Ɛsedɔ 18
18
Zɛtulo è Mose naa kàa
1Midiaŋ sala láa-soŋ-nuu kɛ́tɛi Zɛtulo, nyii kɛ̀ a Mose mɔ̂lɔi, è mɛni-ŋai kélee mɛ̀ni Ɣâla è gɛ̀ Mose mì da ŋɔnûai Eezuɛ-ŋai, da berei Yâwɛɛ è Eezuɛ-ŋai kùla la Ize lɔii sui. 2Mose mɔ̂lɔ Zɛtulo è pà a Zipôla nyii Mose è nɛ̀ɛ bɔ̂taai. 3Zɛtulo è pà máŋ a Mose ǹônii-sinaa feerɛi Gêsɔŋ da Ileyîisɛ. (Mose è mò ǹyɛɛ, “Ŋá kɛ̀ a ŋɔ̃́ya ŋɔ̃́ya lɔii su.”) M̀ɛni ma è ǹóŋ dɔnɔ láa sèe a Gêsɔŋ. 4È mò ŋɔ́nɔ ǹyɛɛ, “Ńâŋ Ŋɔɣâlai ƃé kɛ̀ a kpɔŋ mâ é ŋ́gula gâloŋ ŋɔƃóa sɔkpɔi ŋá.” M̀ɛni ƃé è ǹóŋ gbéli láa sèe là a Ileyîisɛ. 5Mose mɔ̂lɔ Zɛtulo è pà a Mose ŋɔnɛnîi da ǹônii-sinaai ƃɔ́ vɛ̃ɛ-kpâlaŋ su, ƃɛ́i è ŋɔƃûui pù naa Ɣâla ŋɔyéei mai. 6Tãi Mose è mɛ̀ni la a gɛɛ m̀ɔ̂lɔ Zɛtulo káa pâi a ŋɔnɛnîi da ǹônii-sinaa feerɛi, 7é mu sìɣe é lí m̀ɔ̂lɔ túɛ tɔɔ̂i. È pɛ̀lɛ gɔ́ɔ mu é ǹá-gbɔ see ma. Dí díkîe-ni marê kɛ̀ díkɔlɔ̂i pono mɛni ma dí lí pôlu dí lɔ́ ŋɔsua kɔlɔ-seɣe pɛrɛi mu. 8Nya ƃe Mose è mɛni-ŋai kélee ƃò m̀ɔ̂lɔ ma nyii Yâwɛɛ è gɛ̀ a Ize Kâloŋ, Eezuɛ-ŋai mɛni mai. È mɛni-soli-ŋai kélee mɛni ƃò mà nyii-ŋai kùla dîa berei su, da berei Yâwɛɛ è díŋuŋ ma ƃò la Ize-ŋai yêei. 9Zɛtulo líi è nɛ̃ɛ mɛni-ŋai kélee mɛni ma Yâwɛɛ è gɛ̀ Eezuɛ-ŋai mɛni ma díŋuŋ ma ƃo mɛni ma Ize-ŋai yêei. 10Nya ƃe Zɛtulo è mò ǹyɛɛi, “Laa-maa-tɛ é tɛ́ɛ Yâwɛɛ pɔ́ nyii kákùla Ize-ŋai yêei da Gâloŋ. 11Ŋa nâa gɔ́lɔŋ a gɛɛ Yâwɛɛ kɛ̂tɛi é tɛ́ɛ ŋ̀âla-ŋai kélee ǹûai da kɛ̀ vɛlii dîa. Kpɛ́ni fêi, a ǹûai kula Ize-ŋai yée mu, nyii-ŋai dí díŋɛi nàŋiŋ dímɛi.” 12Nya ƃe Zɛtulo è kéreŋ sala da sâla da kpɛ́ni-ŋa kùla Ɣâla ma. Eelɔŋ da Eezuɛ núu pɔlɔ-ŋai kélee dí pà a gɛɛ da dîani dí dílaa mii gîe ma Ɣâla ŋɛ́i-tuɛ.
Dí mɛni ŋá-tee-ƃela sèe
(Dutɛrɔnome 1:9-18)
13Bôlu ma ɣele-walai Mose è nâa sèe a gɛɛ é ǹûai dímɛni-sâa ŋai ƃó. Ǹûai dí lɛ̀ɛ tɔɔni ŋ̀ɛi-túɛ é síɣe ɣele wâla ma é tóo ɣele-wuli ma. 14Tãi Mose m̀ɔ̂lɔ è mɛni-ŋai ŋí kélee kàa la Mose è kɛ̀ gɛ̂i ǹûai mɛni mai, è mò m̀a ǹyɛɛi, “Lé ƃé ŋí íkaa gɛ̂i ǹûai mɛni mai? Lé mɛni ƃé íkaa seeni la ƃɛ́ ya tɔnɔ, ǹûai dí lɛ́ɛ tɔɔ̂ni íŋɛi-túɛ é síɣe ɣele-wala ma é tóo ŋ̀ele-wulii mai?”
15Nya ƃe Mose è m̀ɔ̂lɔ wóo su tòo ǹyɛɛi, “Kpɛ́ni fêi, ǹûai da pâi ḿbɔ a gɛɛ dí m̀ɛnii kɔ́lɔŋ Ɣâla a ŋ̀wɛ̂lii. 16À kɛ̀ laa-saa à tòo núu feerɛ loai, da pà ḿbɔ, ŋa pâi môi ŋa gáa núui ŋɔi lɛ̂lɛi. Ǹyaŋ ŋa Ɣâla ŋɔtɔ̂ŋ-ŋai lɛ̀ dîa da ŋɔmɛni ŋá teeɛi.”
17Mose m̀ɔ̂lɔ è mò ǹyɛɛi, “M̀ɛnii íkaa gɛ̂i, vé lɛ́lɛ ní. 18Ka ǹûai ka pâi kɔlɔ kpɛɛi kákpîŋ kâa, kpɛ́ni fêi, m̀ɛnii ŋí wiyɛɛ̂i ímɛni ma, ífa pɔ̂ri mu yá tɔnɔ. 19Ŋ̀óo mɛni, ŋa pâi ílîa-woo ƃôi, Ɣâla é kɛ́ íkɔlɛ. Tɔɔ Ɣâla ŋɛ́i-tuɛ ǹûai ḿɛni ma í pá bɔ́ a dímɛni-ŋai. 20Ɣâla ŋɔtɔ̂ŋ-ŋai da ŋɔlia-woo-ŋai lɛ́ ǹûai dîa í berei lɛ́ dîa dí sía la da m̀ɛnii da pɔ̂ri gɛ́i. 21Kpakolo nyii ŋai í laai a diai kúla ǹûai kélee sama, nyii-ŋai da yào Ɣâla ma, dífa yee-pɛlɛ ǹá-sɛŋ soŋ wôya mɛni mai. Dí dítɔɔ núu-kpulu-ŋa láa tuɛ yɛ̂ɛ wála tɔnɔ (1,000), ŋuŋ tɔnɔ (100), buu lɔ́ɔlu da núu puu. 22Tɔɔ ǹúu-tuɛ-ƃelai ŋí díkɛ ǹûai dímɛni-ŋai ƃôi díloai a tãi kélee. Mɛni-ŋai dífa pɔrîi môi, dí pá a dîa ípɔ. Kɛ́lɛ dí mɛni pɛlɛɛ-ŋai ƃó díloai. Bere-sii ŋí tí su, kpîri wiyɛɛ fé pâi ŋɔ́nɔ kɛ̂i íyêei. Kpɛ́ni fêi ka dîa-ni ká káa ziɣei. 23À kɛ̀ ƃà m̀ɛni-ŋai ŋí kɛ̀ nyii-ŋai díkaa a Ɣâla nîa-mɛnii, gɛ̀ ní a pâi wála-wala tɛɛ̂i ípɔ ífe pâi kɔlɔ kpɛ̂ɛ íkpîŋ ma. Ǹyaŋ gɛ̀ ní ǹûai kélee da pâi liî pôlu lii-see su.”
24Mose è ŋ̀óli tɔ̀ɔ mɛni-ŋai kélee ma m̀ɔ̂lɔ è mò mai. È gélee kɛ̀ yɛ̂ɛ berei è mò la mai. 25Mose è ténîŋ ƃô kpakolo-ŋa kùla Eezuɛ-ŋai sáma é dítɔɔ ǹûai mɛi. É dítɔ̀ɔ núu wála tɔnɔ (1,000), ŋuŋ tɔnɔ (100), buu lɔ́ɔlu da núu puu mɛi. 26Ǹúu túɛ-ƃelai ŋí dí kɛ ǹûai loai mɛni ƃôi a tãi kélee. Da kâa pà Mose pɔ́ a m̀ɛni kpanaŋ-ŋai. Kɛ́lɛ dakâa m̀ɛni pɛlɛɛ-ŋai ƃò díkîe-ni loai dîa kpîŋ.
27Nya ƃe Mose è vɛ̀li m̀ɔ̂lɔ mà, m̀ɔ̂lɔ é lene pôlu ƃɔ́ taai.
Currently Selected:
Ɛsedɔ 18: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
