59Catatu' bian max bekontok eb ix Rebeca yetok jun ix ix chi ilon ch'ib ix, c'al cham chekbej tu' yetok eb nak ajun yetok cham. 60Cax max yalon eb watx' k'anej bay Rebeca axca ti':
Yak'okab Jehová Dios yaxilal eban, ok ach oc is txutxok yinxa millonal anima. A jantak one' ok elok, a' ok ak'on ayc'ay eb conob ajc'ul yin, ẍi eb bay.
61Lajwi tu xin, max ajtok Rebeca yetok eb ix is chekbej yiban no camello, max tzakloj eb yintak cham is chekbej cham Abraham. Cayton tu' max yun yiontok cham chekbej tu' ix Rebeca, cax max toji.
62Axa Isaac xin, maxax meltzojtek bay a' uc'bala' chi yik, Cham iquis chin iloni. A tu' ay yatut yul yet Néguev. 63Axa yet numumixa yayi, c'uxanc'al ayiltek ec'jabok, axa max yiloni tol ay juntzan no camello chi tita. 64-65Ac'ala' c'apax Rebeca max toj t'ananok, max yilontok yin nak Isaac. Max k'anlej ix bay cham chekbej tu':
—¿Mactxel jun winak chi tit co satak tu'? ẍi ix.
Axa yalon cham chekbej tu':
—A ton nak in patrón tu', ẍi. Axca tu' max yion aytek ix is k'oxil yin sat, cax ayman max aytek yiban no camello tu'.
66Axa cham chekbej max alon bay Isaac masanil tzet max yun yelapnok is viaje. 67Max yiontok Isaac tu' ix Rebeca bay is mantiado xal Sara is camom txutx, cax max nupay yetok ix, caw wal chi camc'ulnelay ix Rebeca tu' yuj Isaac. Caytu' max yun yec'tok is cusc'ulal nak yuj is camichal is txutx.
Currently Selected:
Gn 24: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
