Ɛsedɔ 8

Ǹofo-ŋai

1Yâwɛɛ è mò Mose mà ǹyɛɛi, “Lí Gâloŋ pɔ́ naa yɛ̂ɛ ma Yâwɛɛ ǹyɛɛ, ‘Ŋánûai lɛ́ɛ naa dí lí a gɛɛ dí ḿvɛli. 2Kɛ́lɛ ƃà wàla dílɛɛ naa dí lí, gɛ̀ ní ŋa pâi lofo-ŋa tɛɛ̂i dí ílɔii gwaa kélee síɣe. 3Da pâi Ǹâai Yai su fɛ̂ɛi, nyii-ŋai pâi kulâi naa dí pá ípɛrɛi mu dí lɔ́ ílôŋpoi su. Dí tɛ́ ígbìŋ ŋá. Dí lɔ́ ítii-kɛ-ƃelai dípɛrɛ-ŋai mu da ínûai. Dí lɔ́ íleɣi-ɣíli-kere-ŋai mu. Dí lɔ́ íkpolo-kpɛtɛ sɛŋ-folo-ŋai su. 4Ǹofo-ŋai da pâi máŋ tɛ̂i a íkpono. Dí tɛ́ a ínûai kpono da ítii-kɛ-ƃelai.’ ”

5Nya ƃe Yâwɛɛ è mò Mose ma ǹyɛɛi, “M̀ó Eelɔŋ ma a gɛɛ é ŋɔsia wurii sãa ǹyái mɛi, ǹya-loa-ŋai da bóa-ŋai, a gɛɛ lofo-ŋa dí Ize lɔii láa fɛ́ɛ.” 6Nya ƃe Eelɔŋ è ǹyée sãa a ŋɔsia wûrii Ize ya-ŋai kélee mɛi. Ǹyaŋ ǹofo-ŋai dí kùla dí Ize lɔii láa fɛ́ɛ. 7Kɛ́lɛ ŋɔpóniŋ kɛ́-ƃelai dí mɛni sii tɔnɔi tí kɛ̀. Dí gɛ́ lofo-ŋa dí pá Ize lɔii su.

8Nya ƃe Gâloŋ è Mose tòli da Eelɔŋ ǹyɛɛ diai, “Ka Yâwɛɛ fɛ́li a gɛɛ é ǹofo-ŋai kúla mâ kwa ŋánûai. Ŋa pâi ŋɔnûai lɛɛ̂i naa dí lí a gɛɛ dí sâla kula mâ.”

9Mose è mò Gâloŋ mâ ǹyɛɛi, “Ílii láa yâ í tãi lɛ́ mâ ŋa pâi Ɣâla fɛlîi la ímɛni ma ka ínûai da ítii-kɛ-ƃelai a gɛɛ ǹofo-ŋai dí kúla kâa, dí kúla kápɛrɛ-ŋai mu dí lɛ́ɛ nɔ́ Ǹâai Yai sui.”

10Gâloŋ ǹyɛɛ mai, “Tínaa.”

Mose ǹyɛɛ mai, “A pâi kɛ̂i nɔ́ yɛ̂ɛ berei í mò lai, a gɛɛ í gɔ́lɔŋ a gɛɛ Ɣâla da kpɛ́ni fé naa yɛ̂ɛ Yâwɛɛ Kúɣâlai. 11Ǹofo-ŋai da pâi liî dí kúla ípɛrɛ-ŋai mu, ítii-kɛ-ƃelai dípɛrɛ-ŋai mu dí kúla ímɛi káa-ƃelai dípɛrɛ-ŋai mu dí lɛ́ɛ nɔ́ Ǹâai Yai su.” 12Nya ƃe Mose da Eelɔŋ dí kùla Gâloŋ pɔ́ naa dí lí. Mose è Yâwɛɛ fɛ̀li a gbanaŋɔɔ ǹofo-ŋai mɛni ma nyii-ŋai è bili Gâloŋ mai. 13Yâwɛɛ è ŋ̀óli tɔ̀ɔ Mose wóo ma. Nòfo-ŋai dí sàa bɛ́rɛ-ŋai mu da góraŋ-ŋai su é pɛlɛ gbâlaŋ-ŋai ŋá. 14Ize-ŋai dí ǹofo-pomai ŋá tɛ̀ gîe ma a gbulu-ŋa. Ǹɔii gwaa kélee kúŋ è nyɔ̀ŋ a dílula kuŋ. 15Kɛ́lɛ tãi Gâloŋ è gàa la a gɛɛ a pere loŋ sɔlɔ ƃôi, è ǹíi su kpànaŋ ŋɔ́nɔ. Vé ŋ̀óli tɔ̀ɔ ní ŋɔ́nɔ Mose da Eelɔŋ díwoo ma, yɛ̂ɛ berei nɔ́ Yâwɛɛ è mò lai.

M̀isi-ŋai

16Nya ƃe Yâwɛɛ è mò Mose mà ǹyɛɛi, “M̀ó Eelɔŋ ma a gɛɛ é ŋɔsia-wurii lókwa ǹɔii ma a gɛɛ misi támaa dí kúla bɔ̂rɔi su dí Ize lɔii gwaa kélee láa fɛ́ɛ.” 17Dí gɛ̀ tí. Eelɔŋ è ŋɔsia-wurii sìɣe é ǹókwa ǹɔii ma. Bɔ̂rɔi è pène a misi Ize lɔii gwaa kélee dí ǹɔii láa fɛ́ɛ. Dí fũa-fũa tɔ́ɔ nuu-kpune da fɛnɛ-sãa dîa. 18Gâloŋ ŋɔpóniŋ kɛ́-ƃelai dí kɔ̀ a gbanaŋɔɔ a gɛɛ dí mɛni-sîi tɔnɔi tí kɛ́, kɛ́lɛ dífe pɔ̂ri ní. M̀isi-ŋai dí kɛ̀ nuu-kpune ma da fɛnɛ-sãa-ŋa. 19Nya ƃe Gâloŋ ŋɔpóniŋ kɛ́-ƃelai dí mò mà dîyɛɛi, “Ɣâla kɛ́-mɛni ká ŋí.” Kɛ́lɛ Gâloŋ líi su è kɛ̀ a gbanaŋɔɔ. Vé ŋ̀oli tɔ̀ɔ ni Mose da Eelɔŋ dîa yɛ̂ɛ berei nɔ́ Yâwɛɛ è mò lai.

Ǹilî-ŋai

20Nya ƃe Yâwɛɛ è mò Mose mà ǹyɛɛi, “Ímu síɣe a ɣele-wâla pɛpɛ í lí Gâloŋ pɔ́ naa í maa kpɛŋ ǹyai lá. Tãi à kɛ̀ liî la ǹyái lái í m̀ó mà yɛ̂ɛi, Yâwɛɛ ǹyɛɛi, ‘Ŋánûai lɛ́ɛ naa dí lí a gɛɛ dí ḿvɛli. 21Ƃà wàla ŋánûai lɛ́ɛ naa dí lí, gɛ̀ ní ŋa pâi lilî tɛɛ̂i ímɛi, ka ítii-kɛ-ƃelai é pɛ́lɛ ínûai dîa. Ípɛrɛ-ŋai da Ize-ŋai dípɛrɛ-ŋai kélee láa a pâi fɛ̂ɛi a lilî dí ǹɔii mâ kélee síɣe máŋ ƃɛ́i bɛ́rɛ-ŋai díkaa naai. 22Kɛ́lɛ maa-ɣelei tí Gosɛŋ lɔii nyii ŋánûai díkaa zui, ŋa pâi mà a gɛɛ ǹilî-ŋai da fé lì naa, a gɛɛ í gɔ́lɔŋ ŋgáa a Yâwɛɛ ǹɔii ŋí su. 23Ŋa pâi ŋánûai loai lâai. Ŋ̀ɛi-kɛ-maai ŋí a pâi kɛ̂i tínaa.’ ” 24Ǹyaŋ Yâwɛɛ è gɛ̀ tí. Lilî kpɔŋ è pà Gâloŋ ŋɔpɛ́rɛi mu da ŋɔtii-kɛ-ƃelai dípɛrɛ-ŋai é pɛ́lɛ Ize lɔii su gwaa kélee ma. Ize lɔii láa è fɛ̀ɛ a lilî.

25Nya ƃe Gâloŋ è Mose da Eelɔŋ dîa ǹyɛɛi, “Ka lí ká sâla kula ká Ɣâlai mâ ǹɔii ŋí su.”

26Kɛ́lɛ Mose è mò ǹyɛɛ, “Vé pâi kɛ̂i a ǹɛ́lɛɛ a gɛɛ kú gɛ́ tí. Kpɛ́ni fêi, Ize-ŋai líi a pâi ŋwânai daa-tulɛ ŋai mɛni mâ kwa pâi sâla kulâi la Yâwɛɛ Kúɣâla mai. À kɛ̀ kwa sâla kùla Yâwɛɛ ma a taa-tulɛ nyii ŋa Ize-ŋai dífe ŋ̀wɛli, da pâi kúsɔɔ̂i a kɔni. 27Fɛ̂ɛ nɔ́ kú ɣele kûu saaƃa sia kɛ́ vɛ̃ɛ-kpâlaŋ su a gɛɛ kú sâla kula Yâwɛɛ Kúɣâla mâ yɛ̂ɛ berei è mò la kûai.”

28Nya ƃe Gâloŋ è mò ǹyɛɛ, “Ŋ̀a pâi nɛɛ̂i naa ka lí a gɛɛ ka sâla kula Yâwɛɛ Káɣâla mâ vɛ̃ɛ-kpâlaŋ su. Kɛ́lɛ káfe lì kwaa kôya ma. Kàli, káɣâla fɛli mɛ̂ni ma.”

29Mose è mò mà ǹyɛɛi, “Ŋà kùla ƃɛ́ ŋa pâi Yâwɛɛ fɛlîi a gɛɛ ǹilî-ŋai dí tínaa kula ípôlu da ítii-kɛ-ƃelai é pɛ́lɛ ǹûai dîa. Kɛ́lɛ ífe ŋɔ́nɔ kúpɛ̀lɛ. Ǹɛɛ naa a gɛɛ kúli kú sâla kúla Yâwɛɛ ma.”

30Nya ƃe Mose è kùla Gâloŋ pɔ́ naa é lí é Yâwɛɛ fɛ́li. 31Yâwɛɛ è ŋ̀óli tɔ̀ɔ Mose wóo mà, é ǹilî-ŋai kúla Gâloŋ pôlu da ŋɔtii-kɛ-ƃelai é pɛ́lɛ ŋɔnûai dîa. Dɔnɔ kpîŋ fé lɛ̀ɛ ní naa. 32Kɛ́lɛ Gâloŋ è ǹíi su kpànaŋ máŋ tãi ŋí su. Vé ǹûai lɛ̀ɛ ní naa dí lí.

Currently Selected:

Ɛsedɔ 8: KWB

Highlight

Compare

Copy