Ɛsedɔ 40

Dí Yâwɛɛ ŋɔsua kɔ̂lɔ seɣe pɛ́rɛi maa waai pù gîe ma dí goraŋ ƃô Yâwɛɛ mî

1Nya ƃe Yâwɛɛ è mò Mose ma ǹyɛɛi, 2“Bɛ́rɛi tɔɔ a ŋáloŋ maa-ŋuŋ ŋɔfóloi maa-ŋuŋ. 3Gbanaŋ-woo kɛ́ɛ maa gãlai nyii gɔni-ƃela-ŋai díkaa zui, zee bɛ́rɛi mu í zeɣei sɛ̂lɛŋ berêi. 4Teƃelei sée mu í ŋá-sãai pú ŋ̀á í pá a laŋpo-see-wurii í dɔɔ mu í laŋpo-ŋai sée ŋ̀á. 5Géreŋ-sɛŋ kúŋ-nɛ̃ɛ kéreŋ-teƃelei sée gbanaŋ-woo kɛ́ɛ maa gãlai ŋɛ́i-tuɛ í bɛ́rɛi lá-seɣei sɛ̂lɛŋ ǹá. 6Géreŋ-sala kula-teƃelei sée bɛ́rɛi ŋɛ́i-tuɛ. 7Í mara sɛŋ-foloi sée bɛ́rɛi da géreŋ-sala kula-teƃelei loai í yá pú zu. 8Góraŋ tínaŋ bɛ́rɛi ma í ǹá-seɣei sɛ̂lɛŋ ǹá.

9“Ƃà gɛ̀ tí í bu-ŋua-wulɔi síɣe í zia bɛ́rɛi ma da mu-sãa kélee. Bere sîi ŋí ƃé ƃa pâi maa waai la í dɛɛ ḿbɔ. 10Ŋ̀úlɔi sía máŋ géreŋ sala kula-teƃelei ma da ŋá-sãai kélee í dɛɛ ḿbɔ. Ǹyaŋ teƃelei a pâi kɛ̂i a maa waa. 11Wúlɔ sía máŋ mara sɛŋ-foloi ma da zee-sɛŋ í dɛɛ ḿbɔ.

12“Pá a Eelɔŋ da ǹônii-sinaai í dítɔɔ Bɛ́rɛi lá í díwaa. 13Zâla-laa soŋ-tii kɛ́-seɣei tóo Eelɔŋ ma í wúlɔ pú ŋ̀ûa í zee a gɛɛ é sâla-laa soŋ-tii kɛ́ mî. 14Pá a ǹônii-sinaai máŋ í dímaa ɣíri. 15Í wúlɔ pú díŋûa yɛ̂ɛ berei í bù la dínâŋ ŋûa a gɛɛ dí sâla-laa soŋ-tii kɛ́ mî. Ŋ̀úlɔ púɔɔ díŋûa a pâi dísuui kɛ̂i a sâla laa soŋ-tii kɛ́-ƃela wɔlɔ-wɔlɔ da wɔlɔ-wɔlɔ.”

16Mose è m̀ɛnii-ŋai ŋí kélee kɛ̀ yɛ̂ɛ berei Yâwɛɛ è mò la mai. 17Nya ƃe dí bɛ́rɛi tɔɔ a góraŋ veerɛi ŋɔɣáloŋ maa-ŋuŋ ŋɔfóloi maa-ŋuŋ tãi dí kula la Ize lɔii sui. 18Mose è bɛ́rɛi tɔɔ. È bîleki-ŋai sèe é bɛ́rɛ-pilaŋ-wuru-ŋai pîlaŋ zu é zu ɣiri a ŋ̀úru kôya-ŋai é zeɣei-soŋ-wûru-ŋai tɔ́ɔ. 19È bɛ́rɛi mɛi pɛlɛ-sɛŋ pɛ̀lɛ mɛi é mɛi-pɛlɛ-sɛŋ mɛi pɛ́lɛ yɛ̂ɛ berei Yâwɛɛ è mò la mai. 20Nya ƃe è gɔni-ƃela feerɛi sìɣe é dípu gbanaŋ-woo-kɛɛi maa gãlai su é gãlai siɣe-wuru-ŋai lɔ́ gólo-ŋai su é gãlai mɛi-pɛlɛ-sɛŋ pɛ́lɛ mɛi. 21È pà a gãlai Bɛ́rɛi mu é zeɣei sɛ̂lɛŋ berêi. È gãlai lòo bere sii ŋí su ǹûai dîa yɛ̂ɛ berei Yâwɛɛ è mò la diai.

22È teƃelei sèe Bɛ́rɛi mu nàa ŋûa-pere zeɣei túɛ-pere. 23É gbóloi sée ŋ̀á nyii dí dɛ̀ɛ Ɣâla pɔ́i. È gɛ̀ yɛ̂ɛ berei Yâwɛɛ è mò la mai. 24È laŋpo-see-wurii tɔ̀ɔ Bɛ́rɛi mu nàa kwára-pere teƃelei téniŋ ma. 25Nàa ƃé è laŋpoi tɔ̀ɔ naa Yâwɛɛ ŋɛ́i-tuɛ yɛ̂ɛ berei è mò la mai. 26È géreŋ sala-kula teƃelei sèe Bɛ́rɛi mu zeɣei túɛ-pere. 27É géreŋ sala-sɛŋ kúŋ nɛ̃ɛ kéreŋ ŋ̀á nɔ́ yɛ̂ɛ Yâwɛɛ è mò la mai. 28Nya ƃe è Bɛ́rɛi lá-seɣei sɛ̀lɛŋ ǹá. 29È géreŋ sala kula teƃelei sèe Bɛ́rɛi lá é kéreŋ sala kula ŋ̀á da mii-sɛŋ salai yɛ̂ɛ berei Yâwɛɛ è mò la mai. 30È mara sɛŋ-foloi sèe Bɛ́rɛi da géreŋ sala kula-teƃelei loai é yá pú zu. 31Mose da Eelɔŋ é pɛ́lɛ Eelɔŋ ǹônii-sinaai dîa dí díyee ma da díkɔɔ ma wàa zu. 32Tãi nɔ́ kélee da kâa lì la Bɛ́rɛi mu kpaa máŋ géreŋ-sala kula ɣâla-teƃelei mai, da kâa díwâa, yɛ̂ɛ berei Yâwɛɛ è mò la Mose mai. 33Nya ƃe Mose è góraŋ tìnaŋ Bɛ́rɛi ma da géreŋ sala kula ɣâla-teƃelei é ǹá-seɣei sɛ̂lɛŋ naa. Ŋɔtíi kpɛɛ ŋá ká kɛ̀ tí.

Ŋ̀ele-kɔlɔŋ kolei è yèŋ Bɛ́rɛi mɛi

(Nɔŋba 9:15-23)

34Ŋ̀ele-kɔlɔŋ kolei è Bɛ́rɛi mɛi pɛ̀lɛ. Ǹyaŋ Yâwɛɛ ŋɔfólo-laai è bɛ́rɛi láa fɛ̀ɛ. 35Pere fé kɛ́ ní naa a gɛɛ Mose é lɔ́ Bɛ́rɛi mu. Kpɛ́ni fêi, ŋ̀ele-kɔlɔŋ kolei è kɛ̀ nɔ́ Bɛ́rɛi ma da Yâwɛɛ ŋɔfólo-laai. 36Eezuɛ-ŋai kɛ́ɛ dísiai sui, tãi nɔ́ kélee ŋ̀ele-kɔlɔŋ kolei a kâa kùla la Bɛ́rɛi mɛi, da kâa lì. 37Kɛ́lɛ à kɛ̀ nɔ́ ŋ̀ele-kɔlɔŋ kolei à kɛ̀ niî Bɛ́rɛi mɛi, dífa kâa kùla maa kwaai tí ma. 38Ziai kélee Eezuɛ-ŋai dí kɛ́ gɛ̂i, Yâwɛɛ è kɛ̀ nɔ́ ŋ̀ele-kɔlɔŋ kolei su Bɛ́rɛi mɛi a ŋ̀ele-ƃɔɔ kélee, ŋɔŋ kɛ́ ƃò ŋ̀ele-kɔlɔŋ kolei su a gbínii kélee.

Currently Selected:

Ɛsedɔ 40: KWB

Highlight

Compare

Copy