Ɛsedɔ 20
20
Dɔ̂ŋ puui
(Dutɛrɔnome 5:1-21)
1Ɣâla è ŋ̀óo-ŋa ŋí kélee ƃò ǹyɛɛi, 2“Ńyãa ƃa Yâwɛɛ Ɣâla nyii íkùla ǹuɛ-lâai su Ize lɔii sui.
3“Ífe ɣâla da kpɛ́ni fɛ́li é tée ḿbôlu.
4“Ífe ɣâla da kpɛ́ni kpɛ̀tɛ ímɛni ma í móloŋ sɛŋ nyii kélee gáa ŋ̀elei su da sɛŋ nyii kélee gáa ǹɔii ma da nyii kélee gáa ǹyái su ǹɔii sui dîa. 5Ífe pɛ̀lɛ díkɔɔ mu kpaa máŋ í dífɛli. Kpɛ́ni fêi, ńyãai a Yâwɛɛ Íɣâlai, ŋgáa a tólo Ɣala. Ŋa lóŋ-naŋ-ŋa kélee dísɔnyɔ̂ŋ maa tɔ̂ŋ pú dílônii dîa. Ŋa bù dílônii díwɔ-lônii dîa da díwɔ lonii nyii-ŋai da ŋ́gbɔarai. 6Kɛ́lɛ ŋa wála támaa malôŋ káa diai da ŋ́wɛ̂lii dí ŋatɔ̂ŋ-ŋai mɛi káai.
7“Ífe Yâwɛɛ Íɣâla láa toli kpɛ́ni-kpɛni. Kpɛ́ni fêi, ǹúui a ǹáa toli kpɛ́ni-kpɛni, ŋa pâi tɔ̂ŋ kpɛ̂i ma.
8“Vii-tɔɔ-ɣelei é lɛ́ɛ íkili ŋá í mɛi káa a maa waa. 9Ítii-ŋai kélee kɛ́ fólo lɔ́ɔlu mɛi da yée mu. 10Kɛ́lɛ mɛ̀i feerɛ ɣelei káa a fii tɔɔ ɣele Yâwɛɛ Íɣâla mɛni ma. Ífe tíi da kélee kɛ̀ a maa-ɣele tí, ƃía é pɛ́lɛ íloŋ-surɔ̂ŋ mâ da íloŋ-nɛnii, é pɛ́lɛ íyee mu-surɔ̂ŋ ma da íyee mu-nɛnii, da ítaa-tulɛi é pɛ́lɛ ŋɔ̃yai ma gáa ítaai sui. 11Kpɛ́ni fêi, fólo lɔ́ɔlu mɛi da yée mu ƃé Yâwɛɛ è ŋ̀elei kpɛ̀tɛ la da ǹɔii da ǹyái da zɛŋ kélee gáa dísui é víi tɔ́ɔ a mɛi feerɛ ɣelei. Mɛni ƃé Yâwɛɛ è lûwa làa la Vii-tɔɔ-ɣelei mâ é maa wáa.
12“Ƃâa kɛ́ ínâŋ ma da ílee a gɛɛ ífulu-laai su é kôya ǹɔii ma nyii Yâwɛɛ Íɣâla a dɛɛ ípɔi.
13“Ífe núu pàa
14“Ífe wulu-wulu kɛ̀.
15“Ífe ŋúma kɛ̀.
16“Ífe wôya sere-faa kɛ̀ a íbarâŋ-nuu.
17“Ífe íƃarâŋ-nuu ŋɔpɛ́rɛ maa liî tèe. Ífe íƃarâŋ-nuu ŋɔnɛnîi maa liî tèe, é pɛ́lɛ ǹyée ŋá surɔ̂ŋ ma, ǹyée ŋá nɛnîi, ŋɔni-ŋai, da ŋɔsoo-falaŋ é pɛ́lɛ gɔ̃liŋ kélee ma.”
Ǹûai dí yào
(Dutɛrɔnome 5:22-33)
18Tãi ǹûai kélee dí ŋ̀ele-gbânai tíŋ mɛni la, dí ŋ̀ele-gbânai ŋɔmãla-mãlai kâai, dí dúru-wooi mɛ̀ni, dí nurii káa kulâi ǹyéei mai, dí kpɛ̀liŋ a yao dí pú dí lí dítɔɔ kwaa kôya ma. 19Dí mò Mose ma dîyɛɛi, “Lóno kúpɔ, kwa pâi íwoo mɛnii. Kɛ́lɛ Ɣâla à lòno kúpɔ kwa pâi saâi.”
20Nya ƃe Mose è mò ǹûai dîa ǹyɛɛ, “Káfe yào. Ɣâla a pâi nɔ́ a gɛɛ é kásu kɔ̂ɔŋ a gɛɛ ŋɔyao-maai é kɛ́ nɔ́ kákponôi, a gɛɛ káfe sɔnyɔ̂ŋ kɛ̀.” 21Ǹûai dí kɛ̀ tɔɔ̂-ni kwaa kôya ma, Mose è lɛ́ɣɛ a ŋ̀ele-kɔlɔŋ kole su kpiniɛɛ ƃɛ́i Ɣâla è kɛ̀ naai.
Dɔ̂ŋ-ŋai bîlaŋɔɔi ŋ̀âla-teƃelei mai
22Nya ƃe Yâwɛɛ è mò Mose ma a gɛɛ é mó Eezuɛ-ŋai dîa ǹyɛɛi, “Ka gáa kákpîŋ a gɛɛ Ńyãa Yâwɛɛ ŋa kula Ɣâla-taa ŋa lóno kápɔ. 23Káfe sɛŋ da kpɛ́ni kpɛ̀tɛ kámɛni ma a gɛɛ dí kɛ a káɣâla-ŋa ká dí fɛli kwa dia-ni à nɛ̃ɛ ma kpîŋ dí kɛ a kane da gôo. 24Ɣâla-teƃele kpɛ̀tɛ mî a pɔ̂rɔ í kéreŋ sala kúla ŋá da ílii-see salai é pɛ́lɛ íƃala-salai ma da íniŋa-salai. Ƃɛ́i kélee ŋa ǹaa sìɣe a gɛɛ ká ḿvɛli naai. Ŋa pâi pâi naa ŋá lûwa láa kâa. 25À kɛ̀ ƃà ɣâla-teƃele kpɛ̀tɛ ḿî a kɔni, ífe gbɛ̀tɛ a gɔnii nyii núu-kpune è ŋòloi. Kpɛ́ni fêi, ƃà ŋ̀olo a kpɔ́kpɔ, gɛ̀ ní màa fé pâi kɛ̂i a ŋwaa mɛni ma. 26Ífe íkɔɔ tɔɔ̂i kɛ̀ ŋátêbelei mâ a gɛɛ í tɛ́ ma, ífa lâa íkaŋ lɛ́ la ḿâ.”
Currently Selected:
Ɛsedɔ 20: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
